Tokioya deyil də Hiroşimaya səyahət etməyiniz üçün 10 səbəb

Yaponiya turistlərin ən çox sevdiyi yerlərdən biridir. Yaponiya ildə 31 milyondan çox ziyarətçi qəbul edir. Əlbəttə ki, ən çox ziyarət edilən yerlərdən biri, ölkənin paytaxtıdır, amma biz bu gün sizə Tokio əvəzinə Hiroşimaya səyahət etməniz üçün 10 səbəb verəcəyik. Bu bloqda Hiroşimanın harada olması, burada ediləbiləcək şeylər, bombalandığı tarix, Tokiodan Hiroşimaya səyahət, Hiroşimanın fəlakətdən əvvəl və sonrakı halı və s. barəsində məlumatlar öyrənəcəksiniz.

Hiroşima haqqında əsas faktlar

Hiroşima, atom bombardmanından sonra Yaponiyanın ən tanınmış yerlərindən birinə çevrildi. Hiroşima nə vaxt bombalandı? Bu atom bombardmanı 6 Avqust 1945-ci ildə baş verdi və nəticədə təxminən 220.000 insan həyatını itirdi. Hiroşima bombardmanının Yaponiya tarixindəki ən kədərli anlarından biri olduğunu deyə bilərik, amma indi hər şey geridə qalıb. Bu gün Hiroşimada təxminən 1,3 milyon insan yaşayır və şəhərin ümumi ərazsisi 906,68 kvadrat km-dir. Hiroşima haradadır? Hiroşima, Honşu adasının cənub-qərbində yerləşir və Hiroşima prefekturasının paytaxtıdır. Şəhərdə hava necədir? Yay qısa, isti, rütubətli və əsasən buludlu, qış isə olduqca dondurucu və buludsuzdur. Temperatur il boyu 1-31 ° C (34-89 ° F) arasında dəyişir.

1. Münasib qiymətli otellər

Tokionun Yaponiyanın (və dünyanın) ən bahalı şəhərlərindən biri olması heç kimə sirr deyil və biz bunu yüksək otel qiymətlərində də görə bilərik. Tokionun əksinə, Hiroşima, daha ucuz otel və hostellər təklif edir. Tokioda ortalama otel qiyməti 50-100 ABŞ dollarıdır, ancaq Hiroşimada bir gecəsi 50 ABŞ dollarından az olan bir çox otel tapa bilərsiniz. Əlbəttə ki, Tokioda da bu cür otellər var, lakin Hiroşimadakı qədər çox deyil. Ucuz və tövsiyə olunan otellərdən bəziləri: Hotel Active Hiroshima, Dormy Inn Hiroshima, Daiwa Roynet Hotel Hiroshima, Nest Hotel Hiroshima Ekimae. Bu otellərin hamısı qonaqlardan, 5 ballıq sistem üzərindən 4 bal alıb və qiymətləri də olduqca məqbuldur, gecəsi 18-50 ABŞ dolları. Hiroşimada qalmaq üçün lüks otellər axtarırsınızsa, buyurun: Miyajima Shiro, Kurayado Iroha, Miyajima Seaside Hotel. Demək olar ki, hamısı 3 ulduz və üzərindədir, tək gecəlik qiymətləri isə 250 ABŞ dollarından çoxdur.

2. Münasib qiymətə dadlı Yaponiya mətbəxini sınayın

İki şəhər arasındakı restoran qiymətlərini müqayisə etdiyimi zaman, eyni tendensiyanı görə bilərik. Hiroşimada bahalı olmayan bir restoranda yemək yemək paytaxtdan 1-3 ABŞ dolları ucuzdur. Orta səviyyəli restoranlarda daha böyük fərq müşahidə edə bilərik. Məsələn, deyək ki, dostunuzla birlikdə yemək yeyəcəksiniz. Hiroşimada bir yemək üçün 37-40 dollar ödəyəcəkkən, Tokioda 10-15 dollar daha çox pul ödəyəcəksiniz. Ayrıca, içki qiymətlərində də cüzi fərqləri görə bilərik, amma bu yemək qədər deyil. Yaponiyada nə yeməli? Yaponiya ən məşhur və ən ləziz mətbəxlərdən biridir. Udon, Tofu, Tempura, Yakitori, Sashimi, Ramen və başqaları kimi ləzzətli yeməklər çoxdur. Bəs ən çox bilinən yemək hansıdır? Təxmin etdiyiniz kimi, bu, suşidir. Suşinin 20-dən çox növü var və ən populyar növləri Chutoro, Mushi Ebi, Salmon, Uni, Aji, Shime Saba və digərləridir. Hiroşimadakı ən yaxşı restoranlar hansılardır? Ən çox tövsiyə olunan restoranlara Yakigaki No Hayashi, Nagata-ya, Ekohiiki və s. daxildir.

3. Uzun müddətli qonaqlama üçün münasib qiymətlər

Yaponiyada bir neçə həftədən çox qalmağı planlaşdırırsınızsa, qiymətlərə əsasən, Hiroşimada ev kirayələməyinizi məsləhət görürəm. İndi sizə bəzi nümunələr təqdim edəcəm və fərqi özünüz görəcəksiniz. Hiroşimada şəhər mərkəzində və ya şəhərdən kənarda bir yataq otaqlı mənzilin ortalama icarə qiyməti müvafiq olaraq 700 və 500 ABŞ dollarıdır. Digər tərəfdən, Tokioda, sırasıyla 1200 və 700 ABŞ dollarıdır. Əgər böyük bir qrup və ya ailə üçün mənzil (3 yataq otaqlı) axtarırsınızsa, Hiroşimada bu mənzilə yerindən asılı olaraq 600-1200 ABŞ dolları arası icarə haqqı ödəyəcəksiniz. Bəs Tokiodan nə xəbər? Yenə də müqayisə edərək aralarındakı fərqi görmək mümkündür. Tokionun kənarında 1500 ABŞ dollarına üç yataq otaqlı mənzil tapa bilərsiniz, lakin mərkəzdə ortalama qiymət təxminən 3000 ABŞ dollardır. Ev kirayəsindən danışırıqsa, aylıq kommunal xidmətlərdən də (elektrik, istilik, soyutma, su, zibil) bəhs etməliyik ki, Hiroşimada qiymətlər paytaxtdan təxminən iki dəfə ucuzdur.

4. Əhali sıxlığı

Hiroşimanın ərazisinin Tokiodan təxminən 300 kvadrat km. çox olmasına baxmayaraq, Tokiodakı əhali sayı Hiroşimadan təxminən səkkiz dəfə çoxdur. Beləliklə, paytaxt əvəzinə Hiroşimanı seçməklə, izdihamlı yerlərdən və yoğun tıxacdan qurtulmuş olacaqsınız. Əlbəttə ki, Hiroşimada da insanlarla dolu yerlər görəcəksiniz, amma bu Tokio ilə müqayisədə heç bir şey deyil. Görməli yerlərə getmək üçün daha az vaxt sərf etmək şansınız olacaq və turistik yerlər daha az sıxlıq olacaq. Bundan başqa, COVID-19-u nəzərə alsaq, Hiroşima daha təhlükəsizdir. COVID-19 yaxın təmas səbəbindən sürətlə yayılır və paytaxtda insanlarla məsafəni qorumaq çətin olacaq. Əsasən də, ictimai nəqliyyatdan istifadə edərkən. Bu sıxlıq Tokiodakı yüksək rəqəmlərin səbəblərindən biridir.

5. Hiroşima Sülh Memorialı

Hiroşimada nə etməli? Hiroşimada ediləcək ilk şeylərdən biri, Sülh Memorialını ziyarət etməkdir. Hiroşima Sülh Memorialı (Atomik Bomb Dome (Atom Bombası Gümbəzi) və ya Genbaku Domu olaraq da bilinir) 6 Avqust 1945-ci ildə baş verən fəlakətin ən vacib xarabalığı və faktıdır. Bu ərazi 1996-cı ildə UNESCO-nun Ümumdünya irs siyahısına salındı və 140 mindən çox insan bu memorialda uyuyur. Hiroşima Sülh Memorialı haradadır? Ünvan: 1-10 Otemachi, Naka Ward. Salon xarabalıqları xaricində burada bir muzey və park da var. Hiroşima Sülh Memorialı Muzeyində fəlakət haqqında ətraflı məlumat ala və Hiroşimada həyatın bombadan əvvəl və sonra necə olduğunu öyrənə bilərsiniz.

6. Muzey həvəskarları üçün mükəmməl bir yer

Hiroşimanı ziyarət etməyiniz üçün başqa bir səbəb muzeylər ola bilər. Hiroşimada bombadan əvvəl və sonrakı həyat, mədəniyyət, ənənə, tarix və daha çox şey barəsində öyrənmək üçün çox sayda maraqlı muzeylər var. Ən həyəcanlandırıcı muzeylərdən biri, Mazda muzeyidir. Mazda, Hiroşimada avtomobil istehsalçısıdır. Mazda muzeyi isə sizin Mazda avtomobillərinin keçmişini, bu gününü və gələcəyini görə biləcəyiniz muzeydir. Digər maraqlı muzeylər: “Maneki-Neko Museum”, “Miyajima Municipal History and Folklore Museum”, “Treasure Hall”, “Honkawa Elementary School Peace Museum” və “Hiroshima City Museum of Contemporary Art”.

7. Tarixi arxitektura möcüzələri

Yapon memarlığının cazibədarlığı çox məşhurdur və bu memarlığın ən yaxşı nümunələrini Hiroşimada görə bilərsiniz. Burada Fukuyama qəsri və Hiroşima qəsri kimi məşhur qəsrləri görəcəksiniz, ancaq bu, sadəcə başlanğıcdır. Hiroşimada Koriyakushi, Jinguji, Tenneiji, Abuto-Kannon və s. kimi çox sayda ziyarətgah və məbəd var. Sözlər bu məbədlərin gözəlliyini təsvir etmək üçün kifayət deyil. Təbii ki, yapon memarlığından bəhs edərkən paqodaları da qeyd etməliyik. Paqoda yapon memarlığının incisidir. Yəqin ki, onları filmlərdə görmüsünüz, ancaq real həyatda çox daha təsirli görünürlər.

8. Parklarda əla şəkillər çəkin

Həyatınızda ən azı bir dəfə Yaponiya haqqında kino, sənədli film və ya cizgi filmi izləmisinizsə, rəngli parkları və ağacları görmüsünüz. Uşaqlıq vaxtı bu parkı ilk dəfə görəndə mənzərənin heyrətləndirici olması səbəbi ilə, real olmadığını düşünmüşdüm. Şübhəsiz ki, o möhtəşəm təbiəti gördükdə daha güclü duyğular yaşayacaqsınız. Bu parklardan bəziləri: Hill Overlooking History Park, Hiroshima Prefectural Mominoki Forest Park, Flower Village Kamu no Sato, Momijidani Park. Hamısı arasında ən çox sevdiyim Flower Village Kamu No Sato parkıdır.

9. Bütün fəsillərdə festival

Əminəm ki, hər kəs festivallarda iştirak etməyi sevir. Sizin üçün əla xəbərim var: Hiroşima il boyunca cürbəcür festivallar keçirilir. Şəhəri yaz aylarında ziyarət etsəniz, Hiroşima Gül Festivalı kimi gül festivallarını görəcəksiniz. Yay aylarında isə Miyajima Su Atəşfəşanlığı festivalına, Mihara Yassa festivalına qatıla bilərsiniz. Ayrıca, 6 Avqustda Sülh Mesajı Fənər Buraxma Mərasimində (Peace Message Lantern Floating Ceremony) iştirak edə bilərsiniz. Payızdakı ən həyəcanverici hadisə Onomichi Betcha festivalıdır. Noyabr ayında keçirilən Onomichi Betcha festivalı qeyri-adi və həyəcana gətirəndir. Üç şeytan - Soba, Beta və Shouki festivalın ulduzlarıdır. Əgər yalnız qışda səyahət edə bilirsinizsə, narahat olmayın, Miyajima Oyster festivalından və ya Hiroshima Dreamination-dan zövq ala bilərsiniz.

10. İsti bulaqlar

Hiroşimada nə etməli? Hiroşimada ediləcək bir çox fəaliyyətdən bəhs etdik və təklif etmək istədiyim sonuncu fəaliyyət, isti bulaqlardır. Hiroşimanı kəşf etdikdən sonra bu yerlərin birində istirahət edə bilərsiniz: Miyajima adasının isti bulaqları, Oasa Kanbiki isti bulağı, Nukui bulaqları, Takamiya Yunomori isti bulağı və s.

Tokiodan Hiroşimaya necə və neçə saata getmək olar?

Bəzilərinin bu bloqu Tokioya getməzdən əvvəl oxuya biləcəyini nəzərə alaraq, Tokiodan Hiroşimaya səyahət etməklə bağlı bəzi sualları cavablandırmaq istəyirəm. Tokiodan Hiroşimaya necə getmək olar? Dörd yol var: təyyarə, qatar, avtobus və avtomobil. Təbii ki, ən asan və sürətli olanı, təyyarə ilə səyahət etməkdir. ANA, Japan Airlines, Jetstar və SAM Columbia (qiymət aralığı 103-231$) ilə uçuş mümkündür. Tokiodan Hiroşimaya nə qədər vaxta çatmaq olar? Bu istifadə etdiyiniz nəqliyyatdan asılıdır. Səyahət bir neçə saat və ya günlər çəkə bilər.