ABŞ turizm vizası üçün necə müraciət etmək olar?

Bura xəyallar diyarıdır. Qlobal media və film sənayesi sayəsində hər kəsin tanıdığı və istədiyi kimi ola biləcəyi bir yer. Bəli, ABŞ haqqında danışıram və bu məqalədə ABŞ turizm vizası üçün necə müraciət etməniz lazım olduğunu anlamağa kömək edəcək bütün əsas məlumatları tapa bilərsiniz. Bu bloq sizə “vəd edilmiş torpaqların” qapılarını açacaq diplomatik rəsmiliyin təşkili üçün xəritədir.

Bu qüdrətli fürsətlər ölkəsinin geniş yayılmış görüntüsü sayəsində hər il milyonlarla insan ABŞ-ı ziyarət etməyə çalışır. Kimisi Böyük Kanyonu görmək istəyir, kimisi də Las-Veqasda toy etmək istəyir. Digərləri Böyük Almanın canlılığını yaşamaq və ya oraya köçmək şanslarını dəyərləndirmək istəyirlər. Təsəvvür edin, sadaladıqlarımız bu geniş ölkəni ziyarət edərkən edə biləcəyiniz ən bəsit şeylərdir.

İndi isə keçək əsas məsələyə və "ABŞ-da turizm vizası ilə nə qədər qala bilərəm?" kimi suallara cavab verək, həmçinin Amerika Birləşmiş Ştatları turist vizası tələbləri və prosedurları barədə məlumat alaq. ABŞ turizm vizasının rüsumu və proses müddəti kimi praktik məlumatlarlara da toxunacayıq ki, səyahətinizdən öncə bütün internetdə məlumat axtarmaq məcburiyyətində qalmayasınız.

ABŞ turizm vizası nədir?

Amerika Birləşmiş Ştatlarının viza siyasətinə görə tətil, ailə və dostları ziyarət və ya müalicəyə yönəlmiş qısa məqsədli səfərlər turizmdir. Bunlar ABŞ-a turist və ya B-2 ziyarətçi vizası adlanan viza növünü almağı tələb edəcək əsas səbəblərdir. ABŞ-da turizm vizası ilə nə qədər qala bilərəm? Böyük ehtimalla 6 ay, lakin bəzən fərqli də ola bilər, odur ki situasiyanıza uyğun olaraq səfirlikdən dəqiq məlumat alın.

B-2 vizasının ABŞ-a girməyinizə zəmanət olmadığını vurğulamaq çox vacibdir. Viza səfirlikdəki vəzifəli şəxslərin sənədlərinizi yoxladığı və giriş hüququna sahib olduğunuzun sübutudur. Ancaq son qərarı sərhəd zabiti verəcək.

Nəzərə alın ki, bu viza heç bir halda sizə hər hansı bir ödənişli fəaliyyət göstərməyə icazə vermir. Səfər zamanı səyahətinizin məqsədi dəyişərsə, qeyri-immiqrant statusunu dəyişdirdiyinizdən əmin olun.

ABŞ turizm vizası almaq kimə lazımdır?

Əksər səyahətçilərin ABŞ-a daxil olmaq üçün viza almaları tələb olunur. ABŞ Viza İmtina Proqramına daxil olan ölkələrin vətəndaşları ABŞ-da 90 günədək qalmaq üçün Elektron İcazə Sisteminə (ESTA) müraciət etməlidirlər. Bu sorğunun ortalama baxılma müddəti təxminən 25 dəqiqədir və müraciət təsdiqlənərsə 14 ABŞ dollarına başa gəlir. ABŞ Səyahət İcazəsi üçün Elektron Sistemə baş vurmaq hüququna malik ölkələrin siyahısı:

Andorra, Danimarka, İslandiya, Litva, Portuqaliya, İsveçrə, Avstraliya, Estoniya, İrlandiya, Lüksemburq, San Marino, Tayvan, Avstriya, Finlandiya, İtaliya, Malta, Sinqapur, Birləşmiş Krallıq, Belçika, Fransa, Yaponiya, Monako, Slovakiya, Bruney, Almaniya, Cənubi Koreya, Hollandiya, Sloveniya, Şili, Yunanıstan, Latviya, Yeni Zelandiya, İspaniya, Çex Respublikası, Macarıstan, Lixtenşteyn, Norveç, İsveç.

Kanada və Bermuda vətəndaşlarının isə turizm məqsədli səfərlər üçün vizaya ehtiyacı yoxdur.

ABŞ turizm vizası üçün necə müraciət etmək olar?

Proses olduqca sadədir, lakin müraciət etdiyiniz diplomatik nümayəndəliyə görə fərqli bir ardıcıllıq ola bilər. Ümumi prosedur göstərilən kimi olmalıdır. Əvvəlcə onlayn DS-160 formunu doldurursunuz və müsahibəyə gətirmək üçün təsdiq səhifəsini çap edirsiniz. Daha sonra təlimatlara uyğun şəklinizi sistemə yükləməli və müsahibə günü təyin etməlisiniz. Bu görüşlər üçün gözləmə müddəti mövsümə, səyahət məqsədinizə və ya bir çox başqa səbəbə görə dəyişə bilər.

Müsahibəyə getməzdən əvvəl ediləcək növbəti addım ABŞ turist vizası rüsumunu ödəmək və özünüzlə gətirmək üçün lazım olan bütün sənədləri toplamaqdır. Amerika Birləşmiş Ştatları turist vizası tələbləri haqqında daha çoxunu növbəti bəndlərdə oxuya bilərsiniz. ABŞ turist və ziyarətçi vizası müraciətinə baxılma müddəti 3-10 gündür.

ABŞ turizm vizası üçün tələblər nədir?

Əslində tələb olunan sənədlərin siyahısı qısa və sadədir. Ən əsası ABŞ-dan çıxdıqdan sonra 6 aya qədər qüvvədə olacaq pasporta ehtiyacınız olacaq. Özünüzlə aparmaq üçün iki təsdiq sənədinə ehtiyacınız olacaq: DS-160 formunun çap olunmuş təsdiq səhifəsi və viza haqqının ödənilməsinə dair sübut. Əgər şəklinizin yüklənməsi uğursuz olarsa, görüşə gəldiyiniz zaman pasport tipli rəngli şəkil təqdim etməlisiniz.

Mütləq şəkildə tələb edilən sənədlər bunlardır. Ancaq bəzi hallarda ABŞ səfirlik və konsulluqlarında sizdən əlavə məlumatlar da istənə bilər. Bu sənədlərdən bəziləri səfərinizin məqsədinin, səfərinizdən sonra ABŞ-ı tərk etmək niyyətinin, səfəriniz zamanı bütün xərcləri ödəmə qabiliyyətinin və başqa şeylərin sübutu ola bilər. İndi isə müraciət müddətindəki ən qorxu dolu mərhələdən danışaq.

ABŞ turizm vizası ilə bağlı müsahibə sualları

Müsahibə sualları ilə bağlı ətraflı məlumat verməzdən əvvəl ABŞ turizm vizası ilə bağlı müsahibə sualları haqqında qısa bir məlumat verim. Unutmayın ki, rəsmilərin məqsədi dediyiniz səbəblərə görə səyahət etdiyinizə və sonda vətəninizə qayıdacağınıza əmin olmaqdır. Qorxmağa dəyməz - əgər yalnız turizm məqsədi ilə səyahət edirsinizsə və həqiqəti deyirsinizsə, müsahibədən əvvəl xüsusilə hazırlaşmağa ehtiyac yoxdur. Başqa bir təklif budur - işinizi asanlaşdırmaq üçün sadəcə sualları cavablandırın və detallara girməyin. Bu sizi lazım olandan daha çox danışmaqdan xilas edəcək və müsahibə mərhələnizi asanlaşdıracaq. Bəs ala biləcəyiniz suallar hansılardır?

Bu aşağıda qeyd edilənlərdən hər hansı biri ilə bağlı ola bilər:

• səyahətinizin məqsədi (Məsələn: ABŞ-da bir dostunuz və ya qohumunuz var? Səyahətiniz üçün bronunuz var? Niyə məhz bu vaxt səyahət edirsiniz?)

• maliyyə vəziyyətiniz (Məsələn: Səyahət xərclərinizi necə ödəyəcəksiniz? Nə qədər pul qazanırsınız?)

• ölkənizə geri qayıtmaq üçün səbəblər (Məsələn: Evlisiniz? ABŞ-da qalmaq niyyətiniz var?)

ABŞ turist vizası rüsumu nə qədərdir?

ABŞ turist (B-2) vizası rüsumu bütün millətlər üçün 160 ABŞ dollarıdır. Ola bilər ki, bəzi hallarda bu rüsumu ödəmənizə ehtiyac qalmaz, ancaq ABŞ-a səyahət etmək istəsəniz bu məbləği ödəməyə hazır olun. Ödəniş geri qaytarılmır və müsahibədən əvvəl onlayn olaraq ödənilməlidir.

Gəlin tanış olduğumuz məlumatları ümumiləşdirək. Bəli, ABŞ turist vizasını almaq üçün gediləcək yol dəhşətli görünə bilər. Ən sonda neqativ cavab alındığı təqdirdə isə ən gözəl səyahət yerlərindən birinə səyahət etmək şansı itirilir. Ancaq yanaşma tərzim həmişə sadədir - edə biləcəyiniz ən yaxşı şey güclü bir şəkildə hazırlanmaq və məqam gələndə hərəkətə keçməkdir. Ümid edirəm ki, bu məqalə sizə bu məsələdə kömək olacaq. Xəyallar ölkəsini ziyarət etmək üçün səbəblərinizin nə olduğunu bilmirəm, amma ABŞ turist vizası üçün müraciət prosesində sizə ürəkdən uğurlar və sürətli nəticələr diləyirəm!

* Xahiş edirəm nəzərə alın ki, COVİD-19 səbəbilə dünya miqyasında turizm və səyahət sənayesində məhdudiyyətlər mövcuddur. Bəzi ölkələr sərhədlərinə girişləri dayandırıb və vəziyyət gündən-günə dəyişə bilir. Bütün bunlar viza prosedurlarına da çox təsir edir və ABŞ da istisna deyil. Hər hansı bir bron və ya rezervasiya üçün pul ödəməzdən əvvəl təyinat yerinin həm səyahət, həm də yerli həyat üçün mövcud olan məhdudiyyətlərini nəzərdən keçirmək lazımdır. Alternativ olaraq, ilkin planın istənməyən bir dəyişiklik nəticəsində pozulacağı təqdirdə sizə geri ödəmə və ya tarix dəyişikliyi təklif edəcək bronlar əldə edin. Əlavə araşdırma və diqqətli planlama bu dövrdə çox köməyinizə çatacaq!