Brazil map - shallow focus

Braziliyaya turist vizası necə alınır?

Tamerlan Mehdiyev Tamerlan Mehdiyev 26 iyul 2021
11 baxış 5 dəq. oxu

Cənubi Amerikada yerləşən Braziliya əhatə etdiyi 8.515.767 kvadrat kilometrlik ərazi ilə materikdə ən böyük, dünyada isə 5-ci ən böyük ölkədir. Dünyanın etnik cəhətdən ən müxtəlif və multikultural ölkələrindən biridir. Bu multikultural mühit dünyanın hər yerindən axın edən kütləvi immiqrasiyadan qaynaqlanır. Əvvəllər fərqli qəbilə məskənlərinə ev sahibliyi edirdi, lakin portuqalların Cənubi Amerikanı kəşfə çıxması ilə Portuqaliya imperiyasının bir hissəsi oldu. Ölkə yalnız 1822-ci ildə müstəqillik qazandı.

Braziliya turizm baxımından hər zaman diqqət mərkəzində olub. Niyə də olmasın? Turizm cənnəti olmaq üçün lazım olan hər şeyə sahibdir. Nəfəs kəsən mənzərələrdən canlı karnavallara qədər - bu ölkədə turistlər üçün demək olar ki, hər şey var. 2000-dən çox çimərliyi və 1000 ekvatorial adası olan Braziliya yay tətili üçün mükəmməl bir yerdir. Sörfinqlə məşğul ola və dalğalarla yarışa və ya divinq edib okeandakı həyatı və mərcan riflərini kəşf edə bilərsiniz. Braziliya ən çox Amazon cəngəllikləri və İquasu şəlaləsi ilə tanınır. Vəhşi təbiəti qorumaq üçün 62-dən çox milli park və yüzlərlə qoruq fəaliyyət göstərir ki, bu da ölkəni təbiət sevənlər üçün mükəmməl bir yer halına gətirir. Rio-de-Janeyro kimi Braziliya şəhərləri ən çox ziyarət edilən yerlərdən biridir. Atlantik okeanının sahilində yerləşən və yamyaşıl meşələr və dağlarla əhatə olunmuş bu metropol əyləncələri, xüsusən də karnavalları ilə məşhurdur. Hər il keçirilən Rio karnavalı, milyonlarla insanın toplaşıb şəhər küçələrində qeyd etdiyi dünyanın ən böyük karnavalıdır. Əvvəllər sadəcə bir yemək festivalı idi, lakin zamanla bir çox insanın diqqətini çəkən canlı, parlaq festivallardan birinə çevrildi. Festival günlərində ən nüfuzlu samba məktəbləri tədbir üçün inşa edilmiş Sambadromda yarışır. Paradda ən rəngarəng karnaval kostyumlarını görə bilərsiniz. Qeyd etdiyimiz kimi, saysız -hesabsız turistik fəaliyyət var və hamısı haqqında ayrıca bir məqalə yazılmalıdır. Ancaq bu məqalədə Braziliya səyahətinin texniki tərəfinə daha çox nəzər salacayıq. Bu yazıda Braziliya turist vizası üçün müraciət, Braziliya turist vizasının uzadılması, Braziliya turist vizasının rüsumu kimi məsələləri əhatə edəcəyik və ən əsası "Vizanı necə əldə etmək olar?" sualına cavab tapmağa çalışacağıq. Ancaq birinci növbədə Braziliyanın viza siyasətindən xəbərdar olmalıyıq.

Braziliya viza siyasəti

waving brazilian flag

Təbii ki, Braziliya viza siyasəti də onun digər ölkələrlə qarşılıqlı əlaqələrindən asılı olaraq müəyyən olunur. Ölkələr vizasız və viza tələb edilən olmaqla təsnif edilə bilərlər. Pickvisa.az-da bu ölkələrin siyahısını tapa bilərsiniz. Vizaya ehtiyacınızın olub-olmadığını müəyyən etmək üçün Pickvisa.az saytına daxil olun və "Viza Siyasəti" bölməsinə gedin. Sonra Braziliyanı tapın və üzərinə vurun.

Viza növləri səyahət məqsədinə görə təsnif edilir: ziyarət vizaları, müvəqqəti vizalar, diplomatik vizalar, rəsmi vizalar, mədəni ziyarət vizası və daimi vizalar. Hər bir viza növünün öz şərtləri, tələbləri və rüsumu var. Biz bu yazıda ziyarətçi vizası ilə maraqlanırıq. Braziliya turist vizası almaq nə qədər çətindir? Belə ki, bu, bir çox faktordan asılıdır. Amma narahat olmayın, biz sizə kömək etmək üçün buradayıq.

Braziliya turist vizası

visa application form

Braziliya turist vizası ölkəni turizm məqsədi ilə səyahət etmək istəyən şəxslərə verilən viza növüdür. Turist vizası ilə Braziliyada nə qədər qala bilərəm? Bu növ vizalar 90 günə qədər davam edən səyahətlər üçün verilir. Braziliya turist vizası üçün tələblər nələrdir? Braziliya turist vizası üçün tələbləri aşağıdakı siyahıda tapa bilərsiniz:

• Müraciət forması - lazımi qaydada doldurulmuş və ərizəçi tərəfindən imzalanmış.

• Braziliyadan gediş tarixinizdən etibarən 6 ay boyunca qüvvədə olacaq pasport. Pasport son 10 ildə verilmiş olmalı və ən azı iki boş səhifəyə sahib olmalıdır.

• Yaxın zamanlarda, 3,5x4,5 sm ölçüdə çəkilmiş şəkil. Rəngli olmalı və fonu ağ olmalıdır.

• Yaşadığınız və vətəndaşı olduğunuz ölkə fərqli olarsa (müraciət etdiyiniz ölkənin vətəndaşı olmadığınız anlamına gəlir), yaşayış icazəsi təqdim edilməlidir.

• Səyahətinizi maliyyələşdirmək üçün kifayət qədər maliyyə imkanlarına sahib olduğunuzun sübutu. Bu məqsədlə nağd pul, son 6 ayın maliyyə fəaliyyətini göstərən bank çıxarışı və s. təqdim oluna bilər.

• Gediş-dönüş uçuş bronları.

• Müraciətçi yetkinlik yaşına çatmamışsa, doğum haqqında şəhadətnamənin surəti.

Braziliya turist vizası rüsumu və proses müddəti

us dollar

Braziliya turist vizası üçün ödəniləcək rüsum ölkədən-ölkəyə dəyişə bilər. Ancaq Braziliya turist vizası rüsumu adətən 70-210 ABŞ dolları civarındadır.

Viza üçün bütün sənədləri topladıqdan sonra Braziliya səfirliyi və ya viza müraciət mərkəzindən görüş almalısınız. Bundan sonra isə edə biləcəyiniz tək şey cavabınızı gözləməkdir. Turist vizası üçün ortalama proses müddəti 4-20 gündür.

Braziliya turist e-vizasını necə əldə etmək olar?

travel miniature people figures

Turist vizası ilə bağlı ən çox verilən suallardan biri "Braziliya turist e-vizasını necə əldə etmək olar?" sualıdır. Bu, bir qədər qarışıq məsələdir. Bu qarışıqlığın səbəbi isə insanların çoxunun son yeniliklərdən xəbərdar olmamasıdır. Braziliya elektron turist vizası artıq mövcud deyil. E-viza ABŞ, Kanada, Yaponiya və Avstraliyadan gələn səyahətçilər üçün 17 iyun 2019-cu il tarixinə qədər mövcud idi. İndi bu ölkələrin vətəndaşları Braziliyaya viza prosedurundan keçmədən səyahət etmək və 90 günə qədər qalmaq hüququna malikdirlər, yəni vizasız rejimdən faydalanırlar.

Braziliya turist vizasını necə almaq olar?

visa interviewer

Bu məqsədlə aşağıdakı təlimatı izləyə bilərsiniz:

Etməli olduğunuz ilk şey səfirliklə əlaqə qurmaqdır. Əgər ölkənizdə yoxdursa, qonşu ölkələrdəki sizə ən yaxın səfirliyi tapmağa çalışın. İkincisi, səfirliklə əlaqə saxlayın və görüş təyin edin. Müraciət üçün sizdən istənən xüsusi tələblərin nə olduğunu da öyrənməyi unutmayın. Bütün lazımi sənədləri toplayın və təyin olunmuş vaxtda səfirliyə gedin (yaxşı olar ki, 5 və ya 10 dəqiqə əvvəl). Sənədlərinizi təqdim edin və tələb olunan rüsumu ödəyin. Proses müddəti başa çatdıqdan sonra müraciətinizin cavabının nə olduğunu biləcəksiniz. Braziliya turist vizası almaq nə qədər çətindir? Braziliya turist dostu bir ölkədir. Bu səbəblə müraciətinizdə hər şey tamamdırsa, çox güman ki, viza alacaqsınız.

Viza müddətinin uzadılması

woman holding map and passport

Braziliyada turist vizası ilə nə qədər qalmaq mümkündür? Turist vizası Braziliyada 90 günə qədər qalmağa imkan verir. Ancaq Braziliyada daha çox qalmağın bir yolu var, bu da Braziliya turist vizasının uzadılmasıdır. Braziliya Federal Polisi vizaların uzadılması üçün səlahiyyətli orqandır və bütün müraciətlər onlara yönəldilməlidir. Müraciətçi "Requirimento de prorrogação de estada" formasını doldurmalıdır. Bundan əlavə, "Guia de Recolhimento da União" forması da tamamlanmalıdır. Hər iki forma Federal Polisin rəsmi saytından əldə edilə bilər. Bu iki formanın yanında sizdən aşağıdakı sənədlər də istəniləcək:

• Kredit kartları - uzunmüddətli yaşayışı maliyyələşdirə biləcək gücünüzün olduğunun sübutu.

• Etibarlı pasport

• Giriş/çıxış kartı (Cartao de entrada/saida).

• Geri qayıtmaq niyyətinizi sübut edən uçuş bileti bronu.

• Federal Polis idarələri ilə eyni binada yerləşən Banco do Brasil filiallarında barmaq izlərinizi təqdim edəcək, eyni zamanda tələb olunan rüsumu ödəyəcəksiniz.

Bundan sonra müraciətiniz tamamlanacaq. Qeyd edək ki, prosesə viza qüvvədə olduğu müddətdə başlamaq lazımdır. Vizanın etibarlı olmadığı hər gün üçün sizdən əlavə rüsum alınacaq.

Paylaş

Tamerlan Mehdiyev

Tamerlan Mehdiyev tam bir elm həvəskarıdır. Yer haqqında elmlər üzrə magistr dərəcəsi alan Tamerlan iqlim dəyişikliyi ilə bağlı araşdırma etməyi planlaşdırır. Təbiəti və Yer üzünün gözəlliklərini müşahidə etməyi sevir. Səyahətin onu müdrikləşdirəcəyinə və daxili rahatlıq tapmasına kömək edə biləcəyinə inanır. Həyat məqsədi mümkün qədər çox fərqli yerləri, mədəniyyətləri, insanları görməkdir.

Bütün bloqlar
pickvisa.az