Elə indi Monakoya səyahət etməyiniz üçün 12 səbəb

Dünyanın ən kiçik ölkələrindən biri olan, lakin möcüzələrlə dolu bir ölkə - rəsmi olaraq Monako Knyazlığı kimi bilinən Monako. Tarixi yerlərin müasirliklə mükəmməl təzahürü. Monakoya səyahət edərkən gözəl binalara, eleqant kafe və restoranlara, eləcə də dinc küçələrə heyran qalacağınıza əmin ola bilərsiniz. Əminəm ki, çoxunuz bu ölkənin harada yerləşdiyini bilirsiniz, amma yenə də təkrar edək. Bu suveren şəhər-dövlət Qərbi Avropada yerləşir. Fransız Rivierasında yerləşən Monako ilə həmsərhəd olan yeganə ölkə Fransadır. Ümumi sahəsi 2.02 kvadrat kilometr olan ölkənin əhalisi təxminən 39.000 nəfərdir. Monako əhalisi ölkənin yüksək iqtisadi inkişafı sayəsində lüks həyat tərzi yaşayır. Əhalinin təxminən 60%-i fransızca, qalanları fərqli ləhcələrlə (Ligurian və Oksitan dilində) italyan dilində danışır. Monako Knyazlığının hökmdarı II Albertdir. Onun bacısı Monako Şahzadəsi Stefani ölkəni beynəlxalq səviyyədə təmsil edən məşhur müğənni və modelyerdir.

Monako bayrağı qırmızı və ağ rənglərdən ibarətdir. Bəzi insanlar Monako və İndoneziyanın demək olar ki, eyni bayraqlara sahib olduqlarını düşünürlər. Ancaq onları fərqləndirməyin yolları var. Birincisi, bayraqların ölçüsü və ya nisbəti fərqlidir. İndoneziyanın bayrağı Monako bayrağına nisbətən daha böyükdür. İkincisi, Monako bayrağından fərqli olaraq İndoneziyanın bayrağındakı qırmızı rəng nisbətən daha açıqdır. Bu iki kiçik element xaricində iki ölkənin bayraqlarını fərqləndirməkdə çətinlik çəkə bilərsiniz. 1945-ci ildə İndoneziya öz müstəqilliyini elan edəndə, Monako İndoneziyanın az qala eyni bayrağı qəbul etməsinə etiraz etdi. Ancaq bu nəticə vermədi və indi hər iki ölkə eyni rəngli bayraqlardan istifadə edir.

Monakoda nə etməli? Bir çox şey var, ancaq bunlar arasında ən yaxşıları ölkənin ən yaxşı oteli olan Hotel de Paris Monte-Carlo-da gecələmək və ya II Albert və Monako Şahzadəsi Stefaninin sarayını ziyarət etməkdir. İndi isə keçək Monakoya səyahət üçün 12 səbəbə.

1. Monako şəhəri

Monakonun köhnə şəhərini tam olaraq kəşf etmək üçün ən azı iki saat sərf edəcəksiniz. İnstaqramlıq şəkillər çəkməyi dayandıra bilməyəcəksiniz, çünki ətrafınız çox gözəl mədəni və tarixi yerlərlə dolu olacaq. Burada orta əsrlərdə inşa edilmiş bir çox bina və saray tapa bilərsiniz. Xiyabanlar arasında gəzərkən birdən özünüzü "Place du Palais"-də tapacaqsınız. Ancaq bir şeyi qeyd edim ki, sarayı 11:50-də kəşf edin. Həmin vaxt mühafizəçilər çox tarixi və ənənəvi bir şəkildə növbə dəyişir.

2. Fonvey

Zəngin tarixi yerlər ilə yanaşı, modernliyi qurmaq üçün yüksək texnoloji imkanlarından istifadə edərək özünü dənizdən “çıxarmış” Fonveyi də qeyd etməliyik. Distrikt Monako FK-nin ev oyunlarını oynadığı II Lui stadionuna sahib olduğu üçün futbol azarkeşlərinə ev sahibliyi edir. Xüsusilə Çempionlar Liqası matçları olduqda dünyanın müxtəlif yerlərindən gələn insanlara qapılarını açan bölgənin dinamizmində artım qeydə alınır.

3. Monako instaqramlıq yerlər ilə doludur

Monakoda nə etməli? Əlbəttə ki, İnstaqram hesabınızda paylaşmaq üçün çoxlu şəkillər çəkməli. Monakonun hər bir küçəsi, guşəsi və binası o qədər qəşəngdir ki, hər yerdən şəkillərinizin olmasını istəyəcəksiniz. Monako Vill, Monte-Karlo, Fonvey, Tete de Chien və s.- bu yerlərdə çəkdiyiniz şəkillər bütün sosial media hesablarınızın qalereyalarınızı bəzəyəcək. Monako turizm sənayesinin rəsmi veb səhifəsində səyahətinizi ən yaxşı şəkildə yaşamaq üçün sizə kömək edəcək mükəmməl bir bələdçi səhifəsi var.

4. Monako turları

Uşaqlıqda hər birimiz parklardakı əyləncə qatarlarına minməyi sevirdik. “Monaco Tours” da sizə məhz bu əyləncəni yenidən yaşayıb uşaqlığınızı xatırlamaq, üstəlik şəhərlə tanış olmaq imkanı təklif edir. Tur təxminən 30 dəqiqə davam edir. Okeanoqrafiya muzeyindən yola çıxan qatar Formula 1 Qran-pri dövrəsi, Monte-Karlo, Köhnə şəhər və s. daxil olmaqla bir çox görməli yerlərdən keçir.

5. Trophee d'Auguste

Monakoya təxminən 1100 metr məsafədə olan La Turbie kommunasında (Fransa) Trophee d'Auguste-i tapacaqsınız. Əslən təxminən 2000 il əvvəl inşa edilmiş Trophee d'Auguste İmperator Augustusun nəhəng heykəli ilə birgə 49 metr hündürlüyə sahib idi. Monument La Turbienin qürurudur. Yerlilər Trophee d'Auguste və Auguste muzeyini ziyarət etməyi şiddətlə tövsiyə edirlər.

6. Marineland

Monakoda heyvansevərləri sevindirəcək bir şey var. "Marineland Corporate Foundation" su heyvanlarını və bioloji müxtəlifliyi qorumaq məqsədilə bu parkı yaradıb. Marineland ictimai məlumatlılığı artırmaq, tədqiqat layihələrini dəstəkləmək, mədəniyyət və bilik yaymaq üçün yerdir. Burada peşəkar təlimçilərin rəhbərliyi ilə heyvanların ifasında su şoularına baxa biləcəksiniz. Təlimçilər hər şoudan sonra tamaşaçıların suallarını cavablandırırlar.

7. Antoine qalası

Monakoda kəşf etməniz gərəkən başqa bir gözəl yer Antoine qalasıdır. 18-ci əsrdə inşa edilmiş qala II dünya müharibəsi zamanı ziyan görmüş və məhv edilmişdir. 1953-cü ildə isə əvvəlki cazibəsini geri qazanmış, yenidən qurulmuşdur. Bu gün "Fort Antoine"-də tarixi hərbi memarlıq, gözətçi qüllələri və kiçik açıq hava teatrı tapa bilərsiniz. Əvvəlki əsrlərin qalıqlarından zövq alarkən heyrətləndirici instaqramlıq şəkillər çəkmək üçün ideal məkan!

8. Kilsələr

Monakoda öz memarlıq dizaynları ilə qonaqları heyran edən çoxlu kilsələr var. Ən məşhur kilsələrdən biri, 1875-ci ildə Roma-Bizans üslubunda inşa edilmiş Monako kafedralıdır. İntibah dövrü üslubu ilə Saint-Charles kilsəsi ziyarətçilərini ovsunlamağı bacarır. Tarixi kökləri XI əsrə gedib çıxan Sainte-Devote kilsəsi də ziyarətə dəyər başqa bir kilsədir. Ümumiyyətlə, kilsələrin zərif dizaynı bir çox turistin diqqətini çəkir.

9. Möhtəşəm çimərliklər

Monako haradadır? Fransanın cənubunda, yəni Aralıq dənizi ilə sərhəddə. Hamımızın bildiyi kimi, Aralıq dənizi üzmək və digər su fəaliyyətlərindən zövq almaq üçün əla bir yerdir. Bu baxımdan Monako sizə Larvotto Beach, Crique des Pecheurs və Solarium Beach seçimlərini təklif edir. Larvotto çimərliyi şəhər kənarında yerləşir və gün ərzində çimərlikdə dincəlməyi, sonra da qəşəng bir restoranda şam yeməyi etməyi asanlaşdırır.

10. Hotel de Paris Monte-Carlo

Monakoda bir çox əla və lüks otel var. Xüsusi vurğulananlardan biri də Hotel de Paris Monte-Carlo-dur. Otel mütləq şəkildə Avropanın ən yaxşılarından biridir. Bu beşulduzlu otel 1864-cü ildən bəri qonaqlara xidmət göstərir. Əfsanəvi "Place du Casino"-da yerləşən Hotel de Paris Monte-Carlo 208 otaq və maksimum lüks və rahatlıqla 96 suit təklif edir.

11. İl boyu əyləncəli tədbirlər

Monako turizm sənayesinin rəsmi veb səhifəsi müntəzəm olaraq ziyarətçilərin əyləncəsini təmin etmək məqsədi ilə gündəlik, həftəlik və aylıq fəaliyyətləri dərc edir. Bundan başqa, qonaqların səyahət üçün ən yaxşı vaxtı seçmələrinə kömək edir və əsas tədbirlərin və festivalların illik təqvimini təqdim edirlər.

12. İnanılmaz muzeylər

Monako müasirliyi ilə yanaşı, mədəni irsi və tarixi ilə də lovğalanır. Monakoda bu şəhər-dövlətin mədəni əsaslarını əks etdirən çoxlu muzeylər tapa bilərsiniz. “Prince's Palace of Monaco” 12-ci əsrə aiddir və tarix boyu bir neçə dəfə təmir edilmişdir. Muzey kimi fəaliyyət göstərən saray ziyarətçilər üçün açıqdır. Ziyarət etməniz gərəkən digər muzeylərə Nouveau Musee National de Monaco - Villa Sauber, Naval Museum, Musee d’Anthropologie prehistorique de Monaco və s. daxildir.

Monakoya necə getmək olar?

Monakoya təyyarə ilə necə getmək olar? Təəssüf ki, Monakoda hava limanı yoxdur. Avropa daxilindəsinizsə, Monakoya getmək üçün avtomobil, avtobus və ya qatar kimi bir çox seçiminiz var. Ancaq qonşu ölkələrdən çox uzaqda yaşayırsınızsa, Monakoya səyahət etməyin ən yaxşı yolu Fransanın Nice Cote d'Azur Hava Limanıdır. Daha sonra Monakoya hava limanı servisi olaraq xidmət göstərən 110 nömrəli avtobusa minə bilərsiniz. Həmin hava limanından Monakoya çatmaq təxminən 40 dəqiqə çəkir.

Monakoya səyahət üçün ən yaxşı vaxt

Monakoya ilin bütün fəsillərində səyahət edə və bundan zövq ala bilərsiniz. Ümumiyyətlə, iqlim illik turizm üçün çox uyğundur. Ancaq bəzi insanlara görə, Monakoya səyahət üçün ən yaxşı vaxt aprel-noyabr ayları arasıdır. Bəzi turistlər isə oktyabr və aprel aylarının Monakonu kəşf etmək üçün ideal bir vaxt olduğunu söyləyirlər. Bu zaman dilimi, Monako otellərində endirimli qiymətlərdən yararlanıb, havanın şəhərləri kəşf etmənizə imkan verəcək qədər mülayim olduğu vaxtdır.