Səyahət zamanı pula qənaət etmək üçün 7 tövsiyə

Əsas insan ehtiyaclarından biri olmadığı üçün səyahət etmək, "əlavə" büdcədən maliyyələşdirilən bir şeydir. Təbii ki, əgər iş üçün səyahət edən şanslılardan biri deyilsinizsə. Ancaq xaricə getmək yalnız nadir hallarda etdiyiniz bir şey olmaq məcburiyyətində deyil! Bütün möhtəşəm texnologiyalar və onlayn xidmətlər sayəsində səyahət zamanı pul qazanmaq həmişəkindən daha asan hal alıb. Hətta bunun hüdudlarından kənara çıxıb - səyahət etməklə pul da qazana bilərsiniz! Çılğınlıq kimi səslənir, hə? Səyahətlərinizi ucuzlaşdırmağın ən sadə yolu xərclərinizi azaltmaqdır, lakin mən bu məqalədə səyahət büdcəsini planlaşdırarkən pula necə qənaət etməniz barəsində bir çox müxtəlif fikir söyləyəcəyəm.

1. Hər şeyi planlaşdırın

Kortəbiiliyi sevsəniz də, daha ucuz səyahət istəyirsinizsə, ilk və ən vacib qayda hər şeyi planlaşdırmaqdır. Səyahəti planlaşdırarkən pul qazanmağın yollarını və ən xırda detalları düşünürsünüzsə, qeyd edəcəyim şeylərin ən azı üçdə ikisinə qənaət etməyin yolunu tapmısınız deməkdir. Unutmayın: super ucuz bir təklif tapmadığınız təqdirdə, hər hansı bir turizm agentliyi ilə səyahət etmək çox vaxt daha baha başa gəlir. Odur ki, səyahəti özünüz planlaşdırın! Bir yerə getməzdən əvvəl:

• ən ucuz seçimlər, fəsillər, yerli tövsiyələr barədə araşdırma aparın;

• qonaqlama yerlərini, nəqliyyat vasitələrini, muzeylərə girişi və s. bron edin;

• plana sadiq qalmağa çalışın!

Bunun niyə vacib olduğunu sizə deyim. Araşdırma apararkən qiymətlərdəki fərqi görəcək və daha az xərc tələb edən variantı seçə biləcəksiniz. Çox əvvəldən rezerv etməklə çox qənaət edəcəksiniz, çünki prinsip belədir – sona yaxınlaşdıqca daha bahalı olur! Sonda isə demək istəyirəm ki, bunların hamısına sadiq qalın, çünki planlaşdırma zamanı nəzərə almadığınız bəzi şeylərə tamah sala bilərsiniz

2. Nəqliyyat vasitələri və qənaət

Daha əvvəl də qeyd etdiyim kimi, uçuşları, avtobusları və qatarları bron etmək qənaət etmənizə kömək edəcək, ancaq yadda saxlamanız lazım olan bir neçə texnika var. Əvvəlcə səyahət etdiyiniz vaxtı düşünün. Hər şey mövsüm xaricində daha sərfəli olur. Heç vaxt Milad bayramı ərəfəsində bir yerə getməyin, çünki normal vaxtdan ən azı iki və ya üç dəfə daha çox pul xərcləyəcəksiniz. Ən ucuz uçuşu tapmaq üçün skyscanner.net, rome2rio.com və ya momondo.com kimi saytlardan istifadə edin. Eyni zamanda dəyişkən olun və seçdiyiniz tarixlərə ən yaxın tarixlər üçün olan qiymətləri də yoxlayın (ən azı +-3 gün)! Mən bəzən qiymət seçimlərini bəyənməyəndə başqa ölkələrdən tranzit uçuşları yoxlayır və bir səfərdə bir neçə ölkəni kəşf etmək fürsətini nəzərdən keçirirəm. Bir dəfə çox yaxşı tədqiqatlar apardım və Latviyadan Mərakeşə (Riqadan Stokholma, Frankfurta, Milana, Tanjerə və geri) cəmi 7 avroya səyahət etdim. Uçuşlarınızı bron edərkən “yüngül” olmanızı da nəzərdə saxlayın və beləcə baqaj üçün əlavə xərc ödəməyin.

3. Qonaqlama

Səyahət planını hazırlayarkən minimalist olmaq qənaətə səbəb olurmu? Qonaqlama barədə danışırıqsa, cavab çox güman ki, bəlidir. Söhbət lüks variantlar əvəzinə daha təvazökar seçimlər etməkdən gedir. Əlbəttə ki, hamımız öz süitlərimizdə başımızı super yumşaq yastıqların üstünə qoymaq istəyərik, amma əsas məqsədiniz pula qənaət etməkdirsə, əvvəlcə aşağıdakı seçimləri yoxlayın və ancaq ondan sonra otel axtarın. Qənaət üçün bəzi seçimlər:

• Qrup halında səyahət edirsinizsə, hostellərdəki yataqxanalarda qalın və ya Airbnb rezervasiya edin;

• Pul ödəmədən yaşayın – tanışlarınıza müraciət edin və ya Couchsurfing-də yerli tapın;

• "Housesitting"-i sınayın;

• Workaway-da qonaqlama yeri üçün çalışın (qısa səyahətlər üçün ən yaxşı seçim deyil).

Görürsünüz, bütün ucuz variantların hamısı böcək ilə dolu olan köhnəlmiş döşəklərdən ibarət deyil! Ayrıca bu yerlər sizə heç bir otelin verə bilməyəcəyi bir şey verəcək: yerlilərin həyatına dair fikir.

4. Yeməklər və içkilər

Yuxarıda qeyd etdiyim seçimlər yemək və içkilərə qənaət etmək üçün də əla fikir olacaqdır. Bu barədə bilməniz gərəkən əsas şey - həmişə öz yeməklərinizi hazırlamağa çalışın və barda olan içki sayını minimuma endirin. Və ya alternativ olaraq, yeməyinizi kiminləsə paylaşın (bəlkə bir yerli ilə?). Mən özüm mövsüm məhsullarını ucuz qiymətə alıb gün ərzində daha sadə şeylər yeyib şam yeməyini yerlilərlə birgə yerli təamlardan yeməklə keçirməyə çalışıram.

5. Əyləncə

Standart budur - bir yerə gedirsən, bir bələdçi tutursan, muzeylərə giriş haqqı ödəyirsən və bəlkə də şəhər ətrafında gəzmək üçün iki mərtəbəliyə bilet alırsan. Səyahət zamanı pula qənaət etmək istəyirsinizsə, bunların hamısını unudun! Əvvəlcə turist avtobuslarını ictimai nəqliyyatla əvəz edin. Sonra muzeylər üzərində araşdırma aparın. Onların bir çoxu ayın ilk və ya son bazar ertəsi / bazar günləri pulsuz giriş təklif edir. Müəyyən bir mövzu ilə bağlı super qarışıq təfərrüatlarla maraqlanmırsınızsa, onlayn pulsuz şəhər turu axtarın. Tur bələdçiləri isə bəxşişlərlə işləyir, bu səbəbdən nə qədər ödəməli olduğunuza tur bitdikdən sonra siz qərar verə bilərsiniz.

6. Beynəlxalq gənclər mübadiləsi və könüllü iş

Bir çox proqram səyahət və qonaqlama xərclərinizi sizin mədəniyyətləri öyrənməniz və dünyanın müxtəlif yerlərindən insanlarla əlaqə qurmanız üçün ödəyəcəkdir. Bunlardan ən məşhuru Erasmus+ layihələridir. Əsasən, vaxt və fədakarlıq bahasına həyatınızın ən yaxşı vaxtlarını yaşamaq, öyrənmək və səyahət etmək üçün pul alacaqsınız. Sərf edə biləcəyiniz vaxta və səyahətdən gözləntilərinizə görə, gənclər mübadiləsi, könüllü iş, treyninq və ya xaricdə təhsil arasında seçim edin. Təcrübəmdən deyə bilərəm ki, bunlar şəxsi inkişaf üçün gözəl imkanlardır. Bunu tam dəqiqliklə deyirəm, çünki mən özüm məhz bu yolla - tədbirin iştirakçıları üçün yemək bişirməklə, səyahət edərkən pul qazanmışam.

7. Səyahət zamanı pul qazanmaq

Heç düşünmüsünüzmü “Səyahət edərkən necə pul qazana bilərəm?” Təsvir etdiyim seçimlərdən bəziləri bir az daha çox səy tələb edəcək, bəziləri daha az, ancaq başqa bir ölkəyə səyahət zamanı pul qazanmağın yollarını axtarırsınızsa oxumağa davam edin.

• Səyahət tələb edən iş tapın. Səyahət edərkən pul qazanmaq üçün ən bəlli yol stüardessa olmaqdır. Ancaq əgər bu xəyal etdiyiniz səyahət növü deyilsə, "influencer" və ya səyahət bloqqeri olmağı düşünə bilərsiniz. Ancaq unutmayın ki, bu iş üçün ödəniş almaq və ya pulsuz xidmətlər əldə etmək bir az vaxt alacaq.

• Frilanser və ya rəqəmsal köçəri olun. Hal-hazırda bir çox peşə daha sərbəst hala gəlib və dünyanın hər hansı bir yerindən işləyə bilərsiniz! Və üstəlik, çox vaxt öz şərtlərinizlə. Əgər artıq onlardan birisinizsə, hər gün kafeyə getmək əvəzinə kovorkinq yeri bron etsəniz, səyahət zamanı pula qənaət etmiş olacaqsınız. Belə yerlərdən bəziləri limitsiz qəhvə təklif edir və əlavə olaraq möhtəşəm yerli mütəxəssislərlə də tanış olacaqsınız!

• Uzaqda olduğunuz müddətdə mənzilinizi və ya evinizi Airbnb-də kirayəyə verin. Buyurun, səyahət xərclərinizin bir hissəsini ödəyə biləcək passiv gəlir.

• Bəzi ölkələrdə, məsələn Almaniya kimi, təkrar emalla asan pul əldə edə bilərsiniz. Boş butulkaları təkrar emal maşınlarına gətirmək sizə yerindəcə pul qazandıracaq və elə minimalizmi bayraq edən bir çox səyyah da tam olaraq bu şəkildə pul qazanır. Məsələn, Almaniyada bir plastik şüşə 25 qəpikdir. Dördünü gətirin və artıq bir avronuz var.

Və bunlar haqqında düşünmək üçün sadəcə bir neçə fikirdir!

Bütün bunlardan sonra məndən səyahət zamanı necə pul qazandığımı soruşursunuz? İcazə verin sizə başqa bir şey də deyim: siz hal-hazırda başqa bir şəhərdə həftə sonu tətili zamanı yazılmış məqaləni oxuyursunuz! Kifayət qədər sadədir: kompüterimi hər zaman özümlə aparıram və hara getsəm gözəl yerli kafelərin birində vaxt keçirməkdən zövq alıram. Sadəcə orada otururam, yazıram, mənzərədən zövq alıram və eyni zamanda yerli sakinləri və ətraf mühiti müşahidə edirəm. Bunu dünyanın müxtəlif yerlərində etmək, sizə şəhərin gündəlik ritminə dair fikir verir və bu, heç bir muzeydə və ya turda əldə edə bilməyəcəyiniz bir şeydir!

Ümid edirəm bu məqalə limitli büdcə ilə səyahət etmənizlə bağlı ən azı bir neçə yeni fikrə yol açdı. Minimalizm səyahət zamanı kömək edir? Əlbəttə! Ancaq bu mövzuda ağıllı addımlar atmaq üçün bir neçə yol var və əsas prinsipi hər zaman xatırlamaq lazımdır: PLAN, PLAN, PLAN! Sizə yelkənlərinizdə külək tutmağınız üçün uğurlar arzulayıram və dünyanın hər hansı bir yerində görüşməyi ümid edirəm!