Hansı ölkədə nəyi etmək olmaz?

Səyahət etməyin insana qazandırdığı ən vacib nemətlərdən biri də fərqli mədəniyyətlərlə tanış olmağın verdiyi xoşbəxtlik hissidir. Bu mədəniyyətlərlə tanış olmaq üçün həmin mədəniyyətin məxsus olduğu ölkədə ən azı bir neçə gün, hətta bir həftədən çox qalmalı, ölkənin sakinləri ilə daha çox vaxt keçirməli, o ölkənin vətəndaşıymış kimi hiss etməlisiniz. Təbii ki, həmin ölkədə siz yaxşı qarşılaşacaqsınız. Çünki bir ölkənin vətəndaşı onun ölkəsinin mədəniyyətini öyrənmək istəyən turistə hörmət edir, rəğbət bəsləyir.

Kəşf etmək istədiyiniz ölkənin mədəniyyətinə yiyələnərkən bilməli olduğunuz vacib məlumatlardan biri də həmin ölkədə nəyi etməməyinizdir. Bəli, etməməyiniz. Çünki bəzi ölkələrin bir sıra adət-ənənələri və qadağaları vardır ki, onları etsəniz, pis qarşılana bilərsiniz. Bu adət-ənənələr və qadağalar o qədər milliləşmişdir ki, əgər onlara riyaət etməsəniz cəzalandırıla, təzyiqlərlə rastlaşa, hətta ölkə xaricinə belə çıxarıla bilərsiniz.

Böyük Britaniya - Beşikdən məzaracan qanun

Böyük Britaniya dünyada öz qanunlarına əməl edilməsinə nəzarət edən ölkələr içərisində ilk sıralardadır. Hər bir məsələdə qayda-qanuna əməl edən xalqın arasındasınızsa, çox ehtiyatlı olmalısınız. Çünki Böyük Britaniyada sıra mədəniyyətini pozmağa cəhd etsəniz, bu sizin üçün çox böyük təhlükədir. Hətta həyatınızı riskə atmış olursunuz.

Böyük Britaniyada insanların nə qədər maaş aldığını soruşmaq çox ayıb hərəkət hesab edilir. Buna görə də onların dialoqlarında işlə bağlı, demək olar ki, heç bir sözə rast gəlməzsiniz.

Böyük Britaniyada nə qədər qeyri-qonaqpərvərlik kimi görünsə də, dəvətsiz kiminsə evinə getmək xoş qarşılanmır. Sadəcə yaxın dostlar bir-birilərini öz evlərinə dəvət edirlər.

Hollandiya - Piyada üçün ayrı, velosiped üçün ayrı

Hollandiyada yollar təkcə maşınlar və piyadalar üçün deyil. Maşın və piyada yolu ilə yanaşı, velosipedlər üçün də yol var. “Velosipedlər diyarı” adlandırılan Hollandiyada 7 yaşından 70 yaşına qədər hər kəs velosipeddən istifadə etdiyi üçün velosipedlər ictimai nəqliyyatda daha üstün hesab edilir. Belə ki, siz velosiped yolunda piyada hərəkət edə bilməzsiniz. Bu hərəkətiniz qarşısında ya cərimələnəcəksiniz, ya da velosipedlə üstünüzdən keçəcəklərdir. Hər iki halda bu birmənalı olaraq yaxşı qarşılanmır.

Polşa - Nəqliyyatda zarafat olmaz

Bütün dünyada ictimai nəqliyyatdan istifadə edərkən spirtli içki qəbul etmək və siqaret çəkmək qadağandır. Əksər ölkələrdə buna yol versəniz, o qədər də sərt münasibət görməyə bilərsiniz. Lakin Polşada ictimai nəqliyyatdan istifadə zamanı və ya ictimai nəqliyyatı idarə edərkən spirtli içkidən istifadə etmək və siqaret çəkmək ağır cərimədir və bu zaman böyük ictimai qınağa tuş gələ bilərsiniz.

Polşadan söhbət düşmüşkən. Bu ölkənin qəribə adət-ənənəsi var. Polşada qırmızı borşu, adətən, yemirlər, içirlər. Buna görə də siz qırmızı borşu kofe avtomat cihazlarından da əldə edə bilərsiniz. Hətta kafelərdə isti içki istəsəniz, sizə qırmızı borş da təklif edə bilərlər.

ABŞ - Böyük olduğu qədər qəribə

ABŞ-a səyahət edərkən daha diqqətli olmalı və qaydalara daha çox riyaət etməlisiniz. Bu ölkədə uşaqlara toxunmaq məsləhətli deyil. Xüsusilə də tanımadığınız uşaqlara. Əgər belə bir hərəkətə yol versəniz, səhv anlaşıla bilərsiniz. Hətta bu səbəbdən həbs belə oluna bilərsiniz. Bu əslində uşaq ticarətinin və təcavüzün qarşısını almaq üçün əla vasitədir. Lakin bundan xəbəri olmayan turistlər üçün başı bəlalı ənənədir.

ABŞ-da ictimai nəqliyyatda tanımadığınız birinə söykənə bilərsiniz. Bu normal qəbul edilir. Hətta tanımadığınız biri sizə söykənərsə, bunu soyuqqanlılıqla qəbul etməyiniz məsləhətlidir. Lakin mağazada tanımadığınız birinə söykənməyi ağlınızın ucundan belə keçirtməyin. Bu böyük nəzakətsizlik hesab olunur.

ABŞ nəqliyyatının qəribə cəhəti metrolarda telefonun şəbəkəsənin tutmamasıdır. Buna görə də şəbəkədən asılı nə işiniz varsa, qatara minməmişdən əvvəl bitirməyiniz məsləhət görülür.

İsveç - Rahatlıq önəmlidir

İsveçrədə olarkən özünüzü çox rahat hiss edəcəksinizdir. Amma bu rahatlığa qovuşmaq üçün əvvəlcə digər insanların rahatlığını pozmamağa çalışmalı və buna əməl etməlisiniz. Əgər məcbur qalmasanız, köməyə ehtiyacınız olmasa, tanımadığınız adamlarla dialoqa girməməyiniz məsləhətlidir. Bu onları narahat edə bilər.

Bu rahatlıq “qanun”-u təkcə küçələrdə deyil, ictimai nəqliyyatda da qüvvədədir. Belə ki, ictimai nəqliyyat vasitələrində insanlardan bacardığınız qədər aralı oluturun. Boş yerlərdə oturmağa çalışın. Əgər oturacağınız yer darısqaldırsa, o zaman heç oturmamağınız msələhətlidir. Bu isveçlilərin kobudluğunun və ya asosiallığının əlaməti deyil. Sadəcə onlar nəzakətlidirlər və bir-birilərinin rahatlıqlarının qeydinə çox qalırlar. Bu rahatlıq düşüncəsinə görə, tanımadığın biri ilə aranda ən azı 3 metr məsafə saxlamağın msələhətlidir.

Norveç - Əsl səmimiyyət

Norveçdə rəsmiyyət gözləməyin. Norveçlilər qeyri-rəsmi danışırlar və ilk görüşdən bir-birilərinə öz adları ilə xitab edirlər.

Norveçdə kilsəylə bağlı sual vermək hörmətsizlik kimi qəbul edilir. Çünki Norveçdə insanlar adətən kilsəyə getmir.

Fransa - Yemək qanunları

Fransızlar şərabı su, süd, çay və ya pivə əvəzinə içirlər. Onlar üçün zərif yeməklər yeyəndə azı bir stəkan şərab içməmək müşkül məsələdir. Şərabın bu qədər sevildiyi ölkədə şəraba su qatmaq olmaz. Pendirə sous əlavə etmək də qadağandır. Yeməyə alkoqol qatmaq da qadağandır. Fransaya səyahətdən öncə bunları bilməyiniz sizin səhyahətinizi daha yaxşı keçirməyə kömək edəcəkdir.

İrlandiya - İçki şərtdir

İçki ilə aranız yaxşıdırsa, o zaman İrlandiyaya səyahət düşündüyünüzdən daha maraqlı və əyləncəli keçəcəkdir. Belə ki, bu ölkədə əgər kimsə sizi içkiyə qonaq edirsə, siz də mütləq onu içkiyə qonaq etməlisiniz. Və ya əksinə, siz cinsindən asılı olmayaraq kimisə içkiyə qonaq dəvət etsəniz, həmin şəxs sizi tanımasa belə, təklifinizi rədd etməyəcəkdir və o da sizi içkiyə qonaq edəcəkdir.

İçkidə gözəl qaydalar olduğu kimi, sərt qanunlar da var. Belə ki, pulu olmayanın içki içə bilmək üçün barları gəzməsi və kiminsə onu qonaq etməsini gözləməsi yaxşı qarşılanmır.

İrlandiyanın qəribə adətlərindən biri də “bəxşiş” məsələsidir. Barda işləyən gənclərə bəxşiş verməyiniz lazımsızdır, çünki onlar çox yaxşı qazanırlar. Lakin restoranlardakı, kafelərdəki ofisiantlara mütləq bəxşiş verməlisiniz.

İrlandiya ləhcəsini təqlid etməyə cəhd etsəniz belə, bu sizdə uğurlu alınmaycaqdır. Çünki irlandiyalılar üçün irland ləhcəsi yoxdur. Sadəcə, ölkənin bölgələrinin ləhcələri var.

Şotlandiya - “Kişisənsə, gəl içək!”

Şotlandiyada kişilərin gücü onların nə qədər çox içə bilməsi və içkiyə nə qədər çox dözə bilmələri ilə ölçülür. Bu ölkədə heç bir kişi az içmir və heç kim içkidən imtina etmir. Əgər yolda gördüyünüz tanımadığınız birinə içki təklif eləsəniz, o yüz faiz bu təklifi qəbul edəcəkdir. Əgər siz içki içmirsinizsə, Şotlandiyada dost tapmağınız bir az çətin olacaqdır.

Şotlandiyanın özünəməxsus “qayda”-larından biri də budur ki, bu ölkədə heç kimi “ingilis” adlandırmaq olmaz.

Belçika - Kompliment etməsən yaxşıdı

Belçikada kiməsə kompliment etmək sizi təngə gətirə bilər. Belə ki, qarşınızdakına kompliment etsəniz, o bir saat ərində sizə komplimentinizin düzgün olmadığını, özünün əslində sizin düşündüyünüzdən qat-qat pis olduğunu sübut etməyə çalışacaqdır. Siz bunu zarafat qəbul eləsəniz belə, onlar ciddi olmaqda israrlı olacaqdır.

Almaniya - Hay, Hitler!

Almaniyada nasist salamı vermək ciddi cinayət hesab edilir. Bu səbəbdən siz hətta cəza da ala bilərsiniz.

Almaniyada insanlara dik-dik baxmaq məsləhətli deyil. Çünki bu ölkədə təkcə təhsilsiz və dəli insanlar belə edirlər.

Almaniyada özünüzü dostcanlı aparmaq digər ölkələrin əksinə yaxşı qarşılanmır. Ona görə də çox mehriban rəftar etməyin. Normalda almanlar üçün yeni insanlara öyrəşmək vaxt aldığı kimi, sizin də almanlara öyrəşməyinizin vaxt almağı normal hesab olunur.

Alman dostunuz varsa, ad gününü öncədən təbrik etməyin. Çünki Almaniyada insanların doğum gününü əvvəlcədən təbrik etmək xeyrə əlamət sayılmır. Onların inanclarına görə, bu, ölümə səbəb ola bilər.

Keniya - Necə gəldi elə hərəkət elə

Keniyada heç nəyin nizam-intizamı yoxdur. Buna görə də siz səbrli olmalısınız. Bu intizamsızlıqdan şikayətçi olmağınızın bir faydası olmayacaqdır.

Keniya əhalisinin əksəriyyəti dindardır. Ölkə əhalisi dini inanclarına çox bağlı olduğu üçün siz də xalqın dini inanclarına hörmətlə yanaşmalısınız.

Keniyada qarşınızdakı adam sizə adınızla müraciət etməyibsə, siz də ona adı ilə deyil, başqa cür xitab edin.

Türkiyə - Çay ölkəsi

Türk seriallarında insanların öz evlərinə və digər insanların evlərinə ayaqqabı ilə girdiklərini görsək də əslində bu heç də belə deyil. Türkiyədə hər hansı sakinin evinə daxil olarkən ayaqqabılarınızı çıxardın. Əgər ev sahibi özü sizə təkidlə ayaqqabılarınızı çıxartmaya bilərsiniz deyirsə, bu zaman çıxarıb çıxarmamaq artıq sizin öz işinizdir. Əgər ev sahibi bir söz demədən evə ayaqqabı ilə girsəniz, bu hörmətsizlik hesab edilir.

Dünyanın ən çox çay içilən ölkələri siyahısında 1-ci yeri tutan Türkiyədə çay içmək özü bir mədəniyyət hesab edilir. Əgər sizə çay təklif olunursa, mütləq içməyiniz məsləhət görülür. Əgər çay içmək istəmirsinizsə, təklifini rədd etdiyiniz insana qarşı hörmətsizlik etməmək üçün bir bəhanə uydurmağınız yerinə düşərdi. Amma hər halda bəhanə uydurmaqdansa, çay içmək daha yaxşıdır.

İran - Diqqətli olmaq gərək

İranda ictimai yerlərdə daha diqqətli olmaq gərəkdir. Belə ki, kişilərin ictimai yerlərdə şort geyinməyi qadağandır. Qadınlar isə ictimai yerlərdə baş örtüyündən istifadə etməlidirlər.

İranda Facebook, YouTube, Twitter və başqa sosial şəbəkələrdən istifadə qadağandır və ölkə üçün bu şəbəkələrə giriş bağlıdır. Yəni siz İranın sərhədini keçdikdən sonra bu sosial şəbəkələrə giriş edə bilməyəcəksinizdir. "Twitter" qadağan olmasına baxmayaraq İran lideri Əli Xamenei, prezidenti Həsən Ruhani, Xarici İşlər naziri Məhəmməd Cavad Zərif başda olmaqla dövlətin yüksək səviyyəli şəxsləri tərəfindən fəal istifadə edilir.

Çin - Ehtiyatlı olun

Çində küçələrdə, evlərdə krantdan su içməməyiniz məsləhətlidir. Çünki krantdan gələn sudan içməklə mədə xəstəliyinə tutula və ya birbaşa ölə bilərsiniz.

Yaponiya - Narahat etmə ki, narahat edilməyəsən

Yaponiyada ictimai nəqliyyat vasitələrində, metrostansiyalarda, dayanacaqlarda, əhalinin sıx olduğu yerlərdə telefonla danışmaq olmaz. Bu ətrafdakılara hörmətsizlik kimi qəbul olunur. Əgər siz telefonla danışsanız, sizə qarşı olan soyuq münasibəti görə bilərsiniz. Ona görə də ən yaxşısı ismarıc yazmaqdır.

Yaponiyada ictimai yerlərdə qucaqlaşmaq qadağandır. Həmçinin bu ölkədə hər hansı kafetariyada bəxşiş verməyiniz digər ölkələrin əksinə olaraq düzgün qəbul edilmir. İşçilər bəxşişə ehtiyacları olmadıqlarını düşünürlər.

Salvador - İngiliscə bilməmək yaxşıdır

Əgər bir gün Salvadora səyahət etsəniz, ingiliscə danışmamağa üstünlük verməyiniz məsləhətldir. Əgər ingiliscə danışsanız, yerli camaat elə biləcək ki, siz ABŞ-dan gəlmisiniz. Onların düşüncəsində siz ABŞ-dan gəlmisinizsə, o zaman ilk fürsətdə sizi qarət edəcəklər. Ən yaxşısı isə ispan dilini öyrənməyiniz və ya lüğət və proqramlardan istifadə etməyinizdir.

Hindistan - Yaxınlıq olmaz

Hindistan sizi öz mehriban qonaqpərvərliyi ilə qarşılasa da, bəzi məsələlərdə çox ciddi və sərtdir. Məsələn, bu ölkədə ictimai yerlərdə öpüşmək qadağandır. Ümumiyyətlə, ictimai yerlərdə qarşı cinslə hər hansı fiziki yaxınlıq qadağandır.

Misir - Gender bərabərliyi?

Misirdə ictimai yerlərdə kişi və qadın yan-yana yeriyə bilməzlər. Bu ölkənin qanunlarına görə kişi qadından öndə olmalıdır. Qadının kişidən öndə getməsi hörmətsizlik sayılır. Yan-yana yeriyən cütlüyə isə az rast gəlmək olar.

Koreya - Tək əldən səs çıxmaz

Koreyada kiməsə nəsə vermək istədikdə, tək əlllə verməyin. Bu hörmətsizlik əlaməti hesab edilir. Bir şey verdikdə iki əlinizlə verin. Xüsusən də pul verdikdə buna diqqət edin.

Malayziya - Müqəddəs baş

Malayziyada başqasının başına toxunmamağınız məsləhətlidir. Bu ölkədə baş bədənin ən müqəddəs hissəsi hesab edildiyi üçün ona toxunsanız, xoş qarşılanmaya bilərsiniz. Xüsusilə də körpələrin, uşaqların başına sığal çəkməyin.

Yeni Zelandiya - Qəribə, maraqlı

Yeni Zelandiyada çox qəribə adət-ənənələr hökm sürür.

Yeni Zelandiyada reqbi oyunu, “Üzüklərin hökmdarı” və Birləşmiş Krallığın kraliçası haqqında zarafat etsəniz, bu zarafatların sonu sizinçün yaxşı bitməyə bilər. Çünki Yeni Zelandiya sakinləri üçün bu 3 məvhum çox ciddi mövzulardır.

Yeni Zelandiyada küçələrdə tez-tez ayaqyalın insanlarla qarşılaşa bilərsiniz.

Meksika - De, gül, əylən

Əgər zarafatla aranız yaxşı deyilsə, Meksikaya etdiyiniz səyahət heç də ürəyinizcə olmaya bilər. Çünki bu ölkədə qarşılaşacağınız hər kəs zarafatsevərdir və yaranan hər fürsətdə zarafat edəcəklərdir. Ona görə də gülərüz olun və zarafatlaşın. Meksikalılar zarafatcıl insanları özlərinə dost hesab edirlər.

Meksikalılar üçün dostluq təkcə zarafatla ölçülmür. Onlar dillərini öyrənmək istəyənlərə və adət-ənənələrini mənimsəmək istəyənlərə daha sevgi dolu münasibət göstərirlər. Əgər siz Meksika adət-ənənələrini, dilini bəyənməsəniz və bunu büruzə versəniz, onların sizə qarşı münasibəti heç də yaxşı olmaya bilər.

Hansı ölkədə nə hədiyyə etmək olmaz?

Bəli, bəli. Bəzi ölkələrdə elə adət-ənənələr və qadağalar vardır ki, insan öyrəndikcə təəcüblənir, heyrətini gizləyə bilmir. Aşağıda bəhs edəcəyimiz ölkələrdə elə şeylər var ki, onları hədiyyə etmək ya qadağandır, ya da yaxşı qarşılanmır. Odur ki, xarici ölkədə yaşayan dostunuza hədiyyə seçərkən diqqətli olun.

ABŞ - Bəyənmirsən, get, dəyiş

Azərbaycanda kiməsə hədiyyə alarkən, malın üzərindəki qiymət etiketini çıxarırıq. Bu “hədiyyənin qiyməti olmaz” anlamındadır. Lakin ABŞ-da tamamən bunun əksidir. Yəni siz aldığınız hədiyyənin üstündəki qiymət etiketini çıxarsanız, bu hədiyyə verəcəyiniz adamın xoşuna gəlməyə bilər. Çünki ABŞ sakinləri son zamanlar bir-birilərinə hədiyyə verərkən malın qəbzini üzərində saxlayırlar. Bu zaman isə hədiyyəni qəbul edən adam hədiyyəni bəyənmədiyi təqdirdə onu dəyişə bilir. Sırf bu ənənədən dolayı Milad bayramından sonra ABŞ mağazalarında mal dəyişən insanların sırası yaranır.

Almaniya - Elm, feminizm...

Bütün dünyada öz elmi ilə tanınmış Almaniyada dəftərxana və ofis ləvazimatları, xüsusən də gündəlik təlabatlar - qələm, karandaş, dəftər və s. hədiyyə etmək düzgün hesab olunmur. Bu həmin insanın elmi biliyinə şübhə ilə yanaşdığınızı göstərir.

Almaniyada və eləcə də, Avropanın bir çox ölkəsində feministlərə mətbəx ləvazimatları, xüsusilə də gündəlik təlabatlar - bıçaq, boşqab, qazan və s. hədiyyə etmək düzgün hesab olunmur. Bu qadınların yalnız mətbəx işi görən varlıq olduğunu düşündüyünüzü göstərir. Əgər belə bir jest etsəniz, feministlərin təzyiqlərinə belə rast gələ bilərsiniz.

Fransa - Qadınlar hər zaman diqqətə layiqdirlər

Qadınların azad, xoşbəxt və gözəl yaşadığı Fransada xanımlara gül alarkən diqqətli olmalısınız. Fransız qadınlara qərənfil, qırmızı qızılgül və xrizantema hədiyyə etmək düzgün hesab olunmur. Qırmızı qızılgül və qərənfil yas mərasimlərində, xrizantema isə təbabətdə daha çox istifadə edildiyi üçün qadınlara layiq hesab edilmir. Ona görə də gül seçimində diqqətli olun.

Fransada ailəli qadına başqa kişi tərəfindən ətir hədiyyə edilməsi ədəbsizlik hesab edilir. Evli qadına ətiri yalnız həyat yoldaşı hədiyyə edə bilər. Lakin subay xanımlara alına biləcək ən gözəl hədiyyə elə ətir hesab olunur.

Çin - Atalar üçdən yox, dörddən deyib

Çinli bəylərə hədiyyə alarkən ehtiyatlı olun. Əgər onlara silah suvenirləri, xüsusən də, tapança, xəncər, bıçaq hədiyyə etsəniz, onlar bu hədiyyəni qəbul etməyəcəklər. Çünki Çində bu hədiyyələr dostluğun bitməyinə işarə kimi qəbul edilir. Bu hədiyyələri çinli xanımlara hədiyyə etməyiniz isə ümumiyyətlə məsləhətli hesab edilmir.

Çinli xanımlara həmçinin sarı və ağ güllər hədiyyə etmək də yaxşı qəbul olunmur. Sarı gül ayırlıq, ağ gül isə yas mərasiminin simvolu hesab edildiyindən bu hədiyyələri hədiyyə etməyiniz məsləhətli deyil.

Çinlilərə edəcəyiniz ən gözəl hədiyyə qol saatıdır. Onlar dəqiq insanlar olduqları üçün bu hədiyyəni sevirlər və demək olar ki, xalqın əksəriyyəti qol saatından istifadə edir. Lakin çinlilərə divar və masa saatı, eləcə də, zəngli saat hədiyyə etmək olmaz.

Bir çinlinin evinə gedərkən ona bazarlıq etsəniz, daha çox meyvə və tərəvəzə üstünlük verin. Lakin heç bir halda yumurta almayın. Yumurta Çində axmaqlığa işarədir. Buna görə də pasxa bayramı yumurtası da hədiyyə etmək olmaz.

Çinli uşaqlara ördək kuklası, böyüklərə ördək suveniri, ördək şəkli, bir sözlə, ördəyə aid hədiyyələr etsəniz, onu təhqir etmiş olacaqsınız. Çünki Çində “kişi fahişəsi”-ni ördək adlandırırlar. Ördək sözü söyüş kimi də istifadə olunur.

Nəhayət, bir çinliyə hədiyyə verərkən çox səbrli olmalısınız. Çinli dostunuz hədiyyəni almadan qabaq 3 dəfə ondan imtina edir. Sizin 4-cü israrınızdan sonra onu götürür. Necə deyərlər, “Atalar dörddən deyib, üçdən yox”.

Koreya - Qırmızı ölüm

Koreyada qırmızı rəng qan simvolu hesab edilir və ölümə işarədir. Bu səbəbdən bu ölkədə qırmızı rəng hədiyyənin olmasını görmək qeyri-mümkündür. Hətta digər hədiyyə məqsədli kağızların, açıqcaların qırmızı rənglisindən də istifadə olunmur. Sağ adamların adını isə qırmızı rəngdə yazmırlar.

Sevgili koreyalılar bir-birilərinə ayaqqabı hədiyyə etmirlər. Bu səbəbdən də onlar bir-birilərinin ayaq ölçülərini bilmirlər.

Koreyada burun dəsmalı hədiyyə edilmir.

Vyetnam - Pulun varsa, varlısan; pişiyin varsa, kasıb

Çində olduğu kimi Vyetnamda da bıçaq, eyni zamanda saat hədiyyə etmək olmaz.

Vyetnamlılara pişik hədiyyə etmək onları təhqir etmək anlamına gəlir. Çünki pişik miyoldamasının tələffüzü vyenmanca zəif deməkdir. Yəni “mgheo” (miyau) vyetnamca “zəif”, ona oxşar olan “ngheo” (niyau) isə viyetnamca kasıb deməkdir. Buna görə də pişik hədiyyə etmək onlara kasıb və ya zəif demək istədiyinizə işarədir.

Əgər siz vyetnamlıları sevindirmək və qəlblərinə yol tapmaq istəyirsinizsə, onlara pul hədiyyə edin. Bu pis günlərində onların yanında olduğunuza işarədir. Pulu qırmızı zərfdə hədiyyə etmək isə zənginliyə işarədir, yəni siz hədiyyəni verdiyiniz şəxsə zənginlik arzu etmiş olursunuz.

Yaponiya - Niyə hədiyyə almısan?

Bütün dünya Yeni ili təmtəraqla qarşılayarkən yeni ilin ən tez girdiyi ölkələrdən biri olan Yaponiyada bu bayram xüsusi deyil, əksinə adi, sıradan, sadə bayram hesab edilir. Buna görə də yeni ildə yaponlara bahalı hədiyyə almaq düzgün hesab edilmir. Yeni il bayramında yapon uşaqlarına şirniyyat və oyuncaq hədiyyə etmək düzgün hesab olunmur. Əgər yapon uşaqları sevindirmək və məmnun etmək istəyirsinizsə, o zaman içində pul olan zərf hədiyyə edin. Yaponiya adət-ənənəsinə görə uşaqlara ən münasib hədiyyə elə budur.

Yaponiyada vəzifəli şəxslərə ediləcək ən gözəl hədiyyə xüsusi ləzzətli meyvələrdir. Məsələn, qara qarpız və ya Yubari qovunu.

Bir yapona, xüsusilə də yapon qadına sarı və ağ güllər hədiyyə etmək yaxşı qəbul olunmur. Sarı gül ayrılıq, ağ gül isə yas mərasiminin simvolu hesab edildiyindən bunları hədiyyə etməyiniz məsləhətli deyil.

Yaponiyada ad günü, ildönümü və xüsusi günlərdə hədiyyəni gecikdirmək olmaz. Bu qarşındakı şəxsə hörmətsizlik hesab edilir və gecikən hədiyyə qəbul edilmir.

Yaponlar üçün ən utancverici hal isə onun təbrik etməyi unutduğu adamdan hədiyyə almağıdır. Buna görə də yaponlar çox diqqəcil və qayğıkeşdirlər.

Rəqəmlərin mistik anlam daşıdığı Yaponiyada 4 və 9 sayda olan əşyalar və ya bir əşyadan 4 və 9 dənə hədiyyə etmək olmaz. Çünki bu ölkədə 4 ölümə, 9 isə ağrıya işarədir.

Ən əsası isə Yaponiyada heç bir səbəbiniz olmadan birinə hədiyyə ala bilməzsiniz. Bu onu narahat edə bilər, odur ki, əgər hədiyyənizi qəbul etməsə, heç təəccüblənməyin.