Havanada ən fövqəladə 5 otel

Hal hazırda Havanada əlimdə meyvə kokteyli ilə, gözoxşayan Karib mənzərələrini izləmək istərdim… COVID-19 ilə bir az çətin görünür, ancaq bu karantin rejimi həm də gələcək səfərlərimizi planlaşdırmaq üçün vaxt keçirməyimizə imkan yaradır. Bu gün isə, daha öncədə adını qeyd etdiyim Havana şəhərinə səyahətdən və yerləşmədən danışacağıq. Ancaq gəlin əvvəlcə Havana haqqında məlumat əldə edək. Şəhər sözün həqiqi mənasında hər şeyin bir arada olduğu yerdir desək, səhv etmərik. Havana, Kubanın paytaxtı, ən böyük şəhəri, əsas diqqət mərkəzi və bunlarla yanaşı, ölkənin əsas liman şəhəridir. Ümumi sahəsi 781.58 km2, əhalisinin sayı isə 2.1 milyon olan şəhər, Karib regionundakı ən böyük şəhər, ən sıx məskunlaşmış şəhər və dördüncü böyük metropoliten ərazisidir. Şəhər hər il 1 milyondan çox ziyarətçini özünə cəlb edir. Rəsmilər, 2010-cu ildə şəhəri 1.176.627 xarici turistin ziyarət etdiyini təxmin edir. Bəs Havanaya ən yaxşı səyahət vaxtı hansıdır? Yanvar-fevral arası Kubaya səyahət etmək üçün ən yaxşı vaxtdır. Adanın Karibdəki mövqeyi səbəbindən hava il boyu mülayim temperaturlu olur. Eyni səbəbdən, Havanada yalnız iki mövsüm yaşanır: yağışlı və quru. Kubada quraq mövsüm “qış” a qədər uzanır, yağışlı mövsüm isə qasırğa mövsümü ilə üst-üstə düşür və yağıntı ehtimalı daha da yüksəlir. Havananı ən canlı dövründə görmək istəyirsinizsə, avqust ayındakı karnaval zamanında ziyarət edin.

Havana haqqında əsas məlumatları aldığımıza görə, yerləşmə barədə danışmaq üçün mükəmməl bir zamandır. Özü də hostellər və ya motellər haqqında deyil, Havanadakı ən müstəsna 5 otel haqqında. Havanadakı ən yaxşı otellərdən bəhs edərkən onların qiymətləri barəsində sualları da cavablandırmağa çalışacağıq. Getdik!

1. Saratoga Boutique

Siyahımız həm Hollivud ulduzları, həm də dünya səviyyəsində məşhur siyasətçilər arasında kifayət qədər tanınan bir otellə başlayır. Havananın tarixi mərkəzində yerləşən Hotel Saratoga, Kubanın paytaxtında qaldığınız müddətdə inkar edilə bilməyəcək dərəcədə yaxşı təklifdir. Oteldə 96 suit, iki pab, iki restoran, möhtəşəm bir salon, yüksək səviyyəli şəraiti olan fitness mərkəzi və şəhərin panoramik mənzərəsini təklif edən başgicəlləndirici bir dam hovuzu var. Otel öz orijinal ruhunu qoruyacaq şəkildə təmir edilmişdir və neoklassik üslublu fransız pəncərələr, qızıl panjurlar, dəmirdən balkonlar bünün sübutudur.

Bu oteli özəl edən şey isə, eklektik və sofistik bir tərzdə döşənmiş, komfortlu və yeni texnoloji inkişaflarla dolu 96 otaqdır. Şəhərin panoramik mənzərəsini təmin edən 7 lüks suit və müştərilərinin istirahəti üçün hər cür şəraiti olan müntəzəm otaqlar, dinc və zərif bir yerə dəvət kimi qəbul edilə bilər.

Saratoga Boutique həm də restoranları ilə məşhurdur! Divarlarında Moorish eskizləri olan mozaikaları, soft işıqlandırılması, taxtadan eleqant stulları ilə eklektik və heyranedici Anacaona restoranında aşpazın hazırladığı dadlı Kuba və xarici mətbəxi qiymətləndirin. Havanada normal otellərin qiyməti elə də yüksək deyil, ancaq lüks otellərdən bəhs edərkən qiymətin həqiqətən yüksək olduğunu demək lazımdır. Sadə bir Google axtarışından, Havananın ən yaxşı otellərindən birində bir gecəlik qalma qiymətinin təxminən 200 ABŞ dolları olduğu qənaətinə gələ bilərik.

2. Iberostar Parque Central

Bu otel Havananın ən yaxşı otellərindən biridir və icazə verin sizə bunun səbəbini izah edim. Otel, hər bir müştəri üçün hər şeyi o qədər rahat hala gətirəcək ki, nəqliyyatla maraqlanmağa belə ehtiyacınız olmayacaq. Iberostar Parque Central-dakı iki otel binasından birində qalaraq Havananın tarixi mərkəzini piyada ziyarət etmək şansı əldə edəcəksiniz.

Otelin daxili memarlığının hər bir şəklindən də göründüyü kimi, yuxarı iki mərtəbədə hovuzlar və günəş terrası var. Günəşli havada bu oteldə olmanın yeri lap ayrıdır. Iberostar Parque Central, konfrans və görüş otaqlarını lazım olan bütün avadanlıqlarla təmin edə biləcək imkanlardan əlavə bölgədəki qastronomiya üçün bir etalondur. Artıq təxmin etdiyiniz kimi, otel Havandakı ucuz otellərdən biri deyil və gecələmə qiyməti 190 ABŞ dolları civarında olacaq.

3. Be Live Havana City Copacabana

178 otaqlı Be Live Havana City Copacabana keçmiş caz klubu olaraq, çox əyləncəli Braziliya üslubuna sahibdir. Bununla birlikdə, qeyd etmək lazımdır ki, otel, açıq bufet mətbəxi, çimərliyi və barı ilə orta səviyyəli sahil otelidir. Lakin otelin “təbii hovuzu”, qonaqlara sakit, təhlükəsiz bir üzmə yeri təklif edir ki, bu, sizin və ailənizin sevəcəyi şeydir. Eyni zamanda, Be Live Havana City Copacabana köhnə Havana və digər turistik yerlərə yaxın yerləşir. Bir sözlə, otelin Havananın ən yaxşı ucuz otellərindən biri olduğunu deyə bilərik, əlbəttə ki, digər variantlarla müqayisədə “ucuz”.

4. Grand Hotel Manzana Kempinski La Habana

Havanada ən yaxşı otellərin axtarışındasınız? Bu otel sizi məyus etməyəcək! Köhnə Havananın qəlbində mükəmməl bir yerləşmə mövqeyinə sahib olan, Havanın YUNESKO-nun Ümumdünya mədəni irsi siyahısına düşmüş binaları ilə əhatəli Grand Hotel Manzana Kempinski sizə Kubanın ilk lüks otelində dincəlmək şansı verir. Bu oteli müstəsna edən şey, binanın tarixi və mükəmməl yerləşimidir. Bina 1894-1917-ci illərdə Jose Gomez-Mena Vila tərəfindən Kubadakı ilk Avropa üslublu alış-veriş pasajı olaraq dizayn edilmişdir. Diqqətinizə layiq olan başqa bir fakt isə, otelin birinci mərtəbəsində Versace, Giorgio Armani və Lacoste də daxil olmaqla supermarket françayzlarını barındıran bir ticarət mərkəzinin olmasıdır. Havanaya səyahətiniz zamanı bu oteldə qalmağı planlaşdırırsınızsa, bir gecə üçün ən azı 200 ABŞ dolları ödəməyə hazır olun.

5. Hotel Nacional de Cuba

Hotel Nacional, “New York National City Bank” tərəfindən maliyyələşdirilən “McKim, Mead and White” memarlıq şirkəti tərəfindən dizayn edilmiş və “Purdy and Henderson U.S.” mühəndislik şirkəti tərəfindən 14 ayda inşa edilmişdir. Otel Havananın mərkəzindəki Vedadonun ortasında imtiyazlı mövqeyi ilə dənizdən cəmi bir neçə metr məsafədəki təpədə yerləşir və Havana limanın, eləcə də, şəhərin fantastik bir mənzərəsini təqdim edir. Zərif gözəlliyi və qədim əzəməti sayəsində bu yer 1930-cu ildən bəri sənət, elm və siyasət dünyasından çox sayda məşhuru özünə cəlb edib. Hotel Nacional de Cuba ilk növbədə, inqilabdan sonra turizmə gələn ziyan səbəbindən illərlə laqeydlik görmüş daha sonralar isə, Kubaya gələn diplomatları və beynəlxalq hökumət rəsmilərini qəbul etmək üçün istifadə edilmişdir. 1991-ci ildə SSRİ-nin dağılması valyuta ehtiyatları barəsində narahat olan Kuba Kommunist Partiyasını, Kubanı yenidən turistlərə açmağa məcbur etdi. Kubanın tarixinin bir parçası olan oteldə bir gecə qalmanın qiyməti adambaşına 110 ABŞ dollardır.