Elə indi Peruya səyahət etməyiniz üçün 14 səbəb

Peru gözəlliyi baxımından Cənubi Amerikanın incisidir. Ölkə bənzərsiz və valehedici mədəni və təbii turistik yerlərə ev sahibliyi edir. Əminəm ki, hər bir səyahətçinin arzularından biri bir gün Peruya səyahət etməkdir. Peru haradadır? Peru Cənubi Amerika materikinin şimal-qərb hissəsindədir. Ölkə şimaldan Kolumbiya və Ekvador, şərqdən Braziliya, cənub-şərqdən Boliviya və cənubdan Çili ilə həmsərhəddir.

Perunun paytaxtı və ən böyük şəhəri Limadır. Bu şəhər təxminən doqquz milyon peruluya ev sahibliyi edir. Ümumilikdə isə Perunun əhalisi 32 milyondan çoxdur. Peru hökuməti ilk dəfə 1824-cü ildə Peru bayrağını qəbul etdi və daha sonra 1950-ci ildə bayrağa dəyişikliklər edildi. Ölkənin konstitusiyasına görə Peru bayrağı 3 şaquli zolaqdan ibarətdir: kənarda iki qırmızı zolaq və ortada bir ağ zolaq. Bayrağın unikal xüsusiyyəti mərkəzindəki vikunyadır. Peru GMT-5 saat qurşağındadır.

Bu bloqda Peru ilə bağlı bir çox suallarınıza cavab tapacaq və bu gözəl ölkəni ziyarət etmək üçün 14 səbəblə tanış olacaqsınız. Başlayaq!

1. Sirli Maçu Piçu

Bu tarixi, müqəddəs və mifik antik şəhər Perunun əsas incisidir. Maçu Piçu təxminən 100 il əvvəl kəşf edilmiş olsa da, tarixçilər hələ də onun sirrini ortaya çıxarmağa çalışırlar. Bəziləri hətta şəhərin yadplanetlilərin köməyi ilə inşa edildiyini düşünürlər. Tikintisidə hər hansı bir əhəng məhsulu və ya digər metal əşyalardan istifadə edilmədən hazırlanan şəhər barəsində alimləri ən çox düşündürən sual, niyə belə ideal bir şəkildə tikilib sonradan tərk edilməsidir.

2. Titikaka gölü

Dünyanın ən hündürdə yerləşən gölü - Titikaka Peruya səyahət etmək üçün əsas səbəblərdəndir. Perunun paytaxtından avtobusla təxminən 20 saatlıq məsafədə olan və Peru ilə Boliviya arasında yerləşən Titikaka gölü bir vaxtlar inklərin vətəni idi. Göl və ətrafı kəşfə çıxmaq və instaqramlıq şəkillər çəkmək üçün heyranedici bir yerdir.

3. Müqəddəs Vadi

Müqəddəs Vadi Perudakı bir başqa tarixi yerdir. İnsanlar müstəmləkəçilik dövründən bəri burada məskunlaşdılar. Onlar kənd təsərrüfatı məhsulları becərir və ənənəvi şəhər binaları tikirdilər. İnklər bu vadidə Chinchero və Pisac kimi qədim məskənlər inşa etmişlər. Vadi ənənəvi şəhər və mənzərəli dağların görüntüsünün ideal harmoniyasıdır. Müqəddəs Vadidən qalereyanızda əbədiyyən yaşayacaq şəkillərlə dönmək üçün yanınızda kameranın olduğundan əmin olun.

4. Amazon meşələri

Peru Amazonunu araşdırmaq Peruda ediləcək ən həyəcanverici şeylərdən biridir. Ölkənin 50%-dən çoxunu əhatə edən Amazon meşələri bioloji müxtəliflik çempionudur. Peru dünyanın dördüncü ən böyük tropik meşəsinə ev sahibliyi etməsi ilə tanınır. Mötəbər bələdçilərin rəhbərliyi ilə quşları və digər heyvanları seyr etmək, pirana balığını tutmaq və yemək üçün yağış meşələrinə düzənlənən qrup turlarında iştirak edə bilərsiniz.

5. Əla çimərliklər

Daha əvvəl də qeyd etdiyim kimi, Peru hər bir səyahətçi üçün xəyallar ölkəsidir. Sıra dağlardan isti çimərliklərə qədər, Peruda hər şeyi tapa bilərsiniz! Las Pocitas isə Perunun ən mənzərəli çimərliklərindən biridir. Çoxlu palma ağacları ilə əhatə olunmuş qızıl qumlu bir çimərlik düşünün. Hətta eyni adlı 3 ulduzlu otel də var. Digər məşhur çimərliklərə Mancora, Punta Sal, Playa de la Mina və s. daxildir.

6. Çan-Çan

Peruda xüsusi diqqət tələb edən başqa bir yer də Çan-Çan arxeoloji sahəsidir. YUNESKO-nun Ümumdünya irsi siyahısına daxil olmuş bu yerin tarixi əhəmiyyəti yüksək qiymətləndirir. Antik Çan-Çan şəhəri XV əsrdə ən yaxşı dövrünü yaşayan Çimorun paytaxtı idi. Daha sonra o da inklərə aid oldu. Çan-Çan Amerikada Kolumb öncəsi eraya aid ən böyük şəhərdir.

7. Misilsiz Naska xətləri

Naska dağ yamacında yalnızca çox yüksək məsafədən müşahidə oluna bilən nəhəng həndəsi və fiqurlu geoqliflər bir çox nəzəriyyələrin irəli sürülməsinə səbəbiyyət verib. Elm adamları və tarixçilər bu qeyri-adi xətlərin necə meydana gəldiyinə cavab tapmaq üçün hələ də mübarizə aparırlar. Perunun və dünyanın sirli yerlərindən biri olan Naska xətlərinə çatmaq üçün paytaxt Limadan təxminən yeddi saatlıq səfərə çıxmalısınız.

8. Fantastik bir hikinq təcrübəsi

Perunun təbii gözəllikləri sonsuzdur. Bəzən bir nəfər Perunu tamamilə gəzmək və araşdırmaq üçün düz bir illik tətilə çıxmaq istəyir. Ölkənin Çaçapoyas şəhərini gəzməyə dəyər. 700 metr yüksəklikdə Gocta şəlaləsinin fantastik mənzərəsi sizi gözləyir. Həyatınız boyu xatırlayacağınız hikinq təcrübəsi üçün Inca Trail, Santa Cruz Trek və Rainbow Mountain Loop Trail kimi hikinq parkurlarını sınaya bilərsiniz.

9. Kolka kanyonu

Qeyd edilən kanyon İnklərdən əvvəl yaranmışdır və yəqin ki, Perunun ən mənzərəli yeridir. Bu And koridoru dünyanın ən dərin kanyonlarından biridir. Yaşıl dağlar onu əhatə edir. Kolka kanyonu istirahət etmək, instaqramlıq şəkillər çəkmək, ekstremal idman fəaliyyətləri və trekkinq üçün mükəmməl bir yerdir.

10. Alış-veriş şansını qaçırmayın!

Perunun paytaxtı əl işləri və ənənəvi məhsullar satılan bazarlar ilə doludur. Hədiyyələr və yerli əşyalar almadan Perudan getmək düzgün olmazdı. Şapaqoliklər üçün ölkədə onlarla seçim var. Larcomar alış-veriş mərkəzi, Mercados Inca, Dedalo Market, Centro Artesanal və bir çox digər məkanlarda geniş çeşiddə yerli və xarici məhsullar təqdim olunur.

11. Tarixi yerlərlə dolu bir ölkə

Peru çox qədim bir tarixə və mədəniyyətə sahibdir və bunların hamısını bir həftəlik tətildə kəşf etmək demək olar ki, mümkün deyil. Bütün bu tarixi əlamətdar yerlərin ən başında təbii ki, Maçu Piçu gəlir. Sacsayhuaman İnk İmperiyasının tarixi paytaxtı idi və günümüzdə də hər il milyonlarla turisti özünə cəlb edir. Digər möhtəşəm tarixi yerlər arasında Kusko kafedralını, Tipon arxeoloji sahəsini, Kuelapı və s. qeyd edə bilərik.

12. Əyləncəli dayvinq təcrübəsi

Peruda ediləcək əsas şeylərdən biri də skuba dayvinqdir. Peruda Sakit okeanda dalğıclıq turları təklif edən bir çox turizm şirkətinə rast gələcəksiniz. Ölkədə şnorkellinq və dalğıclıq fəaliyyətlərindən zövq ala biləcəyiniz Ancash, Quilca və Callao kimi bir çox yer var.

13. Mehriban yerli xalq

Əgər Peru xalqı bu qədər mehriban və qonaqpərvər olmasaydı, bəlkə də ölkənin təbii gözəllikləri, tarixi və əsrarəngiz yerləri bu qədər çox qonaq qəbul etməzdi. Perunun əsas incisi xalqıdır. Ölkənin hansı regionuna getdiyinizdən asılı olmayaraq, son dərəcə qonaqpərvər insanlarla qarşılaşacaq və özünüzü evinizdəymiş kimi hiss edəcəksiniz.

14. Ləzzətli yeməklər

Peru öz milli mətbəxinə təsir göstərən bir çox sivilizasiyanın mərkəzi olmuşdur. Peru yeməklərinin bəziləri yengəc sevərlər üçün əla seçimdir. Sınamaq üçün onlarla kartof növü də mövcuddur. Məşhur yerli yeməklərdən Ceviche, Lomo Saltado və Anticuchos de Corazonun adlarını çəkə bilərik.

Peruya necə səyahət etmək olar?

Peru Cənubi Amerikada yerləşir. Qonşu ölkələrin vətəndaşları üçün Peruya avtomobil və ya avtobus vasitəsilə quru sərhədi ilə getmək rahatdır. Digər qitələrdə yerləşən ölkələrin vətəndaşları isə Peruya təyyarə ilə getməli olurlar. Peruya eniş etmək üçün ən yaxşı yer Limadakı Jorge Chavez Beynəlxalq Hava Limanıdır.

Peruya səyahət etmək üçün ən yaxşı vaxt nədir?

Peruya səyahət üçün ən yaxşı vaxt qış aylarıdır. Ekvatorun digər tərəfində yerləşdiyindən, Perunun qış mövsümü may ayından sentyabr ayına qədərdir və bu zaman dilimi ölkənin quraq fəsli olduğundan turistlərin ölkəni araşdırmasını asanlaşdırır. Qışdan fərqli olaraq ölkənin yayı şiddətli yağışlarla müşahidə olunur. Dekabrdan mart ayınadək havalar daha isti, lakin rütubətli olur.

Peruya səyahət etmək təhlükəsizdirmi?

Ümumiyyətlə, bəli, ölkə turistlər üçün təhlükəsizdir. Ancaq baş verə biləcək xoşagəlməz hadisələrə qarşı diqqətli olmalısınız. Kolumbiya ilə sərhəd bölgəsində, narkotik ticarəti ilə məşğul olan silahlı dəstələr ola bilər. Canlı dəlilləri aradan qaldırmaqdan çəkinməyəcəkləri üçün onlardan nə qədər uzaq olsanız, o qədər yaxşıdır. Təəssüf ki, ölkədə cinayət nisbəti də yüksəkdir. Səyahət mütəxəssisləri təhlükəsizlik tədbirləri üçün qrup halında səyahət etməyinizi məsləhət görürlər. Cibgirlik kimi xırda cinayətlər yayğın olduğu üçün sıxlıq yerlərdə xüsusilə diqqətli olun.