Pakistana səyahətdən əvvəl bilsəydim dediyim 10 şey

Pakistan gözəl landşaftlar, dağlar, təpələr, səhralar, meşələr diyarıdır. Pakistanda dörd fəslin hər biri müşahidə edilir, beləliklə ölkənin sərhədləri daxilində ən parlaq günəşli günə, eyni zamanda kəskin qar yağışına şahidlik edə bilərsiniz. Qayalı treklər, dağlar və zirvələr alpinistləri il boyunca Pakistana cəlb edir, lakin turistlər son siyasi hadisələr və təhlükəsizlik situasiyası ilə əlaqədar olaraq Pakistanı kəşfə çıxmaqdan çəkinirlər. Pakistana səyahət etmək təhlükəsizdirmi? Cavabım budur ki, bu daha çox Pakistana necə və hansı bölgəsinə getməyinizdən asılıdır. Ayrıca, Pakistana səyahət etməyi planlaşdırırsınızsa, müəyyən şeyləri bilmək güvəndə olmanıza kömək edəcək. Gəlin, Pakistana səyahətdən əvvəl bilməniz gərəkən 10 fakta nəzər salaq.

1. Pakistana səyahət etmək təhlükəsizdirmi?

Pakistan son bir neçə il ərzində bir çox terror hadisəsi ilə qarşılaşdı və daha sonra elə faktlar və videolar ortaya çıxdı ki, çoxları Pakistanı terrorizmin vətəni elan etdi. İnsanlar bu gözəl diyara istər istirahət, istər də turistik məqsədli səyahəti boykot etdilər, lakin hal-hazırda vəziyyət nəzarət altındadır. Buradakı insanlar həqiqətən dincdirlər, səlahiyyətlilər isə ölkəni terrordan təmizləməkdə müvəffəqdirlər.

Pakistanın ucqar və uzaq bölgələrinə getməyi planlaşdırmadığınız təqdirdə, buraya səyahət etmək təhlükəsizdir. Ayrıca, ziyarətiniz boyunca sizə lazımi təhlükəsizliyi təmin etmək üçün səlahiyyətlilərə müraciət edə bilərsiniz.

2. Viza almaq indi daha asandır

2019-cu ilin may ayından əvvəl turistlər Pakistana 30 günlük viza əldə etmək üçün ölkələrindəki Pakistan səfirliklərinə müraciət etməli idilər və bu asan bir proses deyildi. Ancaq qeyd edilən tarixdən sonra Pakistan, E-viza xidmətinə başladı. Səlahiyyətli şəxslər, təxminən 176 ölkə üçün E-Viza xidmətləri təklif edərək insanların Pakistana səyahət etməsini asanlaşdırdılar. Hətta 50-dən çox ölkənin vətəndaşları vizanı Pakistana çatdıqda əldə edə bilərlər. Əksər səyahətçilər viza alma müddətinin 7-10 gün olduğunu iddia edirlər, hansı ki, əvvəllər bu müddət 1 aydan çox idi.

Viza müddətinin uzadılması da əvvəllər çox çətin prosedur idi, lakin artıq bununla bağlı da müsbət dəyişikliklər var. Pakistanda olarkən E-viza və ya adi vizanızın keçərlilim müddətini yalnızca yaxınlıqdakı pasport ofisə gedərək və ya E-viza portalından uzada bilərsiniz.

3. Əsas sənədlərinizi götürməyi unutmayın

Pakistan dövləti ölkədə sülhü təmin etmək və terrorizmə qarşı mübarizə üçün çox şey edib. Çin və Əfqanıstanla açıq sərhəd olması səbəbi ilə, burada qeyri-qanuni immiqrantların olması ehtimalı var. Asayişi qorumaq məqsədilə sizdən demək olar ki, bütün şəhərlərin giriş və çıxışında yerləşdirilmiş təhlükəsizlik məntəqələrindən keçməniz tələb olunur. Kim olduğunuzu bildirən sənədlər olmadan hərəkət etməniz sizi təhlükəyə ata bilər. Bu səbəbdən, xüsusilə yerli nəqliyyat vasitələri ilə səyahət edərkən hər hansı bir gözlənilməz vəziyyətdən qaçınmaq üçün bütün lazımi sənədlərinizi, pasportunuzu çantanızda saxlamalısınız.

4. Yer üzərindəki cənnət

Dünyanı səyahət edən insanların ortaq motivasiyası nədir? Ən əsas ideya əyləncəli vaxt keçirməkdir və hamının bunun üçün müxtəlif variantları var. İnsanlar xizəklə sürüşmək, qayıqla gəzinti, hikinq və ya sadəcə təbiətin gözəlliyini kəşf etmək məqsədi ilə Pakistana səyahət edirlər. Ölkədə hər şey tapa bilərsiniz: çaylar, şəlalələr, dəniz, onların ətrafında kurortlar və s.

• Dünyadakı ən yüksək 14 zirvədən beşi burada olduğundan, ölkə alpinistlər və hikerlər üçün cənnətdir.

• Pakistanın gözəl vadiləri, meşələri və buzlaqları, təbii olaraq meydana gələn turistik nöqtələri bir sözlə valehedicidir.

Heyif ki, resurs çatışmazlığı səbəbindən dolayı, bu ölkə potensial turizm qabiliyyətini ortaya qoya bilmir.

5. Ziyarət etməniz gərəkən yerlər

Tarix boyunca Pakistan müxtəlif dövrlərdə fərqli imperatorlar tərəfindən idarə edildi və onların hər biri ölkədəki tikililər üzərində bir iz buraxdı. Pakistan ərazisində kəşfiyyata çıxarkən bir çox tarixi və qədim məkan tapacaqsınız.

• Paksitana səyahət etməklə Muğal memarlıq nümunələrini ziyarət və müxtəlif məscid və qala tikililərinə yaxından baxmaq imkanı əldə edə bilərsiniz. Əlavə olaraq isə, səfəriniz zamanı Britaniya Hindistanı dövründə inşa edilmiş və bu günə qədər fəaliyyət göstərən bir çox körpü, kilsə və yola rast gələcəksiniz.

• Bir zamanlar Marko Poloya yoldaş olmuş və ən qədim ticarət yollarından biri olan Böyük ipək yolunda səyahət…

• Pakistanı Çinlə birləşdirən Karakoram magistral yolunda iki ölkə arasında mal idxalı və ixracı edən yük maşınlarına şahid ola bilərsiniz.

6. Hər şey çox ucuzdur

Pakistan o qədər ucuz yerdir ki, yaşayış, yemək və ölkə içi səyahət daxil olmaqla turistik faəliyyətlərinizə həftədə cəmi 100 dollar xərcləməklə səyahətinizdən zövq ala bilərsiniz. Ölkəni gəzikcə bir çox əl işlərinə, yerli mallara, ənənəvi qida məhsullarına və ucuz qiymətə ala biləcəyiniz suvenirlərə rast gələcəksiniz. Məlumatlarla əsasən deyə bilərik ki, olduqca məqbul qiymətlətlə qatarla, avtobusla, hətta Careem və Uber kimi beynəlxalq taksi xidmətləri vasitəsi ilə səyahət edə bilərsiniz.

Məsləhət: ucuz qiymətlərə baxmayaraq bazarlıq etməyi unutmayın. Demək olar ki, bütün satıcılar sövdələşməyə açıqdır və beləcə pulunuza qənaət edə bilərsiniz.

7. Nə olursa olsun mədəniyyətlərə hörmət etməlisiniz

Pakistan mədəniyyətində o qədər müxtəliflik var ki, burada bir tərəfdə ifrat islam tərəfdarlarını, digər tərəfdə isə başqa din nümayəndələrini görə bilərsiniz. Böyük şəhərlər isə özlərini qərbləşdirməyə başlayıb. Pakistanda hansı dildə danışılır? Ümumiyyətlə, bura insanların əksəriyyətinin mühafizəkar düşüncəyə sahib olduğu ölkədir və bu səbəblə onlarla münasibət qurarkən diqqətli olmalısınız. Pakistanda rəsmi dillər isə urdu və ingilis dilidir.

8. Qonaqpərvərlik pakistanlıların həyat tərzidir

Pakistanlı bir ailənin sizə ev sahibliyi etmək şansını əldə etsəniz, özünüzü krallar kimi hiss edəcəksiniz. Onlar sizin üçün iki-üç yerli yemək hazırlayacaq, sizi evlərinin ən gözəl otağında qonaq edəcək və rahatlığınızı təmin etmək üçün heç nəyi əsirgəməyəcəklər. Çünki onlar üçün qonaq Allahın lütfidir. Həmin ailəni illər sonra yenidən ziyarət etsəniz, onlar sizi yenə həmin qonaqpərvərliklə qarşılayacaqlar. Beləliklə, qonaqpərvərlik onların həyat tərzi və dinlərinin bir parçasıdır desək səhv etmərik.

9. Hava proqnozu və səyahət

Pakistan daxilində səyahət edərkən nəzər yetirməniz gərəkən amillərdən biri də hava şəraitidir. Bəli, burada nəinki Pakistan mədəniyyəti, hava şəraiti də çox müxtəlifdir. Şimal bölgəsi yay aylarında belə çox soyuqdur və orada qalarkən isti geyimlər geyinməlisiniz. Bundan əlavə, ölkədə çox günəşli bir gündən sonra, güclü yağışla qarşı-qarşıya qala bilərsiniz. Odur ki, hava proqnozlarını diqqətlə dinləyin.

10. Pul burada hər şeyi ala bilər

Pakistan ehtimallar ölkəsidir və bəzən burada doğurdan qeyri-adi hadisələr görə bilərsiniz. İslam ölkəsi olması səbəbi ilə, alkoqol, narkotik, fahişəlik və s. qarşı sərt qanunları var və onları qətiliklə qadağan edir. Ancaq ölkədə hər hansı bir qanuni problemlə qarşılaşsanız, cəsarətli olub bir az pul xərcləyərək problemi asanlıqla həll edə bilərsiniz.

Pakistana səyahət etmək unudulmaz təcrübədir, inanın mənə. Ziyarətinizi hamıya, hətta nəvələrinizə belə danışmaq istəyəcəksiniz. Pakistan xalqının qonaqpərvərliyinə və sizi necə mehriban qarşılamasına heyran qalacaqsınız. Hər şeyi çox ucuz qiymətlərlə əldə etmək şansınız olacaq. Beləliklə, minimum xərclərlə maksimum əyləncə üçün Pakistanı növbəti səyahət yerinizə çevirin.