Limaya deyil də Kuskoya səyahət etməyiniz üçün 10 səbəb

Yer kürəsindəki hər yer füsünkar və bənzərsizdir, lakin Peru ortalama səviyyədən yüksək olmağı bacaran ölkələrdən biridir. Peru yüz illər boyunca öz təbii və mədəni sərvətləri ilə səyahətçilərin diqqətini özünə cəlb etməyi bacarıb və buna günümüzə qədər davam edir. Peruya səyahət etmək üçün minlərlə səbəb var: tarixi yerləri, rəngarəng festivalları, maraqlı insanları, valehedici təbiəti, Maçu Pikçu və s. Bəs Peruya səyahət zamanı hansı məşhur şəhəri seçməliyik? Kusko yoxsa Lima? Mən bu bloqda sizə niyə Kuskoya səyahət etməli olduğunuzun səbəblərindən bəhs edəcəm.

Limadan Kuskoya necə getməli?

Nəzərə alsaq ki, Lima paytaxtdır yəqin ki, əksər beynəlxalq uçuşlar sizi Limaya aparacaq. Bəs Kuskoya necə gedə bilərik? Lima - Kusko səyahəti üçün bir çox seçim var. Ən asan və rahat yolu seçə bilərsiniz: uçuş. Bir çox yerli hava yolu şirkəti iki şəhər arasında uçuşlar təklif edir. Ancaq mənim şəxsi seçimim Perunun dağlıq yollarında irəliləyən qatar olardı. Kuskoya səyahət üçün avtobusdan da istifadə edə bilərsiniz.

Kuskoda nə etməli?

Perunun tarixi bir paytaxtı olaraq, Kuskonun ziyarətçilərinə təqdim edəcəyi çox şey var. Kuskoda nə edəcəyinizi bilmirsinizsə, küçə yeməklərini dadmaqdan başlayaraq, ata minə, gecə həyatından zövq ala və ya dağlarda gəzə bilərsiniz. İndi isə daha ətraflı məlumat almaq üçün Limaya deyil də Kuskoya səyahət etmək üçün 10 səbəbə göz ataq.

1. Maçu Pikçu

Maçu Pikçu Peruya səyahət etmək üçün ən başlıca səbəbdir. Bu qədim İnk qalası 1911-ci ildə Hayram Binqam tərəfindən kəşf edilmiş və daha sonra 1983-cü ildə UNESCO-nun Ümumdünya mədəni irs siyahısına salınmışdır. Müasir dünyanın möcüzələrindən biri olan Maçu Pikçu dəniz səviyyəsindən 2500 metr yüksəklikdə yerləşir və çox sayda turisti cəlb edən əfsanəvi bir panorama təqdim edir. Kusko şəhərindən 130 kilometr məsafədə, Amazon cəngəlliyinin daxili yaylasında yerləşən bu müqəddəs yerə səyahət tam bir macəradır. İnklərin rəmzi olan Maçu Pikçuya qatarla və ya piyada, bir neçə gün davam edən, dağlar, meşələr və çaylar arasından keçən daşlı yollarla səyahət edə bilərsiniz.

2. Ənənəvi və orqanik qastronomiya

Peru Amerikadakı ən yaxşı qastronomiyaya sahibdir. Bu ölkə təkcə müxtəlif etnik qrupların qarışımı ilə deyil, 28 fərqli iqlim tipinin qarışımı ilə də tanınır. Həm təbiətin, həm insanların multikultural yaşayışı isə ölkədə çeşid-çeşid yeməklərin, fərqli mətbəxlərin yaranmasına gətirib çıxarır. Qeyd etdiklərimiz Kusko üçün də keçərlidir. Lomo Saltado, Butifarra, Ceviche Mixto, Tiradito, və ya Chicharron adlanan yeməkləri dadmaq Kuskodakı mütləq fəaliyyətlərinizdən biri olmalıdır.

3. İnti Raymi

Kuskoya səyahət etməyiniz üçün bir başqa səbəb də 24 iyunda qeyd olunan İnti Raymi festivalıdır. Bu festival, İnklərin dövründəki ən əhəmiyyətli festivallardan biri idi, çünki qış gündönümü zamanı Günəş Tanrısına hörməti nümayiş etdirirdi. Maçu Pikçu qalasının inşasına əmr verən İnka Pachacutec, bu şənliyə ilk dəfə XV əsrdə başladı. Festival minillik epizodların səhnələşdirilməsi ilə başlayır. Ənənəvi musiqi fonunda milli geyimdəki 4 nəfər parad edir. Coricanchadakı təqdimat qızıl bağda keçirilir. İnkalar meydana çıxır və lama, alpaka, koka yarpaqlarının təklif edildiyi ilk rituallar həyata keçirilir.

4. Baratillo Market

Baratillo, Kuskonun ən məşhur bit bazarıdır. Çox sayda səyahətçinin varlığından belə xəbərdar olmadığı bazar, hər şənbə günü səhər saatlarından faəliyyətə başlayır. Baratilloda siz şəhərin mərkəzində gördüyünüz müxtəlif sənətkarlıq nümunələrini daha ucuz qiymətə əldə edə bilərsiniz. Baratillo bazarına getmək üçün tarixi mərkəzdə, Almagro küçəsi boyunca cənub-qərb istiqamətinə doğru hərəkət etməlisiniz. Santiago körpüsünə çatıb keçdikdən sonra bazarı görəcəksiniz.

5. Kuskoda qalmaq üçün ən yaxşı yerlər

Kusko, hər cibə uyğun əla otel təkliflərinə sahibdir. 2-3 ulduzlu otellər gecələmək və şəhəri kəşf edərkən əşyalarınızı saxlamaq üçün kifayət edəcəkdir. Bundan əlavə, bookinq veb saytlarından mənzil kirayəyələyə və ya səmimi bir xarakterininiz varsa və yeni insanlarla tanış olmağı sevirsinizsə, şəhərdəki Couchsurfing alternativlərini sınaya bilərsiniz. Lüks axtarışındasınızsa, Hilton Garden Inn, Novotel, JW Marriott El Convento otelləri tövsiyə olunanlar arasındadır.

6. Palcoyo

Limaya deyil də Kuskoya səyahət etməniz üçün səbəblərdən biri də, 7 rəngli, göy qurşağı dağı kimi tanınan Palcoyo dağıdır. Palcoyo göy qurşağı dağı gündəlik olaraq az ziyarətçi qəbul edir və İnstaqramlıq şəkillər çəkmək və ya sakitcə ətrafda gəzmək üçün idealdır. Palcoyo dağına yürüş, şəxsin fiziki göstəricilərindən asılı olaraq 30-45 dəqiqə arası çəkir.

7. İnklərin müqəddəs vadisi

İnklərin müqəddəs vadisi (ing. Sacred Valley of the Incas) şəhərin şimalında yerləşir. Vadi, gözəl mənzərələrdən zövq almaq və vadinin marşrutundakı bəzi arxeoloji yerləri ziyarət etmək üçün əla seçimdir. Müqəddəs vadiyə səyahətin ən yaxşı yolu turlardır. Burada olan arxeoloji mərkəzlərdən bəziləri: Pisacdakı İnk məzarlığı, Pisacdakı beynəlxalq bazar, Ollantaytambo, Chinchero.

8. Ay məbədi

Kuskodan bir qədər aralıda Ay məbədinin (ing. Temple of the Moon) arxeoloji qalıqlarına rast gəlinir. Məbədə turla getmək mümkündür, ancaq təkbaşına getsəniz, daha uzun müddət qala və məbəddəki orijinal arxeoloji qalıqlarla yaxından tanış ola bilərsiniz. Şəhərin təlaşından xilas olmaq istəyirsinizsə, Ay məbədi təbiətdə istirahət üçün ən yaxşı seçimlərdəndir.

9. Sacsayhuaman

Sacsayhuaman arxeoloji kompleksi Kuskoya səyahət zamanı görülməsi gərəkən yerlərdəndir və hal-hazırki qalıqların orijinal ölçünün yalnız 40%-i olduğu təxmin edilir. Siz Sacsayhuamanda müxtəlif qüllələr, tunellər və böyük qayalarla tikilmiş otaqlar tapa bilərsiniz. Plaza de Armas-dan Sacsayhuamana getmək üçün yolunuza İsveç küçəsindən, Huaynapata və Resbalosa boyunca davam edə bilərsiniz. San Cristobal kilsəsindən sonra Sacsayhuamana gedən yolu izləməlisiniz.

10. Corpus Christi

Peruda Limaya deyil də Kuskoya səyahət etmək üçün son səbəb: iyun ayında keçirilən Corpus Christi festivalı! Bu dini festival əhəmiyyətinə görə 2004-cü ildə Dövlətin mədəni irsi olaraq qeydə alındı. Corpus Christi, Kusko şəhərinə yürüşü təşkil edəcək müqəddəslərin yola düşməsi ilə başlayır. Yürüş zamanı varlılar iştirakçılara fərqli əşyalar və suvenirlər hədiyyə edirlər. Tədbir təşkilatçıları özləri ilə birlikdə şəhərin müqəddəsinin miniatür şəklini daşıyırlar. Bu şəkil cehiz adlanır.