Elə indi Polşaya səyahət etməyiniz üçün 10 səbəb

Bir səyahət haqqında düşünür, ancaq yer seçə bilmirsinizsə, Polşaya diqqət yetirin. Bu ölkə ən tələbkar turisti belə təəccübləndirə və məmnun edə bilər. Burada təbiət qucağında rahatlıq tapa və ya böyük şəhərin parlaq, hərəkətli həyatına qərq ola bilərsiniz.

Polşa haradadır? Şübhəsiz ki, hər birimiz bu ölkənin Mərkəzi Avropada yerləşdiyini bilirik. Çoxumuz Polşanın ovalıq ölkə olduğunu da bilirik. Bununla birlikdə, burada təpələr (ərazinin 6%-i) və dağlar (3%) var. Baltik dənizi ölkənin şimal sahillərini yuyur.

Niyə Polşaya səyahət etməlisiniz? Biləndən sonra sizdə buraya getmək istəyi oyadacaq 10 əsas səbəbi sıralayaq.

1. Varşava

Polşanın paytaxtı Visla çayı hövzəsindədir. Şəhərin bir tərəfində yerləşən əraziyə Praqa, digər tərəfindəkinə isə "Old Town" deyilir. Buradakı həyat həm gecə, həm də gündüz vaxtı aramsız və təlaşlıdır. Varşava memarlıq əsərlərinə görə tipik bir Avropa paytaxtıdır. Qədimlik və müasirliyin kombinasiyası şəhəri gənclik ruhu və müəyyən bir miqdarda təcrübə və müdrikliklə doldurur. Üstəlik, sakinlər ənənələrə hörmət və riayət edir, lakin həmişə zamanla ayaqlaşırlar.

Varşava rəsmi olaraq 1596-cı ildə Polşanın paytaxtı elan edildi. II dünya müharibəsi zamanı şəhərin böyük bir hissəsi tamamilə məhv edildi. Bərpa çoxlu vaxt və zəhmət gərəktirdi, amma buna dəydi. Varşavanın mərkəzi UNESCO-nun Ümumdünya İrsi siyahısına daxil edildi.

Polşanın paytaxtı həm də ölkənin əsas mədəniyyət mərkəzi hesab olunur. Burada Şopen adına Beynəlxalq Piano Müsabiqəsi, Motsart festivalı, Beynəlxalq Teatr Müşavirəsi, Qədim Musiqi Festivalı kimi müxtəlif festival və görüşlər keçirilir.

2. Krakov

Polşa şəhərləri özünəməxsus atmosferləri ilə heyran etməkdən vaz keçmir. Krakov da istisna deyil. Bura Avropanın ən gözəl şəhərlərindən biri sayılır. Buna görə də başqa ölkələrin kraliyyət ailələri, məşhur sənətkarlar və elm adamları tərəfindən ziyarət edilməsi təəccüblü deyil. Mühafizə olunan obyektlər siyahısına daxil olan 200-dən çox tarixi memarlıq abidəsi burada varlığını sürdürür.

Kostyuşko təpəsində yerləşən müşahidə məntəqəsindən şəhəri ovucunuzun içində hiss edə bilər və bu heyrətləndirici mənzərəni kameraya ala bilərsiniz. Əgər buraya piyada getmə qərarı alsanız, özünüzlə içməli su götürün, çünki dırmanma təxminən bir saat çəkəcəkdir. Yolda olan zooparkı və Kamedulov monastırını ziyarət edərək Volsky meşəsindən keçə bilərsiniz.

Şəhərdə mütləq şəkildə Bazar meydanında (Market Square) gəzintiyə çıxın. Meydana yolu tapmaq asandır, Krakovdakı hər hansı bir yol sizi ora aparacaq. Meydanda çox sayda kafe, restoran, sərgi, teatr və qalereyalar, həmçinin daş saraylar və qədim evlər var.

St. Mary's Basilica, the Royal Castle, Wawel Hill, Wawel Cathedral - Krakovda görülməsi gərəkənlərin kiçik bir hissəsidir.

3. Milli mətbəx

Bəli, bu da Polşaya səyahət etmək üçün səbəblərdən biridir. Bu ölkənin milli mətbəxinə xalq arasında "ruhu isitmək" deyilir. Kələm, göbələk, ət və balıq Polşa yeməklərini doyumlu və ləzzətli edən əsas inqredientlərdir.

Polşa haqlı olaraq şorba ölkəsi hesab edilə bilər. Ölkədə çox sayda şorba növü var. Bunlardan ən məşhurları czernina, krupnik və zurekdir.

Polşa mətbəxinin qəlyənaltıları da nə digərlərindən daha az ləzzətli, nə də daha az məşhur deyil. Bigos, perojki və kolbasa - kulinariya sənətinin şah əsərlərindən imtina etmək mümkündürmü?!

Bəs desertə nə var? Polşa şirniyyatları əsasən mürəbbə və ya kəsmiklə doldurulmuş peçenye və piroqlardan ibarətdir. Ən populyarları "mazurek" piroqu və “sernik babci”-dir.

4. Təbiət

Yerinə görə Polşa həm dağlıq ərazilərin, həm də düzənliklərin spesifik təbiəti ilə xarakterizə olunur. Bu mənzərəli fonda gizlənən təmiz çaylar və göllər, sıx, bəzən keçilməz meşələr, qədim qalalar və qəsrlər Cəngavərlər dövrünün təəssüratını yaradır. Ölkə ərazisində orijinal şəklində qorunub saxlanılan yabanı yerlər var. Unikallığını görməli olduğunuz əsas turistik təbii yerlər bunlardır:

- Bialovieza meşəsi

- Rospuda çayının vadisi

- Morskie oko gölü

- Əyri meşə

- Slovinski Milli Parkı

Meşələrdə və dağlarda çöldonuzu, vaşaq, qurd, cüyür, qonur ayı, qartal, bayquş kimi bir çox heyvan və quş növü tapa bilərsiniz. Bir vaxtlar insanlar tərəfindən nəsli məhv edilsə də, xoşbəxtlikdən bərpa edilmiş bir bizon koloniyası görsəniz, unudulmaz duyğular yaşayacaqsınız.

5. Masuriya gölləri

Sakit və tənha bir tətilin pərəstişkarısınızsa, Masuriyaya getməlisiniz. Burada 12 kanal və 8 çayı birləşdirən 2000 göl var. Göllərin ətrafında təbii qoruqları və parkları olan meşə massivləri uzanır. Bu, yerin niyə Polşanın "ağ ciyərləri" adlanmasının səbəbidir.

Masuriyaya getmək üçün qədim Torun şəhərindən keçməlisiniz. Təəccüblüdür ki, şəhərin orta əsr binaları və dar küçələri, demək olar ki, orijinal şəklində qorunub saxlanılmışdır.

Bu gözəllər gözəli məkanda müxtəlif fəaliyyətlər ilə məşğul ola bilərsiniz: balıq tutma, dalğıclıq, kanoe, kayak, və ya yaxta sürmə.

Təbiət qucağındakı bu sakit tətili taclandırmaq istəyirsinizsə, bölgədəki bəzi turistik yerləri ziyarət etdiyinizdən əmin olun: Gizycko Swing körpüsü, Boyen qalası, Swieta Lipka kilsəsi, "Wolf's Lair", Reszel qalası və s.

6. Spiritualizm

Polşa Avropanın ən dini ölkəsi hesab olunur. Polşa əhalisinin 90%-dən çoxu katolikdir. Ancaq ölkədə başqa inanclar da var və ateizm qadağa olunmayıb. Hər döngədə görülən çox sayda kilsəyə əlavə olaraq, burada ortodoks kilsələri, protestant məbədləri və müsəlman məscidləri var.

Yerli əhali dini adət və ənənələrinə çox hörmətlə yanaşır. Uşaqlar kiçik yaşlarından dini ziyarətgahlara və bazar günü məktəblərinə gətirilir, onlara dualar öyrədilir və Allah haqqında məlumat verilir.

Katolik kilsəsi Polşadakı yerli xalqın həyatına əhəmiyyətli dərəcədə təsir göstərir. Məsələn, ölkə bazar və tətil günlərində ticarəti qadağan edən bir qanun çıxardı.

Polşada olarkən kilsələri mütləq ziyarət edin. Xarici gözəllik və dekorasiyaya heyran qalmaqla yanaşı, bu yerlərə xas olan hüzur və əmin-amanlıq atmosferini hiss etmək şansınız olacaqdır.

7. Alış-veriş

Polşaya alış-veriş səyahətləri ölkənin qonaqları və qonşuları arasında çox populyardır. Buradakı malların qiyməti Qərbi Avropadakından xeyli aşağıdır, keyfiyyəti isə dünyaca məşhur markalardan geri qalmır. Çeşidlər olduqca genişdir, hər kəs öz zövqünə uyğun bir şey seçə bilər.

Belə güman edilir ki, ən yaxşı alış-veriş sizi Varşava, Qdansk, Poznan və Belostokda gözləyir. Bu şəhərlərdə və ya onların yaxınlığında hər şeyi ala biləcəyiniz mega ticarət mərkəzləri var. Ayrıca, geniş çeşiddə müxtəlif mallar təklif edən çox sayda mağaza, butik və univermaqlar da mövcuddur. Onlar bazar günü istisna olmaqla, həftənin bütün günlərində adətən 09:00-dan 21:00-dək açıqdırlar.

8. Wieliczka duz mədəni

Wieliczka Krakovdan uzaq olmayan kiçik bir şəhərdir. Buradakı duz mədənçiliyi 13-cü əsrdə başlamışdır. Şəhərdəki duz mədəni dünyanın ən qədim mədənlərindən biridir. Qaya duzu çıxarılması burada 700 ildən çox davam etdi. Nəticədə mədən 327 m dərinlikdə 300 km uzunluğunda tunellər ərsəyə gətirdi. Bu mədəndə təxminən 2000 otaq var.

Operatorlar tərəfindən təklif olunan turist marşrutu sizi kapellalı yeraltı şəhərcik salınan duz mədəninin dibinə aparacaqdır. Duz mədənində gəzərkən Wieliczka mədənçilərinin incəsənət əsəri olan misilsiz heykəlləri, mağaraları, qurbangahları, ibadətgahları, yeraltı gölləri görəcəksiniz.

Bu gün duz mədəninin mağaralarında müxtəlif konfrans və görüşlər keçirilir, sərgilər və ekspozisiyalar təşkil olunur. Tənəffüs yolları xəstəlikləri və astmanın uğurla müalicə olunduğu yeraltı sanatoriya da var.

9. Heyvanlara qulluq

Polyaklar heyvanları çox sevir və onların qayğısına qalmağa çalışırlar. Sakinlər arasında ən çox sevilən itlərdir, çoxu öz sevimli heyvanlarını parklarda və meydanlarda gəzdirir. Ancaq heyvanlar üçün təmizlik qaydalarına əməl edilməməsi pul cəzası ilə təhdid olunur.

Çox vaxt Polşa mağazalarının yaxınlığında heyvanlar üçün su qablarını görə bilərsiniz. Ancaq küçələrdə evsiz heyvanlara rast gələ bilməzsiniz. Əgər işdi görsəniz, EKO Patrol polisinə məlumat verməlisiniz. Bu, işçilərin gəlib tapılan heyvanı bəslənəcəyi, təmizlənəcəyi, qısırlaşdırılacağı və lazımi bütün peyvəndləri olunacağı sığınacağa aparan müstəsna bir xidmətdir. Bundan sonra heyvan orada öz sabini gözləyir.

Vəhşi heyvanlar tez-tez səhvən Polşanın şəhərlərinə gəlirlər. EKO Patrol işçiləri onları tutub bəzi xəstəliklərin olub olmadığını yoxlayır və sonra təbii mühitlərinə buraxırlar.

Polşalıların heyvanlara olan sevgi və qayğısı özünü Varşava yaxınlığında ev heyvanları qəbiristanlığının olması ilə də göstərir. Avropanın ən böyük qəbiristanlıqlarından biri sayılır və burada 15.000-dən çox məzar var.

10. Vaxtın dayanması

Nə qədər sehrli səslənsə də, bu həqiqətdir. Bu aksiya Varşavada baş verir. Hər il 1 avqust saat 17:00-da şəhər tam olaraq bir dəqiqə müddətində dayanır. Bu zaman kəskin və yüksək səsli siqnallar eşidirsiniz. Bütün nəqliyyat növlərinin sürücüləri dayanıb kabinələri tərk edir, piyadalar yavaşlayır, kafe və restoran ziyarətçiləri masalarından qalxırlar. Hamısı səssizcə bir dəqiqə dayanırlar.

Bəs bu davranışa nə səbəb olur? 1944-cü ildə baş verən Varşava üsyanının qəhrəmanlarını şəhər belə xatırlayır. Bu, İkinci dünya müharibəsi dövründə Avropa müqavimət hərəkatı tərəfindən həyata keçirilən ən böyük hərbi əməliyyat idi. Üsyan 63 gün davam etdi. Bu müddət ərzində 10.000 üsyançı öldürüldü, 7000 nəfər itkin olaraq bildirildi. Üsyan 1 avqustda başladı. Buna görə də, həmin gün paytaxt sakinləri qəhrəmanlarına öz hörmətlərini göstərirlər.