Sudana səyahət etməniz və etməməniz üçün 9 səbəb

Yəqin ki, Sudan haqqında çoxunuzun məlumatı yoxdur. Ancaq bu günlərdə demək olar ki, hər kəs internetdə, televiziyada və digər media vasitələrində Sudan barəsində xəbərləri görür ki, bu da insanlar arasında böyük bir maraq yaradır.

Mən bu blogda sizə Sudana səyahət barəsində danışmaq istəyirəm. Əgər siz, Sudana səyahət etmək təhlükəsizdirmi? Sudana səyahət üçün ən yaxşı vaxt hansıdır? deyə maraqlanırsınızsa bu blogda həm bu həm də Sudana səyahət planınızı asanlaşdırmaqda sizə kömək edəcək digər məqamlar haqqında məlumat ala bilərsiniz.

Bəs yaxşı, Sudan harada yerləşir? Afrikanın şimal-şərqində yerləşən Sudan, şimalda Qırmızı dəniz, Misir və Liviya, qərbdə Çad və Mərkəzi Afrika Respublikası, cənubda Cənubi Sudan və şərqdə Efiopiya, Eritreya ilə əhatə olunmuşdur. Bununla yanaşı Keniya, Uqanda və Kongo Demokratik Respublikası bu Afrika ölkəsinin cənub qonşularıdır. Sudanın paytaxtı Xartum şəhəridir. Sudan ilə bağlı əsas məlumatlardan sonra indi sizə bu ölkəyə səyahət etmənin müsbət tərəfləri barəsində danışmaq istərdim.

1.  Sudan piramidaları

Sudan piramidaları barədə, yəqin ki, çoxunuzun xəbəri yoxdur. Bilirəm ki, piramida dedikdə hər kəsin ağlına Misir gəlir ancaq heç bilirsinizmi ki, Sudanda Misirdən daha çox piramida var və bunların demək olar ki yarısı hələ də yaxşı vəziyyətdədir? Piramidalar Xartumdan təxminən 3 saatlıq məsafədə yerləşən Meroenin qədim yerindədirlər. Ərazidə təxminən qırx kral və kraliçanın dəfn olunması üçün məzar olaraq inşa edilən müxtəlif ölçülü, tarixi eramızdan əvvəl 300-cü illərə dayanan 255-ə yaxın piramida var. Sudan piramidaları Qahirədəki məşhur piramidalara bənzəsələr də onlardan ölçüsünün kiçik olması və daha dik olması ilə fərqlənirlər. Fikrimcə, bu piramidalar Sudana səyahət üçün əsas səbəblərdən biridir.

2.  Ağ və Mavi Nil

Ağ və Mavi Nilin qovuşduğu yerdə olmaq və bu mənzərənin gözəlliyindən zövq almaq istəyirsiniz? Cavabınız "hə" dirsə, Sudana səyahət edin. Öz başlanğıcını Şərqi Afrika yaylasındakı Viktoriya gölündən götürən Ağ Nillə, mənbəyi Efiopiyadakı Tana gölü olan Mavi Nilin qovuşması sözün əsl mənasında fantastikdir. Sudanın paytaxtı Xartumdan etibarən iki çay birlikdə axır və onların qovuşduğu bu bölgə “Al-Mugran” adlanır.

3. Mədəniyyət

Bu ölkənin mədəniyyəti insanları Sudana səyahət etməyə təşviq edə biləcək səbəblərdəndir deyərdim. Sudandakı mədəniyyət 400-dən çox fərqli dildə və ləhcədə danışan müxtəlif etnik qrupların töhfəsi ilə formalaşmışdır. Ölkəyə səyahət edənlər muzeylərə üz tutaraq Sudan mədəniyyəti barəsində məlumat əldə edə bilərlər. Bu muzeylərin içində ən əsası Sudan Milli Muzeyidir. Muzey binası 1955-ci ildə tikilsə də, muzey olaraq fəaliyyətinə 1971-ci ildə başlamışdır. Digər başlıqda qeyd etdiyim iki Nilin qovuşduğu Al-Mugran bölgəsində yerləşən Sudan Milli Muzeyində Sudanın qədim tarixini əks etdirən eksponatlar sizi lap o dövrlərə aparacaq. Bu muzey dünyanın ən böyük və ən əhatəli Nubiya arxeoloji kolleksiyasına sahib olması ilə məşhurdur.

4. İnsanlar

Bu bölgənin insanları da səyahətçilər üçün üstünlüklər siyahısındadır. Mənim fikrimcə, sudanlılar əntiqədir. Bu insanlar çox səmimi, danışqan və inanılmaz dərəcədə qonaqpərvərdirlər. Sudana səyahət edənlər sudanlılar tərəfindən göstərilən özəl rəftarla qarşılaşa bilərlər. Xalqın belə qonaqpərvər olması Sudana səyahətin təhlükəsizliyi üçün bir dəlil ola bilər və əmin olun ki, görəcəyiniz xoş rəftarla siz də özünüzü rahat hiss edəcəksiniz.

5. Marine Milli Parkları

Dünyanın ən müxtəlif dəniz tropik habitatlarını tanımaq istəyirsinizsə, mütləq Sudandakı Marine Milli Parklarını ziyarət etməlisiniz. Bu ölkədə iki Marine Milli Parkı var: Sangenob Atoll və Dungonab Bay – Mukkawar. Təbii gözəllikləri ilə məşhur bu parklarda siz dənizdəki həyatı kəşf edə bilərsiniz.

6. Yeməklər

Bəli, Sudan xalqı mətbəxləri ilə məşhur deyil, lakin ərəblərin mirası ilə bu ölkədə çox dadlı çörək, paxla və keçi var. Sudan yeməkləri haqqında geniş məlumat əldə edə biləcəyiniz küçə yeməklərini isə mütləq sınamalısınız. Qəddafi tərəfindən inşa edilən yumurta formalı binada isə siz Sudan və Ərəb mətbəxinin dadlı təamlarından zövq ala bilərsiniz.

Sudana niyə səyahət etməlisiniz deyə hazirladığım bu yazını Port Sudan, Bayuda Səhrasındakı Bisharin, Cəbəl-Barkal dağı və başqa görməli yerlərlə uzada bilərəm. Ancaq gəlin bir az da Sudan səyahətinizi çətinləşdirə biləcək amillərdən danışaq.

7. Yüksək temperatur

Öncəliklə, Sudan ərazisi çox isti və quraqdır, hətta mən buranı dünyanın ən isti ölkəsi adlandıra bilərəm. Fikrimcə, Sudana səyahət zamanı yalnız səhər tezdən və ya günortadan sonra gəzintiyə çıxmaq məsləhətdir. Həmçinin, ölkə səhrada yerləşdiyi üçün temperatur gecə birdən-birə aşağı düşür. Sudana səyahətdən öncə bu məqamı mütləq diqqətə alın və çantanızı hava şəraitinə uyğun hazırlayın.

8. Təhlükəsizlik

Əminəm ki, sizi narahat edə biləcək bir başqa sual da "Sudana səyahət etmək təhlükəsizdirmi?" sualıdır. Sudanda təhlükəsizliklə bağlı əsas problem ölkənin bir çox bölgəsində davam edən bəzi daxili qarşıdurmalardır. Qarşıdurmalar etnikdir və müəyyən vilayətlərdə baş verir ki, bu da digər bölgələrin təhlükəsiz olması deməkdir. Beləliklə, bəzi lazımi məlumatları əldə edərək Sudan səyahətinizi daha rahat hala gətirə bilərsiniz. Məsələn, Darfur, Cənubi Kordofan, Mavi Nil kimi təhlükəli ərazilərdən uzaq durmanız və Port Sudan, Xartum, Gallabat, Sawakin, Karima kimi böyük şəhərlər daxil olmaqla Qırmızı dəniz sahillərini ziyarət etməniz məsləhətdir.

9. Cinayətlər

Sudana səyahət etməyi planlaşdırırsınızsa, gündəlik olaraq Sudan xəbərlərində gördüyümüz cinayətləri də gözə almalısınız. Xartum və digər böyük şəhərlərdə küçə cinayətlərinin - cibgirlik, soyğunçuluq, aqressiv dilənçilik və s. sayı az olsada, gündən-günə artmaqdadır. Buna görə də, Sudana səyahət zamanı özünüzü və qiymətli əşyalarınızı daima qorumalısınız.

Həmçinin, bu ölkədə fotoqrafiya qadağası mövcuddur. Siz viza ilə bərabər, Sudana səyahət və fotoqrafiya icazəsi almalısınız.

Beləliklə, Sudana səyahətin həm müsbət, həm də mənfi cəhətləri ilə tanış olduq. Bəs Sudana nə zaman səyahət edək? deyirsinizsə, yuxarıda da qeyd etdiyim kimi, bu ölkə, dünyanın ən isti ölkələrindən biridir və bu səbəbdən sentyabr və mart ayları arası Sudana getmək üçün ən yaxşı vaxtdır. Eyni zamanda, bilməlisiniz ki, iyul və sentyabr aylarında yağışlı bir mövsüm var ki, bu zaman Nil çayı daşa və nəqliyyat üçün təhlükəli hala gələ biləcək problemlər yarada bilər.