EYFORİYA, ADRENALİN VƏ EKSTREMAL TURİZM

Heç nədən qorxmayan cəsurlarımız, ekstremal turizm sizin üçündür!

Muzeylərdən, tarixi abidələrdən bezmisiz? Elə isə, paraşütlə havada süzün, dərin dənizə atılın, yüksək qayaya çıxın və içinizi adrenalinlə doldurun. Ekstremal turizm səyahətin aktiv və riskli formasıdır. Müasir ekstremal turizm XX əsrdə formalaşıb. Hal-hazırda onun yüzdən çox müxtəlif növü mövcuddur. Daha çox məşhur olan növlərinə dayving, alpinizm, raftinq, bungee jumping və s. aiddir.

Ekstremal turizmin populyarlığı ildən-ilə artır, 20 il öncə ekstremalların sayı 10 min idisə, indi bu rəqəm 100 milyona qədər çatır. Bəs insanları ekstremal idmanla məşğul olmağa nə yönəldir? Maraq, özünü kəşf etmək, gücünü sınamaq, komplekslərinə, qorxularına qalib gəlmək və eləcə də kimsədən dala qalmamaq istəyi buna səbəb ola bilər. Bəzi insanlar bir dəfədən sonra ekstrim üçün yaramadıqlarını anlayır, bəziləri isə bunsuz yaşaya bilmir.

Niyə insanlar ekstremal idmanı sevirlər?

Daim ekstremal idman növlərinə can atmaq narkotik və içki asıllığı kimidir, alimlər bunu adrenalin asıllığı adlandırır. Bunu belə də izah etmək olar. Uzun stress və qorxudan sonra orqanizm eyforiya yaradan hormon ifraz edir. Bəli, stress bəzən sevinməyimizə səbəb olur. İnsanların özəl xüsusiyyətlərinə görə də bəzi insanlarda ekstrimdən, adrenalindən asıllıq yaranır.

Qeyd etmək istəyərdik ki, hər eyforiya yaşamaq istəyən, ekstremal turizmə can atmır. Axı, ekstremal turizmin də öz tələbləri var. Esktrimallar həm fiziki, həm də psixoliji hazırlıqlı olmaqla yanaşı, iradəli, güclü olmalı, risk etməyi bacarmalıdırlar. Bunun müqabilində onlar çox möhtəşəm hisləri yaşayanlardan olacaqlar.

Dünyada çoxlu səyahət ediləsi yerlər var, amma bəzilərinə görə insanlar həyatını riskə atır. Sizə ən məşhur adrenalinli yerləri təqdim edirik.

Viktoriya şəlaləsində şeytan hovuzu

Viktoriya şəlaləsi adi turistləri füsunkar mənzərələri ilə cəlb edirsə, ekstremalları şeytan hovuzu ilə "ovlayır". Şəlalədə su axının qarşısını alan kiçik qayalıqda ekstremallar üçün çimərlik yaranıb. Cəsurlarımızın nəzərinə: hovuzda yalnız sentyabrdan dekabra qədər çimə bilərsiz, qalan aylarda su axını güclü olduğu üçün üzmək mümkün deyil.

Moher qayalıqlarında velosiped səyahəti

Turistlərin çox hissəsi Moher qayalıqlarına özünü dünyanın sonunda hiss etmək və İrlandiyanın gözəlliklərinə tamaşa etmək üçün gəlir. Amma turistlərin içərisində şir ürəyi yemişlər də olur. Onlar bura adrenalin dalıyca və qayaların başını fəth etməyə gəliblər. Qayalıqların bəzi yerlərinin uçuntudan yarım metrdən az qalması ilə yanaşı, həmçinin İrlandiya havasının daimi dəyişkənliyi də qeyri-qanuni olan velosiped səyahətinin həyat üçün riskli olmasında böyük rol oynayır. Amma bütün bunlar sizi dayandırmaz!

Makao qülləsi

Teleqülləni adrenalinli yerlərə aid etməyimizə təəccüb etməyin. Bura bungee jumping - yüksək yerlərdən kanat ilə tullanmaq üçün ən möhtəşəm yerdir. Siz dünyanın ən böyük tullanma platformasından, 233 metr hündürlükdən aşağıya enən zaman şəhər “cəngəlliyinin” parlaq görüntüsünü unutmayacaqsız.

Dubay

Dəniz, qızmar günəş, memarlıq inciləri və s. turistləri Dubaya cəzb edən elə budur? Ekstremallar üçün maraqsız olar deyərdik, amma paraşütistlərimiz üçün Dubay əla seçimdir. Paraşütdən şəhərin bütün gözəlliklərini – hündür binaları, möhtəşəm yarımadanı və səhranı öz gözlərinizlə görəcəksiz. Yerə enəndən sonra isə, bütün bunları gəzib yenidən zövq alacaqsız. Bu fürsəti əldən verməyin!

Oymyakon - həyatın davam etdiyi ən soyuq məskunlaşma yeri

Belə görürük, sizi heçnə dayandırmır. Onda - 60 dərəcə soyuğa yollanaq. Turistlər bura bədənlərinin soyuğa dözümlüyünü yoxlamaq, qaynar suyun neçə saniyəyə donmasını öyrənmək, donmuş mənzərələrə baxmaq üçün gəlir. Həmçinin xizək yarışlarında iştirak edənlər də var, ekstrimi qarlı təpələrdə yaşamaq da bir ayrı hissdir.

Türkiyə yüksəklikləri

Alpinistlər üçün Türkiyə ideal seçimdir. Həm yeni başlayanların, həm də profesianalların öz dağı olacaq. Türkiyənin ən hündür dağları olan - Ərciyəs, Bəydağları və Ağrı dağı alpinistlərin sevdiyi yerlərdəndir.

Sonda demək istəyərik ki, hansı ölkəyə gedib-çıxdığımızdan asılı olmayaraq, hər yerdə unudulmaz ekstrimal anlar yaşaya bilərik.