San Marino macəralarım

San Marino haradadır?

Sizə İtaliya ilə əhatə olunmuş kiçik bir dağlıq əyalətdən - San Marinodan danışmaq istərdim. İlk dəfə 2016-cı ildə İtaliyanın şəhərlərinə səyahətim zamanı bu ölkəni ziyarət etdim. San Marino dünyanın ən kiçik və Avropanın ən qədim ölkələrindən biridir. Bura qədim memarlıq abidələri, təmiz dağ havası və əlbəttə ki, şopinq imkanları ilə məşhurdur. Hər il bütün dünyadan milyonlarla turist buranı ziyarət edir.

San Marinoya necə getməli?

Anamla mən iyul ayında səhərin erkən saatlarında San Marinoya səfər etməyə qərar verdik. Gündəlik olaraq İtaliyanın Rimini şəhərindən San Marinoya gedən rahat servislər var. Bir nəfər üçün gediş-gəlişin qiyməti 40 manatdır (20 avro).

Bütün yol macərası unudulmaz idi. Yaşıllıqlarla əhatə olunmuş dağda dolanbaclı yolda ilərləyirdik və təxminən bir saat yarımdan sonra San Marinoda idik. Buradakı atmosfer isə möhtəşəm idi, ətrafda çox sayda turist gəzirdi, onlardan bəziləri məşhur satış nöqtələrində alış-veriş edir, bəziləri isə muzeyləri və kilsələri ziyarət edirdi. Biz özümüz də İşgəncə Alətləri Muzeyi daxil olmaqla bir neçə muzeyi və və köhnə kilsələri gəzmişdik.

San Marinoda nə etməli?

Monte Titano dağında inşa edilmiş Guaita qalası (Guaita, Prima Torre) məni valeh etdi. Əvvəllər həbsxana olmuş bu yerdən San Marinonun səfalı təbiətinin gözəl bir mənzərəsini seyr edə bilərsiniz. Çoxlu fotoşəkil çəkdikdən və bəzi turistik yerləri gəzdikdən sonra isə alış-verişə getdik. "Gülünc" qiymətlərlə yüksək keyfiyyətli markaların, italyan çantalarının və ayaqqabıların böyük bir seçimi – bu yer şapaqoliklər üçün əsl cənnət idi! San Marinoda xoş təəssüratlarla dolu təxmini 10 saat keçirdikdən sonra biz Riminiyə qayıtdıq.