Sietlda Starbucks xaricindəki 5 ən yaxşı coffee shop

Sietlın nə ilə məşhur olduğunu bilmək istəyirsiniz? O zaman, Sietlın ABŞ-ın qəhvə mərkəzi olduğunu söyləməklə yanılmazdım. Sietl 1971-ci ildə Starbucks-ın təməli qoyulduqdan və Amerikanın “qəhvə dünyası“-na girişindən sonra, hər guşəsində coffee shoplar olan bir şəhər halına gəldi. Sietl ABŞ-ın digər şəhərlərindən daha çox coffee shopa sahib olduğunu iddia edir. Beynəlxalq bir marka olan Starbucksın Sietldakı qəhvə mədəniyyətinin formalaşmasındakı rolunun danılmaz olmasına, həmçinin burada öz dequstasiya mərkəzini (Reserve Roastery & Tasting Room) istifadəyə verməsinə baxmayaraq, həm yerlilər, həm də turistlər tərəfindən yerli coffee shoplara olan tələbat daha çoxdur.

Bəs, Sietlda qəhvə mədəniyyətinin inkişafının arxasında nə dayanır? Bəziləri şəhərin buludlu, yağışlı hava şəraitinin insanların qəhvəyə olan sevgisinin artmasında mühüm rol oynadığına inanır. Kafedə oturub yaxşı bir qəzet və ya kitab oxuyarkən, baristanın latteni hazırlama sənətinə heyran olmaq və qəhvə qoxusunu dərinliklərdə hiss etmək Sietldakı gündəlik həyatın bir hissəsinə çevrilib.

Bu gün bütün qəhvə həvəskarları Sietlın orijinal qəhvə mədəniyyətini yaşamaq üçün ən yaxşı yerlərdən biri olduğunu bilirlər. Ancaq bununla birlikdə, onlarla coffee shop arasından seçim etmək də olduqca çətin ola bilər. Bu problemi aradan qaldırma məqsədilə bu bloqda sizə Sietlda turistlərin və yerli əhalinin üstünlük verdiyi, fərqli standartlara sahib 5 ən yaxşı coffee shopu təqdim edirəm.

1. Ghost Alley Espresso

Post Alley-in düz kənarında yerləşən 142 kvadratmetrlik kafe ən çox ziyarət edilən yerli coffee shoplardan biridir. Hər zaman doludur və bu səbəblə yer tapmaqda bir qədər çətinlik çəkə bilərsiniz. Menyuda qəhvə və çay üçün geniş seçim imkanı var və içkinizlə yemək istədiklərinizi gətirməkdə də problem yoxdur. Kafenin sahibi Mercedes Yaeger turistlər üçün şəhər bələdçisi, barista və yazıçıdır. Hazırda coffee shopu onun qızı idarə edir. Ətrafdakı digər kafelərdən əsas fərqi buranın yalnız qəhvə deyil də, həmçinin şəhər turu təklif etməsidir. Sietlın əsrarəngiz tarixi küçələrində gəzməzdən əvvəl Ghost Alley Espresso-dan bir qəhvə almaq artıq ənənə halını alıb. Yerli Sietl əfsanələrini dinləyərkən isti qəhvə ilə şəhər turu sizə əvəzsiz anlar bəxş edəcək.

2. Moore Coffee Shop

Sietl görkəmli latte sənəti ilə məşhurdur, lakin bu mövzuda Moore Coffee Shop-dakı baristalar kimi xüsusi bacarıqlara sahib olanlar azdır. Müştəri sayından və kafedəki izdihamdan asılı olmayaraq, hər qəhvə xüsusi diqqətlə hazırlanır və fərqli təsvirlərlə bəzədilərək servis olunur. Moore Coffee Shop 2011-ci ildə qurulmasına və daha gənc bir kafe olmasına baxmayaraq, müştərilər tərəfindən yüksək rəğbət qazanıb. Kafenin girişində yazılan “Yeni horçatamızı sınayın” yazısından ilhamlanaraq soyuq horçatanı daddıqdan sonra, onu yenidən dadmaq istəyəcəksiniz. Latte üzərindəki təsvirləri ilə məşhur olan məkanda ziyarətçilər üçün Nutellalı, giləmeyvəli və bir çox müxtəlif çeşidli vaflilər, fransız çörəkləri və müxtəlif sendviçlər də təklif edilir. Coffee shop həftənin hər günü səhər 6:15-dən axşama qədər açıqdır. Dadı damağınızda qalacaq vafli ilə qəhvə Sietlı ən yaxşı səhər yeməyinə sahib şəhərlərdən birinə çevirir.

3. Milstead & Co

2011-ci ildən fəaliyyət göstərən bu məkanda əsrarəngiz qəhvəni dadmaqla yanaşı, qəhvənin necə saxlandığı və hazırlandığı barədə də məlumat əldə etmək şansı qazanacaqsınız. Coffee shopun sahibi Andrew Milstead deyir ki, əla xidmət məhsulu daha yaxşı hala gətirə və ona tələbi artıra bilər, pis xidmət isə yaxşı məhsula olan tələbi azalda bilər.

Bu coffee shopda müxtəlif insanlar görmək mümkündür: kostyumlu iş adamları, uşaqlarını gəzməyə çıxaran valideynlər, idman geyimli qadınlar, qolları döyməli velosipedçilər və s. Fərqli həyat tərzlərindən asılı olmayaraq, bu insanların hamısının bir ortaq cəhəti var: keyfiyyətli qəhvəyə olan sevgi. Sözün tam anlamında keyfiyyətli qəhvəni dadmaq istəyirsinizsə, Milstead & Co-ya mütləq baş çəkməlisiniz.

4. Trabant Coffee & Chai

Trabant Coffee & Chai qonaqlara qəhvə ilə yanaşı, müxtəlif çeşidli səhər və şam yeməyi, pivə, fərqli növ peçenyelər və sendviçlər təqdim edir. ABŞ-ın Sietl şəhərindəki ən yaxşı coffee shoplardan biri olan kafenin baristaları da çox səmimi və mehribandır. 

Bir çoxunuz coffee shopun adının mənası ilə maraqlana bilərsiniz. Trabant alman dilində peyk deməkdir və eyni zamanda bir alman avtomobilidir. Məkanın sahibinin sözlərinə görə, peyk əvvəlcədən müəyyən olunmuş sərhədləri aşmaq və yenilərini kəşf etmək mənasına gəlir. Əgər siz də qəhvənin sərhədlərinin kənarına çıxmaq istəyirsinizsə, Sietl səyahətiniz zamanı bu məkana bir baş çəkin.

5. Sound Coffee and Morsel

Qısaca U (University District) adlanan bölgədə yerləşən bu coffee shop universitet tələbələrinə və turistlərə dadlı qəhvə və amerikan yeməkləri vəd edir. Kafeyə gələn müştəriləri keyfiyyətli qəhvə ilə təmin etmək üçün qəhvə və süd yalnız yerli istehsalçılardan tədarük olunur.

Coffee shopun onu siyahımıza salan güclü cəhətlərindən biri də sürətli xidmətdir. Kafedəki sıxlığa baxmayaraq, qəhvəniz çox qısa bir müddət ərzində təqdim olunduqda xidmətin peşəkarlığına heyran qalacaqsınız. Mükəmməl qəhvə, səmimi və sürətli xidmət və dadı damağınızda qalacaq peçenyelər istəyirsinizsə, ABŞ-a, Sietla səyahətiniz zamanı ziyarət etməniz gərəkən məkan artıq sizə bəllidir.