Spain Schengen visa

İspaniya üçün turist vizası necə alınır?

Tamerlan Mehdiyev Tamerlan Mehdiyev 20 iyul 2021
12 baxış 6 dəq. oxu

Avropanın cənub-qərbində yerləşən İspaniya hər zaman diqqət çəkməyi bacaran bir ölkədir. İspaniyanın dünyanın ən misilsiz ölkələrindən biri olduğunu desəydim, qətiliklə yanılmazdım. Yeməklərin, şərabların, mənzərələrin, şəhərlərin və adətlərin çoxlu çeşidləri var. Demək olar ki, hər bir şəhər digərlərindən fərqlənir. Ölkənin hər yerində müxtəlif fəaliyyətlər var. Təmiz çimərliklərdə günəş vannası qəbul edib Aralıq dənizinin təmiz suyundan həzz ala bilərsiniz. Dağlıq ərazilərindən günəşli çimərliklərinə qədər - İspaniya nəfəs kəsən mənzərələr təqdim edən təbii gözəlliyi ilə insanları heyran qoyur. Sözlərin bir az xaotik olduğunu bilirəm, ancaq bu, sözlərin ölkənin gözəlliyini təsvir etmək üçün kifayət etmədiyindəndir. İspaniya dünyanın ən çox ziyarət edilən ölkələrindən biridir. 2019-cu ildə ölkəni ziyarət edən turistlərin sayı 83,7 milyon nəfərə çataraq rekord qırdı. Daha ətraflı araşdırsaq şəhərlərin, xüsusən Barselona, ​​Madrid və Sevilyanın ölkənin ən çox ziyarət edilən yerləri olduğunu görərik. Barselonada şəhərin hər tərəfinə səpələnmiş müxtəlif memarlıq üslublu binalar və tikililər var. Mənzərəli və həyatınızın ən yaxşı foto görüntülərini vəd edən gözəl barok və qotik üslublu binalar tapa bilərsiniz. Ciutat Vella çox güman ki, sizi orta əsrlər dövrünə aparacaq. Digər Aralıq dənizi ölkələri kimi ispan mətbəxi də müxtəlif çeşidli yeməkləri ilə məşhurdur. Onların arasında ən məşhurlardan biri paxla, zəfəran, zeytun, ədviyyat, göyərti, tərəvəz və seçiminizə görə ət və ya dəniz məhsulları ehtiva edən düyü əsaslı yemək paelladır. İspaniyanı məşhur edən başqa bir şey ispan mədəniyyətidir. İspan Flamenko rəqsi ehtirasdan başqa bir şey deyil. İspan festivalları bütün hər kəsi ətrafına toplayan və günü yaddaqalan edən hadisələrdir. Yəqin ki, La Tomatina haqqında eşitmisiniz və ya görmüsünüz. 1945-ci ildən bəri insanlar əylənmək və stress atmaq üçün bir-birlərinə şiddətli pomidor müharibələri elan edirlər.

İspaniyaya səyahətinizi həyata keçirmək üçün vizaya ehtiyacınız olub-olmadığını bilməlisiniz. Xoşbəxtlikdən bügünkü məqalədə İspaniya turist vizasından danışacaq, İspaniya turist vizası tələblərini, İspaniya turist vizası minimum bank balansını və İspaniya turist vizası rüsumunu əhatə edəcəyik. Ancaq əvvəlcə İspaniyanın hansı ölkələrin vətəndaşlarına viza tələb etdiyini müəyyənləşdirmək üçün ölkənin viza siyasətinə baxaq.

İspaniya Viza Siyasəti

visa stamp and stamping hand

Şengen ölkəsi olduğundan İspaniya qısamüddətli viza növləri üçün tələb və şərtlər Şengen qaydaları ilə müəyyən edilir. Bu səbəbdən İspaniya turist vizasının Şengen turist vizası ilə eyni olduğunu söyləyə bilərik. Lakin bu, İspaniyanın viza ilə bağlı xüsusi qaydalara malik olmadığı anlamına gəlmir. 90 gündən çox çəkəcək səyahətlərdə şəxs milli viza və ya başqa sözlə uzunmüddətli viza üçün müraciət etməlidir. İspaniya hansı ölkələrdən turist vizası tələb edir? Şengen ölkələrinin təyin etdiyi qanunlara görə, Şengen və AB ölkələrinin üzvlərindən başqa, aşağıdakı ölkələrin vətəndaşlarının viza prosedurlarından keçməsinə ehtiyac yoxdur. Buna görə aşağıda verilmiş dövlətləri İspaniya vizasız ölkələr adlandırmaq olar:

Avstraliya, Antiqua və Barbuda, Argentina, Baham adaları, Barbados, Braziliya, Kanada, Çili, Kolumbiya, Kosta-Rika, Dominika, El Salvador, Gürcüstan, Qrenada, Qvatemala, Honduras, Honkonq, İsrail, Yaponiya, Kiribati, Makao, Malayziya, Marşall adaları, Mauritius, Meksika, Mikroneziya, Yeni Zelandiya, Nikaraqua, Palau, Panama, Paraqvay, Peru, Sent-Kits və Nevis, Sent-Lüsiya, Samoa, Seyşel adaları, Sinqapur, Solomon Adaları, Cənubi Koreya, Sent-Vinsent və Qrenadin, Tayvan, Timor-Leste (Şərqi Timor), Tonqa, Trinidad və Tobaqo, Tuvalu, Birləşmiş Ərəb Əmirlikləri, ABŞ, Vanuatu, Venesuela, Uruqvay.

Ölkəniz siyahıda deyilsə, məqaləni diqqətlə oxumanız məsləhətdir, çünki vizaya ehtiyacınız olacaq. İspaniya viza növləri hansılardır? Daha əvvəl də qeyd etdiyimiz kimi, vizalar ümumilikdə qısamüddətli vizalar (Şengen vizaları), uzunmüddətli vizalar və tranzit vizaları kimi kateqoriyalara ayrılırlar. Adından da göründüyü kimi, 90 gündən çox olmayan səyahətlər üçün qısamüddətli vizalar təyin olunur. Bizi maraqlandıran viza növü də bu kateqoriyanın tərkibindədir. İspaniya turist vizası üçün necə müraciət etmək olar? İspaniya turist vizası almaq üçün nə qədər vaxt lazımdır? Turist vizası ilə İspaniyada nə qədər qala bilərsiniz? İspaniya turist vizası üçün tibbi arayışa ehtiyac varmı? Müraciətə başlamazdan əvvəl cavab tapmalı olduğunuz suallar bunlardır. Nə isə, uzatmadan turist vizasına keçək.

Turist Vizası

passports and visa stamps

Bu viza növü İspaniyanı turizm məqsədi ilə ziyarət etmək istəyən insanlar üçün nəzərdə tutulmuşdur. Aşağıdakı siyahıda İspaniya turist vizası tələblərini tapa bilərsiniz:

• Ərizəçi tərəfindən doldurulmuş, imzalanmış, tarixlənmiş viza müraciəti forması.

• İspaniyanı tərk etdikdən sonra üç ay keçərli olacaq pasport. Pasport son 10 ildə verilmiş olmalı və minimum 2 boş səhifəyə sahib olmalıdır. Şəkillər düzgün şəkildə əlavə olunmalıdır. Ərizəçi tərəfindən imzalanmalıdır.

• 6 ay ərzində çəkilmiş iki foto. Üzün ön hissəsi fotoşəklin 70 və ya 80 (32x26 mm) faiz hissəsini əhatə etməlidir. Uniforma və ağ fon tövsiyə olunur.

• İspaniyadan ayrıldıqdan sonra üç ay müddətində qüvvədə qalacaq milli şəxsiyyət vəsiqəsinin surəti.

• Ərizəçinin vətəndaşı olduğu və yaşadığı yer eyni deyilsə, İspaniya ərazisini tərk etdikdən sonra üç ay müddətində etibarlı olacaq yaşayış icazəsinin sürəti lazımdır.

• Pasportun əsas səhifəsinin və bütün əvvəlki Şengen vizalarının surətləri.

• Səyahət marşrutu. Gediş-dönüş uçuş bileti rezervasiyaları və qonaqlama yeri bronu.

• Ərizəçinin səyahəti maliyyələşdirə biləcəyinə dair sübut. Bu məqsədlə, aşağıdakılardan biri təqdim edilə bilər: son 3 aydakı maliyyə hərəkətlərinizi göstərən şəxsi bank çıxarışı, nağd pul, kredit kartı, əmək haqqı sənədləri, iş yerinin sübutu, aktivləri və s.

• Səyahət zamanı tibbi xərcləri qarşılayan tibbi sığorta. Sığorta bütün Şengen ölkələrində keçərli olmalıdır. Bütün səyahət müddətində qüvvədə qalmalıdır. Minimum 30 000 avro dəyərində xərcləri əhatə edə bilməlidir. Sığorta sənədində və ya ayrı bir təsdiq sənədində şərtlər aydın şəkildə göstərilməlidir.

• Əgər səyahətçi yetkinlik yaşına çatmamışsa, doğum haqqında şəhadətnamənin surəti və ispan və ya ingilis dilinə tərcümə edilmiş versiyası tələb olunur. Müşayiət etmədikdə, valideynlərin səyahət üçün razılığını onlar tərəfindən yazılmış razılıq məktubu təsdiq etməlidir.

closeup view of covid vaccination card

Viza müraciətləri üçün hansı sənədlərin lazım olduğunu öyrəndik. Bəs İspaniya turist vizası üçün necə müraciət etmək olar? Aşağıdakı təlimatları izləyin. Əvvəlcə ölkənizdəki İspaniya səfirliyini və ya konsulluğunu tapın. Sonra görüş təyin edin. Təyin edilmiş vaxtda müsahibəyə gedin, tələb olunan sənədləri təqdim edin və rüsumu ödəyin. Yeri gəlmişkən, ölkənizdə hər hansı bir diplomatik nümayəndəlik yoxdursa, qonşu ölkələrdəki ən yaxın səfirliyi tapın. İspaniya turist vizası rüsumu nə qədərdir? Turist vizası üçün tələb edilən rüsum 80 avrodur. Ancaq məbləğin azalda biləcəyi bəzi istisnalar var. Məsələn, 12 yaşınadək uşaqlar üçün (altı yaşa qədər uşaqlar ödənişsizdir) rüsum 40 avroya bərabərdir. Müəyyən ölkələrin (Albaniya, Ermənistan, Azərbaycan, Bosniya və Herseqovina, Gürcüstan, Kosovo, Şimali Makedoniya, Moldova, Monteneqro, Rusiya, Serbiya və Ukrayna) vətəndaşları üçün bu məbləğ 35 avrodur. İspaniya turist vizası almaq üçün nə qədər vaxt lazımdır? Müraciətə baxılma müddəti 3 ilə 20 gün arasında dəyişir. Bu müddət sənədlərinizi hansı ölkədə təqdim etdiyinizdən ciddi dərəcədə asılıdır. Turist vizası ilə İspaniyada nə qədər qala bilərsiniz? İspaniya turist vizası səyahətçilərin ölkədə 90 gün qalmasına imkan verir.

İspaniya turist vizası ilə əlaqədar bəzi nüanslar insanları çaşdıra bilər. Bunlardan biri maliyyə imkanlarının sübutudur. Qısamüddətli viza üçün müraciət edərkən bank hesabımızda müəyyən miqdarda pulun olması tələbi ilə qarşılaşırıq. İspaniya ərazisinə girmək istəyən bir əcnəbinin 10 gün üçün göstərməsi gərəkən məbləğ, ümumi milli minimum əmək haqqının (636.93 €) 90%-i, yəni 573.23 avrodur. Əgər qalma müddəti 10 gün daha uzadılarsa, bir gün üçün tələb olunan məbləğ 70.77 avrodur.

İspaniya turist vizası üçün tibbi arayışa ehtiyac varmı? Bəli. İnsanlara zərər verə biləcək heç bir xəstəliyin (COVID-19 kimi) daşıyıcısı olmadığınızı sübut edən tibbi arayış təqdim etməlisiniz. Turist vizasının uzadılması da mümkündür. Bu məqsədlə müvafiq orqanlara və ya polis bölmələrinə müraciət etməlisiniz.

Paylaş

Tamerlan Mehdiyev

Tamerlan Mehdiyev tam bir elm həvəskarıdır. Yer haqqında elmlər üzrə magistr dərəcəsi alan Tamerlan iqlim dəyişikliyi ilə bağlı araşdırma etməyi planlaşdırır. Təbiəti və Yer üzünün gözəlliklərini müşahidə etməyi sevir. Səyahətin onu müdrikləşdirəcəyinə və daxili rahatlıq tapmasına kömək edə biləcəyinə inanır. Həyat məqsədi mümkün qədər çox fərqli yerləri, mədəniyyətləri, insanları görməkdir.

Bütün bloqlar
pickvisa.az