Elə indi Kabo-Verdeyə səyahət etməyiniz üçün 11 səbəb

Tropik ada ölkələrinə səyahət hər bir səyahətçinin qəlbində xüsusi bir yer tutur. Bu yerlərdən biri olan Kabo-Verde diqqətlərdən kənarda qalmış arxipelaq ölkəsidir. Kabo-Verde haradadır? Kabo-Verde mərkəzi Atlantik okeanda Afrika qitəsi ilə qonşu olan on vulkanik adadan ibarət respublikadır. Ölkənin bayrağında əks olunmuş on ulduz məhz bu adalarının sayını göstərir. Kabo-Verdenin paytaxtı, həmçinin ölkənin ən böyük şəhəri olan Prayadır. Kabo-Verdeyə necə getmək olar? Bu ada dövlətinə ən optimal səyahət yolu uçuşdur. Cabo Verde Airlines Kabo-Verdeyə İtaliya, Mərakeş, Portuqaliya, Birləşmiş Krallıq, Belçika və İsveçdən həftədə bir neçə dəfə uçuşlar təşkil edir. Ölkə tropik təbiəti, zəngin mədəniyyəti, mehriban cəmiyyəti və məşhur mətbəxi ilə hər bir səyahətçini heyrətləndirir. Biz də bugünkü məqalədə niyə Kabo-Verdenin növbəti səyahət təyinatınız olması gərəkdiyinin səbəblərini ətraflı izah edəcəyik.

1. Möhtəşəm çimərliklər

Kabo-Verdenin adaları Atlantik okeanı boyunca inanılmaz dərəcədə uzun sahillərə ev sahibliyi edir. Bu çimərliklərin təmiz və ağ qumları rahatlamaq üçün idealdır. Sahil zolaqları boyunca gəzərkən ekzotik göbələklər, rəngli ilbizlər və qeyri-adi balıqqulaqları sizi müşayiət edəcək. Kabo-Verde çimərliklərinin suyunun şəffaflığı onu üzmək üçün ən yaxşı yerlərdən edir. Suyun şəffaflığı sayəsində müxtəlif rəng və növdə olan balıq və sualtı bitkilərini də müşahidə edəcəksiniz. Kabo-Verdenin paytaxtı hər il dünyanın dörd bir yanından gələn turistləri qəbul edən ecazkar çimərliklərə ev sahibliyi edir.

2. Ən yaxşı şəkildə kaytsörfinq

Kabo-Verde çimərlikləri son dərəcə həyəcan verici və əyləncəli fəaliyyətlərdən olan kaytsörfinq üçün də idealdır. Atlantik okeanının mərkəzində yerləşməsi səbəbi ilə küləklər adalarda həyati əhəmiyyət daşıyır. Mart-oktyabr aylarında küləklər daha güclü olur və bu da kaytsörfinq üçün ən uyğun şəraiti yaradır. Bu səbəbdən deyə bilərik ki, kaytsörfinq üçün ən yaxşı vaxt mart və oktyabr ayları arasıdır. Bundan əlavə, Prayadakı bir çox kaytsörfinq məktəbi həm yerli sakinləri, həm də xariciləri qəbul edir.

3. Ləzzətli dəniz məhsulları

Dəniz məhsulları Kabo-Verde milli mətbəxinin əhəmiyyətli bir parçasıdır. Ölkənin coğrafi yerləşimi səbəbindən insanlar yeməklərində əsasən dəniz məhsullarından istifadə edirlər. Tuna ilə düyü bu mətbəxin dünya miqyasında məşhur nümunəsidir. Jagacida da məşhur və ləzzətli yerli yeməklərdəndir. Shrimp Verde isə zeytun yağı, sarımsaq, yaşıl soğan və parmesan pendiri ilə dadlandırılmış qızardılmış krevetdir. Salsa Verde və piri-piri toyuq da ölkənin məşhur yeməkləri arasındadır. Kabo-Verdenin milli qüruru olan cachupa isə mütləq sınanmalı bir yeməkdir. Doğurdan da dəniz məhsulları Kabo-Verde xalqının qidalanmasında çox əhəmiyyətli rola sahibdir.

4. Kristal kimi təmiz sulara dalış

Kabo-Verde adalarını əhatə edən Atlantik okeanının suyu saf, parlaq və kristal kimi şəffafdır. Suyun keyfiyyəti, mərcan rifləri və saysız-hesabsız balıq və bitki növü Kabo-Verdedəki dalış təcrübəsini fantastik edir. Günün doğması zamanı günəş işığı sudan keçir və inanılmaz dərəcədə gözəl parlaq mavi effekt yaradır. Ölkədə olduğunuz müddətdə mağara dalışını da sınaya bilərsiniz. Dalış Kabo-Verdedə geniş yayılmış turistik fəaliyyətdir.

5. Fogodakı qara qumlu çimərliklər

Bir çox insan qara qumlu çimərliklərdə istirahət etmək üçün Fogoya səyahət edir. Yalnızca Havay, İslandiya və Kabo-Verde kimi az sayda səyahət yeri ekzotik baxımdan misilsiz qara qumlu çimərliklərə ev sahibliyi edir. Qara qumların tərkibi bazalt kimi misilsiz vulkanik fraqmentlər və qayalardır. Vulkanik eroziya Fogo və Santo Antaoda tədricən qara qumlar meydana gətirdi və bu ekzotik təbii xəzinə sayəsində Kabo-Verde adalarına səyahət ömrünüzün ən unudulmaz təcrübələrindən biri olacaq.

6. Küçə sənəti və qədim memarlıq

Dünya miqyasında tanınan bir çox fotoqraf ölkədəki qraffiti və küçə sənət əsərlərini kameraya aldı. Yerli sənətkarlar köhnə arxitekturaların divarlarında onlarla gözəl qraffitilər çəkiblər. Kabo-Verdeni tarixən avropalılar kəşf edib, müstəmləkəyə çeviriblər. Avropalılar ölkədə XV əsrin ortalarından bu günə qədər ayaqda qalan onlarla bina inşa ediblər. Günümüzdə küçə sənəti və qraffiti köhnə binaları öz parlaq rəngləri ilə bəzəyir. Kabo-Verde binalarının instaqramlıq şəkillərini çəkməkdən zövq alacaqsınız.

7. Kabo-Verde backpackinq üçün idealdır

Az büdcə ilə səyahət etməyə üstünlük verənlərdənsinizsə, Kabo-Verde tam sizlikdir. Hər şeydən öncə, bu ölkə onlarla ucuz və əlverişli hostellərə, qonaq evlərinə və otellərə ev sahibliyi edir. Bir neçə gün gəzə və hər gecəni fərqli bir yerdə keçirə bilərsiniz. Üstəlik, avtostop Kabo-Verdedə çox yayğındır. Yerli sürücülər səyyahlara qarşı mehribandır. Xeyirxah sürücülər sayəsində şəhər və kəndlər arası səyahətlər üçün çox az pul xərcləyəcəksiniz. Bundan əlavə, Kabo-Verdenin hikinq və backpackinq üçün valehedici dağlıq bölgələri və yabanı meşələri var. İsti hava, sərin Atlantik küləkləri və hamar çəmənliklər hikinq təcrübənizi unudulmaz edəcək.

8. Sirli, boş və naməlum adalar

Daha əvvəl də qeyd etdiyimiz kimi, Kabo-Verde tanınmış turistik məkanlardan biri deyil. Buna görə də ölkənin vəhşi təbiətindəki bir çox nöqtə toxunulmamış, korlanmamış və kəşf olunmamış olaraq qalır. Bir çox kiçik Kabo-Verde adası on illər ərzində çox az sayda əcnəbini qonaq edib. Odur ki, bu uzaq adaları siz kəşf etməyə çalışın.

Onu da deyim ki, kiçik adalarda vəhşi təbiətə daha yaxın ola bilərsiniz. Məsələn burada yaşayan heyvanlar qonaqlardan qorxmur. Məşhur turizm məkanları olan böyük adalarda isə turistlər heyvanları qorxudur və hətta bəzən incidirlər.

9. Yerli küçə musiqiçiləri

Musiqi Kabo-Verde xalqının gündəlik həyatının əhəmiyyətli bir hissəsidir. Xüsusilə paytaxt ətrafında gəzərkən küçə musiqiçilərinin səslərini davamlı olaraq eşidəcəksiniz. Həmçinin musiqiçilər musiqinin əsas fəaliyyət olduğu həftəlik karnavallar da təşkil edirlər. Fevral ayında yerli musiqi mədəniyyəti haqqında çox şey öyrənə biləcəyiniz unikal musiqi festivalları keçirilir. Kabo-Verde sənətçilərinin göz qamaşdıran geyimləri sayəsində yerli musiqi böyük estetik dəyərə sahibdir.

10. Dalğalı sularda jet-ski sürmək

Atlantik okeanının güclü küləkləri su üzərində heyrətamiz dərəcədə yüksək dalğalar yaradır. Bu səbəblə də Kabo-Verde çimərliklərində jet-ski sürmək olduqca əyləncəlidir. Ancaq bu zaman diqqətli olmağınız vacibdir. Təhlükəsizliyi təmin etmək məqsədilə jet-skini mütəxəssis və ya bələdçi ilə birlikdə sürmək daha yaxşıdır. Bundan başqa, jet-ski sürməyi sizə öyrədəcək kursların mövcud olduğunu da bilməlisiniz. Bu kurslar sizə kirayə jet-ski də təklif edir. İnanın ki, bu təcrübə Kabo-Verde səyahətinizin ən unudulmaz hadisələrindən biri olacaq.

11. Böyük balıqları ovlamaq

Kabo-Verde balıqçılıq ilə də çox məşhurdur. Hətta burada balıq ovu müsabiqələri belə keçirilir. Müsabiqələr zamanı öz balıq ovu bacarıqlarınızla bir qədər pul qazana bilərsiniz. Üstəlik bu faəliyyət son dərəcə əyləncəlidir. Müsabiqələr bir neçə otel və əyləncə mərkəzində təşkil olunur. Yarış günü bütün iştirakçılar böyük bir gəmidə toplanır və Atlantik okeanında tur başlayır. Bu fəaliyyət zamanı başqa turistlər və yerli xalqla da yaxın ünsiyyət qura bilərsiniz.

Ümumiyyətlə, Kabo-Verdeyə səyahət mütləqdir. Ölkədəki turizm sektoru gündən-günə böyüyür və daha yaxşı hala gəlir. Bu bloqu oxuduğunuza və Kabo-Verde haqqında əsas məlumatları əldə etdiyinizə görə, artıq sizin də tropik ada tətilinizi planlamağınızın vaxtı gəldi!