Elə indi Fransa Polineziyasına səyahət etməyiniz üçün 10 səbəb

Ağ qumlu çimərliklər və büllur kimi təmiz su hər il Fransa(Fransız) Polineziyasına minlərlə insanı cəlb edir. Fransa Polineziyası 118 ada və atoldan ibarətdir. Onların arasında ən populyar olanı və ən çox insanın məskunlaşdığı Taitidir. Ölkə əhalisinin demək olar ki, 70% -i Tahitidə yaşayır. Rəsmi dilin fransızca olmasına baxmayaraq, burada Taiti, Avstraliya, Raivavae, Rapa, Mangareva və s. kimi bəzi regional dillər də danışılır. Fransa Polineziyasının rəsmi valyutası nədir? Fransanın digər dənizaşırı kollektivliklərində olduğu kimi, Fransa Polineziyasının da rəsmi valyutası CFP franqıdır. Bu gün 1 ABŞ dolları 101.40 CFP franqına bərabərdir. Geniş istifadə olunan digər valyutalar (USD, EURO) da adalarda qəbul edilir. Avropadan Fransa Polineziyasına necə getmək olar? Əlbəttə ki, ən yaxşı yol Air France-nın Fransa Polineziyasına uçuşlarından istifadə etməkdir. Air France-ın Fransa Polineziyasına həftədə üç reysi var. Fransız Polineziyasına uçuşları olan bir başqa hava yolu şirkəti də Air Tahiti Nui-dir. Onların həftədə beş dəfə Parisdən uçuşları var. Fransız Polineziyasına daha ucuz səyahət etmək üçün bir çox yol var və bunlar arasında ən yaxşısı sezon xaricində səyahət etməkdir.

Artıq Fransa Polineziyası haqqında ümumi məlumat aldığımıza görə adalara səyahət etmək üçün 10 səbəbə keçid ala bilərik.

1. Orijinal yeməklər

Bir çox insan sırf ləzzətli dünya mətbəxlərini dadmaq üçün dünyanı gəzir. Yeni təamları sınamaq hər zaman həyəcan vericidir. Əgər sizin də belə bir istəyiniz varsa, Fransa Polineziyası adalarında xoş vaxt keçirəcsiniz. Digər ada-dövlət mətbəxlərində olduğu kimi, burada da əsas inqredientlər balıq, tərəvəz, müxtəlif növ dəniz məhsulları və ekzotik meyvələrdir. Həmçinin onlar yeməklərində şərab və kokos südündən istifadə etməyi də sevirlər. Ən populyar yeməklərdən biri Poisson Crudur. Bu kokos südü, çiy ton balığı, laym şirəsi və müxtəlif tərəvəzlərdən hazırlanan milli yeməkdir. Poisson Cru şirin və ekzotikdir və onu Fransa Polineziyasının hər yerində tapa bilərsiniz. Sevəcəyiniz digər yeməklər Ma'a Tahiti, Fafaru, Tama'ara'a, Poʻe və s.-dir.

2. Bal ayınızı unudulmaz edin

Əlbəttə ki, Fransa Polineziyasına səyahət etmək üçün ən yaxşı səbəblərdən biri bal ayıdır. Ölkədə romantik bir tətil keçirmək üçün çox sayda yer var. İlk olaraq Taitidən bəhs etmək istəyirəm. Taitidə cütlüklər üçün geniş seçim imkanı var. Adadakı lüks oteldə və ya özəl kottecdə qala bilərsiniz. Okeanın nəfəs kəsən mənzərələri, yaşıl ağaclar, ağ qumlu çimərliklər və daha çoxu sizi nağıldaymışsınız kimi hiss etdirəcək. Ayrıca, həyat yoldaşınıza hədiyyə olaraq inci (dünyanın ən yaxşılarından biri) ala bilərsiniz. Hətta incidən zinət əşyaları düzəltməyi də öyrənə bilərsiniz. Taitidəki ən yaxşı otellərdən bəziləri: Royal Tahitien, Hotel Tahiti Nui, Pueu Village, Tahiti Pearl Beach Resort və Vanira Lodge. Fransa Polineziyasına bal ayı məqsədilə səyahət etmək üçün ən yaxşı vaxt hansıdır? İnsanların əksəriyyəti may-oktyabr ayları arasındakı zamanın Fransa Polineziyasına səyahət üçün ən yaxşı vaxt olduğunu düşünür. Bal ayı üçün tövsiyə olunan digər yerlərə Le Taha'a-nı, Bora-Boranı və Mo'orea'-nı misal göstərmək olar.

3. Skuba dayvinq üçün əfsanəvi məkan

Fransa Polineziyası dalğıclıq mərkəzləri ilə zəngindir. Fransa Polineziyasının bir çox adası dalğıclıq üçün əlverişli mühitə malikdir və haqqında danışmaq istədiyim ilk adalar Tuamotu adalarıdır. Ümumilikdə, Tuamotuda tam 20 suya dalış mərkəzi var. Bunlardan ən böyüyü səkkiz dalğıclıq yeri olan Rangiroa atolludur və bura əksər turistlərin sevimli yeridir. Deməli, bir qədər izdihamlı ola bilər. Əgər siz sakit yerlərə üstünlük verirsinizsə, yeddi dalış mərkəzi olan Fakaravaya üstünlük verə bilərsiniz. Bu idman növünün həvəskarları üçün başqa bir ada da Marquesas adalar qrupundakı Hiva Oadır. Hiva Oanın əsas çatışmazlığı daha az “görünür” olmasıdır. Üstün cəhəti isə çəkicbaş köpəkbalığıdır. Fransa Polineziyasına səyahətinizdə müşahidə etmək şansınızın olacağı digər dəniz canlıları boz rif köpəkbalığı, pələng köpəkbalığı, qara köpək balığı, manta ray və s.-dir. Fransa Polineziyasına dalış məqsədilə səyahət etmək üçün ən yaxşı vaxt mart (həmçinin noyabr) ayıdır.

4. Polineziyalıların mədəniyyət və sənət tarixini öyrənin

Təbiət və macərasevərlərlə yanaşı incəsənət və tarix həvəskarları da Fransa Polineziyası adalarında çox maraqlı yerlər tapa bilər və bunlardan biri də Robert Wan Pearl Muzeyidir. Bura Fransa Polineziyasının tanınmış qara incilərini görə biləcəyiniz misilsiz bir muzeydir. Üstəlik onların necə əmələ gəlməsi və necə rəng almaları barəsində də məlumat əldə edəcəksiniz. Digər yandan, ziyarətçilər Taiti Muzeyində polineziyalıların irsi və tarixi haqqında əvəzsiz məlumatlar öyrənə bilərlər. Burada erkən dövrlərə aid oymalar, müstəmləkə dövrünə aid sənət əsərləri və daha çoxunu tapa bilərsiniz. Ziyarət etməniz gərəkən digər yer isə James Normal Hall-dır. James Normal Taitidə yaşayan amerikalı yazar və şair idi. Hal-hazırda onun evi muzey kimi fəaliyyət göstərir və muzeyin ziyarətçiləri burada bir çox nadir əsər, 3000-dən çox kitab və daha çox şey tapa bilərlər.

5. 118 ada sizi gözləyir

Bildiyiniz kimi, Fransa Polineziyasında 118 ada və atoll var. Bu kəşf etmək üçün kifayət qədər yerin olduğu mənasına gəlir. Uzun müddətli tətil planlaşdırırsınızsa, bu adalara gəmi səyahətləri etməyinizi məsləhət görürük. Bəziləri kiçikdir və beəcə bir gün ərzində bir neçəsini ziyarət edə bilərsiniz. Ancaq Taiti, Bora-Bora kimi böyük adalara daha çox vaxt sərf etməyiniz lazım gələcək. Bu adalara etdiyiniz səyahətlər sizi 16-17-ci əsr səyyahı kimi hiss etdirəcək. Bəlkə də daha öncə kəşf olunmamış əraziləri siz kəşf edəcəksiniz?

6. Aşağı cinayət nisbəti

Hər hansı bir yerə ilk dəfə səyahət edərkən araşdırdığımız ilkin şeylərdən biri bu şəhər və ya ölkədəki cinayət nisbətləridir. Xoşbəxtlikdən Fransa Polineziyasında cinayət nisbəti çox aşağıdır. Həm gecə həm də gündüz vaxtı rahat bir şəkildə gəzintiyə çıxa bilərsiniz. Adada soyğunçuluq, vandalizm, narkotik satışı və başqa təhlükəli şeylərlə qarşılaşmaq çox nadirdir. Əsas problemin COVID-19 olduğunu söyləyə bilərik. Bu günə qədər yoluxanların sayı 6431, ölənlərin sayı isə 26-dır.

7. Ağ qumlu çimərliklər

Fransa Polineziyası Sakit okeanın ən yaxşı çimərliklərinə ev sahibliyi edir. Onlardan bəziləri Fare Beach, Motu Topu, Tikehau, Temae Beach, Matira Beach və s.-dir. Çimərliklərdə istirahət etmək, okeanın təmiz suyunda üzmək və ya dalış etmək... Xəyal kimi səslənir, deyilmi? Bundan əlavə, burada sosial mediada paylaşmaq üçün çoxlu şəkillər çəkə, çimərlik voleybolu oynaya, çimərlik partilərində iştirak edə bilərsiniz. Özünüzü yorğun hiss etdiyiniz zaman bir stul və ən sevdiyiniz içkini götürün və gün batımından zövq alın. Fransa Polineziyası çimərliklərinə səyahət etmək üçün ən yaxşı vaxt noyabr-aprel aylarıdır.

8. Müstəmləkə və Polineziya mədəniyyətinin qarışığı

Fransa Polineziyası əhalisinin əksəriyyəti saf polineziyalılardır. Bundan əlavə isə avropalılar, asiyalılar və “mix” polineziyalılar da kifayət qədərdir. Yeni mədəniyyətləri öyrənməyin ən məşhur yolu muzeylərdir, ancaq yerli sakinlərlə söhbət etmək sizə muzeylərdə öyrənə bilməyəcəyiniz məlumatları verə bilər. Fransa Polineziyası əhalisi ilə danışmaq sizə onların gündəlik həyatını, inanclarını, ənənələrini, adətlərini və daha çoxunu anlamaq üçün şans verəcəkdir. Polineziyanın tarixi 3000 il əvvələ dayanır. Rəqslər, musiqi, sənətkarlıq işləri indiyədək gördüyünüz heç bir şeyə bənzəmir.

9. Festivallar və bayramlar

Fransa Polineziyasında demək olar ki, bütün il boyu müxtəlif festivallar keçirilir. Bu o deməkdir ki, siz tətiliniz boyu maraqlı vaxt keçirəcəksiniz. Ən əyləncəli və ən məşhur festivallar iyun-avqust ayları arasında olur. İyun ayının ortası ilə iyul ayının ortaları arasında baş tutan Heiva Rima’i-də, ölkənin bütün sənətkarları paytaxtda bir araya gələrək öz əsərlərini nümayiş etdirirlər. İyun ayında keçirilən başqa bir festival Miss Tahiti-dir. Polineziya qadınları gözəllikləri ilə məşhurdur, lakin bu belə müsabiqəni qazanmaq üçün kifayət deyil. Qalib olmaq istəyən iştirakçı yerli mədəniyyət haqqında geniş məlumat sahibi olmalıdır. Bu, yalnız gözəllik deyil, həm də mədəni bilik yarışmasdır. Ən məşhur festival isə Heiva i Tahiti-dir. Heiva i Tahiti bir ay boyunca davam edir və bu festival zamanı bol musiqi performanslarına, idman yarışlarına və daha çoxuna şahid ola bilərsiniz. Diqqətəlayiq digər festivallar: Heiva i Bora Bora, Bastille Day, Matari’i i Raro, Tahiti Pearl Regatta və s.

10. Papeete

Bu siyahıda qeyd etmək istədiyim son səbəb ölkənin paytaxtıdır. Bu cənnətə səyahət etmək üçün bir çox fəaliyyətlərdən, məkanlardan, səbəblərdən bəhs etdik, ancaq onların əksəriyyətini sırf bir yerdə tapa biləcəyinizi deyə bilərəm. Papeetedə sizin yolunuzu gözləyən çoxlu dağla və meşələr; ləzzətli yeməkləri ilə sizi heyran edəcək restoranlar, kafelər; qonaqlama üçün gözəl otellər və daha çoxu var. Son olaraq, əgər heç vaxt unutmayacağınız möhtəşəm bir tətil keçirmək istəyirsinizsə, Fransa Polineziyasını ziyarət edin!