Dominikaya səyahətdən əvvəl bilsəydim dediyim 10 şey

Yer üzərində cənnət adlandıra biləcəyimiz bir başqa yer də Dominikadır. Əminəm ki, çoxunuz bu gözəl ölkə haqqında heç vaxt eşitməmisiniz. Dominika haradadır? Dominika və ya Dominika Birliyi Karib dənizində, Qvadelupa və Martinika adalarının arasında yerləşən ada-dövlətdir. Heç kimə sirr deyil ki, təbii gözəlliklərinə görə Dominika adasına Karib dənizinin gizli incisi deyilir. Rozo Dominikanın paytaxtı və ən böyük şəhəridir. Biz də bu bloqda Dominika, Dominikaya səyahət, görülməli yerlər və s. haqqında danışacağıq.

Dominikanın bayrağı misilsizdir və onun üzərindəki hər bir rəng və simvol ölkənin bənzərsiz xüsusiyyətlərini təmsil edir. Bayraq 3 noyabr 1978-ci ildə qəbul edilmişdir. Əsası yaşıl rəngdən ibarət bayrağın üzərindıki sarı zolaqlar orijinal yerli sakinləri, qara rəng məhsuldar torpağın əhəmiyyətini, ağ rəng isə təmiz suyu təmsil edir. Bayrağın mərkəzindəki on ulduz isə ölkədəki on kilsəni təmsil edir. Ulduzların arasında isə Dominika üçün endemik bir növ olan Imperial amazon tutuquşusunun rəsmi var.

İndi isə Dominikaya səyahətdən əvvəl Dominika haqqında bilməli olduğunuz on şey:

1. Çimərlik yox təbiət aşiqlərinin məkanı

Ada ağzı açıq qoyan mənzərələrlə doludur. Dominika adasının uzunluğu cəmi 47 kilometr, eni isə təxminən 29 kilometrdir. Kiçik Antilin bütün digər vulkanik adalarında yalnız bir aktiv vulkan olduğu halda, Dominikada doqquzu var. Kolumbun adanı ziyarət etdiyi gündən sonra böyük bir maqmatik püskürmə qeydə alınmayıb və nəticədə adada günümüzün ən yaxşı və ən çox qorunan tropik yağış meşələri var. Dominika çimərlikləri digər Karib ölkələrində olduğu kimi geniş və ya qumlu deyil. Adanın kütləvi çimərlik partilərindən daha çox təbii gözəllikləri kəşf etmək üçün uyğun olmasının səbəbi budur. Dağlar yağış meşələri ilə örtülüdür və ölkə 300-dən çox çay və şəlaləyə ev sahibliyi edir. Beləliklə, adaya çimərliklərdə tənbəllik etmək ümidi ilə gəlməyin. Düzdür, şansınızı sınaya bilərsiniz, ancaq bu Dominikadan zövq almaq üçün ən yaxşı yol deyil.

2. Digər Karib ölkələrindən daha sərfəlidir

Dominikanın əsas fərqləndirici xüsusiyyətlərindən biri, digər Karib adaları ilə müqayisədə daha münasib qiymətləridir. Karib dənizi bölgəsi Şərqi Avropa və Cənub-Şərqi Asiyanın turistik yerlərindən daha bahalıdır. Karib hövzəsindəki adaların çoxu kiçikdir və bir-birləri ilə rəqabət edən çox şirkət yoxdur və bu kimi faktorlar şirkətlərin rahatlıqla qiymətlərini bahalaşdırmasına gətirib çıxarır. Ancaq Barbados, Sent Martin ve Antiqua kimi adalardan fərqli olaraq, Dominika daha münasib qiymətlər təklif edir. Dominika restoranlarında əsas yemək sizə təxminən 12 dollara başa gələcək. Balina seyr turu 70 dollar civarındadır və gecə başına 15 dollar tələb edən hostellər tapa bilərsiniz.

3. Dominika: təbiətlə yaxın olmaq

Dominikada lüks otellər, restoranlar və barlar varmı? Yox! Bura təbiətlə yaxın ünsiyyətdə olmaq üçün ideal ölkədir. İnsanlar Dominikanı Karib bölgəsinin sağlamlıq və gümrahlıq paytaxtı hesab edirlər. Təbii mənzərələrdə, təmiz havada və təmiz suda üzən ada xüsusi şəfa gücünə malikdir. Yalnız orqanik qidalar qəbul etməklə və əfsanəvi bir mühitin içində olmaqla çoxdandır arzusunda olduğunuz terapiyanı alacaqsınız.

4. Maria qasırğası

Dominika ilə əlaqəli ən maraqlı faktlardan biri də, “Hurricane Maria” tərəfindən məhv edildiyinə dair formalaşan yanlış fikirdir. Düzdür, 2017-ci ilin sentyabrında Maria qasırğası Dominikanı çox pis “vurdu” və həqiqətən də adada baş verən ən qorxunc təbii fəlakət idi. Onun nəticəsində bir çox ev və infrastruktur dağıldı. Ancaq Dominika xalqının özünə gəlməsi sadəcə bir il çəkdi. 2019-cu ildə ölkə tamamilə normal vəziyyətinə qayıtdı. Bu, əla dayanıqlıq nümunəsi idi. İnsanların zəhməti və pozitivliyi şəhərləri və qəsəbələri yenidən bərpa etmələrini mümkün etdi.

5. Mehriban insanlarla görüşə hazır olun!

Dominika haradadır? Qonaqpərvərliyin cəmiyyətin əsas xüsusiyyəti olduğu yerdə. Çalışqan və qonaqpərvər xalq həqiqətən də çox nəzakətlidir. Dominikada turistlərin xalq ilə isti münasibətlər qurması çoxdan ən əyləncəli asudə vaxt fəaliyyətlərindən birinə çevrilib. Adanın əsas gəlir mənbəyi turizmdir, bu səbəbdən onlar turistlərə qarşı ikiqat mehriban və şəfqətli davranırlar.

6. Adını qarışdırmayın

Dominikaya səyahət etməzdən əvvəl nələri bilmək lazımdır? Dominikaya gedərkən mütləq bilməniz gərəkən bir şey var. Dominikanın adını Dominikan Respublikası ilə qarışdırmayın. Bəzi insanlar hətta Dominikanın Dominikan Respublikasının paytaxtı olduğunu düşünürlər. Bundan başqa, Dominikada olduğunuz zaman Dominika əvəzinə Dominikan Respublikası deməkdən çəkinin. Axı onlar sizə çox yaxşı münasibət bəsləyir, nəyə görə eynisini görməsinlər?

7. Rəsmi dil - ingilis dili

İngilis dili ölkənin rəsmi dilidir. Hər yerdə danışılır və bu, turistlərin bələdçi köməyi olmadan küçələrdə gəzməsini daha da asanlaşdırır. Bundan əlavə, bəzi insanlar dominikan kreolu və Antil kreol dillərində danışırlar. Bu iki dil fransız dilinə əsaslanır və 17-ci əsrin sonunda fransızların adaya köçü sayəsində ölkədə geniş yayılmışdır.

8. Mümkün qədər rahat geyinin

Daha əvvəl də qeyd etdiyim kimi, təbiət adanın əsas sərvətidir. Ada sərgüzəştlərlə doludur. Buna görə də özünüzlə çoxlu rahat paltar və idman ayaqqabısı götürməyi unutmayın. Dominikanın təklif etdiyi təbiət fəaliyyətləri ilə özünüzü canlı hiss edəcəksiniz. Morne Trois Pitons Milli Parkında instaqramlıq təbiətə qərq olmaqla bütün problemlərinizi və narahatlıqlarınızı unudacaqsınız. Biraz hikinq etdikdən sonra cənnətə bənzər bir yer olan Titou Gorge dərəsində üzməyə gedə bilərsiniz. Burada turistlər heyrətamiz bir kanyoninq təcrübəsi yaşaya, dalış edə, dərin rifləri araşdıra bilərlər.

9. Üzdüyünüz yerə diqqət edin

Dominikadakı hər göl və hər çimərlik üzmək üçün deyil. Məsələn Ümumdünya Mirası sayılan Boiling Lake gölündə üzmək üçün çox təhlükəlidir. Hətta bu gölü professional bələdçi ilə ziyarət etməlisiniz. Gölün temperaturu son zamanlarda ensə də, hər an xəbərdarlıq etmədən qəfildən arta bilər. Bəzi çimərliklərdə xilasedicilər yoxdur, odur ki, həmin ərazilərdə də üzməkdən çəkinin. Üzməzdən əvvəl bələdçinizlə və ya yerli xalq ilə məsləhətləşin. Dalğıclıq və şnorkellinqi sınamaq istəyirsinizsə, peşəkar rəhbərlərlə sınaya biləcəyiniz bir çox şirkətin olduğunu bilin.

10. LGBTQ səyahətçilər üçün xəbərdarlıq

Dominik qanunları və qaydaları eynicinslilər arasında cinsi əlaqələri qadağan edir. Aşkarlandıqları təqdirdə LGBTQ səyahətçilər ağır şəkildə cərimələnə və hətta on ilə qədər həbs cəzası ala bilərlər. Homoseksualizm cəmiyyət daxilində də qəbul edilmir. LGBTQ şəxslər kobudluqlara və şifahi istismara məruz qala bilər. Bu səbəbdən homoseksualların Dominikaya səyahət etmələri məsləhət görülmür.

Dominikaya səyahət üçün ən yaxşı vaxt nədir?

Dominikaya səyahət etmək üçün ən yaxşı vaxt oktyabr-fevral aylarıdır. Bu müddət güclü yağışların yağmadığı və rütubətin daha az olduğu zaman dilimidir. Həmin dövrdə orta temperatur 26 ° C ətrafında seyr edir. İyul ayının sonundan oktyabr ayına qədər Dominikada yağışlar mövsümüdür. Yağışlı mövsümdə qasırğa və tropik fırtına ola bilər.

Dominikaya necə getmək olar?

Dominika ada olduğundan oraya getməyin iki yolu var: hava və su yolu ilə. Avropanın və Şimali Amerikanın böyük şəhərlərindən Dominikaya birbaşa və ya dayanacaqsız uçma imkanı yoxdur. Bunun səbəbi isə ölkənin Douglas–Charles hava limanının böyük təyyarələr üçün çox kiçik olmasıdır. Dominikaya səyahətin əsas yolu Antiqua və Barbuda, Qvadelupa, Sent-Lüsiya, Puerto-Riko və Barbadosdan qalxan yerli uçuşlardan istifadə etməkdir. Dominikaya gedən kruiz səfərlərinə də bilet ala bilərsiniz. Kruiz mövsümü oktyabrdan aprelin ortalarına qədərdir. Dominikaya gedən kruiz xəttlərinə Aida Cruise, Seabourne, Windstar Cruise, Sea Cloud və s. daxildir. Əksər ölkələrin vətəndaşlarının Dominikaya daxil olmaq üçün vizaya ehtiyacları yoxdur. Qonşu dövlətlərin vətəndaşları Dominikaya sərbəst şəkildə daxil ola bilərlər. ABŞ və AB-dən olan şəxslər isə altı aylıq vizasız girişdən istifadə edə bilərlər.

İndi isə sıra Dominikaya səyahətdədir. Yolunuz açıq olsun!