Elə indi Şərqi Timora səyahət etməyiniz üçün 10 səbəb

Sizə diqqətlərdən kənarda qalmış bir yer haqqında danışmaq istəyirəm. Söhbət Şərqi Timordan gedir. Şərqi Timora səyahət yalnız dostlarınız arasında "cool" hiss etmənizlə deyil, həm də möhtəşəm tətil keçirməyinizlə nəticələnəcək. Bəlkə də düşünürsünüz ki, Şərqi Timor haradadır? Ölkə Cənub-Şərqi Asiyada Timor adasının demək olar ki, yarısını tutur. Şərqi Timor ilə sərhəd olan yeganə ölkə, Timor adasının digər yarısına sahib olan İndoneziyadır. Banda dənizi şimal və şimal-şərqdə, Timor dənizi isə cənub və şərqdə ölkənin sahillərini yuyur.

Şərqi Timorun əhalisi təxminən 1,3 milyon nəfərdir. Əhalinin 60%-dən çoxu kənd yerlərində yaşayır. Onların yaşadıqları yerlərə gedib təbii gözəlliklərə şahid olduqdan sonra seçimlərini tam başa düşəcəksiniz. Ölkənin rəsmi dilləri tetum və portuqal dilləridir.

Şərqi Timora necə səyahət etmək olar? Ən yaxşı və ucuz yol təyyarədir. Bali və ya Sinqapurdan Şərqi Timorun paytaxtı Diliyə uçmaq olar. Şərqi Timora səyahət etmək üçün ən yaxşı vaxt aprel və iyul ayları arasıdır. Bu müddət ərzində istənilən su fəaliyyətindən zövq ala biləcəyiniz ən yaxşı hava şəraiti ilə qarşılaşacaqsınız.

İndi isə Şərqi Timora səyahət etməniz üçün 10 səbəblə tanış olaq və bu ölkəni daha yaxından tanıyaq.

1. Möhtəşəm dalış təcrübəsi

Cənub-Şərqi Asiya və Avstraliyadakı əksər yerlər onsuz da tam “dayvinqlikdir”. Bu səbəblə daha az insanın bildiyi dalış yerləri axtarırsınızsa, tərəddüd etmədən Şərqi Timoru ziyarət etməlisiniz. 40 dəqiqəlik təcrübə zamanı balina köpəkbalığı (narahat olmayın, çox mehribandır), ton balığı, barrakuda və başqa müxtəlif növ balıqları görəcəksiniz. Ölkənin dalğıclıq nöqtələri məşhur Mərcan Üçbucağının içərisindədir və bu səbəblə Şərqi Timoru əhatə edən sular müxtəlif dəniz canlıları növləri ilə zəngindir. Kəşf edilməmiş sulara dalışınızı professional rəhbərlərlə birlikdə edəcəksiniz.

2. Şnorkelle üzmə

İstər şnorkellinqi ilk dəfə sınayan biri olun, istərsə də illərinizi vermiş peşəkar olun, heç bir fərqi yoxdur, Şərqi Timorun isti tropik sularında həyatınızın ən yaxşı şnorkellinq təcrübəsini əldə edəcəksiniz. Dilinin yaxınlığında elə yerlər var ki, burada balıqların valehedici sualtı rəqsinə şahidlik etmək üçün çimərlikdən sadəcə bir qədər üzmək kifayətdir. Ətrafdakı mavi su o qədər zəngindir ki, çox sayda mərcan və balıq növləri tapa bilərsiniz. Ölkənin cənub-qərb küncündə yerləşən Mərcan Üçbucağında 2500-dən çox müxtəlif balıq və mərcan rifi növləri görəcəksiniz.

3. Füsunkar çimərliklər

Təmiz çimərliklər axtarırsınız? O zaman nə gözləyirsiniz? Çantanızı yığın və Şərqi Timora səyahət edin. Şərqi Timorun heyranedici çimərliklərində çəkdirdiyinzi şəkillər sosial media hesablarınızı bəzəyəcək. Daha əvvəl də qeyd etdiyim kimi, Şərqi Timora səyahət üçün ən yaxşı vaxt apreldən iyulun sonuna qədər, yəni havanın çimərlikdə günəşlənmək və dənizdə çimmək üçün ideal olduğu vaxtdır. Çimərliklərdəki mənzərəli gündoğumu və qürub Şərqi Timordakı günlərinizi daha da gözəlləşdirəcək. Məşhur tropik çimərliklər arasında Hera Beach, Baucau yaxınlığındakı çimərlik və Atauro adası da var. Bu çimərliklər həmçinin gözəl qonaqlama yerləri, restoranlar və kafelərlə təchiz olunmuşdur.

4. Atauro adası

Atauro adası Şərqi Timorda ən sevimli yeriniz olacaq. Bura eko-turizmi və az təsirli turları sevənlər üçün inanılmaz bir yerdir və rahat və münasib qiymətli restoranlar və qonaqlama yerləri ilə doludur. Atauro adası təmiz çimərlikləri, sıra-sıra dağları və keçilməz meşələri ilə sizi heyran edəcəkdir. Ziyarətçilərin rəylərinə görə ada həmçinin dalış, şnorkellə üzmə, üzgüçülük və trekkinq üçün də idealdır. Jaku adası ilə birlikdə Atauro, şnorkelçilər üçün cənnətdir. Atauro riflərində müxtəlif dəniz canlılarını ovlamaq da mümkündür. Odur ki, balıqçılıq, balina və delfin seyrindən də zövq ala bilərsiniz. Adada kəşfinizi gözləyən gizli mağaralar, təəccübləndirici sıldırım qayalar və bulaqlar da var.

5. Quş seyri

Təbiət və heyvanlar aləminin aşiqləri Şərqi Timora səyahət fürsətini əldən verməməlidirlər. Kamera ilə müxtəlif quşların maraqlı şəkillərini çəkməyə çalışarkən özünüzü National Geographic-in fotoqrafı kimi hiss edəcəksiniz. Ölkədəki quş növləri Asiya və Avstraliya coğrafi xüsusiyyətlərinin qarışığına malikdir. Şərqi Timorda 230-dan çox quş növü var və bunlardan 23-ü endemikdir, yəni dünyanın başqa heç bir yerində tapıla bilməz. Adadakı bənzərsiz və nəsli kəsilməkdə olan quş növlərinə Timor yaşıl göyərçini, slaty cuckoo-dove və Timor imperiya göyərçini daxildir.

6. Jaku adası

Jaku adası cənnət adlandıracağınız, lakin yaşayış olmayan bir adadır. Timor adasından şərqdə yerləşən ada Luten rayonu ərazisindədir. Ada üzgüçülük təcrübənizi unudulmaz edəcək büllur kimi təmiz sulara malikdir. Yerli əhali Jaku adasını müqəddəs bir yer kimi qəbul edir. Adadakı əsas turistik fəaliyyətlər üzgüçülük, dalış və şnorkellinqdir. Qonaqlamaya gəldikdə, gününüzü Jaku adasına açılan valehedici mənzərə ilə başlamaq istəyirsinizsə, Valu çimərliyindəki mehmanxanalarda qala bilərsiniz.

7. Sənətkarlıq

Şərqi Timor xalqı müxtəlif əl işləri hazırlamaq baxımından olduqca istedadlıdır. Şərqi Timorda ən məşhur əl işi sənətkarlıq nümunəsi taisdir. Yerli əhali taisi fərqli dizayn və rənglərdə istehsal edir və bir çox kolleksiyaçı onları satın almağa çalışır. Burada müxtəlif zinət əşyaları, diqqətlə hazırlanmış çantalar, toxunmuş səbətlər, gözəl rəsmlər, taxta oymalar, eləcə də musiqi alətləri tapa bilərsiniz. Ölkənin paytaxtında və digər şəhər və kəndlərdə sənətkarların dükanlarına və bazarlarına mütləq rast gələcəksiniz. Dilini kəşfə çıxdığınız zaman görəcəyiniz bu mağaza və təzgahlar yerli ənənələri və mədəniyyəti daha yaxşı anlamağınıza kömək edəcəkdir.

8. Nino Konis Santana Milli Parkı

Şərqi Timor hökuməti 2007-ci ildə ilk milli parkı olan Nino Konis Santana Milli Parkının açılışını elan etdi. Təxminən 1236 kvadrat kilometr ərazini əhatə edən milli park Şərqi Timorun şərq ucunda yerləşir. Parkın ərazisinə yalnız quru sahələr deyil, dənizdəki sular da daxildir. Park təbiəti qorumaqdan başqa, qədim qaya və əhəng daşı mağaraları kimi mədəni və müqəddəs yerləri də əhatə edir. Ümumilikdə Nino Konis Santana Milli Parkı dağları, mərcan riflərini, Jaku adasını, məşhur Mərcan Üçbucağının bir hissəsini, gözəl İra Lalaro gölünü və s. əhatə edir.

9. Müxtəlif tədbirlər və festivallar

Bu ölkə ilk öncə ispanlar, daha sonra da indoneziyalılar tərəfindən idarə olunub. Ancaq 2002-ci ildən bəri müstəqil bir ölkədir. Ölkədə müxtəlif tədbirlər və festivallar keçirilir və təbii ki, çətin əldə edilmiş müstəqilliyi anma mərasimi də bunlardan biridir. Əsas festivallara Pasxa, 20 May və 28 Noyabrda qeyd edilən Müstəqillik günü, Qəhvə festivalı, Tatamaylauya illik ziyarət və Dili Beynəlxalq Film Festivalı daxildir.

10. Hikinq parkurları

Cənnəti xatırladan bu ölkə yalnız çimərlikləri və su fəaliyyətləri ilə deyil, həm də təbiəti və hikinq parkurları ilə məşhurdur. Ölkəni kəşf edərkən çəkəcəyiniz şəkillər bu ecazkar yeri yaddaşınıza əbədi olaraq yazacaqdır. Şərqi Timor dağ yürüyüşləri, sahil yürüyüşləri, bir neçə günlük kənd səfərləri və dağ velosipedi sürmək kimi müxtəlif faəliyyət seçimləri təklif edir. Mükəmməl hikinq yollarından biri, 2.963 metr hündürlük ilə ölkədəki ən yüksək zirvə olan Tatamaylau dağına gedən yoldur. Zirvə Şərqi Timor xalqı üçün müqəddəs və mədəni baxımdan vacib bir yerdir. Bunun bir səbəbi də zirvədəki Məryəm Ana heykəlidir. Digər məşhur yürüyüş parkurlarından Matebian dağlarına yolu, Horta Loop-u qeyd edə bilərik.

Şərqi Timora səyahət təhlükəsizdirmi?

Ümumilikdə Şərqi Timora səyahət təhlükəsizdir, amma yenə də çox diqqətli olmalısınız. Ölkədə siyasi gərginlik ola bilər. Dili və digər bölgələrdə müxtəlif şiddətli hücumlar, soyğunçuluq və xırda cinayətlər baş verə bilir. Yol şəraitinin pis olması avtomobil idarə edən turistlərə maneə yarada bilir. Tək qadın səyahətçilər şifahi və cinsi istismarın hədəfi ola bilir.