Buenos-Ayresdə 12 İnstaqramlıq yer

Səyahət milyonlarla insan üçün sonsuz bir sevgidir. Bəzi mənbələr dünya üzrə ümumi turist sayının 1,4 milyarddan çox olduğunu göstərir. Əlbəttə ki, 2020-ci ildə COVID-19 səbəbi ilə turist sayında azalma oldu, lakin bu əbədi olaraq qalmayacaq. Bu səbəbdən də pandemiya sonrası səyahət marşrutumuzu elə bu gündən planlaşdırmağa başlamalıyıq. Bu məqsədlə, bu gün sizə Argentinanın paytaxtı Buenos-Ayresin 12 instaqramlıq məkanını təqdim etmək istəyirəm. Bu bloqdan Buenos-Ayresdə nə edəcəyinizi və hansı yerləri ziyarət etməli olduğunuzu, Buenos-Ayresə səyahət etmək üçün ən yaxşı vaxtın nə vaxt olduğunu və daha çoxunu öyrənəcəksiniz.

Buenos-Ayres haradadır? Buenos-Ayres Argentinanın ən böyük şəhəridir və Cənubi Amerika qitəsinin cənub-şərq sahilində yerləşir. Məlumatlar göstərir ki, Buenos-Ayres əyalətində təxminən 16 milyon insan yaşayır (şəhərdə təxminən üç milyon). Şəhər il ərzində üç milyon ziyarətçiyə ev sahibliyi edir. Buenos-Ayresə səyahət etmək üçün ən yaxşı vaxt nədir? İnsanların çoxu düşünür ki, aprel və iyun ayları arasındakı dövr, Buenos-Ayresə səyahət etmək üçün ən yaxşı vaxtdır. Ölkədə rəsmi və ən çox istifadə olunan dili ispan dilidir. Ancaq əksər turistik yerlərdə ingilis dilindən sərbəst istifadə edə bilərsiniz.

1. Kolon Teatrı (Teatro Colon)

Kolon teatrı Buenos-Ayresdə ziyarət etmək üçün ən yaxşı yerlərdən biridir. Bu teatrın adını Milandakı La Skala, Parisdəki Qarnye Sarayı-nın da adının olduğu dünyanın ən yaxşı opera evləri siyahısında görə bilərsiniz. Bina heyrətləndirici memarlıq və fenomenal akustikaya malikdir. Bu arxitektura möcüzəsi üç memar – Françesko Tamburini, Vittorio Meano və Xulio Dormal tərəfindən dizayn edilmişdir. Opera evinin inşası 20 il davam etdi və nəhayət 1908-ci ildə öz qapılarını qonaqlara açdı. O gündən bəri bir çox tanınmış sənətçilər, dirijorlar bu səhnədə çıxış etdi. Məsələn: Maksimiliano Querra, Luçano Pavarotti, Plaçido Dominqo, Rudolf Nuriyev ve Xulio Bokka. Bundan əlavə, 2010-cu ildə təmir işləri aparıldığından bina indi daha yaxşı vəziyyətdədir və sizin instaqramlıq şəkillərinizə ev sahibliyi etməyə tam olaraq hazırdır.

2. Cabildo

Şəhər tarixi və müstəmləkə binaları ilə zəngindir və Cabildo, Buenos-Ayresdə gəziləcək tarixi yerlərdən biridir. Keçmişdə bura İspaniya ordusunun inzibati mərkəzi və Argentinanın müstəqilliyinin ilk əsrində yeni hökumətin inzibati mərkəzi idi. Orijinal bina 1580-ci ildə, indiki bina isə 18-ci əsrin ikinci yarısında inşa edilmişdir. Bu gün Cabildo, ispan müstəmləkə dövrünə, ingilis istilasına və müstəqilliyin ilk illərinə aid əsərlər və sənədlər tapa biləcəyiniz instaqramlıq muzeydir. 2016-cı ildə muzeydə təmir işləri aparıldı və ən çox bəyəni alacaq İnstaqram şəklinizi çəkmək üçün mükəmməl hala gəldi. Muzeyin iş saatları həftənin günlərindən asılı olaraq dəyişir: çərşənbə axşamı, çərşənbə və cümə günləri 10.30 - 17.00, cümə axşamı 10.30 - 20.00, şənbə, bazar və tətil günləri: 10.30 - 18.00. Muzeydə rəhbərli turlar var, lakin onlar ispan dilindədir.

3. Caminito

Hər şeylə maraqlanan birisinizsə, Buenos-Ayresdə həyəcan dolu vaxt keçirmək üçün Caminito-ya getməyinizi məsləhət görürəm. Caminito küçə muzeyi La Boca-da yerləşir. Caminito-da buraya 19-20-ci əsrdə gəlmiş miqrantlara məxsus çoxlu rəngli evlər görəcəksiniz. Maraqlıdır ki, 1950-ci ilin ortalarında küçə demək olar ki, tamamilə tərk edildi. Geriyə qalan insanlar isə ərazini bərpa etməyə qərar verdilər və nəticə göz qabağındadır. Caminito-da küçələrdə gəzmək və rəngli yaşayış yerlərini müşahidə etməklə yanaşı, restoranlara, kafelərə, rəqs məktəblərinə gedə və ya mağazalardan müxtəlif əl işləri ala bilərsiniz. Gördüyünüz kimi, burada hər kəs üçün uyğun şey var.

4. Ekoloji Qoruq

Buenos-Ayres Ekoloji Qoruğu 350 ha ərazini əhatə edən və 2000-dən çox flora və fauna növünə ev sahibliyi edən cənnətdir. Bu instaqramlıq yeri ziyarət edənlər üçün ən cəlbedici olan isə quşlardır. Qoruqda 340-dan çox quş növü var və 40-dan çox növü görmək üçün bir və ya iki saatlıq gəzinti kifayətdir. Parkda gəzinti zamanı valehedici yerlər görəcəksiniz, ona görə də Buenos-Ayresə səyahət zamanı özünüzlə yaxşı bir kamera götürməyi unutmayın. Ziyarətçilər üçün başqa bir maraqlı fəaliyyət velosiped sürməkdir.

5. Palermo Qızılgül Bağı (Parque Tres de Febrero)

Buenos-Ayresdəki instaqramlıq yerlərdən danışırıqsa, buranı mütləq qeyd etməliyik. Bağı Buenos-Ayresdə gəziləcək yerlərdən birinə çevirən əsas xüsusiyyət 18000 qızılgüldür. Əlli yaşındakı məkan gözəlliyi və sakitliyi ilə məşhurdur. Parque Tres de Febrero-nun Dünya Gül Cəmiyyətləri Federasiyası (“World Federation of Rose Societies”) tərəfindən Mükəmməl Bağ (“Garden Excellence”) mükafatını alması təəccüblü deyil. Ayrıca burada Xorxe Luis Borxes, Alfonsina Storni, Dante Aligyeri kimi 26 məşhur yazıçının heykəli və göl var. İstirahət etmək və əyləncəli vaxt keçirmək üçün bağı mütləq ziyarət edin.

6. Bombonera Stadionu

Minlərlə insan Buenos-Ayresə Boka Xuniors və River Plate arasındakı mübarizəni izləmək üçün gedir. Bir çox futbol azarkeşi bu mübarizənin ilin ən həyəcanlı matçı olduğunu, hətta El Classico-dan (Real Madrid – Barselona) daha maraqlı olduğunu düşünür. Əgər məlumatınız yoxdursa, Bombonera stadionu əfsanəvi Maradonanın ən sevdiyi klubu - Boka Xuniorsun ev arenasıdır. Klubun pərəstişkarları, kluba olan məhəbbətləri və çılğınlıqları sayəsində dünya səviyyəsində məşhurdurlar. Bir şəkildə bilet alın və matçı canlı izləyin. Sizi əmin edirəm ki, bu 90 dəqiqə, Buenos-Ayresdəki ən unudulmaz anlarınız olacaq. Futbol yarışını izləməklə yanaşı, klub muzeyinə və stadiona təşkil olunan turlara da qatıla bilərsiniz.

7. Plaza Dorrego

Buenos-Ayresdə ediləcək ən yaxşı şeylərdən biri də Plaza Dorrego-nu ziyarət etməkdir. Bura San Telmonun mərkəzində yerləşən tarixi meydandır. Bölgə kafe, restoran və barlarla əhatə olunmuşdur və təkcə bu fakt, Plaza Dorrego-nu "Buenos-Ayresdə gediləcək yerlər" siyahısına əlavə etmək üçün kifayətdir, amma dahası da var. Meydanı Buenos-Ayresin ən yaxşı yerlərindən birinə çevirən əsas xüsusiyyət, Feria de San Telmo - hər bazar günü təşkil edilən açıq səma bazarıdır. 250-dən çox piştaxta sizə müxtəlif antik fotoşəkillər, kolleksiya oyuncaqları, kitablar və jurnallar, sikkələr və s. təklif edir.

8. Palacio Barolo

Siyahımızdakı növbəti yer Palacio Barolo-dur. Bina italyan memar Mario Palanti tərəfindən dizayn edilmişdir. Memar Palacio Barolo-nu dizayn edərkən bir çox müxtəlif memarlıq üslubundan ilham almışdır: Caypurdakı Hawa Mahal, Rajarani məbədi və hətta yazıçı Dante Aligyerinin İlahi Komediyasına aid bəzi istinadları görə bilərik. Bundan başqa, müəyyən dövrlərdə Cənubi Amerikadakı ən hündür bina, 100 m-dən yüksək ilk dəmir-beton bina s. kimi tanınmışdır.

9. El Ateneo Grand Splendid

Kitabsevərlərin valeh olacağı bir yer! The Guardian bu kitab mağazasını "dünyanın ikinci ən yaxşı kitab mağazası" olaraq adlandırıb. İndiki dövrdə kitab mağazası olmasına rəğmən, bina əvvəlcə teatr olaraq dizayn edilmiş və uzun illər müxtəlif incəsənət nümayişləri üçün istifadə edilmişdir. Bina sahibləri 2000-ci ildə buranı kitab mağazasına çevirdilər, lakin orijinal memarlığı qoruyub saxladılar. Bu günlərdə mağazada 120000-dən çox kitab var.

10. Mataderos

Buenos-Ayresə getməzdən əvvəl, “gəziləcək yerlər” siyahınıza Mataderos-u əlavə etməlisiniz. Mataderos həftəlik yarmarkası ilə məşhur olan bölgədir. Burada müxtəlif gaucho sənətkarlıq nümunələrini (ponço, yorğan) ala biləcəyiniz 700-dən çox stend var. Bundan əlavə, burada ləzzətli yerli mətbəxi dada, rəqs və musiqi nümayişlərindən zövq ala, Argentinanın milli idman növü olan - pato (polo və basketbol qarışığı) yarışlarını izləyə bilərsiniz.

11. Galerias Pacifico

Şübhəsiz ki, Galerias Pacifico misilsiz alış-veriş mərkəzlərindən biridir. Digər alış-veriş mərkəzlərindən fərqli olaraq insanlar buraya əsasən alış-veriş üçün deyil, Xuan Karlos Kastagnino, Demetrio Urruchua, Antonio Berni və başqalarının monumental rəsmlərinin olduğu heyranedici günbəzi seyr etmək üçün gəlirlər. Misilsiz bir alış-veriş mərkəzi olmaqla yanaşı, Galerias Pacifico-nun tarixi dəyəri də var və onun tarixi haqqında daha çox məlumat əldə etmək istəyirsinizsə, bələdçili turlara qoşula bilərsiniz.

12. Obelisk

Buenos-Ayresdə hansı yerləri ziyarət etmək lazımdır? Qeyd etmək istədiyim son yer Buenos-Ayresin Obeliskidir. Monumentin şəhərin simvolu olduğunu və iki vacib küçənin - Avenida 9 de Julio və Avenida Corrientes - arasında yerləşdiyini söyləyə bilərik. Abidə 1936-cı ildə Argentina bayrağının ilk dəfə qaldırıldığı yerdə inşa edilmişdir.