Alberta, Canada

Inception filminin çəkildiyi yerlər

Nərgiz Məmmədzadə Nərgiz Məmmədzadə 11 fevral 2021
9 baxış 6 dəq. oxu

Usta rejissor Kristofer Nolanın, izləyicilərini xəyallar aləminə apardığı Inception(Başlanğıc, 2010) filmi dünya miqyasında uğur əldə etdi və şah əsər kimi tanındı. Tam 8 kateqoriyada Oscar mükafatına namizəd olan film, dörd kateqoriyada mükafat alaraq Nolanın ən yaxşı əsərlərindən biri olaraq qəbul edildi və kino tarixində öz yerini aldı. Başlanğıc filmi haqqındakı rəylərə göz gəzdirsəniz, bir çox insanın bu filmə olan sevgisini görəcəksiniz. Bəs heç bu filmin harada çəkildiyi barəsində düşünmüsünüzmü? Xüsusi ilə də xizək səhnəsinin. Ümumiyyətlə, Başlanğıc filmi nədən bəhs edir?

Başlanğıc filmi yalnız bir ölkədə deyil, altı fərqli ölkədə çəkilib. İngiltərənin Bedfordshire bölgəsində başlayan film çəkilişləri, epik dağ səhnələri üçün əla bir yer olan Kanadanın Alberta əyalətində davam etdi. Sonrakı çəkilişlər Mərakeş, Yaponiya, Fransa və Amerika Birləşmiş Ştatları kimi ölkələr də daxil olmaqla, altı fərqli ölkədə davam etdirildi.

Gəlin bu yerlərlə daha yaxından tanış olaq və Başlanğıc filmini turizm baxımından dəyərləndirək.

1. Alberta, Kanada

making film

Başlanğıc filmindəki xizək səhnəsi harada çəkilib? Kanadanın Alberta əyalətində yerləşən Fortress Mountain dağ-xizək kurortu, Inception filminin kuliminasiya səhnələrinin lentə alındığı yerdir.

Kanadada turizm üçün ən maraqlı yerlərdən biri, ölkənin qərbindəki Alberta əyalətidir. Kraliça Victoria Louise Caroline Albertanın qızının şərəfinə adlandırılan bu əyalətdə turistlərin onu kəşf etməsini gözləyən çoxlu yerlər var: vəhşi meşələr, təmiz çaylar və qayalı dağlar. Dövlət tərəfindən mühafizə olunan dovşan və ördəklər, sincablar və elklər o qədər güvəndə hiss edirlər ki, özlərinə yemək almaq üçün şəhər və qəsəbələrə getməkdən çəkinmirlər.

Alberta quru kontinental iqlimə malikdir. Burada qış soyuq, yay isə istidir. Bu fakt yola çıxarkən özünüzlə götürəcəyiniz paltarları seçərkən nəzərə alınmalıdır, çünki qışda buradakı temperatur bəzən 51 dərəcəyə çatır, ancaq bu yalnızca əyalətin şimal hissəsinə aiddir. Albertadakı yay da qışdan geridə qalmır. Yay vaxtı Albertanın cənubunda temperature 40 dərəcəyə qədər yüksələ bilir!

2. Mərakeş

camera equipments

Mərakeş, Başlanğıc filminin lentə alındığı bir başqa ekzotik yerdir.

Afrika qitəsinin şimal-qərbində yerləşən Mərakeş, şimalda Cəbəllütariq boğazı və Aralıq dənizi, şərqdə Əlcəzair, cənubda Mavritaniya və qərbdə Atlantik okeanı ilə əhatə olunmuşdur.

Dar küçələri, köhnə tikililəri, tarixi abidələri və 17-ci əsrdən qalma qalası ilə turistləri ən çox cəlb edən bölgələrdən biri olan Rabat, Mərakeşin paytaxtı, eyni zamanda əhəmiyyətli bir tədris mərkəzidir. Fəs, Mərrakeş, Kasablanka, Meknes, Tanjerr, Agadir, Məhəmmədiyyə, Əl-Cədidə bu ecazkar ölkənin digər şəhərləridir.

Marakeşin ən rəngarəng meydanı, adının "Sonsuzluq meydanı" mənasına gəldiyi Jemaa el-Fna meydanıdır. Səyyar yemək və meyvə şirəsi satıcılarının, ilan, meymun oynadanların, falçıların, xına yaxan qadınların, ənənəvi geyimlərdəki rəqqasələrin olduğu bu meydan yarmarkadır və Mərakeş mədəniyyəti barəsində çox şeydən bəhs edir.

Məscidlərə islam mədəniyyəti, bağlara və fəvvarələrə Əndəlüs mədəniyyəti,  binaların quruluşuna isə fransız mədəniyyəti təsir göstərir. Burada Afrikadakı digər mədəniyyətlərin təsiri də müşahidə edilə bilər.

Mərakeş coğrafi mövqeyi baxımından müxtəlif iqlim tiplərinə sahib olan ölkədir. Okean boyu şəhərlərdə mülayim iqlim hakim olsa da, Atlas dağına yaxın ərazilərdə səhra iqliminə rast gəlinir. Yay isti, qış isə mülayimdir. Daxili hissələrə doğru irəlilədikcə Aralıq dənizi iqlimi görünməyə başlayır və bol miqdarda yağıntı müşahidə olunur. İsti və quraq hava şəraitindən boğulmamaq üçün ölkəyə qış zamanı səyahət etmək tövsiyə olunur.

3. Tokio, Yaponiya

man carrying camera

Başlanğıc filminin çəkildiyi bir başqa yer Yaponiyanın Tokio şəhəridir. Yaponiyanın paytaxtı və ən sıx şəhəri olan Tokio, 37,3 milyonluq əhalisi ilə dünyanın ən böyük metropollarından biridir.

Bura həmçinin yaşamın ən bahalı olduğu şəhərlərdən biridir. Tarixi kökləri uzun illər əvvələ dayanan bu şəhər, əvvəllər kiçik bir balıqçı şəhəri olsada hal-hazırda Şərqin paytaxtına çevrilib. Tokionun köhnə adı "Edo" dır. 1603-cü ildə Edoda Tokuqava şoqunatının qurulması ilə iqtisadiyyat, mədəniyyət sahəsində inkişaf etməyə başladı. Daha sonra, 1868-ci ildə İmperator Meyci, şoqunatın hakimiyyətinə son verdi və bu yerin adını Tokio etdi.

Yaponiya, Şərqi Asiya ərazisində Sakit okeanda yerləşən ada ölkəsidir. Tokio, ölkəni təşkil edən adalardan biri olan Honşunun mərkəzi hissəsindəki Tokio körfəzinin sahilindədir.

Tokioya səyahət üçün ən yaxşı vaxt yaz və payız fəsilləridir. Subtropik iqlimin göründüyü Tokioda düşən yağıntının miqdarı olduqca yüksəkdir. Yay ayları rütubətli və yağışlı keçir. Soyuq və qarlı olduğu üçün qış aylarında səyahətə üstünlük verilmir.

Tokyo Skytree, Senso-Ji, Meiji Jingu, Tokyo Tower, Tokyo Disneyland, Imperial Palace, Shinjuku Gyoen National Garden, Yoyogi Park, Hamarikyu Gardens, Inokashira Park və s. Tokioda ziyarət edilməsi gərəkən ən yaxşı yerlərdir. Canlı gecə həyatı, maraqlı alış-veriş məkanları, rəngarəng festivallar bu şəhərin mədəniyyətinin ən vacib hissəsidir.

4. London, İngiltərə

making film

Inception filmi İngiltərədə yalnızca Londonda deyil, müxtəlif mənbələrə əsasən Bedfordshire, Hampshire və Surrey-də də çəkilmişdir. Ancaq biz paytaxt Londondan bəhs edəcəyik.

Hər kəs həyatında ən azı bir dəfə Londona gedə bilməyi arzulayır. Nyu-York, Paris və Pekin kimi London da ikonik mənzərələri olan tarixi bir metropoldur. Londonu sevən, lakin orada yaşamayan bizlər, bu şəhərdən doymaq üçün oraya dönə-dönə getməyə davam etməliyik.

London İngiltərənin və Birləşmiş Krallığın paytaxtıdır. Qədim bir tarixə sahib, önəmli bir dünya şəhəri olan Londondakı ilk yaşayış yerləri 2 min il əvvələ aiddir. AB-nin dördüncü ən sıx şəhəri, İngiltərənin cənub-şərqində yerləşir.

London gəzməli yerlər baxımından çox zəngin bir şəhərdir. Bura bir çox sənət qalereyasına və muzeylərə ev sahibliyi edən, təbii gözəlliyi və tarixi zənginliyi ilə göz qamaşdıran və dünyaca məşhur meydanlara sahib olan bir şəhərdir. Burada ziyarət edilməli o qədər çox yer və ediləcək o qədər çox fəaliyyət var ki, günlərinizi, hətta bir ayınızı bu şəhərə ayırsanız belə, yenədə Londondan doymayacaqsınız.

Şəhərin ən populyar turistik yerlərinə misal olaraq Parlament Evləri, Bukingem sarayı, Big Ben, Tauer körpüsü, London körpüsü, London Eye, Greenwich rəsədxanası və s. göstərmək olar. Dünyanın ən çox ziyarət edilən, populyar və izdihamlı şəhərlərindən biri olan Londonun çox canlı və rəngli bir gecə həyatına sahib olduğunu xatırlamağı unutmamalıyıq.

5. Paris, Fransa

blue cinema hall

Başlanğıc filmini daha da yaddaqalan etmək məqsədi ilə, filmin çəkilişlərini aparmaq üçün ən yaxşı şəhərlərin seçildiyini düşünürəm və Paris də onlardan biridir.

Paris həmişə dünyanın ən romantik şəhərlərindən biri hesab edilmişdir. Parisin əhalisi, şəhərətrafı zona da daxil olmaqla, 12,3 milyon nəfərdir. Sena çayının ətrafında yerləşən bu şəhər Avropanın ən popular səyahət yerlərindən biridir. Parisdəki bir çox məşhur bina UNESCO-nun Ümumdünya irsi siyahısına daxil edilmişdir. Montmartre-dən Quartier Latin'- qədər uzanan yol boyunca ən yaxşı orta əsr və Roma əsərlərindən bəzilərini görmək olar. Açıq hava muzeyinə bənzər Paris dünyanın ən çox ziyarət edilən şəhərlərindən biridir.

Paris hər fəsildə gözəldir. Buna görə də, onun qapıları ziyarətçilər üçün ilin on iki ayı açıqdır. Ancaq əsasən, yay və Milad bayramı ərəfəsində hər zamankından daha çox diqqət çəkir. Parisin iqlimi yarı-dəniz  və yarı-kənd(rural) iqlimi arasıdır.

Paris, zəngin tarixi və mədəniyyəti, ləzzətli mətbəxi, gecə həyatı, Avropanın ən vacib alış-veriş və moda mərkəzlərindən biri olması və festivalları ilə xəyallar şəhəridir. Eyfel qülləsi, Luvr Muzeyi, Sena çayı, Notr-Dam kilsəsi və saya bilmədiyimiz bir çox möhtəşəm turistik yer ürəkləri fəth etməyi bacarıb.

6. Los-Anceles, ABŞ

men making film

Başlanğıc filmi əsasən Los-Anceles, Kaliforniyada çəkilib.

 "Mələklər Şəhəri" – Los-Anceles, ABŞ-ın Kaliforniya ştatının, Nyu-Yorkdan sonra, ən böyük şəhəridir. Əsası 1781-ci ildə qoyulan şəhər bu gün ABŞ-ın ən canlı metropoluna çevrilib. Qonşu şəhərlər San-Fransisko və Las-Veqasdır. Hollywood, Disneyland, USC School of Cinematic Arts kimi binaları və zəngin mədəni fəaliyyətləri ilə ziyarətçilərin diqqətini çəkir.

Tropik və Aralıq dənizi iqliminin təsiri Los-Ancelesdə kəskin hiss olunur. Heç vaxt çox isti və ya çox soyuq olmayan Los-Ancelesə hər fəsildə baş çəkmək olar. Ətrafdakı dağlar sayəsində hava yayda çox isti olmur.

Böyük okeanın şərq sahilində yerləşən və dağlarla əhatə olunmuş Los-Ancelesdəki gəzməli yerlər, sizə sanki amerikan filmindəsiniz hissini bəxş edə bilər. Downtown, Hollywood Sign, Disneyland Park, Universal Studios, Beverly Hills, Malibu, Santa Monica, Exposition Park, Griffith Park, Los Angeles County Museum of Art ziyarət etməniz gərəkən heyranedici və maraqlı yerlərdən yalnız bir neçəsidir. Los-Anceles əyləncəli partiləri və unudulmaz festivalları ilə də tanınır!

Budur, siz artıq dünya kino tarixinin şah əsərlərindən biri olan Inception-un çəkildiyi yerlərlə tanışsınız!

Paylaş

Nərgiz Məmmədzadə

Daima bölüşmək, paylaşmaq sevgisi var. Bu sevgi sonradan özünü öyrəndiklərini, oxuduqlarını yazmaqla hamı ilə bölüşmək sevgisi ilə əvəzləyib. Bu yola qısa hekayələr, məqalələr yazmaqla başlayan Nərgiz, gələcəkdə kitabını nəşr etdirməyi məqsəd qoyub. O, yazaraq özümüzü ifadə etdiyimizə, özümüzdən sonrakı nəsillərə xatirələr qoyduğumuza inanır. Ən sevdiyi hədiyyə də kitabdır. Hər kəsdən gələcək kitabxanası üçün bir töhfə verməsini istəyir. İncəsənətə, yeni dillər öyrənməyə marağı böyükdür. Özünü 1 cümlə ilə ifadə etsə, o cümlə belə olardı: “Bir gün arzuladığım o dünya səyahətim zamanı Madriddə dayanarkən Santiago Bernabeu-da REAL MADRİDin oyununa baxmaq istəyən 12 illik Madridistayam”.

Bütün bloqlar
pickvisa.az