Dubayda 12 İnstaqramlıq yer

Siz İnstaqramda gözəl şəkillər paylaşmağı sevir və bu şəkilləri çəkmək üçün hara getməniz gərəkdiyini düşünürsünüz? O zaman siz mütəq şəkildə Dubaya səyahət etməlisiniz. Başgicəlləndirici göydələnləri, möhtəşəm təbiət mənzərələri və ağzı açıq qoyan mühəndislik möcüzələri ilə Dubayın hər yeri İnstaqramınızı hamını qısqandıracaq şəkillərlə bəzəmənizə yardımçı olacaqdır.

Dubayda hər kəsin zövqünə xitab edəcək bir şey var. Lüks əşyaları sevən alış-veriş həvəskarı və ya ölkəni bütünü ilə kəşf etmək istəyən solo səyyah olmanızın heç bir fərqi yoxdur. Dubay hər kəs üçündür!

İndi isə keçək İnstaqramımızı bəzəyəcək şəkilləri çəkdirəcəyimiz yerlərə. Dubayın aşağıda sıraladığım 12 yeri səyahət albomunuzu və eləcə də İnstaqramınızı füsunkar şəkillərlə doldurmaq üçün mütləq baş çəkməli olduğunuz instaqramlıq yerlərdir.

1. Bürc Xəlifə

829 metr yüksəkliyi ilə dünyanın ən hündür binası olan bu tikili, BƏƏ-yə səyahət etmək üçün əsas səbəblərdən biridir. Binanın üstündə və ya binadan kənarda, heç fərqi yoxdur burada instaqramlıq şəkil çəkdirmək üçün seçimlər sonsuzdur. Bürc Xəlifədə iki müşahidə göyərtəsi var. Biri 125-ci mərtəbədə, digəri isə ağılları başdan alan yüksəklikdə - 148-ci mərtəbədədir.

Bürc Xəlifə Downtown Dubai-də Dubay Mall-ın yanında yerləşir. Giriş ticarət mərkəzindəndir metro ilə asanlıqla bu yerə gedə bilərsiniz. Binanın yuxarısından açılan mənzərə sadəcə heyranedicidir və bariz şəkildə İnstaqrama layiqdir! Ancaq günəşin doğuşunda və qürubunda Bürc Xəlifədən açılan mənzərə dünyanın ən füsünkar mənzərəsi ola bilər. Bununla yanaşı, dünyanın ən hündür binası olan Bürc Xəlifəni parlaq günəşli bir gündə ziyarət etməyə çalışın, çünki Dubayda hava əksərən dumanlı olur.

İnsanların Bürc Xəlifədə çəkdikləri ən populyar şəkillər arxa planda Dubay fəvvarələrinin olduğu şəkillərdir. Bu detalı qaçırmadığınızdan əmin olun.

2. Bürc əl-Ərəb

Təsviri yelkən şəklində olan bina, sözün əsl mənasında, Dubayın emblemi olaraq təqdim edilir. Bu cəlbedici tikili dünyanın ən lüks otellərindən birinə, əslinə qalsa, dünyadakı yeganə 7 ulduzlu otelə ev sahibliyi edir. Ancaq bu lüksü yaşamaq pulqabınızı boşalda bilər. Oteldə qalmasanız da, binadakı ultra lüks restoranda nahar edə bilərsiniz ki, bu da bir nəfər üçün 255 AZN-dən (150 dollar) çox pul deməkdir.

Ruhdan düşməyin! İnstaqramdakı izləyicilərinizi bu möhtəşəm binanın ən yaxın kadrlarını paylaşaraq dəli edin! Cumeyra-Biç (Jumeirah Beach) ziyarətinizi gün batımına saxlayın. Çimərlikdə, arxa planda Bürc əl-Ərəblə çəkilən hər hansı bir şəklin İnstaqramda yüzlərlə “like” alacağından əmin olun. 

3. Dubay Möcüzə Bağı

Bu Möcüzə Bağı, adından da göründüyü kimi, Dubayın ən möcüzəvi və şübhəsiz, ən gözəl şəkillər çəkilən yerlərindən biridir. 50 milyondan çox çiçək və 250 milyondan çox bitki ilə bu təbii çiçək bağçası, Dubayın isti hava şərtlərində sözün əsl mənasında möcüzələr diyarıdır. Bilet qiymətləri formal olaraq açıqlanır və noyabr ayının ortalarından may ayına qədər ziyarət üçün açıqdır.

Möcüzə Bağındakı çiçəklər müxtəlif formalarda şəkilləndirilmişdir. Hətta burada çiçəklərlə düzəldilmiş təyyarə də var! Bağı ziyarət etmək üçün ən yaxşı vaxt səhər saat 9 və istiliyin azaldığı axşam saatlarıdır. Buna baxmayaraq, noyabrdan yanvar ayınadək olan soyuq vaxtlarda, Möcüzə Bağını istənilən zamanda rahatlıqla ziyarət edə bilərsiniz.

4. Dubay Fəvvarələri

Dubay fəvvarələri Bürc Xəlifənin kənardan şəkillərini çəkmək üçün ən yaxşı yerdir. Əgər bu yerə axşam vaxtı səyahət etsəniz, saat 6-11 arası hər yarım saatda bir gerçəkləşən, möhtəşəm işıqlandırma və ecazkar musiqilələrlə kombinə olunmuş, cəzbedici fontan rəqsini də həm görə, həm da kameranızla qeydə ala bilərsiniz.
Fəvvarə eyni zamanda axşam vaxtı izdihamı ilə məşhurdur, ona görə valehedici instaqramlıq şəkillər çəkərkən bu detalı nəzərə alın. Bununla yanaşı, siz həm axşam yeməyinizin dadını çıxartmaq, həm də fəvvarəyə rahat bir şəkildə tamaşa etmək üçün Dubay Mall-dakı restoranlardan birinə gedə bilərsiniz.

5. Atlantis The Palm

İnsanlar tərəfindən palma ağacı şəklində inşa edilmiş ən ağılalmaz adada yerləşən Atlantis, heç şübhəsiz ki, aerofotoşəkillər üçün idealdır. Lakin əgər sizin otelin üstündən helikopterlə uçaraq şəkillər çəkmək üçün pulunuz yoxdursa, məyus olmağa dəyməz, otel bütün hallarda çox gözəl görünür.

Dünyanın ən yaxşı və ən lüks çimərlik kurortlarından biri olan bu 5 ulduzlu otelin içi isə İnstaqram fotoları üçün başqa bir aləmdir. Siz burada həmçinin 50000-dən çox su heyvanının yaşadığı və özlüyündə bir möcüzə olan Lost Chambers Aquarium-a da baş çəkə bilərsiniz.

6. Dubay Çərçivəsi

Çərçivə formalı bu mega struktr Dubayın dünyada yaxşı bilinən bir xüsusiyyətinin - keçmiş ilə müasirliyin qarışımının bir örnəyidir. Dubay çərçivəsi Old Town-u yeni Dubaydan ayırır. Binaya girişin məbləği 52 dirhəmdir (24 AZN). Siz binanın başından Dubayın hər iki versiyasının fotosessiyasını edə və daha sonra bu instaqramlıq şəkilləri öz İnstaqram və digər sosial media hesablarınızda paylaşa bilərsiniz.

7. Desert Safari

Əgər hələ də "Dubay səyahətində nə etməliyəm?" deyə düşünürsünüzsə, bu, sizin sualınızın cavabıdır! Həm bu dəyərli təcrübəni yaşamaq, həm də ucsuz-bucaqsız səhranın şəkillərini çəkmək üçün siz mütəq və mütləq bu aktivitəni sınamalısınız. Gün doğumu və gün batımı zamanı çəkilən şəkillər isə İnstaqramdakı izləyicilərinizi heyran olmağa vadar edəcəkdir.

Safaridə olarkən “dune bashing” gəzintisindən, dəvə sürməkdən, yerli rəqs şoularından, milli yeməklərdən feyzyab olun və bu zaman milli geyimləri geyinərək kamera qarşısına keçməyi də ehmal etməyin.

8. Al Seef Heritage Souq

Al Seef binaların estetikasına və arxitekturasına orijinal toxunuşlarla tarixi bir bölgə olaraq dizayn edilmişdir. Bu yer Dubaya səyahət edənlər üçün zəngin bir alış-veriş məkanıdır.

Dubayın ən qədim yerlərindən biri olan Al Seef eyni zamanda sizin İnstaqramınızı füsunkar şəkillərlə doldurmanız üçün də gözəl yerlərdən biridir və əgər şansınıza güvənirsinizsə, siz burada tez-tez rast gəlinən küçə performanslarını da görə və kameraya ala bilərsiniz.

9. La Mer

Trendə uyğun, təvazökar, müasir, yuxu kimi gözəl, sehrli La Mer İnstaqram sevərlərin axtarışında olduqları qüsursuz fotoları çəkə biləcəkləri yerlərdən biridir.

Sərin çimərlik, iddialı divar rəsimləri, küləklə birgə yellənən palma ağacları, sizi nağıllar aləmində hiss etdirəcək işıqlar – bunların hamısı sahil kənarında yerləşən La Mer açıq-hava ticarət mərkəzinin bir hissəsidir. Qeyd etdiklərim və həmçinin buranın dadlı yeməkləri sizə əsl ABŞ, Lon-Anceles abu-havasını hiss etdirəcək və əlbəttə bu xoş hislər çəkdirdiyiniz şəkillərə də yansıyacaq. 

10. City Walk

City Walk yeni bir həyat məfhumunun və həyat tərzi təcrübəsinin fantastik bir konsepsiyasıdır. Bu instaqramlıq yerdə siz geniş terraslı restoranlar, lüks mağazalar, ağıllara sığmayan divar rəsimləri, başgicəlləndirici gecə işıqlandırmaları və daha nələr-nələr görəcəksiniz. Bu yerlərdən keçib gedərkən şəkil çəkməyi və eyni zamanda İnstaqramda paylaşmanız üçün bir neçə özçəkim etməyi də unutmayın.

11. Riverland Dubay

Riverland Dubai Parks and Resorts-un ortasında yerləşən böyük və açıq bir məkandır. Parkın qalan hissələrindən fərqli olaraq Riverland Dubaya giriş pulsuzdur və hər gün ziyarətçilərə açıqdır.

Məkan 4 hissədən ibarətdir və bu hissələrdən biri olan “French Village”, Riverlandda İnstaqram şəkilləri çəkmək üçün ən uyğun bölgədir. Siz burada çay kənarında rahatladıcı bir gəzintiyə çıxa və arxa fondakı memarlıqdan ilhamlanaraq valehedici instaqramlıq şəkillər çəkə bilərsiniz.

12. Global Village

Əgər siz Dubay səyahətinizi daha da maraqlı etmək istəyirsinizsə, səyahətinizi alış-veriş festivalının, başqa sözlə desək, Global Village-in açıq olduğu oktyabr-aprel aylarına planlayın. 70-dən çox ölkənin memarlıq, geyim, yemək və mədəniyyətinin təmsil edildiyi Global Village, dünya mədəniyyətinin İnstaqramınızdakı təsviri olacaqdır.

Mən bu yazıda sizə İnstaqramınıza qürürla qoya biləcəyiniz şəkilləri çəkdirmək üçün gedə biləcəyiniz Dubayın ən gözəl 12 yerini tanıtdım. Əlbəttə bu siyahını uzada bilərəm, ancaq bunun əvəzinə sizə bir ipucu verəcəm:

Gözlərinizi geniş açın, çünki Dubayda baxmaq üçün çox şey var!