Hamımızın evində, soyuducunun üstündə müxəlif ölkələrin görüntüsü ilə maqnitlər olmamış olmaz. Uşaqlıqda onlara baxıb səyahət etməyi arzulamışıq. İndi isə arzularımız gerçəkləşib və səyahətdəyik. İstirahətimiz bitib və hələ də qohumlara, dost-tanışa hədiyyə almamışıq. Vəziyyətdən necə çıxaq? Bəlkə biz də soyuducu üçün maqnit alaq? Əslində pis fikir deyil, onlara indi başqa uşaqlar baxıb xəyallar qurar. “Amma bu çox sadədir, daha kreativ hədiyyələr lazımdır” deyirsiniz? O zaman hədiyyələrdən söhbət edək.
Ən yaxşı səyahət hədiyyələri
Hədiyyələr rəngarəng olmalıdır. Ona görə də rəng dolu Hindistandan başlayaq. Müxtəlif ədviyyatlar - zəfəran, uzun sarıkök(kurkuma), zirə, mixək, darçın, şüyüd və s. həm ətri ilə, həm görünüşü ilə hamını valeh edəcək. Aşpaz dostunuz varsa, bu lap mükəmməl hədiyyə olacaq. Bir də,ən yaxşısı, ədviyyatları bazardan deyil, mağazalardan alın. Bazarlarda onlar açıq kisələrdə satılır, həm toz olur, həm ətri azalır.
Xanımlar üçün isə Hindistandan xına gətirə bilərsiniz. Burada onun keyfiyyətinə söz ola bilməz, o həqiqətən də təbii boyadır. Həmçinin, xanımlar, kosmetik kokos yağına da sevinər. Əl, üz dərisinə qulluq üçün kokos yağı əvəzsizdir.
Hind filmlərinə baxanlar onların bəzək əşyalarını diqqətdən qaçırmaz. Ölkənin zərgərləri öz işlərinin ustadlarıdırlar, zinət əşyaları kiçik detallarına qədər möhtəşəmdir. Hindistan qızılında gümüş qatışığı daha az olduğundan, o davamlı və incə olur.
Maraqlı stillərlə “təcrübə” aparan tanışınıza Hindistandan geyim gətirməsəniz, günahkar olarsınız. Turistlər “Ali baba” şalvarları, muncuqdan toxunma köynəklər, rəngli gödəkçələr almadan ölkəni tərk edə bilməz.
İtaliyadan nə almalı?
Sizə çox qəribə gələcək, amma ma-ka-ron. İtaliyada olan makaron çeşidi heç yerdə yoxdur. Növbəti deyəcəyimiz makarondan da qəribə gələ bilər, amma pendir alın, gətirin, hədiyyə edin. Axı Parmesan pendiri yalnız İtaliyada hazırlanır. Qurman dostunuzsa, belə hədiyyəni yüksək dəyərləndirəcək. İtaliyadan şərab da gətirsəz yanılmazsınız.
Suvenirlərdən isə İtaliya öz mətbəx əşyalarının qeyri-adiliyi ilə seçilir. Yerli sənətkarlar tərəfindən hazırlanmış keramika mətbəx əşyaları unikallığı ilə göz oxşayır. Analarımız üçün burdan mütləq bərbəzəkli bir qab götürməliyik.
Fransadan nə almalı?
Yolunuz Fransaya düşübsə ordan nə gətirim deyə götür-qoy etməyə ehtiyac yoxdur. Mümkün deyil ki, Fransa dedikdə parfümeriya, incə ətirlər barəsində düşünməyəsiniz. Chanel, Guerlain, Christian Dior, Cartier, Givenchy markalarının hamısının özünəməxsus ətirləri var. Bir neçəsini alın, bu ətirləri bəyənməyən insan tapılmaz. Bundan başqa moda dünyasına düşüb geyimsiz qayıtmayacaqsınız. Bütün moda nümayişlərini izləyən, dəbdəbəni sevən rəfiqənizə Andre, Sandro, Eram kimi butiklərdən hədiyyə ala bilərsiniz.
Böyük Britaniya - böyük hədiyyələr
Çay sevərlərə Böyük Britaniyadan ləziz erl grey və çay dəsti, miniatür fincanlar hədiyyə edin. Yanında Britaniya şirniyyatları da gətirsəniz, tam mükəmməl olar. Amma bəzi dostlarınız çay deyil, spirtli içki sevir? Problem deyil, Böyük Britaniya cin və şərabı ilə də tanınır. Səyahətdən sonra dostunuzla xoş xatirələri yada salıb keçmişi xatırlayarsınız.
Dostlarınızın içində Şerlok Holms, Harri Potter və ya M&M's fanatları varsa, onları hədiyyələriniz nəyinki sevindirəcək göyün yeddinci qatına qaldıracaq. M&M's World mağazısında sarı və qırmızı personajlara həsr olunmuş müxəlif mallar tapa bilərsiniz. Sherlock Holmes Museum-da isə detektivin şlyapasını əldə etmək olar. King Croos vağzalnın lap içində yerləşən Harry Potter Shop-da Harri dünyasına aid hər nə desən var.
Meksikadan nə gətirməli?
Meksikadan çox qəribə bir hədiyyə gətirə bilərsiniz. Mistikanı sevən, cəsur dostunuza “ölülərlə bayram” keçirən bu ölkədən rəngarəng boyanmış kəllə sümüyü bağışlayın. Belə suvenirlər Meksikada çox geniş yayılıb və turistlər üçün maraqlı bir seçim olur.
Tekila da gözəl seçimdir. Don Julio, Herradura, Corralejo tekilalarını Meksikalılar özləri sizə təklif edir. Sınamağa dəyər, elə deyilmi?!
Meksikadan həm də kofe, şlyapalar, mədəniyyətlərini əks etdirən qəribə fiqurlar və başqa hədiyyələrinizlə tanışlarınızı sevindirə bilərsiniz.
Hədiyyə alarkən onu kimə alacağınızı düşünün, sizin yaxınlarınızı sizdən yaxşı tanıyan yoxdur. Onların zövqünə uyğun böyük şəhərlərdə çoxlu seçimlər olacaq. Unutmayın ki, nə hədiyyə alsanız belə, dostlarınız da, ailəniz də sevinər. Kiçik bir konfet də kiminsə üzünü güldürə bilər. Düz deyiblər, “Hədiyyənin böyüyü kiçiyi yoxdur, əsas diqqətdir.” Ən gözəl hədiyyəniz isə yaxınlarınıza istirahətinizin gözəlliyindən danışıb onları səyahət etməyə ruhlandırmağınızdır!
Bir kliklə vizanı al
Vaxt itirmədən viza almağa hazırsan?
Biz dünyanın istənilən ölkələsinə səyahət, təhsil və işgüzar səyahət vizalarının alınmasında köməklik göstəririk.