Flixbus nədir? Müsbət və mənfi cəhətləri

Turistlər daima daha münasib səyahət alternativləri axtarışındadırlar. Uzun səfərlər zamanı bu alternativləri tapmaq həmişə asan olmaya bilir. Beynəlxalq turizm və nəqliyyat şirkətləri mövcud rəqabətdə birinci olmaq üçün daha uyğun paketlər təklif etməkdə və servislərini təkmilləşdirməkdədirlər. İndilərdə bu şirkətlərdən birisi olan FlixBus platforması reytinqlərdə həm səfərlərdə təklif olunan münasib qiymət, həm də təhlükəsizliyi ilə turistlərin rəğbətini qazana bilmişdir. FlixMobility, başlanğıcı FlixBus olaraq, davamlı avtobus səyahətini həm rahat, həm də əlverişli etmək düşüncəsinə sahib olan üç gənc sahibkar - Daniel Krauss, Jochen Engert və Andre Schwammlein tərəfindən qurulub. FlixMobility, 2013-cü ildən bəri FlixBus markası ilə Avropada milyonlarla insanın səyahət istiqamətini dəyişdirən gənc bir mobillik təminatçısıdır. Texnoloji başlanğıcın, e-ticarət platformasının və nəqliyyat şirkətinin unikal birləşməsi olan FlixBus, milyonlarla insana səyahət istiqamətlərinə çatmaqda kömək edərək Avropanın ən böyük şəhərlərarası avtobus şəbəkəsinə çevrildi. FlixBusın yüzlərlə istiqaməti mövcud idi, əsasən də, Qərbi Avropada.

FlixBusın bir alman şirkəti olduğunu nəzərə alsaq, marşrutların ən yüksək sıxlığı Almaniya və qonşu ölkələrdə cəmlənmişdir. Lakin şirkət günü-gündən istiqamətlərini genişləndirməyə davam etdi. Belə ki, 2015-ci ildə FlixBus uzunməsafəli istiqamət şəbəkəsini  Fransa, İtaliya, Danimarka, Niderland və Xorvatiya, həmçinin müntəzəm sərhəd-keçid xidmətlərini Norveç, İspaniya və Böyük Britaniyaya kimi genişləndirmişdir. 2018-ci ildə şirkət xidmətini dəmiryol sənayesinə kimi genişləndirərək FlixTrain istifadəyə verildi və eyni zamanda FlixBus öz istiqamətinə Amerika Birləşmiş Ştatlarını da əlavə etməklə əhatə dairəsini zənginləşdirdi. 2019-cu il iyun ayından etibarən isə, FlixBusın  Avropa və Birləşmiş Ştatlardakı istiqamət şəbəkəsi inkişaf etmiş və toplamda 29 ölkədə 2000-dən çox nöqtəyə çatmışdır.

Bəzən təcrübə üçün səyahət edirsən, bəzən isə yeni bir şeylər sınamaq üçün. Avropa daxili minimal büdcə ilə A-dan B-yə səyahət etmək istədiyinizdə isə FlixBus ən sərfəli seçim kimi göstərilə bilər.

Bütün digər platformalar kimi FlixBus layihəsində də təkmilləşdirilməli olan nüanslar mövcuddur. Gəlin Avropada ən münasib səyahət yollarından biri olan bu platformanın həm müsbət, həm də mənfi cəhətlərinə birlikdə göz ataq.

Avantajlarından bəhs etməzdən öncə onu qeyd etmək istəyirəm ki, FlixBusla səyahətin avantajları dezavantajları üstələyir. İndi isə keçək avantajlarına:

Qiymətlərin münasibliyi

FlixBusın ən böyük üstünlüyü qiymətinin münasibliyidir. Ən sərfəli bileti əldə etmək üçün gərək onu minimum bir ay öncə alasınız. Çünki bütün biletlərin qiyməti eyni olmur, yəni səfərin vaxtına az qaldıqda bilet qiyməti də artır. Daha əvvəl də qeyd etdiyim kimi, FlixMobility-nin FlixBus və FlixTrain startapları mövcuddur və bunlardan hansının daha sərfəli olduğunu nəzərə almalı olsaq, əlbəttə ki, Flixbus. Çünki bildiyimiz ki, adətən avtobus biletlərinin qiyməti qatar biletlərindən daha ucuz olur. FlixBusın qiyməti €5-dan başlayır. 

İnterFlix keçidi

Əgər siz bir yox, bir neçə Avropa ölkəsinə eyni anda səyahət etmək istəyirsinizsə, İnterFlix paketi tam sizlikdir. İnterFlix bileti sizə €99 tam beş Avropa ölkəsinə birbaşa istiqamət üzrə səfər etmə imkanı verir. Ancaq bileti gediş-dönüş olaraq seçə bilməzsiniz, bir istiqamət üzrə olmalıdır. İnterFlix-lə 3 ay ərzində 5 ölkəyə səfər edə bilərsiniz. Ancaq gərək öncədən səyahət istiqamətlərini düzgün planlaşdırasınız.

Gecə reyslərinin mövcudluğu

Büdcənin məhdud olduğu vacib səfərlərdə avtobus ideal seçimdir. Bu yolla həm pula qənaət edə, həm də səfərini təxirə salmamış olarsınız. Digər bir tərəfdən isə, şəhərlərarası gecə reysləri nadir olur, xüsusilə də büdcəyə uyğun. 

24/7 biletlərin mövcudluğu

Bəzən gecikdiyimizdə biletimiz yanır, və yaxud da son anda səyahət istiqamətimizi dəyişirik və belə olan halda əgər vaxta az qalıbsa, alternativ seçimlər azalır. FlixBusda əksər hallarda son saatlarda belə bilet əldə edə bilərsiniz. Avropalılar avtobusla nadir hallarda səyahət etdikləri üçün bu boş yerlərin səfərin son saatlarına kimi boş qalmasına gətirib çıxardır və turistlərə ekstra bir üstünlük verir. 

Baqaj

FlixBus sizə ölçüsü (max. 42 x 30 x 18cm) olan 7 kq əl çantası və ölçüsü (max. 80 x 50 x 30cm) olan 20 kq baqaj götürməyə icazə verir. Daha böyük əşyalar və ya iki çantadan çox varsa, əvvəlcə müştəri xidməti ilə müzakirə etsəniz, əlavə ödəniş üçün gətirə bilərsiniz. Əgər yükünüz limitdən çoxdursa o zaman çəkisinə görə əlavə ödəniş etməklə apara bilərsiniz, ancaq bunu öncədən bilet rezervindən müştəri xidmətlərinə bildirsəz yaxşı olar. 

Təmizlik

FlixBuslar ümumiyyətlə təmiz olur və avtobusda pis qoxu olmur. Tualetlərdə təmizliyə riayət edilir və koridorlar boyunca da zibil qutuları yerləşdirilmişdir, beləcə də insanlar da sanitariya qaydalarına əməl edirlər. Üstəlik, oturacaqlar da yenidir, yaxşı vəziyyətdədir və kifayət qədər rahatdır.

Etibarlılıq

Məşhur avtobus brendi olan FlixBus müştəri məmnuniyyətinə xüsusi önəm verir və bu müştərilərdə güvən yaradır. 

FlixBus onlayn tətbiqi sizə avtobusun haradan yola çıxacağını öyrənməyə kömək edir. Biletinizdəki QR kodunu birbaşa telefonunuzdan istifadə edə bilərsiniz və bu, sizi bileti çap etmə zəhmətindən xilas edir. FlixBus tətbiqi digərlərindən istifadə rahatlığı ilə seçilir.

Xidmətin Amerikada da mövcudluğu

Daha əvvəl də qeyd etdiyim kimi, FlixBus 2018-ci ildən öz istiqamət şəbəkəsini Amerikada da açıq elan etdi. Greyhound və ya Peter Pan avtobusları, əsasən, Amerika mənzərəsinə hakimdir və Flixbusın ABŞ-da da reyslərinin olması xoş haldır.    

Şarj yerlərinin olması

Uzun səfərlər zamanı elektronik əşyalarımızın (telefon, noutbuk və s.) zaryadkasının azalması bizə problem yaradan hallardandır. Bəzi avtobuslarda şarj yerlərinin olması qeyd olunsada, avtobusa mindiyinizdə xəyal qırıqlığına uğraya bilirsiniz. Bu cəhətdən FlixBus avtobusları güvənilirdir. Avtobusların əksəriyyətində USB kabeli və şarj yerləri mövcuddur. FlixBus avtobusları Qərb Sahilində, Kaliforniya, Arizona və Nevadada fəaliyyət göstərir.

Geniş Avropa şəbəkə xidməti

Onlar demək olar ki, Qərbi Avropanın hər yerindədirlər. Avropa xəritəsinə bir göz atsaz orada böyük ehtimalla bir FlixBus dayanacağını görə bilərsiniz (Böyük Britaniya və İspaniya istisna).

Əlavə olaraq deyə bilərik ki, dayanacaqlarda və ya vağzallarda gözlədiyimiz avtobusu tapmaq bəzən çətin ola bilir. FlixBus avtobusları isə açıq yaşıl rəngi sayəsində asanlıqla seçilir və bu da sərnişinlərə onu tapmaqda rahatlıq yaradır.

Deavantajlarına keçməzdən öncə onu qeyd etmək istəyirəm ki, bütün nəqliyyat vasitələrində arzuolunmaz hallarla qarşılaşmaq mümkündür və bu təkcə avtobus səfərində deyil, qatar, təyyarə, gəmi səyahətləri üçün də keçərlidir. Heç birimiz belə hallardan sığortalanmamışıq və arada istənilən vasitədə xoşagəlməz hallarla qarşılaşa bilirik. Amma bu kimi hadisələr istisna hallarda baş verirsə bu həmən kampaniyanın servisinin pis olduğu anlamına gəlməz. İndi isə keçək FlixBusın mənfi cəhətlərinə:

Rahatlıq

Uzaq istiqamətlərə avtobusla səyahətdə bir çox dayanacaq nöqtəsi olur və nəticədə səfər yorucu və narahat keçə bilir. Ancaq uyğun büdcə ilə səfər edən turistlər hər şeyi gözə alırlar və hətta bundan zövq alırlar. Əgər gedəcəyiniz istiqamət çox uzaqdırsa və avtobus səyahətinin sizi çox yoracağını düşünürsünüzsə, həmən istiqamətə FlixTrainlə də gedə bilərsiniz. Beləliklə, yolda daha rahat yata və yorğunluğunuzu çıxara bilərsiniz.

Wi-Fi

Bütün FlixBus avtobuslarında Wi-Fin olduğu qeyd olunsada, internet istifadəsi limitli olur və bəzən isə heç işləmir. Bu səfər etdiyiniz avtobusa görə dəyişir. Çünki FlixBus avtobusları şirkətin deyil, sürücülərindir və onlar müqavilə əsasında işləyir. Ona görə də bəzən fərqli dizayn və ölçüdə FlixBus görməyiniz mümkündür.

Dayanacağı tapma çətinliyi

Bu, bəlkə də, FlixBus istifadəsində qarşılaşaca biləcəyiniz ən böyük maneə olacaq. Avtobus dayanacaqları həmişə təyin olunmuş stansiyalarda və ya xəritə qeyd olunmuş nöqtələrdə olmur. Böyük ehtimalla bir FlixBus işarəsi olacaqdır. Əgər o da yoxdursa, çamadanla çaşqın görünən digər kütləni axtarın. Əvvəlcədən avtobus dayanacağını FlixBusın rəsmi saytında yoxladığınızdan əmin olun (və sizi təmin etdikləri mail adresini yoxlayın və əgər tətbiqi yükləmisinizsə orada hər hansı bir dəyişiklik haqqında sizə öncədən məlumat veriləcəkdir). Mobil datalarınız və ya Google Xəritələriniz oflayndırsa, biletinizdəki kiçik xəritəni Google Xəritələrdəki müvafiq GPS nöqtəsinə uyğunlaşdırmağa cəhd edə bilərsiniz. Tətbiqdə də  dayanacaqların xəritəsi mövcuddur. Avtobusların çoxunun yan tərəfində yaşıl rəngdə böyük hərflərlə yazılmış "FlixBus" yazısı var, amma hamısında yox. Bir avtobus təxmini sizin gözlədiyiniz dayanacaqdadırsa, üstündə sırf qeyd olmadığına görə bu sizin deyil deyə düşünməyin. Əgər ölkənin dilini bilməsəniz belə, belə hallarda biletinizi mütləq şoferə göstərin.

Dil problemi

FlixBus şəbəkəsi bir çox Avropa ölkəsində olduğundan və avtobusda məsuliyyətli şəxs kimi sadəcə sürücü olduğundan bu turistlərin tez-tez qarşılaşdığı bir haldır. Bütün FlixBus sürücüləri ingilis dilini yaxşı bilməyə və ya bəziləri hətta heç bilməyə bilər. Buna təəccüblənməyin. Dili bilməsəniz belə orada ingilis dilini bilən birindən kömək ala və yaxud birbaşa biletinizi şoferə təqdim edə bilərsiniz.

Əlavə olaraq, sizi maraqlandıra billəcək bəzi suallar:

FlixBus biletini necə ləğv edə bilərəm?

Yeni dostunuz sizi biraz daha qalmağa razı saldı? Biletinizi FlixBus rəsmi səhifəsində və ya tətbiqində səfərə 15 dəqiqə qalmış cəmi €1-a ləğv edə bilərsiniz.

Bloqun karantin vaxtında yazıldığını görüb həvəsdən düşməyin, səyahət planlarınıza olduğu yerdən davam etdirin sadəcə bir iki ay geri almaqla. Səyahətçilərin azad ruhunu heç bir virus həbs edə bilməz! Unutmayın heç nə daimi deyil, korona belə... Ona görə olduğu kimi davam və evdə qaldığınız vaxtlardan səmərəli istifadə etməklə işəyərkən edə bilmədiklərinizi etməyə cəhd edin. Pulunuzu geri almırsınız, ancaq növbəti sifarişinizdə istifadə edilə bilən orijinal biletinizin qiymətinə (ləğvetmə haqqı çıxmaqla) yenisi üçün FlixBus çeki alırsınız. Bu çeklərin də istifadə müddətinin olduğunu unutmayın.

Başqa hansı xidmətlər mövcuddur?

Demək olar ki, bütün avtobuslarda tualetlər mövcuddur. FlixBus avtobuslarının bəzilərində əlavə ödənişlə sizə atışdırmalıqlar (çips, çərəz, meyvə şirəsi və s.) təklif olunur. 

Siz siz olun avtobus səyahətinizin uğurla başa çatması üçün bəzi qaydaları gözardı etməyin. Çalışın avtobus dayanacağına vaxtından daha tez çatın, çərəzlərinizi, səyahət yastığınızı, suyu və ən əsası pasportunuzu unutmayın. 

CO2 (karbon) neytral avtobus səyahəti mümkündürmü və bu sistem necə işləyir?

Əgər təbiət mühafizəsinə qatqınızın olmasını istəyirsinizsə, FlixBus biletini saytında və yaxud tətbiqində onlayn sifariş verərkən, səyahət istiqamətinizi təyin etdikdən sonra "CO2 kompensasiyası" qutusuna işarə vurun. Səyahətinizdən qaynaqlanan CO2 emisyonları daha sonra səfərinizin müddəti və məsafəsinə uyğun olaraq hesablanır. Hesablanan dəyər dərhal avtomatik olaraq sizin bilet qiymətinizin üzərinə əlavə olunur. Ətraf mühitə töhfəniz səyahətinizin qiymətinin təxminən 1-3% -ni təşkil edir. Verdiyiniz ianə beynəlxalq ekoloji standartlara uyğun sertifikatlaşdırılmış iqlim mühafizəsi layihəsinə transfer ediləcəkdir.