Çikaqoda ediləcək ən yaxşı 7 fəaliyyət

Çikaqo haradadır?

Çikaqo ABŞ-ın üçüncü ən böyük şəhəri və arxitektura paytaxtıdır. 50-dən çox beynəlxalq və 150-dən çox yerli uçuşlar edən O'Hare Beynəlxalq Hava Limanının yaxınlığında yerləşən və dünyanın ən vacib ticarət mərkəzlərindən biri sayılan Çikaqo, ABŞ-ın ən başlıca turizm şəhərlərindən biridir. Çikaqo şəhəri öz mədəniyyəti, çağdaş həyatı, əyləncəli fəaliyyətləri, incəsənəti, ədəbiyyatı, mətbəxi ilə tanınır və hər il milyonlarla turisti özünə cəlb edir.

İllinoys ştatında yerləşən Çikaqo, dünyanın ən işlək hava limanına (2019-cu il üçün) sahib olması ilə məşhurdur. O'Hare Beynəlxalq Hava Limanı, əllidən çox beynəlxalq və yüz əllidən çox daxili məkana birbaşa xidmət göstərir. Uçuş biletlərini isə ən yaxşı uçuş aqreqatorlarından hər hansı biri vasitəsilə evinizdən rahatlıqla sifariş edə bilərsiniz.

Çikaqoda milyonlarla turisti ziyarətə dəvət edən bir çox müxtəlif fəaliyyət var. Siz də İllinoys əyalətinin bu gözəl şəhərini ziyarət etməyi planlaşdırırsınızsa, o zaman "Çikaqoda nə edim?" deyə düşünə bilərsiniz. Sualınızın cavabı bu yazıda gizlidir. Beləliklə, Çikaqodakı ən yaxşı fəaliyyətlər haqqında məlumatlara keçid alaq. Çikaqoda ən yaxşı fəaliyyətlər toplusu:

1. Navy Pier

1916-cı ildə Çikaqoda, tam olaraq 600 East Grand Avenue-də açılan Navy Pier, Miçiqan gölü sahilində 1 kilometr uzunluğunda keçiddir. Navy Pier-dəki IMAX teatr, Ferris Wheel, qolf kursu, Chicago Shakespeare Theater, Amazing Chicago's Funhouse Maze, Navy Pier Festival Hall, Grand Ballroom, Pepsi Skyline Stage kimi fəaliyyətlər buranı hər yaş qrupundan olan insanlar üçün maraqlı edir. Çikaqoya səyahət zamanı Navy Pier-i ziyarət edərək sahildəki su taksiləri ilə gölü kəşf edin, əla servisləri ilə məşhur restoranlarda qarnınızı doyurun və gün batımı zamanı şəhərin ən gözəl mənzərələrindən birinə şahidlik edin, əmin olun ki, buna dəyəcək.

2. Shedd Aquarium

1930-cu ildə Çikaqoda, 1200 South Lake Shore Drive-da açılan Shedd Aquarium dünyanın ən böyük qapalı akvariumlarından biridir. Akvariumun tutumu 5 milyon galondur və burada 32.500-dən çox balıq var. "Amazon Rising", "Caribbean Reef", "Abbott Oceanarium", "Polar Play Zone", "Waters of the World " və "Wild Reef" də daxil olmaqla məşhur sərgiləri və prezentasiyaları izləmək üçün bu məkanı mütləq ziyarət etməlisiniz. Xüsusilə uşaqlarla birlikdə ziyarət üçün ideal olan məkandakı mağazalarda rahat bir şəkildə şopinq edə, restoranlarda dadlı yemək yeyə bilərsiniz. Bu ecazkar məkanda keçirdiyiniz vaxtdan zövq alacaqsınız.

3. The Art Institute of Chicago

1879-cu ildə qurulan və hal-hazırda 111 South Michigan prospektində yerləşən The Art Institute of Chicago bütün sənətsevərlərin mütləq ziyarət etməsi gərəkən bir yerdir. Əsas girişində iki aslan heykəli ilə sizi qarşılayacaq məkan, özündə birləşdirdiyi bir çox üslubların qarışımı ilə sizi valeh edəcək. Muzeydə özünüz və sevdikləriniz üçün müxtəlif hədiyyələr almaqla yanaşı, öyrədici turlara qatıla və ya digər fəaliyyətlərdə iştirak edə bilərsiniz.

4. Millennium Park

2004-cü ildə inşa edilən zaman çoxları tərəfindən tənqid olunan Millennium Park indilərdə hamını özünə cəlb edir. 10 hektar ərazidə salınmış parkın hər guşəsinə heyran qalacaqsınız. Parkda Hindistan əsilli heykəltəraş Anish Kapoor tərəfindən dizayn edilən və parlaq strukturu ilə ətrafdakı bütün binaları əks etdirən The Bean çox məşhurdur.

Çikaqoda Millenium Park kimi valehedici yerlər çoxdur. İnanın ki, Çikaqoya səyahət zamanı hər şey görəcəksiniz: muzeylər, akvariumlar, zooparklar, sənət qalereyaları və daha nələr...

5. Willis Tower

Dünyanın ilk göydələni 1883-cü ildə Çikaqoda tikilib. Elə dünyanın ən hündür binalarından biri də Çikaqo şəhərindədir və onun adı Willis Tower-dir. İndiki zamanda inşa edilən arxitektura möcüzələri, 110 mərtəbəli bu binanı unutdursa da, Willis Tower görülməyə dəyərdir. Çikaqodakı nəfəskəsən hündürlükdəki göydələnləri seyr etmək üçün ən yaxşı üsul, Çikaqo çayında kruiz gəzintisinə çıxmaqdır.

6. Çay turları

Əgər siz kruiz gəzintisini tərcih etmirsinizsə, bir paddleboat icarəyə götürüb çayda gəzintiyə çıxa bilərsiniz. Çox az adam bunu etdiyindən diqqət mərkəzində olacağınızı və hətta bəzi insanların sizi ələ salacağını nəzərə almalısınız. Çaydakı gəzintiniz zamanı, dörd-beş mərtəbəyə qədər yalnız maşın və avtomobillərin göründüyü hündür Çikaqo göydələnləri və ümumiyyətlə, bütün Çikaqonun əzəmətli görüntüsü sizi heyran edəcək və siz bu şəhəri dayanmadan, bütünlüklə kəşf etmək istəyəcəksiniz.

7. Maggie Daley Park

Çikaqonun ilk və yeganə açıq dırmaşma parkı olan Maggie Daley Park mütləq ziyarət edilməsi gərəkən yerlərdəndir. Parkda yaşıllıqlar arasında iki qaya var və siz burada öz bacarıqlarınızı yoxlaya bilərsiniz. Hər kəsin sevdiyi bu parkda eyni vaxtda 25-100 insan qayaya dırmaşma yarışları edə bilər.

Çikaqo dünyada ləqəbi olan yeganə şəhərlərdəndir. Küləkli şəhər kimi tanınan Çikaqoda külək hər yerdədir və hava axını da çox coşğundur. Bu axının səbəbi isə nəhəng Miçiqan gölüdür. Dünyanın ən böyük 5-ci gölü olan Miçiqan nəhəngliyi ilə dənizə bənzəyir.

İndi Çikaqodakı ən yaxşı 7 fəaliyyət haqqında məlumatınız var. Odur ki, Çikaqoya səyahət etməyi planlaşdırırsınızsa, bu gözəl yerləri ziyarət edin və qeyd etdiyimiz hər bir fəaliyyəti yoxlayaraq səyahətinizdən zövq alın.

Çantanızı hazırlayın və Çikaqoya unudulmaz bir səyahətə çıxın!