Fortalezada 12 İnstaqramlıq yer

Braziliya öz çimərlikləri, meşələri, çılğın festivalları, sambası və s. ilə məşhurdur. Hər il milyonlarla insan Braziliyaya səyahət edir. 2019-cu il üçün olan məlumatlar 6 milyondan çox turistin Braziliyaya səyahət etdiyini göstərir. Təbii ki, kimsə Braziliyaya səyahət etmək qərarına gəldikdə ağlına gələn ilk instaqramlıq yerlər San-Paulu və Rio-de-Janeyro olur. Ancaq biz bu gün Braziliyanın Fortaleza şəhərindəki instaqramlıq yerlərdən bəhs etmək istəyirik. Odur ki, bu bloqda Fortalezadakı ən yaxşı və ən instaqramlıq yerlər barəsində və daha çoxunu öyrənəcəksiniz.

Braziliya, Fortalezada ən yaxşı yerlər haqqında danışmağa başlamazdan əvvəl bəzi əsas faktları nəzərdən keçirək. Fortaleza haradadır? Fortaleza Braziliyanın şimal hissəsində yerləşir və Searanın paytaxtıdır. Ölkənin ÜDM-də 13-cü, ərazi böyüklüyündə isə 5-ci şəhəridir. Fortaleza 313 kvadrat km ərazini əhatə edir və 2.68 milyon əhaliyə evdir. Əlbəttə, Braziliyanın bütün şəhərlərində olduğu kimi burada da portuqal dili ən çox istifadə olunan dildir. Bəs ingilis dili necə? Turistik məkanlarda ingilis dilindən çox istifadə olunmasına baxmayaraq, sakinlərin ingilis dili biliyi ürəkaçan deyil.

Fortaleza haqqında əsas faktları öyrəndikdən sonra, şəhərin gəzməli-görməli instaqramlıq yerləri barədə danışmağın vaxtı gəldi.

1. Futuro Çimərliyi (Praia do Futuro)

Bloqun əvvəlində dediyimiz kimi, Braziliya öz möhtəşəm çimərlikləri ilə məşhurdur və "Futuro Beach" yalnız Fortalezada deyil, həm də bütün Braziliyada ən populyar olanlardan biridir. Digər çimərliklərlə müqayisədə, Futuro sahilində mərcan rifləri yoxdur və bu da ərazini avarçəkmə üçün ideal hala gətirir. Çimərliyin yanında çox sayda restoran və kafe var, lakin ən çox üstünlük verilənlər öz xüsusiyyətlərini on illərdir ki, qorumağı bacaranlardır. "Praia do Futuro"-ya getmək üçün ən yaxşı vaxt nə vaxtdır? Şübhəsiz ki, cümə axşamı Futuro çimərliyini ziyarət üçün həftənin ən yaxşı günüdür. Bu zaman həftənin digər günlərində olduğu kimi, təmiz sudan, günəşdən və qumlu çimərlikdən ləzzət ala bilərsiniz, ancaq əsas əyləncə gecələr başlayacaq: demək olar ki, hər kəs bir araya gəlir, yengəc yeyir və forro dinləyir.

2. Metropolitan Kafedralı

Braziliya əhalisinin əksəriyyətini xristianlar təşkil edir və bu səbəblə ölkədə, həmçinin Fortalezada çox sayda instaqramlıq kilsə var. Mütləq ziyarət olunması gərəkən müqəddəs binalardan biri, Braziliyada üçüncü ən böyük kilsə olan Metropolitan kafedralıdır. Kilsəyə baxdığınız zaman sizə tanış gələ bilər. Bu normaldır, çünki möhtəşəm kafedral Kölndəki kafedraldan ilhamlanaraq yaradılıb. Binanın memarı fransız Georges Munierdir və Gotik-Roma memarlıq üslubuna malikdir.

Maraqlıdır ki, kilsənin inşasına 1939-cu ildə başlanılıb, lakin inşaat tam 40 ilə yaxın davam edib. Təxminən 5000 nəfər kilsədə eyni vaxtda dua edə bilər.

3. Fortaleza Mərkəzi Bazarı (Mercado Central de Fortaleza)

Fortalezaya səyahətiniz zamanı müxtəlif suvenirlər almağı unutmayın. Braziliyanın şimal hissəsindəki əksər şəhərlər kimi Fortaleza da əl işləri ilə məşhurdur və onları almaq üçün ən yaxşı yerlərdən biri Fortaleza Mərkəzi Bazarıdır. Bina 1809-cu ildən bəri sakinlərə xidmət göstərir, lakin fərqli məqsədlər üçün. Keçmişdə bura insanların tərəvəz və ət aldığı bir bazar idi, amma 1931-ci ildə hər şey dəyişdi. 1809-cu ildən bəri binada bir çox yenidənqurma işləri aparılıb və indiki binanın əksər hissələri 1998-ci ildə inşa edilib. Bazar dörd mərtəbəlidir və burada müxtəlif tekstil malları, toxunmuş hamaklar, rəsmlər, gil heykəllər və daha çox şey əldə edə biləcəyiniz çox sayda mağaza var. Hamısı arasında ən məşhur olan işlənmiş krujevadır.

4. Jose de Alencar Teatrı (Theatro Jose de Alencar)

Fortalezada gəzməli yerlərin başqa bir nümunəsi 20-ci əsrin əvvəllərinə aid olan və "Art Nouveau" üslubunda tikilmiş Jose de Alencar Teatrıdır. Teatrın inşası altı il davam etdi və 1910-cu ildə öz qapılarını qonaqlara açdı. Binaya Fortalezada doğulub-böyümüş məşhur novelist-dramaturq Jose de Alencarın adı verilib. Əsas salon 800, kiçik açıq hissə isə 90 yerlikdir. Teatrın memarlıq üslubu ilə yanaşı, Burle Marks Robertonun tərtib etdiyi bağ da buranı şəhərdəki ən məşhur instaqramlıq yerlərdən birinə çevirir.

5. Seara Muzeyi (Museu do Ceara)

Fortalezada həyəcan verici vaxt keçirmək və şəhərin mədəniyyəti və tarixi ilə bağlı məlumatlar əldə etmək istəyirsinizsə, Seara muzeyini ziyarət etməlisiniz. 1932-ci ildə açılan muzey çoxlu artefaktlara sahibdir. Bugünkü məlumatlar muzeydə 12000-dən çox əsər və obyekt olduğunu göstərir. Sikkələrə, mebel növlərinə, medallara, rəsmlərə baxmaqla yanaşı, şəhərin yerli əhalisi haqqında məlumat əldə etmək şansınız olacaq. Ziyarətçilərin ən sevdikləri artefaktlar Yoyo adlı doldurulmuş keçi və 75 milyon illik fosillərdir. Seara muzeyində ən çox bəyənilən İnstaqram şəklini çəkmək üçün bir çox imkanınız olacaq.

6. Seara Turizm Mərkəzi (Emcetur)

Seara Turizm Mərkəzi yalnız bir məkanda üçdən çox turistik attraksion tapa biləcəyiniz yerlərdəndir. Mərkəz əl işləri, suvenirlər və daha çox şey səbəbiylə Fortalezaya səyahət edən backpackerlərin "görməli yerlər" siyahısında ilk yerlərdən birini tutur. Həmçinin burada İncəsənət və Populyar Mədəniyyət Muzeyini (Museu de Arte e Cultura Popular) tapa bilərsiniz. Seara Turizm Mərkəzi yalnız bəzi ənənəvi sənətkarlıq nümunələri almaq istəyən insanlar üçün deyil, həm də tarix sevərlər üçün maraqlıdır. Mərkəzin sahibləri bəzi mağazaları əvvəlki həbsxana kameralarına köçürtdülər və bu, turist sayına müsbət təsir etdi. Odur ki, Fortalezaya səyahət edirsinizsə, "Emcetur"-u mütləq ziyarət edin.

7. Nossa Senhora de Assuncao Qalası

Braziliyanın Fortaleza şəhərində ziyarət ediləcək ən qədim yerlərdən biri Nossa Senhora de Assuncao qalasıdır. Qalanın tarixi 1649-cu ilə təsadüf edir. Qalanı 1649-cu ildə hollandlar tikdi, lakin bir neçə il sonra portuqaliyalılar hücum edərək onu ələ keçirdilər. Portuqaliyalılar bundan sonra qalanın adını dəyişdirdilər və ona Fortalezanın müqəddəs himayədarının adını verdilər. "Nossa Senhora de Assuncao Fort" Braziliya ordusunun qərargahı olaraq istifadə edildiyi üçün xalqa tam olaraq açıq deyil. Daxilində Antonio de Sampaio Muzeyi kimi bir neçə turistik yer var.

8. Meireles Çimərliyi (Praia do Meireles)

Fortaleza sahili və çimərlikləri ilə bütün Braziliyada məşhurdur. Dünyanın müxtəlif yerlərindən minlərlə ziyarətçi bu çimərliklər üçün Braziliyaya səyahət edir və Meireles çimərliyi də ən sıx və üstünlük verilənlərdən biridir. Ən yaxşı restoran və otellərə yaxın yerləşməsi Meirelesin şöhrətini artırır. Meireles çimərliyi demək olar ki, bütün gün boyunca izdihamlıdır. Səhər gəzintiləri üçün idealdır, gecə isə böyük bir əyləncə məkanına çevrilir. Vətəndaşlar və turistlər ənənəvi Braziliya mətbəxinin dadına baxmaq üçün buraya toplaşırlar.

9. Adahil Barreto Park

Əgər Fortalezaya turizm mövsümündə səyahət etsəniz, sıxlıqla qarşılaşa bilərsiniz. Bəzən belə yerlər cansıxıcı və stressli ola bilir və bu zaman ehtiyacımız olan daha sakit, dinc yerlərə qaçmaq olur. Səs-küylü şəhər həyatından qurtulmaq üçün Fortalezadakı ən yaxşı instaqramlıq yerlərdən biri Adahil Barreto parkıdır. Bura müxtəlif ekzotik bitkiləri, ağacları müşahidə edə biləcəyiniz və təbiətin füsunkar mənzərəsindən zövq alacağınız möhtəşəm bir yerdir. Park sakinlər arasında velosiped və yürüyüş yeri kimi məşhurdur. Ayrıca, burada bəzi idman meydançaları və uşaqlar üçün oyun sahəsi var.

10. Beach Park

Fortalezaya ailənizlə birlikdə səyahət edirsinizsə və ailə üçün yerlər axtarırsınızsa, yolunuzu "Beach Park"-dan salın. Bu, Latın Amerikanın ən böyük akvaparkıdır. Uşaqlarınız əylənərkən uzanıb istirahət edib və tətilinizdən zövq alın. Parkda müxtəlif attraksionlar və adrenalin sevərlər üçün 41 sürüşkən var. Son olaraq onu qeyd edək ki, parkda əyləncəli vaxt keçirərkən ən çox bəyəniləcək İnstaqram fotonuzu çəkməyi unutmayın.

11. Crocobeach

Siyahımızdakı son çimərlik yüksək standartları ilə məşhur olan Kroko çimərliyidir. Bura təmizlik və rahatlığa önəm verənlər üçün ideal çimərlikdir. Dəniz kənarında, palma ağaclarının altında və hovuzun qarşısında masalar var. Burada əlverişli qiymətlərlə dadlı yeməklər təqdim edən restoranlara rast gələcəksiniz. Üstəlik, bəzi şəxslər uyğun qiymətlərlə masaj təklif edirlər. Saxta zinət əşyaları, saatlar və sair satmağa çalışacaq çox sayda satıcı görəcəksiniz, onlardan heç nə almayın.

12. Coco Ekoloji Parkı (Parque Ecologico do Coco)

Coco Ekoloji Parkında keçən zaman təbiət həvəskarları üçün unudulmaz olacaq. 1989-cu ildə açılan qoruq 1155 ha ərazini əhatə edir. Park şəhər üçün çox böyük əhəmiyyətə malikdir, çünki bioloji müxtəlifliyi qoruyur, gəlir mənbəyi yaradır və seldən sonra şəhəri potensial fəlakətlərdən qoruyur. Buna baxmayaraq, hökumətin yeni tikinti planları səbəbindən park təhlükə altındadır. Hal-hazırda bir çox "yaşıl" təşkilat təbiət qoruqlarını bu fəlakətdən xilas etməyə çalışır.