Təbii gözəlliklərlə dolu bir ölkə olan Nikaraqua, Mərkəzi Amerikada görülməsi gərəkən yerlərdən biridir. Turistlər Mərkəzi Amerikaya əsasən Kosta Rika və digər ölkələr üçün səyahət edirlər edirlər. Bu halda isə Nikaraquanın yetəri qədər diqqət görmədiyini deyə bilərik, çünki bu kiçik dövlət demək olar ki, hər şeyi ilə sizi heyran edəcəkdir. Əvvəlcə Nikaraquanın harada yerləşdiyini öyrənək. Nikaraqua və ya rəsmi olaraq Nikaraqua Respublikası Sakit okean ilə Karib dənizi arasında yerləşən, şimalda Honduras, cənubda isə Kosta Rika ilə həmsərhəd olan Mərkəzi Amerika ölkəsidir. Nikaraquanın paytaxtı haradır? Manaqua Nikaraquanın ən böyük şəhəri və paytaxtıdır. Nikaraqua Qərb yarımkürəsindəki az gəlirli ölkələrdən biridir və pul vahidi Nikaraqua kordobasıdır.
Niyə Nikaraquaya səyahət etmək lazımdır? Çünki burada Nikaraqua gölü kimi ziyarət edilməsi gərəkən yerlər və az büdcə ilə edilə biləcək fəaliyyətlər var. Nikaraquaya nə vaxt getmək lazımdır? Nikaraquaya səyahət üçün ən yaxşı vaxt quraq mövsümdür. Bu mövsüm əsasən yağıntının daha az düşdüyü dekabr-may ayları arasını əhatə edir. Nikaraquada ziyarət olunması gərəkən yerlər hansılardır? Bu kiçik ecazkar ölkənin bir çox ekzotik və mədəni yerləri var ki, onlar barəsində aşağıda daha ətraflı məlumat verəcək, eyni zamanda "Nikaraquada nə etməli?" sualına da cavab axtaracayıq.
Nikaraquaya səyahət etmək üçün ən əsas səbəblərdən biri, dünyanın ən böyük göllərindən biri olmaqla yanaşı, Mərkəzi Amerikanın ən böyük şirinsulu gölü olan Nikaraqua gölünü görməkdir. Sahəsi 8264 kvadrat kilometr olan Nikaraqua gölü tektonik fəaliyyət nəticəsində yaranmışdır. Yerli sakinlər bu göldə üzməyi məsləhət görmürlər, amma üzmək fikrində qətiyyətli olsanız, gölün sahilində bir neçə çimərlik tapa bilərsiniz. Ətrafdakı mənzərə çox gözəl və tam İnstaqramlıqdır.
Nikaraquada bir çox dalğıclıq və şnorkel məkanları var. Korn adasının yaxınlığında Karib dənizinin büllur kimi təmiz sularına dalış edə və ya San Juan del Sur bölgəsindəki Sakit okean sularından zövq ala bilərsiniz. Ən maraqlısı isə, Apoyo vulkanının krater gölünə dalmaqdır. Karib dənizinin sularında müxtəlif dəniz canlılarını, məsələn, Nurse köpəkbalığını, Queensland groper-i, müxtəlif balıq və dəniz tısbağası növlərini görə bilərsiniz.
Sörfinqi sevir və bunun üçün "Nikaraquaya nə vaxt getməli?" sualı ilə maraqlanırsınızsa, qışda səyahət etməniz tövsiyə olunur. Bu zaman dilimi, ən az yağıntının düşdüyü quraq mövsümdür. Yay aylarında Nikaraquaya çoxlu yağış yağır və bu sörfçülər üçün problem yarada bilir. Ölkənin cənub-qərbində San Juan del Sur çimərliyi yerləşir, hansı ki, mükəmməl dalğaların axtarışında olanlar üçün əla yerdir. Playa Maderas, unudulmaz sörfinq təcrübəsi təklif edən bir başqa çimərlikdir.
Nikaraquada haralara getməli? İmmaculada Conception qalasını ziyarət etmək mütləqdir! İspanlar bu möhtəşəm qalanı 1670-ci illərdə inşa ediblər. Təpənin üzərində yerləşən və ətrafı müşahidə etmə imkanı verən bu əfsanəvi qala insanları Karib dənizinin quldurlarının hücumlarından qoruyur. Bu gün qala içərisində ərazinin tarixi ilə əlaqəli eksponatların nümayiş etdirildiyi muzey də var. Qalaya San Carlos-dan qayıqla asanlıqla getmək olar.
Nikaraquaya səyahət etmək sizə ləzzətli və orijinal yerli yeməklərdən dadmaq imkanı da verəcəkdir. Nikaraquada mütləq dadmanız gərəkən əsas milli yemək gallo pintodur (düyü, qırmızı lobya və soğan). Digər diqqətəlayiq yerli yeməklərə misal olaraq, nakatamal, quesillo, rondon və s. qeyd edə bilərik. Əgər ənənəvi Nikaraqua səhər yeməyini yemək arzusundasınızsa, desayuno nica-nı sınayın.
Əgər hələ də "niyə Nikaraquaya səyahət edim?" deyə düşünürsünüzsə, qeyd etməliyəm ki, Nikaraquanın cəngəllikləri dünyadakı biomüxtəlifliyin təxminən 7%-nə ev sahibliyi edir. İndi bir də bu cəngəlliklərdə uçmağı təsəvvür edin. Bu, ölkədəki kanopi turları sayəsində mümkündür. Nikaraqualılar bu sərgüzəşti yalnız cəngəlliklərdə deyil, laqunlar, göllər və çaylar üzərində də təklif edirlər. Kanopi turları zamanı maksimum təhlükəsizliyi təmin etmək üçün peşəkar rəhbərlər və çox sərt qaydalar var.
Nikaraquanın paytaxtından təxminən beş saatlıq məsafədə yerləşən Los Guatuzos Təbiət Qoruğu, 437 kvadrat kilometr ərazini əhatə edir. Bu qoruqda sizin kəşfinizi gözləyən onlarla bataqlıq, gölməçə və çay var. Qoruq quşları, timsahları, ərincəkləri və digər vəhşi heyvanları müşahidə etmək üçün ideal bir yerdir.
Nikaraquada hara getmək olar? Bəlkə aktiv vulkana? Cerro Negro sandboardinq fəaliyyəti ilə tanınan aktiv vulkandır. Üzərində bir dənə belə ağac olmayan Cerro Negro 400 metr hündürlüyündədir. Vulkanın səthi hamar və dikdir ki, bu da onu sandboardinq üçün çox əlverişli edir. Sandboardinq snouborda bənzəyir, ancaq burada qardan bəhs etmək mümkün deyil.
Indio Maiz qoruğu, ölkənin cənubunda yerləşir və ümumi sahəsi 3000 kvadrat kilometrdən çoxdur. Qoruq yaquar və ya puma kimi cəngəlliklərdə yaşayan yüzlərlə heyvan növü üçün uyğun şərait təmin edən tropik cəngəllikləri də əhatə edir. Bu gözəl yerin yerli sakinləri tərəfindən təklif olunan peşəkar turlara qatıla və ərazini kəşf edə bilərsiniz.
Hikinq planınızı nə poza bilər? Əlbəttə ki, yağış! Buna görə də, hikinq məqsədilə Nikaraquaya səyahət üçün ən yaxşı vaxt çox az yağışın yağdığı dekabrdan may ayına qədərki zamandır. Hikinq Nikaraquanın hər yerini görmək üçün əla üsuldur. Mombacho Vulkanı Təbiət Qoruğu müxtəlif hikinq marşrutları təklif edir. Həmçinin burada bölgəni əllərinin içi kimi bilən yerli bələdçilər də var.
Daha əvvəl də qeyd etdiyimiz kimi, Nikaraqua, Mərkəzi Amerikada dəyəri bilinməyən ölkədir. Ancaq sırf bu səbəbdən daha az turistin olması sayəsində ölkədə rahat şəkildə hərəkət edə biləcəksiniz. Hətta Nikaraquaya səyahət etmək üçün ən yaxşı vaxtda belə burada izdiham və çoxlu turist müşahidə edilmir. Ölkə getdikcə məşhurlaşır, odur ki, Nikaraquaya səyahət etmək üçün tələsin.
İtkin düşmüş şəhər Greytown, maraqlı tarixi ilə görməli olduğunuz bir yerdir. San Juan del Norte adlanan bu şəhərdə vaxtı ilə nikaraqualılar və ispanlar məskunlaşmışdı. Ancaq britaniyalılar 1841-ci ildə buranı işğal edərək şəhərə Greytown adını verdilər. Bu ad həmin dövrdə Yamayka valisi olan Charles Gray-ə ithaf edilmişdi. İtmiş şəhəri ziyarət edərkən, Panamadan əvvəlki uğursuzluqla nəticələnən okeanlararası kanal qurma cəhdinin qalıqlarını da görə bilərsiniz.
Ölkənin tropik cəngəlliklərində müxtəlif növ heyvanlar, quşlar, böcəklər, eləcə də ağaclar və bitkilər yaşayır. Nikaraquanı ziyarət etmək və bütün bu təbii gözəlliklərin şahidi olmaq möhtəşəm bir təcrübədir. Nikaraquanın kasıb bir ölkə olması, bura səyahət etmək üçün başqa bir səbəbdir, çünki biz ölkəyə pul qazandırıb onlara vəhşi təbiəti qorumaqda kömək edə bilərik.
Nikaraqua xalqı inanılmaz dərəcədə mehribandır. Ölkədəki uşaqları sizinlə oynamaq və rəqs etmək üçün can atırlar. Yetkin insanlar isə turistləri gülərüzlə qarşılayır, onlarla mehriban davranır və hər zaman kömək edirlər.
Nikaraqua, daha çox tursit axınının olduğu qonşu ölkələrlə müqayisədə daha sərfəlidir. Bir ABŞ dolları 34,50 Nikaraqua kordobasına bərabərdir. Hətta bəzən təxminən 5 dollara yatacaq yer tapa bilərsiniz. Bir şüşə pivə təxminən 1,50 dollardır. Lüks restoranların birində dadlı yerli yeməklərdən dadmaq sizə haradasa 15 dollara başa gələcək.
Nikaraquada 23 vulkan var ki, bunlardan 19-u aktiv vulkanlardır. Bu sizə bəs deyil? Bu vulkanların ətrafında hikinq, sandboardinq və dağ velosipedçiliyi kimi müxtəlif fəaliyyətlər ilə məşğul olmaq olar. Təsəvvür edin ki, dağın başında tətilinizdən zövq alarkən bir anda vulkan püskürür. Nikaraqua əsl adrenalin həvəskarları üçündür.
Nikaraqua ziyarət etmək üçün etibarlı sayılan yerdir. Ancaq heç vaxt tək olmamağa və ən yaxşı halda yerli bələdçi ilə birlikdə olmağa çalışın. Hesabatlar ölkədə cinayət nisbətinin 2018-ci ildən bəri artdığını göstərir. Soyğunlar, zorakı hücumlar və bəzi xırda cinayətlər əsasən böyük şəhərlərin xaricində baş verir. Qadınların Nikaraquaya səyahət etməsi təhlükəsizdirmi? Tək olmadıqları təqdirdə, bəli. Tək qadın səyahətçilər şifahi təcavüzə və hətta qaçırılmaya məruz qala bilər.