Limada 12 İnstaqramlıq yer

İnstaqramın populyarlığının gündən-günə artması və bu sosial şəbəkəyə olan maraq insanların hər getdiyi ölkədə İnstaqramlıq yerlər axtarmasına səbəb oldu. Hər bir kəsin öz İnstaqram profilində paylaşmaq üçün maraqlı şəkillər çəkdirmə istəyi onları şəhər-şəhər, ölkə-ölkə gəzməyə sövq etdi və yeni turizm trendinin yaranmasına səbəb oldu.

Əgər siz Peruya səyahət etməyi planlayır və orada valehedici şəkillər çəkdirmək istəyirsinizsə, doğru yerdəsiniz. Bu bloqda sizə Limada 12 İnstaqramlıq yerdən bəhs edəcəm.

1. Parque El Olivar

Limaya səyahət edirsinizsə, bohem tərzində fotoşəkillər çəkmək üçün bu gözəl və əsl İnstaqramlıq məkana gedin. Heç vaxt eşitməyənlər üçün Olivar Park San Isidro bölgəsində yerləşən, 1500-dən çox zeytun ağacının olduğu meşə tipli parkdır. Olivar Park istirahət günlərini sakit bir şəkildə yaşıl ətrafı seyr edərək və ya piknik edərək təbiət qoynunda keçirtmək istəyən turistlər arasında çox populyardır. Parkın mərkəzində, Republica küçəsinə yaxın ərazidə balıqlarla dolu kiçik bir laqun var ki, insanlar onun ətrafında yüzlərlə “like” alan şəkillər çəkdirirlər.

2. Circuito Magico del Agua

Limada yaddaşlarda qalacaq şəkil çəkdirmək istəyirsiniz? Elə isə bura tam sizin üçündür. Circuito Magico del Agua, 13 fəvvarənin musiqi, işıqlar, rənglər və şəkillərlə yaratdığı gecə şousunun olduğu parkdır. 

Parque de la Reserva-da yerləşən və Parque de las Aguas olaraq da bilinən bu gözəl yer Limada mütləq görülməsi gərəkən yerlərdən biridir. 2007-ci ildə açılan fəvvarələr kompleksi 2009-cu ildə ictimai parkda yerləşən ən hündür fəvvarələr kompleksi olaraq Ginnesin Rekordlar Kitabına düşüb.

3. Pantanos de Villa

Pantanos de Villa Limada şəkil çəkdirmək üçün ən məşhur yerlərdən biridir. Bir çox modellər və geyim markaları Chorrillos distriktində yerləşən bu qorunan əraziyə öz fotosesiyalarını etmək məqsədi ilə üz tuturlar.

Bu təbii ərazi qorunur və əhəmiyyəti çox vacibdir. Yerin əhəmiyyətinin böyük olmasının səbəblərindən biri, Şimali Amerikadan Cənubi Amerikaya səyahət edən köçəri quşlar üçün istirahət, qida və çoxalma yeri olan ekosistem olmasıdır.

Eyni zamanda, Pantanos de Villa, 250-dən çox quş növü olan, zəngin flora və faunaya malik məkandır. Fərqli balıq növləri, molyuskalar, xərçəngkimilər və başqa su faunası növlərinə əlavə olaraq kəpənəklər, parəbüzənlər, bəzi sürünənlər, gəmiricilər və digər canlılar da bu təbii ərazidə yaşayırlar. Əgər siz təbiət qoynunda yaşıllıqlar arasında çəkilən şəkilləri sevirsinizsə Limadakı bu yer xəyallarınızın məkanıdır.

4. Monumental Callao

Bu yer Limaya səyahət edən hər kəsin İnstaqramında öz “izini” qoyub. Monumental Callao öz qraffiti yerləri, restoranları, mağazaları və tədbirləri ilə məşhurdur.

Siz Monumental Callao-da 10-dan çox qalereya və sərgi otağı tapa bilərsiniz. Üstəlik, Amazon motivlərindən tutmuş səyahət şəkillərinə qədər çoxlu ilhamverici eksponatların sərgiləndiyi bu yerə giriş pulsuzdur.

5. El Jardin Cafe Vivero

Bu yer klassik infrastruktura malik, “vintage” üslubunda dizayn edilmiş, bağın içində yerləşən qəhvə dükkanıdır. Peruya səyahətlərini Limadakı gözəl bir kafedə çəkilmiş romantik şəkillərə baxaraq xatırlamaq istəyənlər mütləq şəkildə sehrli auraya sahib El Jardin Cafe-ni ziyarət eməlidirlər.

6. Costa Verde

Costa Verde ərazisində əsas görülməli yer, isti və şəffaf olmamasına baxmayaraq, görkəmli şəkillər çəkdirmək üçün sörfçülər tərəfindən çox ziyarət edilən çimərliklərdir.

Yeganə qumlu çimərlik Chorrillosdadır və yay aylarında kifayət qədər turist qəbul edir. Costa Verde-nin bir başqa özəlliyi də dəniz səsinin müşayiəti ilə gəzinti üçün ideal məkan olmasıdır. Eyni zamanda siz burada uçurum üzərində tikilmiş binaları ilə birgə Limanın gözəl bir mənzərəsinə tamaşa edə bilərsiniz.

7. Murales de Barranco

Şübhəsiz ki, Murales de Barranco Limanın ən çox ziyarət edilən bölgələrindən biridir. Bir çoxu buranı hipster məhəlləsi kimi tanısa da, Murales de Barranco-nun tarixi və klassik küçələri yerli sakinlərin həyat tərzini və bu məkanda nəfəs alan bohem gecələrini nümayiş etdirən mədəniyyət və sənət ifadələrini özündə barındırır. Əgər siz Peruya səyahət edirsinizsə, İnstaqramınızdakı bütün izləyicilərinizi valeh edəcək şəkillər çəkə biləcəyiniz bu yerə baş çəkməyi yaddan çıxarmayın.

8. Parque de la Amistad de Surco

Dilimizə Dostluq parkı olaraq tərcumə edilən bu parkda siz həm böyüklər həm də balacalar üçün müxtəlif attraksionlar tapa bilərsiniz. Caminos del Inca prospekti ilə Nazarenas küçəsinin kəsişməsində yerləşən 30000 m² bu yerdə siz, Lima şəhərini İnstaqramınızdakı ən xoş xatirəyə çevirəcək şəkillər çəkdirə bilərsiniz.

9. Plaza Mayor de Lima

Perunun paytaxtı - Limaya səyahət edərkən maraqlı fotoşəkillər çəkdirə biləcəyiniz, Plaza de Armas olaraq da bilinən bu məkana getməyi qətiyyən yaddan çıxartmayın.

Meydan paytaxtın tarixi mərkəzində yerləşir və Cənubi Amerikanın ən gözəl meydanlarından biri hesab olunur. Plaza Mayor de Lima ətrafında Lima Kafedralı, Hökümət Sarayı, Bələdiyyə Sarayı kimi gözəl tarixi abidələri də görə bilərsiniz.

10. Kennedy Park

Kennedy parkı Lima şəhərindəki Miraflores bölgəsində yerləşən və çoxlu restoranlar, mağazalar, müəssilərlə dolu mərkəzi bir məkandır. Həmçinin, bu yer "Pişik parkı" kimi tanınır, səbəbi isə Kennedy parkın, sərbəst şəkildə gəzən böyük pişik qruplarına ev sahibliyi etməsidir. Şübhəsiz ki, bunu Limadan başqa bir yerdə görə bilməzsiniz. Bu yerin bohem üslubunda tikilməsini və qeyd etdiyim digər xüsusiyyətlərini nəzərə alsaq, Kennedy parkın İnstaqramlıq yer olduğu ilə, yəqin ki, hamımız razılaşarıq.

11. Cementerio Presbitero Maestro

Limada gecə vaxtı gəziləcək yer axtarışındasınız? Elə isə siz, öz qapılarını gecə vaxtı açan, konqresin tanınmış simaları da daxil olmaqla, tarixin ən tanınmış Peru prezidentlərinin məzarı olan bu tarixi qəbiristanlığa üz tuta bilərsiniz.

Biraz qorxuducu səslənsə də bu məkanda çəkilən şəkillərə ürpərdici, tutqun abu-hava verəcək bir çox tarixi abidələr var. Məzarlıqdakı işıqlandırmaları da nəzərə alsaq, bu yerdə çəkilən şəkillərin İnstaqramdakı effektinin güclü olacağını əminliklə söyləyə bilərik.

12. Museo del Convento de Santo Domingo

Peruya səyahətdən köhnə Limanın şəkillərini çəkmədən qayıtmaq yəqin ki, günah olar. Bu səbəbdən siz mütləq 1535-ci ildə inşa edilmiş, Lima şəhərinin mərkəzində yerləşən Santo Domingo Muzeyini ziyarət etməlisiniz. Binanın içərisindəki kitabxananı, salonu, heykəlləri sanki tarixi bir filmi izlər kimi süzərkən çəkəcəyiniz şəkillər xüsusilə, tarixsevər tanışlarınızda marağa və heyranlığa səbəb olacaq.