Madrid səfəriniz üçün nə götürməli?

Madrid milyonlarla insanın xəyallarının şəhəridir. Memari gözəlliklər, restoranlar, Santyaqo Bernabeu və s. Madridə milyonlarla səyahətçi cəlb edir. Keçən il İspaniyaya təxminən 84 milyon insan səyahət etdi və hər il 6 milyon insan paytaxtı ziyarət edir. İspaniyaya, Madridə səyahət etmək planlarınız varsa, deməli doğru yerdəsiniz. Bu bloqdan Madridə səyahət üçün ən yaxşı vaxtın nə vaxt olduğunu, səyahət üçün nə götürməniz gərəkdiyini və daha çox şeyi öyrənəcəksiniz.

Kiçik çanta götürməyi unutmayın

Bu növ çanta Madriddə çox köməyinizə çatacaq, çünki bura izdiham dolu bir şəhərdir və telefonunuzu, pasportunuzu və ya başqa bir şeyi restoranda və ya başqa bir yerdə unuda bilərsiniz. Madriddə cinayət nisbəti kifayət qədər aşağı olsa da, oğrulara qarşı tədbir almanız yaxşı olar. Bundan əlavə, kiçik çantalar bahalı deyil və onları hər yerdə tapa bilərsiniz. Çantalar Amazon kimi veb saytlarda da mövcuddur və qiyməti cəmi 5 ABŞ dollarından başlayır. Amazonda geniş seçim imkanı sizi gözləyir.

Pover bank backpackerlərin ən yaxşı dostudur

İspaniyaya və ya başqa bir ölkəyə səyahət etmək istəyirsinizsə, özünüzlə portativ şarj alətləri götürməyi unutmayın. Yeni bir ölkədə çox sayda yer gəzəcəksiniz və binaların, yeməklərin, yerli sakinlərin, parkların, meşələrin, çimərliklərin və s. fotolarını çəkmək istəyəcəksiniz. Bu səbəblə sizə enerji dolu telefon lazım olacaq. Çox güman ki, pover bankınız var, amma yoxdursa belə bilin ki, demək olar ki, bütün mobil telefon və digər elektron cihaz istehsalçıları bu cür məhsulların satışını həyata keçirirlər. Bu sahədə böyük bir rəqabət var və bu, qiymət aralığına təsir edir. Tövsiyə etdiyimiz bəzi çeşidlər: Mi Power Bank (20,000 mAh), Corseca DMB2056 (20,000 mAh), Ambrane P-2080 (16,000 mAh), Intex IT-PB15k (15,000 mAh), Lenovo PA13000 (13,000 mAh), və s.

Virtual özəl şəbəkə (VPN)

Şübhəsiz ki, onlayn alış-veriş gündəlik həyatımızın ayrılmaz bir hissəsidir. Hər gün yüzlərlə insan nəsə sifariş etmək və ya satmaq üçün veb saytlardan istifadə edir. Təəssüf ki, fürsətçilər də bu vəziyyətdən sui-istifadə edirlər. Bir çox insanın kredit və bank kartı məlumatları onlayn alış-veriş yolu ilə oğurlanıb. Bu səbəbdən sizə tətiliniz boyunca VPN-dən istifadə etməyinizi məsləhət görürük. Digər məsləhətimiz isə onlayn alış-veriş etmək istədiyiniz zaman yalnız etibarlı veb saytlardan istifadə etmənizdir. Üstəlik bir şey satın almağa qərar verdiyiniz zaman şərhləri və rəyləri də nəzərə alın. Bu, riski minimuma endirməyə kömək edəcəkdir. İstifadə edə biləcəyiniz bəzi virtual özəl şəbəkələr: ExpressVPN, Surfshark, NordVPN, IPVanish, CyberGhost, Private Internet Access və s. Ayrıca müəyyən ölkələrdə fərqli tətbiqetmələr və ya veb saytlara qoşulmaq mümkün olmur. VPN sizə bu məsələdə də kömək edəcəkdir.

Su şüşəsinə ehtiyacınız ola bilər

Avropanın bir çox yerində təmiz su problemi ilə qarşılaşa biləcəyiniz aydındır. Xoşbəxtlikdən İspaniya bu baxımdan şanslıdır, ancaq hər yerdə krandan su içməyinizi məsləhət görmürük. Madriddə çoxlu gəzəcəyinizi və bəlkə də bundan sonra digər ispan şəhərlərini ziyarət edəcəyinizi nəzərə alsaq, özünüzlə su şüşəsi götürməyinizin vacib olduğunu söyləyə bilərik. Bu cür şüşələr ağır deyil və onları bel çantanızda rahatlıqla gəzdirə bilərsiniz. Su şüşəniz filtrli olması daha yaxşı olar. Bu halda özünüzü daha güvəndə hiss edəcəksiniz.

Aktivləşdirilmiş kömür

Səfər üçün götürməniz gərəkən vacib şeylərdən biri də aktivləşdirilmiş kömürdür. İspaniyanın zəngin mətbəxi və ləzzətli yeməkləri olsa da, zəhərlənmə və ishal problemləri ilə qarşılaşa bilərsiniz və bu cür vəziyyətlərdən qaçınmaq üçün aktivləşdirilmiş kömürə ehtiyacınız ola bilər. Daha əvvəl Madridə səfər etmiş səyahətçilərin fikirlərini oxuduqda, əksəriyyətinin yalnız orta və ya yüksək səviyyəli restoranlarda yemək yeməyi tövsiyə etdiklərini görə bilərik. Küçədə hazırlanan və uyğun qaydada saxlanılmayan sendviçlərdən uzaq durmağa çalışın. Dediyimiz kimi İspaniyada dadlı yeməklər sınamaq şansı əldə edəcəksiniz. Tövsiyə edə biləcəyimiz təamlardan bəziləri: patatas bravas, qaspaço, pimientos de padron, fideua, jamon, tortilla və başqaları. Bundan əlavə, şərab sevirsinizsə, sizə Asda Extra Special Albarino, Coto Mayor Crianza, Jaume Serra Cava Organic Brut və s. kimi növlər tövsiyə edə bilərik.

Dəbli bel çantası

Madridə səyahətiniz zamanı şəhər sakinlərinin çox dəbli geyindiklərini görəcəksiniz. Əlbəttə ki, turist olaraq yerli sakinlər kimi geyinmək və ya davranmaq çətin olacaq, amma onları gördükdən sonra daha dəbli görünmək istəyəcəksiniz. Gününüzün çox hissəsini muzeyləri, arxitektura möcüzələrini, parkları, ticarət mərkəzlərini, yerli bazarları gəzməyə sərf edəcəksiniz və bu səyahət əsnasında bel çantanız həmişə sizinlə olacaq. Odur ki, sadəcə bel çantası deyil, dəbli bel çantası almaq vacibdir. Müxtəlif dizaynlı və rəngli bel çantaları çoxdur və sizə uyğun dəbli birini tapmaq asan olacaq.

Rahat ayaqqabılar

Səfər üçün götürməniz gərəkən əşyalara bir digər nümunə rahat ayaqqabılardır. İspaniyada şap-şap ilə avtomobil sürmək qadağandır. Üstəlik çimərliklər xaricində əksər ərazilərdə onlarla gəzə bilməzsiniz. Madriddə və ya ölkənin digər şəhərlərində maşınla və ya piyada gəzməyi planlaşdırırsınızsa, rahat ayaqqabı geyinməlisiniz. Müxtəlif kombinlər etmək istəyirsinizsə, 2 və ya 3 cüt ayaqqabı götürməyiniz daha yaxşı olar. Bundan əlavə, ənənəvi üslublu ispan ayaqqabılarından almağı da unutmayın. Xüsusilə qadınlar üçün geniş sayda çeşid mövcuddur.

Şal qadınlar üçün faydalı ola bilər

Səfər üçün nə götürmək lazımdır? Qadınların götürməsi vacib olan şeylərdən biri yaylıqdır. Tarix və mədəniyyətlə maraqlanırsınızsa, bir çox kilsəni, məscidi və ya digər dini və tarixi yerləri ziyarət etmək istəyəcəksiniz və bu zaman sizə başınızı, bədəninizi örtmək lazım olacaq. Bu məqsədlə götürdüyünüz şallarla müxtəlif tərzlər da yarada bilərsiniz. İspaniyada möhtəşəm ənənəvi şallar var. Onlardan birini Madrid səfəri xatirəsi kimi ala bilərsiniz. Bir az öncə qeyd etmişdik ki, İspaniyada bir çox dini yer var. Madriddə də bu yerlərin sayı kifayət qədərdir, məsələn: Mərkəzi Madrid məscidi, Madrid İslam Mədəniyyət Mərkəzi, Almudena kafedralı, San Fransisko bazilikası, San Sebastian kilsəsi və s.

Günəş eynəyi mühümdür

Günəşli Madridə səyahət üçün nə götürməli? İspaniya Avropanın ən günəşli ölkəsidir. Bu ölkədə ilin 365 günündən üç yüzü günəşlidir, buna görə də özünüzlə mütləq və mütləq günəş eynəyi götürməlisiniz. İspaniya və Madrid turistik və hikinq yerləri ilə doludur, buna görə vaxtınızın çox hissəsini çöldə gəzməklə keçirəcəksiniz. Bu halda isə günəş eynəyi köməyinizə çatacaq. Eynək yalnız gözlərinizin sağlamlığı üçün deyil, həm də günəş altında gəzərkən rahat hiss etməniz üçün vacibdir. Üstəlik günəş eynəyi həm qadınlar, həm də kişilər üçün əla bir aksessuardır. Sizə sirr və cazibə qatacaq.

Sevimli komandanızın köynəyini unutmayın

İspaniya mədəni yerlər, çimərliklər, içkilər, yeməklər, ənənəvi paltarlar və daha bir çox şey ilə məşhurdur. Şübhəsiz ki, qeyd etməmiz gərəkən xüsusiyyətlərdən biri də futboldur. Ölkənin milli komandası və futbol klubları bir çox müsabiqədə qalib gəlib və bu səbəbdən də dünyanın hər yerində çox sayda pərəstişkara sahibdirlər. Ölkənin ən məşhur futbol şəhərlərindən biri də Madriddir. Son illərdə iki məşhur klub - Atletiko Madrid və Real Madrid Avropada səs salıb. Bundan əlavə, bu iki komanda arasındakı matçlar böyük marağa səbəb olur. Bu rəqabətin uzun bir tarixi var. Madridə səyahət zamanı sevdiyiniz komandanın oyunlarına gedə, həmçinin klubun stadionuna və muzeyinə edilən turlarda iştirak edə bilərsiniz.

Xüsusilə Real Madrid azarkeşisinizsə, tətilinizi dünyanın ən həyəcanlı derbisi olan El Klasiko ilə eyni vaxta sala bilərsiniz. Bu matçı neçə nəfərin izlədiyini bilirsinizmi? Əzəli derbini hər il hardasa 2,5 milyard insanın izlədiyi təxmin edilir.

Günəş kreminə ehtiyacınız olacaq

Daha əvvəl də dediyimiz kimi, İspaniya çox günəşlidir və çimərliklərə getmədən belə günəş yanıqlarınız ola bilər. Bu səbəbdən də özünüzlə günəşdən qoruyucu kremlər götürmənizi məsləhət görürük. Bazarda çoxlu günəş kremi növləri mövcuddur və ilk dəfə satın alırsınızsa, uyğun birini seçmək çətin ola bilər. Buyurun, mükəmməl bir günəş kremi seçmək üçün bilməniz gərəkən bəzi şeylər. Hər şeydən əvvəl günəş yanıqlarının bir çox növü olduğu üçün kreminiz geniş spektrli qorumaya sahib olmalı və bədəninizi hər növ zərərdən qorumalıdır. İkinci əsas məsələ isə kremin suya davamlı olmasıdır. Alacağınız günəş kreminin SPF 30+ olmasına da diqqət yetirin.

Madridə səyahət üçün ən yaxşı vaxt nə vaxtdır?

Sonda isə potensial səyyahların ən çox soruşduğu sualı cavablandırmaq istəyirik: Madridə səyahət etmək üçün ən yaxşı vaxt nə vaxtdır? Bu əsasən sizin prioritetlərinizdən asılıdır. Canlı şəhərlərə üstünlük verirsiniz? Onda Madridə payızda (sentyabr-noyabr arasında) və ya mart-may ayları arasında getməlisiniz. Yox əgər siz soyuq havanı, ucuz qiymətləri və sakit şəhəri sevirsinizsə, İspaniyanın paytaxtı Madridi qışda ziyarət edə bilərsiniz.