Elə indi Andorraya səyahət etməyiniz üçün 9 səbəb

Heç Andorra haqqında eşitmisinizmi? Andorra, xəbərlərdə tez-tez görünməyən kiçik bir Avropa ölkəsidir, buna görə də insanlar onun barəsində çox şey bilmirlər. Bu gün Andorra haqqında danışacağıq və bu barədə bəzi suallara cavab verəcəyik, məsələn: Andorra haradadır, Andorraya necə səyahət etməli, Andorranın paytaxtı haradır, Andorra bayrağı hansıdır və s.

Andorra haradadır?

Andorra Avropanın ən kiçik ölkələrindən biridir. Andorra Knyazlığı, Qərbi Avropada İspaniya ilə Fransa arasında yerləşir. Siqaret, siqar və mebel istehsalı ölkənin istehsal sənayesini təşkil edir. Andorrada rəsmi dili katalan dilidir və eyni zamanda ölkədə ispan dili də danışılır.

Andorranın paytaxtı

Andorranın paytaxtı Pireney dağlarında yerləşən Andorra la Vella-dır. Andorra la Vella həm də rüsumsuz pərakəndə satış mərkəzi kimi tanınır. Şəhər, eyni zamanda Avropada ən yüksəkdə yerləşən paytaxtlardan biridir.

Andorra bayrağı şaquli üç rəngdən ibarətdir: göy, sarı və qırmızı. Bayrağın sarı rəngli hissəsi digər iki hissədən daha genişdir. Andorra bayrağının şablonu 1993-cü ildə yaradılmışdır. Andorranın əhalisi isə təxminən 77 000 nəfərdir.

Andorraya necə səyahət etmək olar?

Andorrada heç bir hava limanı yoxdur. Ən yaxın hava limanları Le Seu d’Urgell, Barselona, Reus və Cironadakıdır. Sizin ehtiyacınız olan tək şey hər hansı bir yaxın hava limanına bilet almaqdır.

İndi isə Andorraya səyahət etməyiniz üçün 9 səbəbə keçək:

1. Andorranın təbiəti

Andorranın təbiəti ölkəni ziyarət etmək üçün əsas səbəblərdən biridir. Ən yüksək nöqtələr, yaşıl və ya qarlı meşələr, yaşıl təbiət həvəskarları üçün əsl cənnətdir. Ölkədə üç milli park var: Valle de Sorteny, Madriu-Perafita-Claror və Valles del Comapedrosa.

2. Vergisiz alış-veriş

Turistlərin Andorranı ziyarət etməsinin əsas səbəbi vergisiz alış-verişdir. Bu, ölkənin hər yerindəki, təxminən, 2000 mağaza ilə inanılmaz bir təcrübədir. Mağazaların çoxu Andorra Knyazlığının paytaxtında yerləşir. Bu şəhərin əhalisi cəmi 22.000 nəfərdir, lakin bu şəhərdə 400-dən çox mağaza var. Andorranın əlverişli vergi sistemi sayəsində Andorradakı qiymətlər olduqca cəlbedicidir. Qiymətlərin ən böyük üstünlüyü isə əlavə satış vergisinin olmamasıdır.

Andorrada paytaxtın əsas küçəsində yerləşən Benetton, Guess, Zara və digərləri kimi bir çox beynəlxalq qadın və kişi markaları var. Aksesuarlar çayın qərb tərəfindədir. Meritxell küçəsində yerləşən Gallery Andorra, çanta və digər lüks aksesuarların ən yaxşı seçimlərinə sahibdir.

Yaxşı alış-verişi xoş ətirlər olmadan təsəvvür etmək mümkün deyil və Andorra bir neçə ətir almaq üçün ən yaxşı yerdir. Andorra la Vella-nın əsas küçəsində beynəlxalq və niş ətir butiklərinə rast gələ bilərsiniz. Rüsumsuz ixrac məhdudiyyətlərinə nəzər salmağı unutmayın.

İdman mallarını sevirsinizsə, Andorra Knyazlığı, bu alış-veriş üçün də ən düzgün seçimdir. Səbəbi isə hikinq və velosiped yollarına yaxın olmasıdır. Əsas küçədə çoxlu idman avadanlıqları mağazası var. İdman malları mövsümi olaraq satılır.

3. Kaldeanın termal suyu

Andorranın yüksək qiymətləndirilən mənbələrindən biri də ölkənin termal sularıdır. Andorrada 35 termal bulaq var və ən isti bulaqlar əksərən Pireney bölgəsindədir. Kaldeanın termal suyu da bunlardan biridir. Su səthi 70 C-dir və duzlu və yağlı planktonlar, kükürd və minerallarla zəngindir. Təbii anti-allergik, müalicəvi təsirlərə malikdir. Tibbi xüsusiyyətlərlə zəngin olan su hər il bir milyon turist qarşılayır.

4. Dağlara baxan açıq laqunlar

Dağlara baxan açıq laqunlar, Hind-Roma hamamı, akva masajı sahələri, İsland vannası, hamam, açıq teraslar spa həvəskarları üçün Andorradakı növbəti yerlər ola bilər. Spa, həyatınızın ən maraqlı təcrübələrindən biri olacaqdır. Burada dağlara baxan açıq laqunlar var, hansı ki, qapalı laqun suyu böyük açıq laquna axır. Bu təcrübəniz möhtəşəm bir mənzərə ilə daha da zəngin olacaq. Suyun istiliyi 34-36 C-dir. Suyun kontrast temperaturlarından da faydalana bilərsiniz.

5. Qış İdmanları

Andorra Pireneydə yerləşdiyindən dağlıq bir ölkədir və ölkədə 65 zirvə var. Bu zirvələr 2000 metr yüksəklikdədir. Bu səbəbdən də Andorra xizəksürmə ilə məşhur ölkələrdən biridir. Ən uğurlu xizək turizmi 2003-cü ildə Grandvalira layihəsi ilə başladı. Grandvalira, Pas de la Casa, Grau Roig, Canillo, Soldeu ve El Tarter-dan ibarət xizəksürmə sahəsidir.

Qar və əyləncəni sevənlər üçün digər fəaliyyətlər:

- Meşədə “snowshoe” ilə ekskursiya

- İt xizəyi

- “Snowmobile” ilə turlar

- Hikinq

6. Andorra memarlığı

Andorra memarlığı digər xarici ölkələrin təsirinə məruz qalıb. Kiçik bir ölkə olmasına baxmayaraq, burada bir çox orijinal şey var və siz hətta Romadan əvvəlki və Roma dövrünün dəlillərini görə bilərsiniz. Andorranın ən qədim kilsələri sadə memarlığı və kiçik ölçüsü ilə bilinir. Ölkədə 40-dan çox kilsə və abidə var.

Andorra kilsələri üçün tipik bir nümunə, XI-XII əsrlərdə inşa edilmiş Sant Joan de Caselles kilsəsidir. Kilsə, Roma dövrünə aid edilir. Kilsədə taxtadan tavan və yarımdairəvi apse var.

7. Gecə partiləri

Ölkə əsasən kurortlar və şopinq ilə tanınsa da, gecələri də çox canlıdır. İstirahət mərkəzlərinin klublarında çoxlu gecə partiləri keçirilir.

8. Andorra yeməkləri

Andorra yeməkləri Qərbi Aralıq dənizi mətbəxinin bir hissəsi olan dağ yeməkləri kimi tanımlanır. Andorra yeməkləri mövsümi və rəngarəngdir. Andorra qastronomiyası haqqında bilmək istəyirsinizsə, orijinal yemək səyahətimizi təqib edin:

Galtes de Pore (Donuz yanaqları)

Bəli, Andorrada donuz yanaqları yeyilir. Bunu hazırlamaq üçün bir neçə variant var. Reseptlərdən biri belədir: donuz yanaqlarının qırmızı şərab, kərəviz yarpaqları, göy soğan, bulyon və sarımsaq, yerkökü, soğan, pomidor, duz, qara bibər kimi digər əsas maddələr ilə kombinasiyası.

Escudella (Tərəvəz ilə qaynadılmış donuz əti)

Escudella tərəvəz ilə qaynadılmış donuz ətidir, əsasən qışda yeyilir və bir çox növü var. Bəzən Conchiglie makaronlarına əlavə olunur.

9. Kiçik kəndlər

Andorranı ziyarət etmək üçün başqa bir səbəb də möhtəşəm şəkillər üçün kiçik kəndlərin olmasıdır. Bildiyiniz kimi, Andorra kiçik bir ölkədir və hər yerdə şəkil çəkmək üçün digər ölkələrə nisbətən, daha çox şans və vaxt var. Ən məşhur kənd – Ordino, daş evlər və İnstaqramınız üçün rəngli restoranları ilə Roman memarlığının bariz nümunəsidir