Manaquada 12 İnstaqramlıq yer

Zəngin bioloji müxtəliflik, vulkanlar, çimərliklər və s. ölkəsi. Bu gün Nikaraquanın paytaxtı Manaqua haqqında danışacağıq. Son illərdə Nikaraqua turizm sektorunda məşhurlaşan ölkələrdən oldu. Hər il minlərlə insan həm paytaxt Manaquaya, həm də ölkənin digər şəhərlərinə səyahət edir. Bu artan tendensiyanı nəzərə alaraq, bu bloqda Manaquadakı görməli yerləri, ən əsası isə instaqramlıq yerləri kəşf edəcəyik.

Manaqua haradadır?

Manaqua Mərkəzi Amerika ölkəsi Nikaraquanın paytaxtı və ən böyük şəhəridir. Ümumi ərazisi 267,17 kvadrat km, əhali sayı 1,1 milyon nəfərdir. Şəhər Manaqua gölünun cənub sahillərində yerləşir. Bu göl turistik attraksionların sayını artırır və çox miqdarda balıq ehtiyatı təmin edir. Bunu da qeyd edək ki, əhalinin əksəriyyəti xristiandır (xüsusilə katolik). Nikaraquanın rəsmi pul vahidi Nikaraqua kordobasıdır, lakin ABŞ dolları vətəndaşlar tərəfindən geniş istifadə olunur. Ölkənin rəsmi dili isə bir çox Mərkəzi Amerika ölkələrində olduğu kimi, ispan dilidir.

Şəhər və ölkə haqqında ümumi məlumat aldıqdan sonra, Manaquadakı 12 instaqramlıq yeri tanımağın vaxtı gəldi.

1. Köhnə Manaqua Kafedralı

Manaquada gəziləcək yerlər arasında ilk qeyd etmək istədiyim Köhnə Manaqua kafedralıdır. Neoklasik memarlıq üslubuna sahib kafedralın xarici hələ də yaxşı vəziyyətdədir, ancaq daxili hissə üçün eyni sözləri deyə bilməyəcəm. Zəlzələ səbəbindən kafedralın interieri çox zədələnib. Onu da qeyd edək ki, içəriyə giriş hökumət tərəfindən qadağan edilib. Bu məhdudiyyətə baxmayaraq, kafedral Manaquada ziyarət ediləsi ən yaxşı yerlərdən biridir. Ayrıca, St James kafedralı və "Antigua Catedral de Managua" kimi adlarla da tanınır.

2. Puerto Salvador Allende

Daha əvvəl də dediyimiz kimi, Manaqua gölü turistlər və yerlilər üçün əla turizm seçimləri yaradır. Manaquada gəzməli olduğunuz gölkənarı yerlərdən biri də Puerto Salvador Allendedir. Bura həm siz, həm ailəniz üçün inanılmaz bir yerdir. Göl kənarında gəzin, təmiz sudan, ecazkar təbiətdən zövq alın və bundan sonra yaxınlıqdakı restoranların birində yemək yeyin. İnstaqram hesabınızda paylaşmaq üçün çoxlu şəkillər çəkmək şansınız da olacaq. Manaquanın əsrarəngiz mühiti  ən çox bəyənilən İnstaqram şəklinizi çəkməkdə sizə kömək edəcək. Parkinq yerlərinin olub-olmaması ilə maraqlanırsınızsa, əlbəttə ki, var və onları asanlıqla tapacaqsınız. Həftə sonu buranın sıxlıq olduğunu unutmayın.

3. Chocoyero - El Brujo Təbiət Qoruğu

Bu qoruq ilk növbədə, bioloji müxtəlifliyi və əzəməti ilə bizi cəlb edir. Şəhərin mərkəzindən təxminən 30 km məsafədədir və ananas, qəhvə və banan əkinləri sayəsində son 7-10 km daha cəlbedicidir. Yolun bu hissəsində dayanın, gözəllikdən zövq alın və İnstaqramda və digər sosial media platformalarında sizi izləyənlərlə bölüşmək üçün möhtəşəm şəkillər çəkin. Qoruq ərazisinə çatdıqdan sonra müxtəlif canlılarla qarşılaşmaq şansınız olacaq. Ağ üzlü kapuçin meymunları Chocoyero - El Brujo təbiət qoruğunun ən məşhur üzvləridir. Bəlkə də, səfər zamanı onları görməyəcəksiniz, çünki nadir hallarda ortaya çıxırlar. Qoruqda yaşayan digər məşhur meymun növü ulamaları ilə məşhur olan revun Alouattadır. Hikinq zamanı tədricən onların səslərini eşidəcəksiniz. Bu təbiət qoruğuna səfərin bir neçə yolu var. Bir vasitə icarəyə götürə və ya ictimai nəqliyyatdan istifadə edə bilərsiniz. Məsələn, Ticuantepedən yola çıxan bənövşəyi mikroavtobuslardan istifadə edə bilərsiniz (adambaşına 6 dollar). Qonaqlama üçün isə qeyd edə bilərik ki, yaxınlıqdakı otellərdə qala və ya sadəcə 5 dollara çadır kirayəyə götürə bilərsiniz. Manaqua ərazisində hava yay aylarında 22-30 Selsi dərəcədir, lakin bəzən (əsasən sentyabr) yağışlı ola bilər. Yağış sizin üçün böyük bir problem deyilsə, çadırda qalmağa üstünlük verə bilərsiniz.

4. Montelimar Çimərliyi

Montelimar çimərliyi bütün Mərkəzi Amerikanın ən füsunkar instaqramlıq yerlərindən biridir. Ölkənin ilk kurort oteli də Montelimarda açılıb. Təmiz su, ağ qum çimərliyi və ağaclar buranın simvoluna çevrilib. Gözəl təbiətdən zövq almaqla yanaşı, vindsörfinq, voleybol və s. kimi müxtəlif fəaliyyətlərdə iştirak edə bilərsiniz. Montelimar çimərliyinə necə getmək olar? Maşınla və ya avtobusla. Şəxsi nəqliyyat vasitələri üçün iki yol var. Biri Carretera Vieja a Leon-dan, digəri Carretera Sur-dan keçir. İctimai nəqliyyatdan istifadə etmək istəyirsinizsə, Israel Lewites Market terminalına getməlisiniz.

5. Tiscapa Tarixi Milli Parkı

Nikaraquanın mədəniyyəti və tarixi haqqında məlumatlarınızı genişləndirmək istəyirsinizsə, "Parque Historico Nacional Loma de Tiscapa"-nı ziyarət edə bilərsiniz. Keçmişdə burada işgəncə otaqları (Samoza ailəsinin hakimiyyəti dövründə), prezident sarayı (40 ildən çox müddətdə) və digər tarixi binalar var idi. Günümüzdə isə turlara qatıla və həmin binalardan geriyə qalan xarabalıqları araşdıra bilərsiniz. Əlavətən, burada Benito Mussolini tərəfindən göndərilən tank da görəcəksiniz. Tarix və mədəniyyət sizin üçün elə də maraqlı deyilsə, parka sadəcə Manaquanın əla görüntüsü üçün səyahət edə bilərsiniz. Çünki yuxarıdan bütün binaları və şəhər mənzərəsini müşahidə etmək həmçinin, instaqramlıq şəkillər çəkmək şansınız olacaq.

6. Laguna de Tiscapa

Daha əvvəl də dediyimiz kimi, Manaqua cəlbedici mənzərələrlə doludur və bunlardan biri də Tiscapa laqunudur. Laqun hazırda sönmüş hesab olunan vulkanın krater gölüdür və 15 hektar ərazini əhatə edir. Arxeoloqlar burada Kolumb öncəsi eraya aid çoxlu qədim qalıqlar tapdılar. Bundan əlavə, bir qrup insan İspaniyanın torpaqları fəth etməsindən əvvəl bəzi yerli qəbilələrin burada yaşadığına inanır. Bu faktlar sizin üçün həyəcanvericidirsə, daha ətraflı məlumat almaq üçün Tiscapadakı Canopy Tour və Tiscapa Tarixi Milli Parkındakı müxtəlif turlarda iştirak edə bilərsiniz.

7. Huembes Market

Roberto Huembes bazarı tərəvəz, meyvə, əl işləri, suvenirlər, paltarlar və daha bir çox şey əldə edə biləcəyiniz küçə bazarıdır. Buradakı qiymətlər alış-veriş mərkəzləri ilə müqayisədə çox əlverişlidir. Ancaq Huembes bazarında lüks və ya marka mallar əldə edəcəyinizi düşünməyin. Bu yer həm özünüzə, həm də sevdiklərinizə Nikaraquadan yadigar hədiyyə almaq üçün ideal məkandır. Ancaq qeyd etməliyik ki, bazar izdiham dolu ola bilər və satıcılar sizi narahat edə bilər.

8. Milli Muzey

Tarixsevərlər üçün Milli Muzey Manaquada ziyarət edilməsi gərəkən ən yaxşı yer ola bilər. Bu bir həqiqətdir ki, insanlar hər hansı bir ölkəyə səyahət edərkən mütləq muzeylərlə maraqlanırlar. Milli Muzeydə geniş çeşidli qədim əsərlər, müasir rəsmlər, heykəllər, sümüklər, keramikalar (4000 yaş) və s. var. Muzeydə "Natural History Room", "Paleontology Room", "Room of Pre-Columbian Ceramics", "Traditional Art Room", "Room of Latin American Paintings" və s. kimi müxtəlif otaqlar mövcuddur. Giriş haqqı isə sadəcə 2 dollardır.

9. Ruben Dario Milli Teatrı

1972-ci ildə Manaquada zəlzələ qeydə alındı və nəticədə bir çox hündür binalar zərər gördü, hətta yerlə-yeksan oldu. Ancaq bəzi binalar heç bir zərər görmədi və bunlardan biri də Ruben Dario Milli Teatrının binasıdır. Cəlbedici daxili, xarici dizaynı olan teatrda konfrans, kitab təqdimatı, moda nümayişi və konsertlərdə iştirak edə biləcəyiniz bir neçə otaq var. Teatrı ziyarətdən əvvəl bəzi qaydaları bilməlisiniz: dörd yaşınadək uşaqların girişi qadağandır, şort və şap-şap geyinə bilərsiniz, geciksəniz içəri girə bilməyəcəksiniz (şou başlayandan 15 dəqiqə sonra qapılar bağlanacaq).

10. Roberto Incer Barquero Kitabxanası

Yüzlərlə "like" alacaq İnstaqram şəkliniz olsun istəyirsiniz? O zaman Roberto Incer Barquero kitabxanasına gedin. Burada 67.000-dən çox kitab, pulsuz internet, köhnə qəzetlər və s. var. Bundan əlavə, eyni binanın içərisində görkəmli Nikaraqua sənətkarlarının bəzi rəsmlərinin müntəzəm olaraq sərgiləndiyi bir qalereya otağı da var. Kitabxanaya getmək üçün Siete sur-a gedən avtobuslardan istifadə edə bilərsiniz.

11. Huellas de Acahualinca Muzeyi

Huellas de Acahualinca muzeyi mədənçilər tərəfindən tapılan qədim ayaq izləri ilə məşhurdur. Arxeoloqlar bu ayaq izlərinin bir qrup insana (10 nəfər) aid olduğunu və 6000 ildən çox yaşı olduğunu söyləyirlər. Bu, Amerika qitəsindəki ən qədim izdir. Bundan əlavə, arxeoloqlar ərazidən keramika, mamont qalıqları, kəllə və s. tapıblar. Muzeyi ziyarətiniz zamanı çoxlu instaqramlıq şəkil çəkə bilərsiniz. Muzeyin yanında kitabxana da var. Muzeyə giriş haqqı əcnəbi tələbələr üçün 0,2 ABŞ dolları, böyüklər üçün 0,67 ABŞ dollarıdır.

12. Manaqua Akvaparkı

Hikinqlə məşğul olduqdan və Nikaraquanın mədəniyyəti, tarixi haqqında məlumat aldıqdan sonra istirahət etməyin vaxtı gəldi. Manaqua akvaparkı bütün problemlərinizdən qurtulmaq üçün ideal yerdir. Xüsusilə uşaqlar bu yeri çox sevəcək. Onu da qeyd edək ki, akvaparkda qiymətlər (giriş haqqı, restoran, kafelər) çox münasibdir.