Arubaya səyahətdən əvvəl bilsəydim dediyim 10 şey

Bu gün sizə ABC adalarının üç üzvündən biri olan Aruba haqqında məlumat vermək istəyirəm. Arubanın ağ qumlu çimərlikləri və büllur kimi təmiz suyu hər il dünyanın müxtəlif yerlərindən bir çox insanı cəlb etməyi bacarır. Minlərlə insan Arubaya getməyi arzulayır. Əgər onlardan birisinizsə, deməli, doğru yerdəsiniz. Bu bloqdan Arubaya getməzdən əvvəl bilməniz gərəkən əvəzsiz məlumatlar əldə edəcəksiniz. Arubaya getməzdən əvvəl nə etməli? Təxmin etdiyiniz kimi, ilk növbədə Aruba və onun mədəniyyəti barədə faktları öyrənməli.

1. Turistlər ünsiyyətdə problem yaşamır

Arubanın iki rəsmi dili var: Niderland və Papyamento. Adadakı digər iki ən yayğın dil isə ispan və təbii ki, ingilis dilidir. İnsanların əksəriyyəti 4 dildə bilik və bacarıqlara malikdirlər. Bu o deməkdir ki, Arubanı ziyarət zamanı heç bir ünsiyyət problemi ilə qarşılaşmayacaqsınız. Ziyarətdən əvvəl yerli dildə bəzi sözlər öyrənmək istəyirsinizsə, buyurun sizin üçün bir neçə nümunə:

Bon bini - Xoş gəlmisiniz

Con ta bai? - Necəsən?

Mi ta bon! - Yaxşıyam!

Danki! - Çox sağ ol

Aruba ta dushi! - Aruba sevimlidir!

2. Hansı valyutadan istifadə etmək lazımdır?

Arubanın öz valyutası Aruba florinidir, ancaq burada ABŞ dolları da istifadə edə bilərsiniz. Üstəlik ada-dövlət daxilində bir çox valyuta dəyişimi edən məntəqələr tapıla bilər. Əlavə olaraq, alış-verişiniz və qonaqlama xərcləriniz üçün kredit kartlarından istifadə edə bilərsiniz. Arubada bütün əsas kredit kartları qəbul edilir. Bəzən insanlar alış-veriş zamanı müxtəlif problemlərlə qarşılaşırlar və bu səbəbdən onlara nağd puldan istifadə etmələri təklif edilir. Ancaq on nəfərdən yalnız biri bu cür çətinliklərlə üzləşir. 2020-ci ildən etibarən bir ABŞ dolları 1,80 Aruba florininə bərabərdir.

3. Vindsörfinq yoxsa çimərlik tennisi?

Şübhəsiz ki, yerli xalqın idmanı sevdiyini deyə bilərik. Arubaya getməzdən əvvəl bilməli olduğunuz ən maraqlı məqamlardan biri dövlətin çimərlik tennisi adlanan oyununun olmasıdır. İnanıram ki, bir çoxunuz bu oyun haqqında heç eşitməmisiniz. Bu, tennis və çimərlik voleybolu arasında bir növdür. Bir maraqlı faktı da qeyd edək ki, Arubada hər il Həvəskarların Vindsörfinq Çempionatı keçirilir. Bundan əlavə, yelkənçilik, kaytsörfinq, beysbol, basketbol və əlbəttə ki, futbol da məşhurdur. 1988-ci ildən bəri turnirdə iştirak etsələr də, Aruba idmançıları heç vaxt Olimpiya medalı qazana bilməyib. Bu, Aruba ilə bağlı ən kədərli faktlardan biridir.

4. Heç dadlı Aruba yeməklərini sınamısınız?

Bir çox insan sırf yeməklərə görə Arubaya səyahət etməyə can atır. Dövlətin mətbəzinin kifayət qədər zəngin olduğunu deyə bilərik. Cala, keshi yena, funchi, bolita di keshi, cabrito stoba, Cool island şorbası, sopi mondongo ən tanınmış yeməklərdir. Arubanın pan bati adlı bənzərsiz çörəyi var. Pankek kimi görünməyinə və bişirilməyinə baxmayaraq, yerli insanlar onu şorba və ya digər ləzzətli yeməklərlə yeyirlər. Aruba Karib dənizində yerləşdiyindən dəniz məhsulları və balıq xalq üçün əlçatandır. Ziyarətiniz zamanı mütləq sınamalı olduğunuz bəzi balıqlara isə mahi-mahi, qırmızı snapper və grouper daxildir.

5. Çimərliyi kokteylsiz təsəvvür edirsiniz?

Arubalılar doğurdan da necə kokteyl hazırlanacağını bilir. Seçimlər çoxdur, ancaq bəzi əsas kokteylləri sizə tanıtmaq istəyirəm: Melon Popsicles, Blueberry Bramble, Out of the Fire, Rainbow Sangria, Pelican-Rita. Üstəlik Aruba Ariba kokteyli adlanan milli Aruba içkisini də mütləq dadmalısınız. Sınamalı olduğunuz bir digər içki, unikal ada sahib Balashi - yerli Aruba pivəsidir. Bəlkə də bir alman pivəsi qədər populyar deyil, amma bütün hallarda yeni ləzzətləri dadmaq əyləncəlidir.

6. Arubaya səyahət üçün ən yaxşı vaxt nə vaxtdır?

İndi isə Arubanın havası və turizm şərtləri barəsində danışaq. Sizi maraqlandıran əsas məsələ temperaturdursa, bu adaya istədiyiniz zaman baş çəkə bilərsiniz. Bu adada hava davamlı istidir və temperatur 25-32 ° S (77-89 ° F) arasında dəyişir. Bu o deməkdir ki, Arubaya səyahət üçün ən yaxşı vaxt tamamilə sizin tətil planlarınızdan asılıdır. Bir çox insan soyuqdan qaçır və bu səbəblə dekabrın ortalarından aprelin ortalarına qədər olan müddət ərzində Arubada sıxlıq müşahidə olunur. Bu dövrdə otel qiymətləri də ilin digər dövrlərinə nisbətən xeyli yüksək olur. Əgər sıxlıq olan yerləri sevmirsinizsə və ya səyahətinizin daha ucuz başa gəlməsini istəyirsinizsə, onda Arubaya səyahət üçün ən yaxşı vaxt aprel ayının ortalarından dekabrın ortalarına qədər olan dövrdür. Bildiyiniz kimi, Aruba qasırğa kəmərinin xaricində, fırtınalardan çox uzaqdadır. Daha əvvəl də qeyd etdiyimiz kimi, tətilinizdə çox çətin hava şəraiti ilə qarşılaşmayacaqsınız, amma yağış müşahidə edilə bilər. Bu, əsasən oktyabr və yanvar ayları arasında baş verir. Bəs həmin dövr ərzində Arubaya səyahət təhlükəsizdirmi? Narahatçılığa əsas yoxdur, çünki yağışlar təhlükəli deyil və qısa müddətə davam edirlər.

7. Arubada qalmaq üçün ən yaxşı yerlər hansılardır?

Artıq Arubanın mətbəxi, mədəniyyəti, hava şəraiti haqqında məlumat əldə etdik və indi Arubada qalmaq üçün ən yaxşı yerləri kəşf etmənin vaxtı gəldi. Aruba ilə əlaqəli ən yaxşı faktlardan biri budur ki, adada bütün büdcələrə uyğun qonaqlama yerləri mövcuddur və bu da Arubanı dünyanın müxtəlif yerlərindən olan fərqli insanlar üçün əlçatan edir. Arubada qonaqlama üçün ən yaxşı yerləri axtararkən məkanın yerinə diqqət yetirməlisiniz. Dəniz kənarında qalmaq istərdiniz, yoxsa siz daha çox bilinməyən yerlərə üstünlük verirsiniz? Hər şey büdcənizə və prioritetlərinizə bağlıdır. Tətilinizi beşulduzlu bir oteldə keçirtmək istəyirsinizsə, otaqdan asılı olaraq 200-400 ABŞ dollar xərcləməyi gözə almalısınız. Mövcud qiymətləri nəzərə alsaq, çimərlikdə yerləşən qonaqlama yerləri arasında ən ucuzunun Blue Residences (132 ABŞ dolları) olduğunu söyləyə bilərik. Bu sizin üçün uyğun deyilsə, daha ucuz qiymətə otaqlar təklif edən yerlərə nəzər yetirə bilərsiniz. Bu baxımdan, Arubada qalmaq üçün ən yaxşı yerlər arasında Quality Apartments, La Felicidad, Aruba Beach Villas, Sea Breeze Apartments qeyd edə bilərik. Adı çəkilən yerlərdə qiymətlər sahil kənarındakı otellərdən təxminən 2-3 dəfə ucuzdur. Bundan əlavə, kirayə də mümkündür. Kirayəyə villa, lüks kondo və ya studiya mənzil götürə bilərsiniz.

8. Arubanın ən yaxşı yerləri hansılardır?

Arubada ziyarət etmək üçün valehedici yerlər axtarırsınızsa, onlardan bəziləri: Alto Vista kilsəsi, Kaliforniya mayakı, Antilla Wreck, Baby çimərliyi, Arikok Milli Parkı və Palm çimərliyi. Oranyestad Arubanın ən böyük şəhəri və paytaxtıdır, buna görə də küçələrdə sıxlıq olmasına təəccüblənməyin. Burada bir çox kurort, mağaza, bar, rəngli müstəmləkə binaları tapa bilərsiniz. Fort Zoutmana mütləq getməlisiniz. Hal-hazırda Bon Bini festivalı da burada keçirilir. Bir təbiət sevərsinizsə, adanın təxminən beşdə birini əhatə edən Arikok Milli Parkına baş çəkin. Getsəniz, istirahət etmək və zövq almaq üçün 3 məşhur çimərliyi - Dos Playa, Boca Prins və Daimarini görmə şansı qazanacaqsınız.

9. Vəhşi təbiəti sevənlər üçün gözəl bir yer

Arubanın vəhşi təbiəti də kifayət qədər zəngindir. Burada təxminən 200 növ quş yaşayır. Bundan əlavə, müxtəlif kərtənkələ növləri, xərçənglər, tısbağalar və s. görə bilərsiniz. Onların əksəriyyətini Arubanın ən yaxşı yerlərindən biri olan Arikok Milli Parkında tapa bilərsiniz. Bundan əlavə, Aruba, adanın milli simvolu olan bayquşların da yuvasıdır. Maraqlıdır ki, onlar adada yaşayan ilan növlərindən olan boa konstriktorlara görə təhlükə altındadırlar. Nəsli kəsilməkdə olan bir başqa canlı növü də Aruba zınqırovlu ilanıdır. Təəssüf ki, dünyada onlardan yalnız 230-u qalıb. Adada kərtənkələ və ilanlar çoxdur, ağlınıza sual gələ bilər: Arubaya səyahət etmək təhlükəsizdirmi? Narahat olmaq üçün səbəb yoxdur, amma yenə də diqqətli olmalısınız.

10. Arubaya səyahət etmək təhlükəsizdirmi?

Aruba Karib hövzəsində ən aşağı cinayət nisbətinə sahibdir. Bu adada 90 fərqli millət yaşasa da, ahəng içində yaşayırlar. Bəlkə də dünya Arubadan çox şey öyrənməlidir. Bununla birlikdə, COVID-19 indi hər şeyə, hər yerə təsir edir və Aruba da istisna deyil. Hökumət vətəndaşları və turistləri qorumaq üçün çox səy göstərir, amma təhlükə hələ də keçməyib. Bu dövrdə Arubaya səyahət təhlükəsizdirmi? Səyahət koronavirus səbəbindən bir qədər təhlükəli ola bilər, lakin bütün tədbirləri alsanız, rahatlıqla Arubaya səyahət edə bilərsiniz.