Adrenalin dolu səyahət: təhlükəli dəmir yolları

Bu dəfəki bloqumuzda sizə adrenalin dolu səyahətlərin ünvanını verəcəyik. Təhlükə dolu dəmir yollarının həyəcan bəxş edən hər anı əsl macərapərəstlər üçündür.

10. Kuranda dəmir yolu – Avstraliya

Dik yarğanlar və şəlalələr arasındakı misilsiz mənzərələrdən ibarət möhtəşəm və həyəcanlı bir səyahət Kuranda dəmir yolu vasitəsilə mümkündür. Kuranda səyahəti təxminən 2 saat çəkir və marşrut 15 tunel, 37 körpüdən ibarətdir. Kairns şəhəri və Kuranda arasındakı dəmir yolu xəttinin uçurumlar arasından keçən 37 kilometrlik hissəsi isə digər hissələrlə müqayisədə daha təhlükəlidir.

9. Ramesvaram dəmir yolu – Hindistan

Hindistanın cənub-şərq sahillərini Ramesvaram adasına bağlayan dəmir yolu su üzərində inşa edilib. Ramesvaram adasına gedən dəmir yolu körpüsü 1914-cü ildə inşa edilib və uzunluğu 1,4 kilometrdir. Ada özünəməxsus dini və memarlıq üslubuna malik abidələrlə zəngindir. Buna görə də, Ramesvaram dəmir yolunu dünyanın hər yerindən bir çox insan ziyarət etməyə can atır. Amma dənizin fırtınalı olması adaya gəmi və qayıqla səyahəti çətinləşdirir. Hələ XIV əsrdə yerli əhali materiki ada ilə birləşdirən körpü inşa etmək istəyirdilər. XX əsrin əvvəllərində təhlükəli hava səbəbi ilə dəmiryol xəttinin çəkilməsinin daha əlverişli olacağına qərar verdilər. Amma bu da təhlükəni azaltmadı. 1964-cü ildə bu bölgədə baş verən fırtına zamanı dalğaların 7,4 metr yüksəyə qalxması səbəbi ilə 150 sərnişin öldü.

8. Georgetown dəmir yolu – ABŞ

19-cu əsrin ikinci yarısında inşası tamamlanan Georgetown Loop Railroad dəmir yolu Kolorado ştatı “Clear Creek” mahalının sərhədləri daxilində yerləşir. Gümüş mədənlərinə işçilərin daşınması məqsədi ilə inşa edilib. Dar və təhlükəli dəmir yolu mədənçilərin Qayalı dağları (eng: Rocky Mountains) keçməsinin yeganə yolu idi. Amma dəmir yolu yalnız mədənlərdə qazıntılar aparıldığı illərdə fəaliyyət göstərdi. Daha sonra istifadəsiz qalsa da, əraziyə turist cəlb etmək məqsədi ilə dəmir yolunun fəaliyyəti yenidən bərpa edildi. Dəmir yolunun fəaliyyətə başladığı ildən təxminən 100 il sonra sərnişin daşımalarına başlanıldı. 1973-cü ildə yolun dağıdılmış hissələri bərpa edildi və bir il sonra artıq turistlər üçün açıq elan edildi. Dəmir yolu Georgetown və Silver Plume şəhərləri arasında fəaliyyət göstərir. Marşrut iki körpüdən ibarətdir: Krik Vadisi körpüsü və Şeytan Qapısı körpüsü. Şeytan Qapısı adlanan körpü yolun ən qorxulu və təhlükəli hissəsidir. Körpü 30 metr yüksəklikdədir. Dəmir yolu marşrutu 7,2 kilometrdir, inanılmaz dərəcədə gözəl dağ ərazilərindən keçir və dəniz səviyyəsindən 195 metr yüksəkliyə qalxır.

7. Minamiaso dəmir yolu – Yaponiya

Minamiaso marşrutu Yaponiyanın ən aktiv vulkanlarından biri olan Aso dağının ətrafında inşa edilib. 1928-ci ildən etibarən dəmiryolu xətti sərnişinlərin istifadəsinə verildi. Dəmiryol xəttinin bir hissəsi ilk baxışdan tamamilə etibarsız görünən yüksək dəmir körpü boyunca davam edir. Körpünün yolu çox dardır və bu xüsusiyyət onu daha da təhlükəli olmasına şərait yaradır. Çünki sürücünün səhv bir manevr etməsi qatarın yoldan çıxması üçün kifayət edə bilər. 2016-cı il Kumamoto zəlzələsi zamanı dəmir yolu körpüsünə ciddi ziyan dəydi və körpü qəzalı vəziyyətə düşdü. Zəlzələdən sonra bu dəmiryolu xəttindən istifadə xeyli azaldı. Digər tərəfdən dəmir yolunun aktiv vulkanın ətrafında yerləşməsi növbəti püskürmə ehtimalını qaçılmaz edir. Amma dəmir yolunun bu təhlükə ilə yarışa biləcək möhtəşəm mənzərəsi var. 

6. Tren a las Nubes – Argentina

Argentina şəhəri Saltanı Çilidəki Polvorillo ilə birləşdirən dəmir yolu 217 km uzunluqdadır. Əvvəlcə yük daşınması üçün nəzərdə tutulsa da, indi turistlərin üzünə açıq elan edilib. Bu dəmir yolunun inşası üçün, ümumilikdə, 27 il lazım oldu. Dağ silsilələri və ən dərin kanyonlardan keçən unikal dəmir yolunun tikintisi 1921-ci ildə başladı və 1948-ci ildə tamamlandı. A Las Nubes dəmir yolu 29 körpü, 21 tunel və hündürlüyü 4,200 metr olan 13 keçiddən ibarətdir. Yolların ziqzaq quruluşu, spiralvari qıvrımları və sərt döngələri ilk sərnişinləri daha çox həyəcanlandırır. Təxminən 16 saat çəkən adrenalin dolu səyahət turistlərə nəfəskəsən anlar vəd edir. 

5. Pilatus dəmir yolu – İsveçrə

Pilatus dəmir yolu dünyanın ən dik marşrut xəttinə malikdir. Pilatus dağından keçən dəmir yolu 1889-cu ildə istifadəyə verilib. Dəmiryolu xətti “Alpnachstad”-dan başlayaraq Pilatus dağının zirvəsinə qədər uzanır. Burada yüksəklik 2073 metrdir. Vaqonların relsdən çıxmaması üçün dişli çarxlardan istifadə bu ehtimalı azaldır. Layihə üçün bu fikri ilk dəfə mühəndis Eduard Loçer təklif edib. Relslərdə və vaqonlarda olan üfüqi və şaquli çarxlar vasitəsilə zirvəyə doğru dik qalxma mümkün olur. Hazırda bu xətt üzrə marşrutlar sərnişinlərin ixtiyarındadır. Nostalji vaqonlar vasitəsilə turistlər qorxulu da olsa zamanda səyahət hissi yaşaya bilərlər.

4. Ölüm dəmir yolu – Burma

1943-cü ildə Yaponiya imperiyası İkinci Dünya müharibəsi zamanı Burmada öz hakimiyyətini möhkəmlətmək üçün dəmir yolu inşa edir. Adının Ölüm dəmir yolu (eng: Death Railway) adlanmasının səbəbi inşa zamanı çoxsaylı insan tələfatının baş verməsi ilə əlaqədardır. 12000 məhkum və 90000-dən artıq işçinin həyatının itirdiyi məlumdur. Düzü qatarın marşrut xəttini də insan həyatı üçün təhlükəsiz adlandırmaq olmaz. 415 metr uzunluğunda olan dəmir yolu Burmanı Taylanda bağlayır.

3. Ağ keçid və Yukon marşrutu – ABŞ

Ağ keçid və Yukon marşrutu (eng: White Pass and Yukon Railroad) Alyaska ilə Kanadanı birləşdirən dəmiryolu xəttidir. Dəmir yolu sisteminin ümumi uzunluğu 175 kilometrdir və ən təhlükəli hissəsi Alyaskadadır. Xəttin mürəkkəb quruluşuna görə dünyada bərabəri yoxdur. Marşrut təhlükəli dağlıq ərazidən keçir, bəzi qayalar 3.000 metr hündürlüyə çatır. Dar və qaranlıq tunellər xəttə daha çox qorxu əlavə edir. Bu marşrutdakı körpülər qorxulu və təhlükəlidir. Əgər çox cəsarətli olduğunuzu düşünürsünüzsə, marşrutun yüksək, dönüşlü olması sadəcə sizə mənzərədən zövq almağa şərait yaradacaq. Bu dəmir yolundakı bəzi körpülərin yüksəkliyi 2.000 metrə  qədər ola bilər. Dəmir yolu marşrutunda müxtəlif illərdə qəzalar da baş verib. 2006-cı ildə baş verən qəza ölümə səbəb oldu. Yenə 2014-cü ildə qatar relsdən çıxdı, 19 sərnişin və dörd dəmir yolu işçisi yaralandı. Kanadanın Whitehorse şəhərini ABŞ-ın Skagway şəhəri ilə birləşdirən dəmir yolu nə qədər təhlükəli olsa da, bu gün hələ də turistlərin istifadəsindədir. 

2. Duffy's Cut dəmir yolu – ABŞ

Haqqında mistik rəvayətlər dolaşan Duffy's Cut dəmir yolu 1832-ci ildə inşa edilib. Dəmir yolunun tikintisi üçün podratçısı Filip Daffi ərazinin sıx meşəli təpələri və yarğanları boyunca dəmiryolu xəttini inşa etməkdən ötrü 57 irlandiyalı immiqrantı işə götürür. Bir müddətdən sonra işçilər arasında yoluxucu xəstəlik yayılır və 57 işçinin hamısı vəfat edir. Bu hadisədən sonra bölgədə bir sıra şəxslər və sərnişinlər tərəfindən ruhlar və kabusların görüldüyü iddia edilməyə başlanılır. Bölgədə yaşanan anomal hadisələrlə bağlı hətta filmlər də çəkilməyə başlanılır. Güman olunurdu ki, işçilər arasında yayılmış xəstəliyin digər şəxslərə keçməməsi üçün onların hamısı qəsdən öldürülüb. Tədqiqatçılardan ibarət bir araşdırma qrupu 2004-cü ildə arxeoloji qazıntılara başladı və 5 il sonra dünyanı şoka salan faktlar açıqladı.Tədqiqatçılar işçilərin qəsdən öldürülməsi ehtimalını təsdiqlədilər. Bəzilərinin ümumi məzarda diri-diri basdırıldığı bildirildi. Araşdırılmalardan sonra kabusların insanlar tərəfindən görülməsi hadisələri də azaldı. Bunu narahat ruhların rahatlıq tapması ilə izah edirlər.  Amma buna baxmayaraq, kabus görmək arzusuyla turistlər bura hələ də axın edirlər.

1. Şeytan burnu – Ekvador

Aranızda atraksiyon parklarında qorxu qatarlarına minənlər varsa, özünü Ekvadordakı Şeytan burnu dəmir yolundan (eng: Nose of the Devil) istifadə etmiş saya bilər. Dağın kənarıyla uzanan bu dəmir yolunun marşrut xətti olduqca təhlükəlidir. Dəmir yolu dağın “burnuna” çatdıqdan sonra aşağı doğru hərəkət edir və döngədən sonra yenidən yuxarı istiqamətdə davam edir. Yenidən “buruna” çatdıqdan sonra təkrar aşağı istiqamətdə irəliləyir. Şeytan burnu Ekvadordakı Quito-dan Guarayquil-a gedən dəmir yoludur. Dəmir yolunun tikintisi zamanı 2.000 nəfərə yaxın işçi həyatını itirib. Şeytan burnu həyəcanı sevən turistlərin alternativi olmağa iddialıdır.