Nyu-Yorka deyil də Çikaqoya səyahət etməniz üçün 10 səbəb

Fürsətlər ölkəsi olan ABŞ-ı ziyarət etməyi kim istəməz? Hər kəs amerikan xəyalını yaşamaq üçün ABŞ-a səyahət etməyi arzulayır. Dünyanın iqtisadi liderlərindən olan ABŞ, hər il turizm vizası, J-1 vizası və s. ilə milyonlarla insan tərəfindən ziyarət edilir. Ölkədə Boston və Nyu-York kimi bir çox möhtəşəm şəhərlər var. Nyu-York şəhəri ABŞ-da ən çox ziyarət edilən şəhərdir. Ancaq mən bu yazıda diqqətinizi ABŞ-ın başqa bir gözəl şəhərinə - Çikaqoya cəlb etmək istəyirəm. Nəyə görə Çikaqoya səyahət etməlisiniz? Çikaqoda nə etməli? Çikaqoda haranı ziyarət etmək olar? Çikaqoda ziyarət edilməsi gərəkən bir çox heyrətləndirici yerlər var. Əminəm ki, bu məqsədlə sadəcə Millennium Park-ın adını qeyd etmək kifayətdir.

Çikaqoya səyahət üçün ən yaxşı vaxt nədir? Çikaqoya səyahət üçün ən yaxşı vaxt aprel-may aylarından oktyabr ayına qədər olan müddətdir. Bu müddət ərzində şəhərin havası əla bir yay keçirməyinizi təmin edəcək qədər isti olacaq. Yay aylarında Çikaqoda müxtəlif festivallarda da iştirak edə bilərsiniz. İndi isə Çikaqoda görməli yerlər və Çikaqonun niyə Nyu-Yorkdan üstün olduğu barəsində danışaq.

1. Münasib qiymətlər

Ümumiyyətlə, büdcə ilə səyahət edirsinizsə, ABŞ ziyarət etmək üçün bahalı bir yerdir. Bu xüsusiyyət həm də Nyu-York və Çikaqo arasındakı kəskin fərqdir. Çikaqoda demək olar ki, hər şey Nyu-Yorkdan daha sərfəlidir. Əlbəttə ki, Nyu-Yorkda daha çox insanın yaşaması və şəhərin ABŞ-ın əsas prestijli şəhərlərindən biri olması baxımından bu başa düşüləndir. Əmin ola bilərsiniz ki, Amerika Birləşmiş Ştatlarına səyahət edərkən Nyu-York yerinə Çikaqoya səyahət etsəniz daha az pul xərcləyəcəksiniz. Nyu-York ilə müqayisədə Çikaqoda yatdığınız yataqdan pivənizə qədər hər şey nisbətən daha ucuzdur. Xüsusilə qonaqlama ilə əlaqədar olaraq deyə bilərik ki, qalacağınız yeri Çikaqoya getməzdən əvvəl “book” etməklə, pulunuza qənaət edə bilərsiniz. Bundan əlavə, nəqliyyat da Çikaqoda daha ucuzdur. Burada bir gedişə 2.50 $ ödəməli olacaqsınız, halbuki bu qiymət Nyu-Yorkda 2.75 dollardır. Limitsiz kartlara gəldikdə, Nyu-Yorkla müqayisədə Çikaqoda 12 dollar qazana bilərsiniz.

2. Miçiqan gölü

Çikaqonu Nyu-Yorkdan daha yaxşı edən başqa bir şey də Miçiqan gölüdür. Çikaqoya səyahət üçün ən yaxşı vaxt haqqında düşünürsünüz? Daha əvvəl də qeyd etdiyim kimi, Çikaqoya baharın sonundan oktyabr ayına qədər səyahət etmək ən yaxşısıdır. İsti hava Çikaqoda ən gəzməli yerlərdən biri olan Miçiqan gölündən zövq almanıza imkan verəcəkdir. Miçiqan gölündə bir çox fəaliyyətlə məşğul ola bilərsiniz. Birincisi, North Avenue Beach, Hollywood Beach, South Shore Beach və 12th Street Beach kimi qızıl qumlu çimərliklərdən zövq almaqla göldə əla vaxt keçirə bilərsiniz. Bundan başqa, kayakinq, avarçəkmə, gəmi turu, quş seyri, balıq ovu və velosiped sürmə kimi aktivitiləri də sınaya bilərsiniz. Bu fəaliyyətlərdən başqa, atəşfəşanlığı sevirsinizsə, Dörd iyulda (Müstəqillik günü) Çikaqoya getmək şansını qaçırmayın. Miçiqan gölü üzərində göz qamaşdıran atəşfəşanlıqdan zövq alacaqsınız.

3. Daha yaxşı nəqliyyat xidməti

Nyu-York şəhərindən fərqli olaraq, Çikaqo hava limanları daha əlçatandır. O'Hare və Chicago Midway kimi hava limanlarından şəhərə getmək su içmək qədər asandır. Midway Beynəlxalq Hava Limanından şəhər mərkəzinə getmək üçün Orange Line qatarını, O'Hare Beynəlxalq Hava Limanından şəhərin qərb məhəllələrinə getmək üçün isə Blue Line qatarını seçə bilərsiniz. Çikaqodan fərqli olaraq, Nyu-York şəhər mərkəzindən Con Kennedi adına beynəlxalq aeroporta getmək o qədər də sadə deyil və rahatlığınız üçün taksiyə ehtiyacınız olacaq. Ayrıca, Çikaqoda metrodan istifadə etmək üçün yeraltına enmək məcburiyyətində qalmayacaqsınız. Bunun əvəzinə, çoxlarının üstünlük verdiyi Chicago "L"-i seçə bilərsiniz. Bu, Çikaqo əhalisinə xidmət edən sürətli tranzit sistemidir. Yerin altında deyil, binaların arasında gəzməsi onu ənənəvi metrodan daha yaxşı nəqliyyata çevirir.

4. Daha az izdiham və təlaş

Əminəm ki, Nyu-Yorkda olmuş hər kəs şəhərin təlaş və izdiham dolu olduğunu təsdiqləyə bilər. Bəzən bu, həqiqətən də baş gicəlləndirir. Şəhər mərkəzində olanda hər kəsin bir şey üçün tələsdiyini hiss edirsən. Bir çox insan telefonda işdən danışır və işə tələsir. Manhettendə olanda elə hiss edirdim ki, hamı üstümə gəlir. Nyu-Yorku hiperaktiv şəhər adlandırsam, yanılmaram. Çikaqo və digər şəhərlərlə müqayisədə, məsələn Boston, Nyu-Yorkda küçələr o qədər də təmiz deyil. Gecə Nyu-York küçələrində bir yığın zibil tapa bilərsiniz. Çikaqo küçələrinin və havasının bir qədər təmiz olması onu daha sevimli bir yerə çevirir.

5. Uillis Tauer

Çikaqo göydələnlərin vətənidir. 1871-ci ildə şəhərdə bədnam bir yanğın hadisəsi baş verdi, bundan sonra isə aktiv yenidənqurma prosesi başladı. 1884-cü ildə Çikaqoda on mərtəbəli Ev Sığortası Binası (Home Insurance Building) tikildi və bu, dünyadakı ilk göydələn oldu. İlk göydələnlərin ən yaxşı nümunələrindən biri də Çikaqodakı Uillis Tauerdir. İnşası tamamlandıqdan sonra bu 110 mərtəbəli bina, Nyu-Yorkdakı Dünya Ticarət Mərkəzini keçərək həmin dövrün ən hündür binasına çevrildi. Uillis Tauerin hündürlüyü 442,1 metrdir və dünyanın 21-ci ən hündür binasıdır.

6. Field muzeyi

Çikaqoda haranı ziyarət etməli? Mən sizə Field muzeyini ziyarət etmənizi tövsiyə edərdim. 1893-cü ildə qurulan muzey öz növünün ən böyük muzeylərindən biridir. Dünyadakı müxtəlif mədəniyyətləri və mühitləri təmsil edən əşyaları görə biləcəyiniz bu böyük muzey qədim mədəniyyətləri təmsil edən eksponatları, son elmi kəşfləri və 20 milyondan çox əşyası ilə dünyanın ən yaxşı muzeylərindən biridir. Qədim Misir türbəsini, Yer üzündə yaşamış ən böyük məxluqun (Maximo Titanosaur) skeletini və s. araşdırmaqdan zövq alacaqsınız. Daimi eksponatlar sırasında Evolving Planet, Cyrus Tang Hall of China, Underground Adventure və s. qeyd etmək mümkündür.

7. Yemək

Çikaqoda nə etməli? Əlbəttə ki, yeməkdən zövq almalı! Doğrudur ki, Nyu-Yorkda restoran və kafelərlə bağlı daha çox seçim var. Ancaq Çikaqodakı qiymətlər daha münasibdir. Burada meksikan, italyan, Koreya və türk yeməkləri də daxil olmaqla, dünyanın hər yerindən olan yeməklər ucuzdan çox bahalı yeməklərə qədər geniş bir seçim yelpazəsində təqdim olunur. Bir Nyu-York sakinini Çikaqoya gətirin və qiymətlərin nə qədər məqbul olduğunu onun özündən eşidin. Çikaqonun əla “deep-dish” pizzalarını və hot-doglarını dadmağı unutmamalısınız.

8. Yaşam rahatlığı

Daha əvvəl də qeyd etdiyimiz kimi, Çikaqo münasiblik baxımından daha yaxşı nəticə göstərir. İctimai nəqliyyat yaxşıdır və nisbətən ucuzdur. Qonaqlama və yemək qiymətləri də Nyu-Yorkdan daha münasibdir. Ümumiyyətlə, Nyu-Yorkda həyat çətindir, yaxşı bir yaşam üçün davamlı tələsmək lazımdır. Şəhərin mərkəzinə yaxın bir yerdə yaşayırsınızsa, səs-küydən və sıx tıxacdan çox yorulacağınıza əminəm. Bunun əksinə, Çikaqoda ərzaq məhsulları və digər ehtiyaclar üçün gəzmək olduqca asandır. Nyu-Yorkdan daha təmizdir. Miçiqan gölü sahilində qaçışdan və velosiped sürməkdən də zövq alacaqsınız.

9. Möhtəşəm parklar

Çikaqoda görməli yerlər arasında gözəl parklar da var. Millennium Park öz gözəlliyi və “Bean” kimi tanınan Cloud Gate ilə dünya miqyasında məşhurdur. Çikaqoya getmək və bununla şəkil çəkdirməmək böyük bir səhv olardı. Şəhər mərkəzindəki yerləşimi ilə, “Bean” Çikaqonun əsas turistik simvollarından biri oldu. İstirahət etmək üçün bir digər möhtəşəm park Lincoln parkıdır. Şəhərin ən varlı məhəllələrindən birində yerləşən bu parkın içərisində zoopark da var. Ümumiyyətlə, Çikaqoya səyahət edərkən şəhərdə bir çox gözəl parkın olduğunu görəcəksiniz. Adı çəkilənlərdən başqa, Grant Park, Garfield Park və s. ziyarət edilməsi mütləq olan parklardır.

10. Miqdar və keyfiyyət

ABŞ-ın ən böyük şəhərində, yəni Nyu-Yorkda yaşamağın müsbət və mənfi tərəfləri var. Buradakı açar söz "ən böyük şəhər"dir. Vaxtınız limitlidirsə, bir turist olaraq, Nyu-Yorkdan daha çox Çikaqoya səyahət etməkdən zövq alacağınıza əminəm. Çikaqo keyfiyyətli turistik attraksionları, otelləri, restoranları və barları olan böyük bir şəhərdir. Məhdud vaxt ərzində Çikaqoda ziyarət etmək üçün ən yaxşı yerlərin çoxunu görə bilərsiniz.

Qısa xülasə

Bu gün ABŞ-ın ən gözəl şəhərlərindən biri olan Çikaqo haqqında danışdıq. Bloqda bu suallara cavab tapdıq: Çikaqoda nə etməli? Çikaqoda hansı yerləri ziyarət etmək olar? Çikaqoya səyahət üçün ən yaxşı vaxt nədir? Ümumilikdə isə niyə Çikaqonun Nyu-Yorkdan daha yaxşı səyahət seçimi olduğunu açıqladıq.