Antverpendə 12 İnstaqramlıq yer

Bu gün Benilüks Birliyinin üzvü olan Belçikanın Antverpen şəhərini ziyarət edirik. Ancaq əvvəlcə Belçika ilə yaxından tanış olaq. Bu ölkə Qərbi Avropada yerləşir və İntibah memarlığı və köhnə şəhərləri ilə çox məşhurdur. Belçika şimal-qərbdə Atlantik okeanı, qərbdə və cənubda Fransa, şərqdə Almaniya, cənub-şərqdə Lüksemburq və şimal-şərqdə Hollandiya ilə həmsərhəddir. Belçika NATO və Avropa Birliyinin qərargahına da ev sahibliyi edir. Ümumi sahəsi 30,689 kvadrat kilometr olan ölkənin əhalisi təxminən 11,4 milyon nəfərdir. Belçikanın üç rəsmi dili - fransızca, Niderland dili və almanca, olduğundan dil fərqlərinə görə ölkə üç bölgəyə ayrılır. Bu bölgələr fransızca danışan Valloniya bölgəsi, Niderland dilinin rəsmi dil olduğu Flandriya bölgəsi və çox dilli Brüssel-paytaxt bölgəsidir.

Antverpen haradadır? Bu şəhər Flandriya bölgəsində, Şelda çayı sahilində yerləşən liman şəhəridir. Antverpendə nə etməli? Bu gözəl şəhərdə ediləcək çox şey var və ağla gələn ilk şey, ecazkar memarlıqdan və tarixi binalardan zövq almaq üçün küçələrdə gəzməkdir. Şəhər instaqramlıq yerlər ilə doludur. Belçikaya səyahət edərkən ən çox bəyənilən İnstaqram postunuzu Antverpendə kameraya alacaqsınız. Aşağıda Antverpendəki 12 instaqramlıq yerdən bəhs edəcəm.

1. Het Zuid

Het Zuid turistik attraksionlarla dolu inanılmaz bir yerdir. Yerli insanları, həmçinin ziyarətçiləri heyrətləndirməkdən heç vaxt çəkinmir. Şəhərlərin sıx aurasından qurtulmaq və möhtəşəm malikanələrin, gözəl geniş meydanların və bulvarların gözəl mənzərəsindən zövq almaq üçün idealdır. Distrikdə bir çox sənət qalereyası və muzey də var. Məşhur olanlardan “FOMU Antwerpen”, “Museum of Contemporary Art (M HKA)”, “Galerie Van Campen & Rochtus” və s. qeyd edə bilərik. Bölgə həmçinin gecə vaxtı yaxşı yemək və içkilərdən zövq almağa imkan verən restoran və kafelərə ev sahibliyi edir.

2. Tarixi Mərkəz

Ən çox bəyənilən İnstaqram postlarınızdan bəziləri Antverpenin tarixi mərkəzindən olacaq. Dar küçələrdəki binaların gözəl memarlığına heyran qalacaqsınız. Tarixi mərkəzdə YUNESKO-nun Ümumdünya irsi kateqoriyasına aid olan tək muzeyi, yəni Plantin-Moretus muzeyini tapacaqsınız. Əsas instaqramlıq yerlərə Grote Markt (şəhər meydanı), Cathedral of Our Lady, Stadhuis (Bələdiyyə Salonu), Brabofontein, Het Steen və s. daxildir. Bölgə eyni zamanda tarixi mərkəzi araşdırdıqdan sonra gecənizi əyləncəli bir şəkildə keçirə biləcəyiniz restoran və orijinal pablara ev sahibliyi edir. Antverpenin ən qədim tavernası olan Quinten Matsijs-də Westmalle pivəsini dadmağı unutmayın.

3. Nottebohmzaal

Kitabları sevirsinizsə, Nottebohmzaalı ziyarət şansını əldən qaçırmayın. Kitabxana şəhərin ən gözəl binalarından birində yerləşir. Bu kitabxananın görünüşü nağıla bənzəyir. Dəhşətli dərəcədə gözəl olan daxili dizayn bu yeri unudulmaz edir. Saatlarla köhnə rəflərə və memarlığa baxmaqdan zövq ala bilərsiniz. Bura kitab sevərlərin Antverpendə ziyarət edə biləcəyi əsas instaqramlıq yerlərdən biridir. Yeri yalnız sərgilər və mühazirələr zamanı ziyarət etmək olar, yəni ildə yalnız bir neçə dəfə. Nottebohmzaal “Heritage Library Hendrik Conscience”-nin bir hissəsidir. Digər ictimai kitabxanalardan fərqli olaraq, buradan kitab götürə bilməzsiniz.

4. Beş Qitənin Evi

Antverpendə nə etməli? Əlbəttə ki, memarlıqdan zövq almalı! Antverpendə vurğulamaq istədiyim digər arxitektura möcüzəsi Beş Qitənin Evidir (House of the Five Continents). Çox təəccüblü bir şəkildə tikilmişdir: binadan ağ qayıq çıxır! Zərif dizaynına görə bəziləri onu ən instaqramlıq bina kimi qəbul edir. Schilderstraat və Plaatsnijdersstraat küçəsinin küncündə, şəhər mərkəzinə təxminən on dəqiqəlik piyada məsafədə yerləşir. Bu qeyri-adi yer Frans Smet-Verhas tərəfindən dizayn edilmiş və 1901-ci ildə əsl "Art Nouveau" üslubuna uyğun olaraq tikilmişdir.

5. Aan de Stroom Muzeyi

Antverpen haradadır? Gözəl binaların, muzeylərin və zalların olduğu yerdə. Şəhərdəki ən yaxşı muzeylərə nümunələrdən biri Aan de Stroom muzeyidir (MAS). Muzey Antverpendəki əsas instaqramlıq yerlərdən biridir. Muzey binası fərqli memarlığa, şəhərin gözəl mənzərəsinə və içəridə görməli daha bir çox şeyə sahibdir. Hər il yarım milyondan çox turist bu maraqlı bina və muzeyi ziyarət edir. Daimi və müvəqqəti kolleksiyalarda 500.000-dən çox əsər tapacaqsınız. Üst mərtəbələrə, onuncu mərtəbəyə çıxanda şəhərin 360 dərəcəlik panorama mənzərəsini seyr etmək sevincini yaşayacaqsınız.

6. Den Bell Qülləsi

Belçikaya səyahət zamanı, Antverpen gözəl binalardan zövq almaq üçün gediləcək yerdir. Şəhərin bir başqa memarlıq şedevri Den Bell qülləsidir. Bu qüllə 1958-ci ildə telefon şirkəti üçün inşa edilmişdir. Ancaq bu gün 12 mərtəbəli qüllə binası şəhər rəhbərliyinə ev sahibliyi edir. Binanın xarici görünüşü heyrətamizdir, lakin insanların əksəriyyəti əyri pilləkənləri səbəbindən binanın içərisinə heyran qalır.

7. Zurenborg

Bir çox insan Brüsselə, onun "Art Nouveau" memarlığının möhtəşəm nümunələrini təqdim etdiyini bildiyi üçün səyahət edir. Ancaq Antverpen də bu baxımdan Brüsseldən heç geri qalmır. Antverpendə gözəl "Art Nouveau" arxitekturasına sahib olan ən instaqramlıq yerlərdən biri Zurenborgdur. Bəlkə də bura şəhərin ən gözəl məhəlləsidir. "Belle Epoque" əzəməti və cazibədar memarlığı ilə öyünən Zurenborg Antverpenin şərq ucunda yerləşir. Bölgədə ləzzətli bir içki içmək üçün əla pablar da var.

8. Antverpen Mərkəzi Stansiyası

"Middenstatie" və ya "Spoorwegkathedraal" olaraq da bilinən Antverpen Mərkəzi Stansiyası dünyanın ən gözəl qatar stansiyalarından biri sayılır. 1895-1905-ci illər arasında inşa edilmişdir. Struktru üst hissədən polad platforma ilə örtülməsi baxımından əksər stansiyalardan fərqlənir. Bu yaxınlarda, 2007-ci ildə stansiya altına bir tunel də əlavə edilərək təmir edildi. 2009-cu ilin fevralında Antverpen Mərkəzi Stansiyası Newsweek tərəfindən Yer üzündəki dördüncü ən gözəl qatar stansiyası olaraq seçildi.

9. Vlaeykensgang

Antverpendəki ən möhtəşəm instaqramlıq yerlərdən biri gizli Vlaeykensgang xiyabanıdır. Bu gizli xiyaban 1591-ci ilə aiddir. Bu gözəl yer Hoogstraat və Pelgrimstraat & Oude Koornmarkt-ı bir-birinə bağlayır. Oude Koornmarkt 16-dakı qapıdan keçsəniz, orta əsrlərə düşmüş kimi hiss edəcəksiniz. Xiyabanda əvvəllər kasıb insanlar, xüsusən ayaqqabı ustaları yaşayırdı. Onlar kafedralın zənginin çalmasından da cavabdeh idilər. Günümüzdə bu yer antik mağazaları, qalereyaları və Sir Anthony Van Dijck restoranı ilə məşhurdur.

10. Sint-Andries Distrikti

Bu distrikt əvvəllər “İstirab məhəlləsi” kimi tanınırdı. Lakin bu gün şəhərin önəçıxan yerlərindən biridir. Sint-Andries distrikti əla kafelərə, barlara, antik mağazalara və s. sahibdir. Bölgədə ən çox şəkil çəkdirilən yerlərdən biri eyni adlı kilsədir. Bu arxitektura möcüzəsi 16-cı əsrdə inşa edilmişdir. Taxta eskalator vasitəsi ilə St Anna tunelini (Alt Keçid) də ziyarət edə bilərsiniz. Tunel Şelda çayından sol sahilə keçmək istəyənlərə kömək edir. Distrikt alış-veriş etmək üçün də uyğun bir yerdir.

11. Teatr Distrikti

Bəli, təxmin etdiyiniz kimi, distrikt adını ərazidəki çoxsaylı teatrlardan götürüb. Distrikt bir çox aktyor/aktrisanın, rejissorun, musiqiçinin və s. evidir. Ərazini kəşfə səhər vaxtı çıxmanız tövsiyə olunur, çünki bu zaman çoxlu moda mağazası, antik dükanlar və s. görmək şansı əldə edəcəksiniz. Teatr distrikdə gəzməli olduğunuz ecazkar yerlər: Botanika bağı, Mayer van den Bergh muzeyi və "Maiden’s House Museum".

12. Het Eilandje

Het Eilandje (Kiçik Ada) Antverpendə ziyarətə layiq bir başqa yerdir. Bu məhəllə şəhərin şimal hissəsində yerləşir. Əvvəllər su (çaylar və arxlar) ilə əhatə olunduğu üçün Kiçik Ada adlanır. Hal-hazırda bu bölgə Şelda çayı və limanlar ilə əhatə olunmuşdur. Əvvəllər Antverpenin unudulmuş bir ərazisi idi, amma bu gün insanlar ora köhnə doklar və limanlardan, həmçinin cəlbedici binalardan zövq almaq üçün gedirlər. Aan de Stroom muzeyi (MAS) bu məhəllədə yerləşir. Bölgədə geniş teraslı, əla bar və restoranlar da mövcuddur.

Hələ də Belçikaya səyahət üçün səbəblər axtarışındasınız? Yuxarıda saydıqlarım bəs deyil?!