Business People Planning Meeting Conference Concept

Sinqapur biznes vizası: qaydalar, tələblər və ödənişlər

Tamerlan Mehdiyev Tamerlan Mehdiyev 10 iyul 2021
13 baxış 5 dəq. oxu

Sinqapur Malay yarımadasının cənub ucunda, ekvatorun şimalında yerləşən və 1965-ci ildən bəri suveren olan şəhər-dövlətdir. Ölkənin tarixi on doqquzuncu əsrin əvvəllərinə gedib çıxır və 1819-cu ildə Britaniya imperiyasının dövlət xadimi Ser Stemford Rafflz tərəfindən qurulduğuna inanılır. İlk illərdə imperiya tərəfindən ticarət məntəqəsi olaraq istifadə edilmişdir. İkinci dünya müharibəsi zamanı isə fərqli dövlətlərin tərkib hissəsinə daxil olmuşdur. Lakin nəticədə 1965-ci ildə müstəqillik qazana bilmiş və o vaxtdan bəri multikulturalizmi təcəssüm etdirməyi bacarmışdır. Sinqapurda fərqli millətlərdən, inanclardan, irqlərdən və dillərdən olan bir çox qrup var. Buna görə də ölkənin öz müstəqilliyini davam etdirməyi üçün yeganə yol çoxmədəniyyətliliyi konstitusiyaya salmaq idi. Dörd dil rəsmi dil sayılır və bunlar ingilis, malay, mandarin, tamil dilləridir. Sinqapurun ziyarətçilərə təqdim edə biləcəyi çox şey var. Bu ölkə yaşıl şəhər konsepsiyasının möhtəşəm bir nümunəsidir. Bir çox göydələnə sahib olan və sıx məskunlaşan şəhər ağaclarla doludur. Sinqapur yeməklərlə bağlı olaraq da çoxlu çeşidlər təklif edir. Görünür bu çoxmədəniyyətli mühit Sinqapur mətbəxinə də təsir göstərib. Təbiət və şəhər həyatının harmoniyası kəşf etməyə dəyər bənzərsiz bir yer yaradır. Daha da maraqlısı buranın dünyanın ən təhlükəsiz yerlərindən biri olmasıdır. Asiyanın əksər bölgələrinin o qədər də sabit olmadığını nəzərə alsaq, bu amil diqqətləri Sinqapura çəkir. Bura xüsusilə iş adamları və investorlar üçün bir cənnətdir. Biz də bu səbəblə sizə Sinqapur biznes vizasından danışmağa qərar verdik. Bu yazıda Sinqapur biznes vizasının tələblərinə, etibarlılıq müddətinə, rüsumuna, işləmə müddətinə və s. nəzər salacayıq. Sinqapur biznes vizasının alınması və müraciət müddəti ilə bağlı suallarınız olduğunu bilirik. Ancaq Sinqapur biznes vizası haqqında ətraflı məlumat almaq üçün əvvəlcə Sinqapur viza siyasətini gözdən keçirməliyik.

Sinqapur viza siyasəti

border control stamps

Sinqapurun viza siyasəti digər ölkələrlə qarşılıqlı münasibətlərdən asılı olaraq dəyişir. Əslində viza dostu ölkə sayılır. Bununla birlikdə, ölkələri vizalarla əlaqədar statuslarına görə iki qrupa bölə bilərik və bunlar vizasız ölkələr və elektron viza ölkələridir. E-viza ölkələri bunlardır:

Əfqanıstan, Əlcəzair, Azərbaycan, Banqladeş, Belarusiya, Çin, Misir, Gürcüstan, Hindistan, İran, İraq, İordaniya, Qazaxıstan, Kosovo, Qırğızıstan, Livan, Liviya, Mali, Moldova, Mərakeş, Nigeriya, Şimali Koreya (KXDR), Pakistan, Fələstin, Rusiya, Səudiyyə Ərəbistanı, Somali, Sudan, Suriya, Tacikistan, Tunis, Türkmənistan, Ukrayna, Özbəkistan, Yəmən.

Bir çox viza növü səyahətin məqsədindən asılıdır. Ancaq ümumilikdə hamısını dörd qrupa ayıra bilərik: e-viza, qısamüddətli vizalar, uzunmüddətli vizalar və tranzit vizaları. Bizi maraqlandıran viza növü qısamüddətli viza qrupuna aiddir. Daha çox ləngimədən Sinqapur biznes vizası, Sinqapur biznes vizası tələbləri, Sinqapur biznes vizası rüsumuna nəzər salaq.

Sinqapur biznes vizası tələblər və rüsumlar

dollar

Daha əvvəl də qeyd etdiyimiz kimi, biznes vizası qısamüddətli səyahətlər üçün verilən qısamüddətli vizadır. Səyahət məqsədindən asılı olaraq qısamüddətli vizaların növü dəyişə bilər - turist vizası, biznes vizası, mədəni, elmi, idman tədbirləri vizası, ailə və dostları ziyarət vizası, qısamüddətli təhsil vizası və qısamüddətli iş vizası. Sinqapur biznes vizası iş görüşləri, danışıqlar, təlimlər, konfranslar, sərgilər, elmi və ya araşdırma məqsədli işlərlə əlaqəli olaraq 30 və ya 90 gündən çox (milliyyətinizə görə) qalmamaq şərti ilə verilir. Planlaşdırdığınız səyahət müəyyən bir müddətdən daha uzun sürərsə, narahat olmayın, vizanızı uzatmaq üçün EntrePass kimi bir seçiminiz var. Sinqapur biznes vizasını necə alım? Normalda bu məqsədlə ölkənizdəki Sinqapur konsulluğuna və ya səfirliyinə müraciət etməlisiniz, amma bizim situasiyada viza üçün təkbaşına müraciət edə bilməzsiniz. Müraciət üçün Sinqapuda təsdiqlənmiş viza agenti, strateji tərəfdaş və ya yerli əlaqə tapmanız lazımdır. Yalnız bundan sonra tələb olunan sənədləri viza müraciət mərkəzinə və ya səfirliyə/konsulluğa təqdim edə bilərsiniz. Sinqapur biznes vizasına müraciət üçün bəzi tələblərə cavab verməlisiniz. Sinqapur biznes vizası üçün tələb olunan sənədlər aşağıda verilmişdir:

• Ərizəçi tərəfindən doldurulmuş, imzalanmış və tarixlənmiş müraciət forması. İngilis dilində doldurulmalıdır.

• Pasport Sinqapurdan ayrıldıqdan sonra 6 ay müddətində qüvvədə qalmalıdır. Ərizəçinin imzasını daşıyan pasportun verilmə müddəti 10 ildən çox olmamalıdır. Ən azı iki boş səhifəyə sahib olması gərəkən pasportda ərizəçinin şəkilləri də yaxşı formada əlavə edilməlidir.

• Maksimum 6 ay əvvəl çəkilmiş iki foto. Fotonun ölçüsü 3.5x4.5 olmalıdır. Üzün ön hissəsi fotonun 70-80%-ni əhatə etməlidir. Uniforma və ağ fon da şərtdir. Şəxs üz ifadəsi göstərməməlidir.

• Şəxsiyyət vəsiqənizin kopyası. Şəxsiyyət vəsiqəsi Sinqapurdan ayrıldıqdan sonra ən azı iki ay müddətində qüvvədə qalmalıdır.

open passport with different stamps

• Vətəndaşlıq və yaşadığınız ölkənin fərqli olması halında yaşayış icazəsi və ya vizasının surətlərini təqdim etməlisiniz.

• Pasportun əsas səhifəsinin və əvvəlki vizaların surətləri

• Bilet rezervasiyası - Sinqapur ərazisinə giriş və çıxış tarixləri göstərilməlidir.

• Qonaqlama yerini təsdiq edən sənəd - oteldə qalacaqsınızsa, otel rezervasiyası olmalıdır. Ev kirayələsəniz, kirayə müqaviləsi təqdim olunmalıdır.

• Ərizəçinin peşəsinə dair yerli işəgötürən tərəfindən verilən məktub. Bu məktubda işəgötürənin, həmçinin müraciətçinin adı, əlaqə məlumatları, statusu göstərilməlidir.

• Sinqapurda olduğunuz müddətdə xərcləri qarşılayacaq qədər maliyyə imkanlarınız olduğunun sübutu. Bunun üçün ərizəçi fərqli metodlardan istifadə edə bilər. Bu, son 3 aydakı maliyyə köçürmələrinizi göstərən şəxsi bank hesabından çıxarış, kredit kartı, nağd pul və s. ola bilər.

• Səyahətin məqsədi və xarakterini göstərən sənədlər. İşgüzar səfərin səbəbləri və mövcud iş əlaqələrinin izahı. Ərizəçi Sinqapurdakı bir şirkət tərəfindən dəvət edildiyi təqdirdə şirkət haqqında ətraflı məlumat verən bir dəvət məktubu. Ərizəçinin dəvət olunduğu konqres, iclas və ya tədbir haqqında məlumatın verilməsi də vacibdir. Ərizəçinin səfəri maliyyələşdirilirsə, xərclərin ödənilməsi barədə məlumat.

• Sarı qızdırma peyvəndi - əgər Sinqapura səyahətinizdən altı gün öncə bu ölkələrdə olmusunuzsa və ya bu ölkələrin vətəndaşısınızsa: Anqola, Mərkəzi Afrika Respublikası, Efiopiya, Boliviya, Ekvador, Qvineya, Burkina-Faso, Kot-d'İvuar, Qabon, Çad , Fransa Qvianası, Liberiya, Kolumbiya, Qambiya, Niger, Ekvatorial Qvineya, Qvineya-Bisau, Seneqal, Qana, Nigeriya, Toqo, Qayana, Mali, Sudan, Kenya, Syerra-Leone, Argentina, Mavritaniya, Surinam, Burundi, Peru, Uqanda, Braziliya, Cənubi Sudan, Benin, Konqo, Trinidad və Tobaqo, Kamerun, Konqo Demokratik Respublikası.

• Ərizəçi azyaşlıdırsa, doğum haqqında şəhadətnamə təqdim edilməlidir. Bundan əlavə, valideynlərinin müşayiəti olmadan səyahət edərsə, valideynlər tərəfindən razılıq məktubu təqdim edilməlidir.

employer shook hands

Sinqapur biznes vizasının etibarlıq müddəti milliyətinizə görə 30 gündən 90 günə qədər dəyişə bilər. Sinqapur vizasının proses müddəti də sabit deyil. Müraciət etdiyiniz ölkədən asılı olaraq 3 ilə 20 gün arasında dəyişə bilir. Sinqapur biznes vizası rüsumu 25-100 ABŞ dollar arasında ola bilər.

Daha əvvəl EntrePass-dan bəhs etmişdik. Bu, Sinqapurda yeni iş müəssisələri açmaq niyyətində olan insanlar üçündür. Xarici sahibkarların öz iş fikirlərini reallığa çevirməyinə imkan yaradır. Bununla birlikdə, EntrePass-dan yararlana bilmək üçün müəyyən tələblərə cavab verməlisiniz. Birinci növbədə ən azı 21 yaşında olmalısınız. Şirkətdə ən azı 30 faiz paya sahib olmalısınız. Aşağıdakı sənədləri də təqdim etməlisiniz:

• Ərizəçi tərəfindən doldurulmuş, imzalanmış müraciət forması. İngilis dilində doldurulmalıdır.

• Sinqapurdan ayrıldıqdan sonra 6 ay müddətində qüvvədə olacaq pasport. İki boş səhifəsi olması gərəkən pasportda ərizəçinin imzası olmalı və sənəd son 10 ildə verilmiş olmalıdır. Əsas səhifənin surəti də tələb olunur.

• Son 6 ay ərzində çəkilmiş iki pasport ölçülü foto. Üz hissəsi fotonun 70-80%-ni əhatə etməlidir. Uniforma və ağ fon mütləqdir. Şəxs üz ifadəsi göstərməməlidir.

• Keçmiş iş tövsiyyə məktublarının surəti (ingilis dilində)

• Biznes planı

• Dəstəkləyici sənədlər

Paylaş

Tamerlan Mehdiyev

Tamerlan Mehdiyev tam bir elm həvəskarıdır. Yer haqqında elmlər üzrə magistr dərəcəsi alan Tamerlan iqlim dəyişikliyi ilə bağlı araşdırma etməyi planlaşdırır. Təbiəti və Yer üzünün gözəlliklərini müşahidə etməyi sevir. Səyahətin onu müdrikləşdirəcəyinə və daxili rahatlıq tapmasına kömək edə biləcəyinə inanır. Həyat məqsədi mümkün qədər çox fərqli yerləri, mədəniyyətləri, insanları görməkdir.

Bütün bloqlar
pickvisa.az