Elə indi Tanzaniyaya səyahət etməyiniz üçün 12 səbəb

Xüsusilə heyvanlar aləmi və təbiəti ilə məşhur olan Tanzaniya və ya Tanzaniya Birləşmiş Respublikası sizə gözlədiyinizdən daha çox şey təklif edir. Kilimancaro dağından möhtəşəm çimərliklərə qədər; qonaqlar Tanzaniyaya səyahət edərkən ətrafdakı gözəlliklərdən zövq alırlar. Ölkə Şərqi Afrikada yerləşir. Tanzaniya şərqdə Hind okeanı ilə məhdudlaşır. Cənubda Mozambik və Malavi, cənub-qərbdə Zambiya, qərbdə Demokratik Konqo Respublikası, şimal-qərbdə Burundi və Ruanda, şimalda Uqanda və şimal-şərq hissəsində Keniya ilə həmsərhəddir. Tanzaniyanın paytaxtı Dodomadır. Bununla birlikdə, ölkənin ən böyük şəhəri, həmçinin ən böyük liman şəhəri olan Dar-əs-Salamdır. Tanzaniyanın əhalisi 58 milyon nəfərdir. Ölkədə iki rəsmi dil var: suahili və ingilis dili.

Tanzaniyaya necə səyahət etmək olar?

Julius Nyerere Beynəlxalq Hava Limanı Dar-əs-Salamın şəhər mərkəzindən təxminən on kilometr məsafədə olan, Tanzaniyanın beynəlxalq və ən rahat hava limanıdır. Etihad, Emirates və Qatar Airways kimi bir çox hava yolu şirkəti bu hava limanına uçuşlar təşkil edir.

Tanzaniyaya səyahət üçün ən yaxşı vaxt nə vaxtdır?

Tanzaniyaya səyahət etmək üçün ən yaxşı vaxt iyul-oktyabr ayları arasıdır. Ümumilikdə bu, nə kimi faəliyyətlər axtardığınızdan asılı olsa da, ölkənin əsas attraksionunu, yəni Böyük Köçü görmək istəyirsinizsə, o zaman iyul-oktyabr ayları arası sizin üçün idealdır. Qeyd edək ki, həmin vaxt ölkədəki ən quraq mövsümdür, bu səbəblə də zebra və qnu sürüləri Mara çayını keçməyə çalışır. Bu hadisə təbiət həvəskarları üçün çox maraqlıdır, çünki çayı keçən heyvanlar timsahların çənələrindən qaçınmaq kimi çətin bir maneə ilə qarşılaşırlar. Əgər siz quşları izləməyin tərəfdarısınızsa, Tanzaniyaya səyahət etmək üçün ən yaxşı vaxt noyabr-mart aylarıdır. Bu zaman Tanzaniyada təbiət bir qədər sakitdir. Çox yağış yağmasına baxmayaraq, quşları və onların köçlərini izləmək üçün əla bir zamandır. Şiddətli yağışların daşqınlara səbəb olduğu aprel və may ayları arasında isə Tanzaniyaya getməməlisiniz.

Tanzaniyaya səyahət etməyiniz üçün 12 səbəb isə aşağıda sıralanıb.

1. Zənzibar adası

Unguja və ya Zənzibar adası təbiətdən, vəhşi təbiətdən, mehriban insanlardan, möhtəşəm ağ qumlu çimərliklərdən və Hind okeanının mükəmməl isti sularından zövq almaq üçün əla bir yerdir. Zənzibar arxipelaqındakı ən böyük və ən çox ziyarət edilən adadır. Adanın şərq və şimal hissələrində sakit və az məskunlaşmış çimərliklər var ki, burada bir neçə rahat qonaqlama yeri tapa bilərsiniz.

2. Kilimancaro zirvəsi

Kilimancaro dağı 5.895 metr hündürlüyü ilə Afrikanın ən yüksək zirvəsidir. Kilimancaro Yer üzündəki ən yüksək sərbəst dayanan dağdır, yəni onu heç bir dağ silsiləsi əhatə etmir. Vulkan isə ərazinin inanılmaz bir mənzərəsini təqdim edir. Kilimancaroda Kibo, Mavenzi və Şira adlı üç vulkanik konus var.

3. Böyük Köç

Əvvəlki başlıqlardan birinin adı belə idi: Tanzaniyaya səyahət üçün ən yaxşı vaxt nə vaxtdır? Mən həmin başlıqda da qeyd etdim ki, Böyük Köçü izləmək istəyirsinizsə, bunun üçün Tanzaniyaya səyahət etməli olduğunuz vaxt iyul-oktyabr ayları arasıdır. Möhtəşəm təbiət hadisəsini müşahidə etmək bir ömür boyu xatırlayacağınız bir təcrübə olacaq.

4. Serengeti Milli Parkı

Serengeti Milli Parkının əksər hissəsi ağacsız geniş ərazilərdir. Bu geniş ağacsız düzənlikdə çox sayda hər şey yeyən və ətyeyən heyvanlar yaşayır. Park xüsusilə Böyük Köç ilə məşhurdur. Tanzaniyadakı ikinci ən böyük milli parkdır. Təbiəti və zəngin heyvan populyasiyaları parkın hər il çox sayda turisti özünə cəlb etməsinə imkan verir.

5. Nqoronqoro krateri

Tanzaniyanın şimal hissəsindəki Nqoronqoro qoruğunun ərazisində yerləşən Nqoronqoro krateri çox əvvəllər böyük bir vulkan idi. Bu gün isə dünyanın ən böyük kalderasıdır. Təbii gözəlliyi ilə Tanzaniyada mütləq ziyarət edilməsi gərəkən yerlər arasındadır. Siz ətrafdakı mənzərələrdən zövq alarkən heyvanlar ətrafda dolaşır və yeri instaqramlıq fotolar üçün ideal məkana çevirir.

6. Manyara Gölü Milli Parkı

325 kvadrat kilometr ərazi boyunca uzanan Manyara Gölü Milli Parkı, Böyük Rift Dərəsi ilə Manyara gölü arasında yerləşən Arusha və Manyara bölgələrindəki təbii mühiti qoruyur. Ərazinin böyük bir hissəsi gözəl flaminqoların evi olan göllə örtülüdür. Bu qorunan ərazidə pavianlara, ağaca dırmaşan aslanlara, fillərə və bir çox başqa heyvanlara da rast gələcəksiniz.

7. Mafiya adası

Mafiya adası istirahət etmək və böyük şəhərlərin təlaşından xilas olmaq üçün ideal məkandır, eyni zamanda möhtəşəm sualtı həyatı və müxtəlifliyi sayəsində dünyanın hər yerindən çoxlu skuba-dayvinq və şnorkellinq həvəskarının diqqətini çəkir. Mart və aprel aylarında, yəni yağış mövsümündə Mafiya adasına səyahət etməkdən çəkinməlisiniz.

8. Viktoriya gölü

Viktoriya gölü Afrika qitəsindəki ən böyük şirin sulu göldür. Tanzaniya xaricində Keniya və Uqanda ilə həmsərhəddir. Qonşularından fərqli olaraq, Tanzaniyadakı Viktoriya gölü sahillərini nisbətən daha az sayda turist kəşf edib. Burada quşları və digər heyvanları seyr edə bilərsiniz. Bundan əlavə, göldə balıq tutmaq və adaları araşdırmaq üçün gəzintilər də var.

9. Stoun Taun

Mji Mkongwe olaraq da bilinən Stoun Taun Zənzibarın mədəniyyət mərkəzinin köhnə bir hissəsidir. YUNESKO-nun Ümumdünya irsi siyahısı ərazini Suahili sahil ticarət şəhərlərinin nümayəndəliyi olaraq qeyd edir. Stoun Taun min illik Afrika, ərəb və Avropa mədəniyyətlərinin müxtəlif elementlərini özündə birləşdirən şəhərin mədəni harmoniyasının gözəl bir nümunəsidir.

10. Mehriban Tanzaniya xalqı

Tanzaniya xalqı, xüsusən də turistik yerlərin ətrafında yaşayanlar çox mehriban insanlardır. İlk növbədə, yerli Tanzaniya sakinləri sizə kömək etmək istəyir və qonaqpərvərliklərini nümayiş etdirirlər. Tanzaniyadakı rəsmi dillərdən biri ingilis dilidir odur ki, yerli əhali ilə ünsiyyət qurmaq sizin üçün problem olmayacaq.

11. Pemba adası

Zənzibar arxipelaqındakı bu ada qeyri-adi gözəlliyi ilə sizi heyran edəcəkdir. Xüsusilə yaşıllıqları, mixək əkinləri və gözəl yaşıl vadiləri ilə məşhurdur. Hər il az sayda turist adanı kəşf edir odur ki, diqqətlərdən kənarda qalmış yerləri sevirsinizsə, buyurun. Ada skuba dayvinq və şnorkellinq üçün də əla yerdir. Su fəaliyyətləri xaricində, turistlər Pembanın yaşıl təpələri ətrafında dağ velosipedi sürməkdən zövq ala bilərlər.

12. Ləzzətli yemək

Gözəl təbiəti, zəngin mədəniyyəti və qonaqpərvər insanları əhatə edən siyahı dadlı ənənəvi yeməklər olmadan tamamlana bilməz. Tanzaniyada çox məşhur və unikal küçə yeməyi Zanzibar Pizzadır. Hər bir turist mütləq şəkildə bu pizzadan dadmalıdır. Tanzaniya mətbəxinin digər ləzzətli üzvləri arasında Mchuzi wa samaki, Chipsi mayai və s. qeyd edə bilərik.

Tanzaniyaya səyahət etmək təhlükəsizdirmi?

Tanzaniyaya səyahət ümumilikdə təhlükəsizdir, ancaq xırda cinayətlərin (soyğunçuluq, cibgirlik və s.) baş vermə ehtimalını nəzərə almalısınız. Xüsusilə oğruların qiymətli əşyalarınıza asanlıqla çata biləcəyi çimərliklər, böyük marketlər və gecə klubları kimi yerlərdə ikiqat diqqətli olun. Sənədlərinizi güvəndə, tərcihən, çantanızdan kənarda saxlamaq çox vacibdir. Təəsüf ki, ölkədə silahlı və mütəşəkkil cinayətlər, adam qaçırma və s. kimi hallar da müşahidə olunur.

Bəzi hallarda oğrular qurbanlarını bankomata apararaq pullarının hamısını çəkməyə məcbur edirlər. LGBTQ şəxslər üçün Afrikaya, Tanzaniyaya səyahət etmək təhlükəsizdirmi? Xeyr, onlar əsasən şifahi və fiziki istismara məruz qalırlar. Ölkədə yol təhlükəsizliyi də o qədər yaxşı deyil, bu səbəblə gecə tək maşın idarə etməkdən çəkinməlisiniz.

Tanzaniyaya səyahət üçün hansı vaksinlərə ehtiyacım var?

Ölkədəki tibb müəssisələri və xidmətlər böyük şəhərlərdə belə məhdud və zəifdir. Bəzən ağır yaralanmalar zamanı evakuasiya edilməyiniz lazım ola bilər. Bu kimi hallarda güvəndə olmaq üçün səyahət mütəxəssisləri Tanzaniyaya səyahət etməzdən əvvəl hərtərəfli səyahət sığortası etməyinizi məsləhət görür. Bəs Tanzaniyaya səyahət etmək üçün hansı vaksinlərə ehtiyacım var? Tanzaniyanı ziyarət etməzdən əvvəl bu barədə həkiminizlə danışın. Tövsiyə olunan peyvəndlərə hepatit A və B, qızılca, sarı qızdırma, quduzluq (bu vacibdir) və qrip əleyhinə olanlar daxildir.