Backpackinqin lüks səyahətdən daha yaxşı olmasının səbəbləri

Backpackinq nədir və nəyə görə buna üstünlük verməliyik? Bu gün sizə backpackinq, yəni beli çantalı yürüş ilə bağlı ətraflı məlumat verməyə çalışacağam. Bloq 2 hissədən ibarət olacaq. Birinci hissədə sırf backpackinq ilə bağlı qeydlər edəcəm, ikinci hissədə isə bu növ səyahətin üstünlüklərindən bəhs edəcəm. Ancaq əvvəlcə, backpackinq nədir? Hər kəs bu suala minlərlə müxtəlif cavablar və izahlar verə bilər, ancaq qısaca deyə bilərik ki, bu daha ucuz və özünüzü sərbəst hiss edə biləcəyiniz səyahət növüdür. Şübhəsiz ki, bu növ səyahət hər kəs üçün uyğun olmaya bilər, çünki bəzi insanlar lüks səyahəti üstün tuturlar. Beli çantalı yürüş, macəra arayışı içində olan insanlar üçün daha uyğundur.

Hava şəraiti və götürüləcək əşyalar

Əlbəttə ki, hazırlaşmağa başlamazdan əvvəl hara gedəcəyinizə qərar verməli və həmin təyinatdakı hava şəraitini yoxlamalısınız. Bunun ardınca, “götürüləcək əşyalar” siyahısı yarada bilərsiniz. Siyahıda hər şeyi qeyd etmənizi məsləhət görürük, çünki bəzi hallarda səyahət planlaşdırması bir qədər qarışıq ola bilər. Səyahətiniz yay aylarındadırsa, bir-iki futbolka və köynək, günəş eynəyi, günəş kremi, şapka və s. ehtiyacınız olanlardandır. Günəş kremi, şapka və eynək ən vacib əşyalardır, çünki heç kim səfər zamanı sağlamlıq problemi yaşamaq istəməz. Uzun müddət yürüş edəcəyinizi nəzərə alsaq, özünüzlə su şüşəsi götürməyiniz faydalı olardı.

Əgər siz qış turizminə üstünlük verirsinizsə, bu halda özünüzlə termos götürməyi unutmayın. Bununla, isinməyə ehtiyacınız olduqda və ya bir fincan qəhvə, ya da çay içmək istədiyinizdə restoran yaxud kafe axtarmağa ehtiyac qalmayacaq. Sonda isə qadın səyahətçilərə şərf götürməyi məsləhət görürük, çünki tarixi, müqəddəs yerləri ziyarət etmək istəsəniz, saçlarınızı örtməyiniz lazım ola bilər.

Bəzi vacib tədbirlər

Səfər zamanı hər şeyə hazır olmalıyıq. Bildiyiniz kimi, cihazlar, gündəlik həyat və daha bir çox şey ölkədən asılı olaraq dəyişə bilər. Bu başlıq altında onlardan bəzilərini paylaşacam. İlk öncə elektrik yuvası tiplərini qeyd etmək istəyirəm. Ölkələrin A, B, C, D, E, F, G və s. kimi müxtəlif növ yuvalardan istifadə etdikləri aydındır. Bu problem ilə qarşılaşmamaq üçün yuva dəyişdiricisinə ehtiyacınız olacaq. İşinizi asanlaşdıracaq digər əşya portativ şarj alətidir. Vaxtınızın çox hissəsini açıq havada keçirəcəksiniz, buna görə də çantanıza “power bank” qoymağı unutmayın. Backpackinq zamanı bəzi dərmanlara da ehtiyacınız olacaq. Yeni iqlimə uyğunlaşmada çətinlik çəkə bilərsiniz və ya məsələn Afrikaya səyahət edirsinizsə, həşəratlardan bəzi viruslar tuta bilərsiniz, bu səbəblə də yanınızda antidotların olması məsləhətdir. Bəs yemək? Backpackinq qidaları bəzi qidalara allergiyası olan insanlar üçün faydalı ola bilər. Çox gəzəcəyinizi nəzərə alsaq, enerji üçün də bu qidalara ehtiyacınız olacaqdır. Beləliklə, çantanızda backpackinq qidalarına da yer ayırmağı unutmayın.

Backpackinq xəritələri

Xəritə bel çantanızda olması gərəkən ən vacib əşyalardan biridir. Əlbəttə ki, bu gün hər hansı bir yerin xəritəsini internetdə asanlıqla tapa bilər və ya Google xəritələrdən istifadə edə bilərik, ancaq gedəcəyimiz yerdə internet zəif ola və ya heç olmaya bilər. Meşədə və ya dağda hikinq edərkən isə, internet bağlantısı problemləri ilə qarşılaşmanız qaçınılmazdır. Bundan əlavə, əksər insanlar yalnızca çox populyar yerləri ziyarət etdiyindən, internetdə bütün maraqlı turistik yerləri tapmaq çətin ola bilər. Ancaq narahat olmayın, bunun üçün bütün turistik yerləri özündə barındıran xüsusi xəritələr ala bilərsiniz. Bu növ xəritələrdən bəziləri ölkələrin və ya şəhərlərin rəsmi saytlarında mövcuddur və onları zəhmət çəkmədən əldə edə bilərsiniz.

Hikinq səfərinizi daha rahat hala gətirin

Backpackinqdən əvvəl bel çantanıza yığmanız gərəkən başqa vacib şeylər bir cüt çəkələt və idman ayaqqabılarıdır. Şəhəri, parkları və meşələri araşdırmaq füsunkar, ancaq eyni zamanda da yorucu olur. Bu səbəbdən də rahat ayaqqablarınızın olması şərtdir. Meşədə və ya dağda gəzinti zamanı, idman ayaqqabılarınız ən yaxşı dostunuza çevriləcək. Bəzi şəhərlərə çəkələklə giriş qadağan olduğundan, meşəyə və ya dağa getməsəniz belə, çantanızda rahat ayaqqabılara yer edin. Digər tərəfdən, çimərliklərə getmək istəsəniz, buna görə rahat sandallara ehtiyacınız olacaq.

Nəhayət, birinci hissəni bitirdik və indi backpackinqin üstün tərəfləri barədə danışmağa başlaya bilərik.

Daha sərfəli olması

Əlbəttə ki, hər kəs sərfəli tətil arzulayır, amma fikrimcə bu, iki növ səyahətçilər üçün daha faydalıdır: tələbə backpackerlər və səyahət marafonuna çıxmış şəxslər. Səyahət zamanı büdcənin böyük bir hissəsinin qonaqlama üçün xərcləndiyini bilirik. Əksər ölkələrdə bir gecə üçün ən azı 20-50 ABŞ dolları ödəməniz lazım gələ bilər. Əsasən insanlar zərgərlik və digər qiymətli əşyalarını güvəndə saxlamaq, təmizlik, xidmət və s. səbəblərlə otellərdə qalmağı üstün tuturlar. Əgər bunlar sizin üçün əhəmiyyətsizdirsə, çadır icarəyə götürüb orada yata bilərsiniz. Ayrıca, bir çox ölkədə ortaq otaqlar və ya kiçik otaqlı hostellər var. Qeyd edək ki, onlar baqaj üçün yüksək standartlı, güvənli yerlər təklif etmirlər və bu səbəbdən də çoxlu baqajla səyahət edən insanlar üçün uyğun olmaya bilər. Digər tərəfdən, bu, backpackerlər üçün idealdır. Ortaq otaqlarda qalmağın müsbət tərəfi yeni insanlarla tanış olmaqdır. Bəlkə də burada sonsuza qədər davam edəcək dostluqlar quracaqsınız.

Sonsuz macəra imkanları

Backpackinq sizə müşahidə etmək, təbiətdən zövq almaq və bir çox macəra yaşamaq şansı verir. Səfərimi necə sərgüzəştli edim? Əlbəttə ki, bunun üçün ən yaxşı yol açıq hava fəaliyyətləridir və bunlar arasında ən məşhur olanı kampinqdir. Bəzi ölkələrdə vəhşi təbiətdə kampinq qanunsuz olsa da, məhdudiyyət və qaydaları olmayan çoxlu yer tapa bilərsiniz. Ayrıca, bəzi əyalətlər parklarda, təbii qoruqlarında xüsusi kampinq sahələri yaradıb, ona görə də yer barəsində narahat olmayın. Kampinq zamanı valehedici mənzərə qarşısında dağların zirvələrində piknik edə, kanoe və ya qayıqçılıqla məşğul ola bilərsiniz. Özünüz və övladlarınız üçün minlərlə unudulmaz xatirələr yaradacaq, bəlkə də film və ya kitab çıxarmanıza ilham verəcək təcrübə yaşayacaqsınız.

Səfərin kapitanı sizsiniz

Normal səyahətlər bəzən rutin və darıxdırıcı ola bilər, ancaq beli çantalı yürüş sizə özünüzü sərbəst hiss etmək imkanı verəcəkdir. Qısaca, göyərtədəki tək kapitan olacağınızı deyə bilərik. Müasir həyat bizi robotlar kimi işləməyə və yaşamağa məcbur edir və əksər insanlar özlərinə vaxt ayıra bilmirlər. Əgər siz də gündəlik həyatınızda belə problemlərlə qarşılaşırsınızsa, backpackinq tam olaraq sizin üçündür. Sizin heç bir cədvələ və ya izləməli olduğunuz plana ehtiyac yoxdur. İstədiyiniz zaman müxtəlif qərarlar ala bilərsiniz.

Daha açıqfikirli olacaqsınız

Təəssüf ki, bəzən fərqli mədəniyyətlərə, xalqlara, ənənələrə və daha bir çox şeyə qarşı qərəzli fikrilərimiz ola bilər. Backpackinq sizə bu pis vərdişdən qurtulmanızda və daha açıqfikirli olmanızda kömək edəcək. Bu növ səyahət zamanı vaxtınızın çox hissəsini çöldə keçirəcək və bununla da yerli insanlarla əlaqə quracaq, adət-ənənələri ilə bağlı bir çox faktı öyrənəcəksiniz. İlk öncə onların əksəriyyəti sizin üçün qəbuledilməz və ya qəribə görünəcək, lakin daha çox müxtəlif mədəniyyətlə tanış olduqdan sonra, müəəyən bir yeri, məhz bu fərqlərin cəlbedici və bənzərsiz etdiyini başa düşəcəksiniz. Təəssüf ki, müasir dünyamızda həll olunmamış problemlərdən biri də, dinlə bağlı olanlardır. Bəlkə də sizin də başqa dinlərə qarşı qərəziniz var və düşünürsünüz ki, yeganə düzgün yol sizin dininizdir. Ancaq fərqli dini görüşlərə sahib insanlarla söhbətdən sonra ən vacib şeyin insan olmağı bacarmaq olduğunu başa düşəcəksiniz. Tanrıya, Allaha və ya Buddaya inana bilərik, bunun heç bir əhəmiyyəti yoxdur. Bir-birimizə hörmət etməliyik!

İsraf etməməyi öyrənəcəksiniz

Yeni bir ölkəyə gedəndə etdiyimiz ən böyük səhvlərdən biri də mənasız şeylər almaqdır. Bununla sadəcə pulumuzu və vaxtımızı faydasız şeylərə sərf edirik, ancaq bel çantası ilə səyahət zamanı belə “fürsətləriniz” olmayacaq. Məhdud yeriniz olduğundan, daha diqqətli olmağa məcbur qalacaqsınız. Əlbəttə, söhbət yalnız puldan getmir. Müxtəlif nümunələr verə bilərik və qida israfı da bunlardan biridir. Danılmaz faktdır ki, kənd yerlərində səyahət edərkən tez-tez alış-veriş etmək şansınız olmayacaq, bu səbəblə də yeməyinizdən səmərəli istifadə etməyi öyrənəcəksiniz. Eyni zamanda bu sözləri enerjidən səmərəli istifadə haqqında da söyləyə bilərik.

Məqaləni bitirdik, ümid edirəm ki, sizin üçün faydalı olacaq.