Pekində 12 İnstaqramlıq yer

Deməli, Pekinə səyahət etmək qərarına gəldiniz, ancaq Pekində nə edəcəyinizi bilmirsiniz, o zaman doğru yerdəsiniz. Bu yazıda Pekində görməli yerlər, ediləcək fəaliyyətlər, Çin Xalq Respublikasının paytaxtındakı ən instaqramlıq yerlərlə tanış olacaqsınız. Bəs Pekin haradadır?

Şimali Çində yerləşən şəhər, cənub-şərqdəki qonşu Tyantszin istisna olmaqla, əsasən Hebei vilayəti ilə əhatə olunmuşdur. Bu üç bölgə birləşərək Jingjinji meqalopolisini və Çinin milli paytaxt bölgəsini təşkil edir.

Pekində ziyarət edilməsi gərəkən çoxlu yerlər var, ona görə də bu nəfəs kəsən mənzərələrlə dolu ecazkar şəhəri ziyarət etdikdən sonra İnstaqram səhifənizin daha rəngli olacağından əmin ola bilərsiniz. Buyurun, Pekində 12 instaqramlıq yer.

1. Yasaq Şəhər

Yasaq Şəhər Pekində ziyarət ediləcək yerlərin başında gəlir. Doğrudur ki, şəhərdə kəşf edilməsi gərəkən çoxlu instaqramlıq yer var, ancaq bu məkanı görmədən qayıtmaq həqiqətən günah olardı. Qədim imperial sənət əsərləri ilə dolu olduğundan, xəyallarınızdakı İnstaqram fotosessiyasını burada gerçəkləştirə bilərsiniz. Əgər şəkillərinizin arxa fonunda ətrafı kəşf edən turistlərin olmağını istəmirsinizsə, Yasaq Şəhəri səhər tezdən ziyarət edin.

2. Galaxy Soho

Pekində getmək üçün çoxlu yer var və bəlkə də onların hamısını ziyarət etmək üçün kifayət qədər vaxtınız olmaya bilər, ancaq Galaxy Soho-nu ziyarət etmək fürsətini heç bir halda əldən verməyin. Pekin yüz illik tarixi binalarla dolu olsa da, eyni zamanda futuristik bir şəhərdir və Çinin ən möhtəşəm əlamətdar yerlərindən bəziləri məhz burada yerləşir.

Galaxy Soho şəhərin futuristik xüsusiyyətlərinin gözəl bir nümunəsidir. Buradakı mağazaları və restoranları kəşf etmək sci-fi filmdə olmaq kimidir. Ən çox bəyənilən İnstaqram şəkilinizi Galaxy Soho-da çəkəcəyinizdən əmin ola bilərsiniz.

3. 798 Sənət Zonası

Pekinin şimal-şərqindəki 798 Art Zone haqq etdiyi dəyəri görməyən yerlər arasındadır. Bölgəyə getmək elə də asan deyil, çünki Jiangtai stansiyasında düşüb taksiyə minməlisiniz. Bununla birlikdə, məkan özünüzə bir qədər əziyyət vermənizə dəyər. 798 Sənət Zonası çoxlu sevimli kafelərə, ecazkar sənət qalereyalarına, muzeylərə və milyonlarla valehedici küçə sənətinə ev sahibliyi etdiyindən olduqca instaqramlıqdır. Küçələrdə gəzərkən freskalar, heykəllər və qrafiti ilə dolu divarlarla qarşılaşacaqsınız. İnanın ki, Pekinin ağlınıza belə gətirmədiyiniz bu yanı sizi heyran edəcək.

4. Səma Məbədi

Bu məbəd də Pekində mütləq şəkildə ziyarət edilməsi gərəkən ən yaxşı yerlərdən biridir. Məbəd inanılmaz bir mədəni yer olması ilə yanaşı, sosial media izləyicilərinizi heyran qoyacaq şəkillər çəkə biləcəyiniz məkanlardan biridir. Şəkillərinizdə məbəddəki parlaq detalların mükəmməl əks etdirmə qabiliyyətindən istifadə etmək istəsəniz, buraya günortadan sonra səfər etmənizi məsləhət görürük.

5. Böyük Çin Səddi

Böyük Çin Səddi haqqında yəqin ki, eşitmisiniz və bilirsiniz ki, Çinə səyahət bu inanılmaz möcüzəni görmədən tamamlanmış sayıla bilməz. Böyük Çin Səddini ziyarət edərkən turistlərin ilk seçimi Badaling olur, ancaq izdihamdan uzaqlaşmaq istəyirsinizsə, buradan bir qədər aralıda yerləşən Mutianyu hissəsini tərcih edə bilərsiniz. Badaling əla infrastruktura malikdir, Mutianyu isə gözəl bir şəkildə bərpa edilmişdir.

Dünyanın yeddi möcüzəsindən biri olan Çin Səddini funikulyorlar vasitəsilə asanlıqla kəşfə çıxa bilərsiniz.

6. CCTV Baş Qərargahı

234 metr hündürlüyündə olan CCTV Baş Qərargahı Pekinin mərkəzi biznes bölgəsində yerləşir. Çoxları bu binanı keçmiş televiziya qülləsi ilə qarışdırır. Ancaq siz bu bloqu oxumaqla, bianaların adının çox oxşamasına baxmayaraq fərqli yerlər olduğunu öyrənmiş oldunuz.

Buradan rəngarəng üfüq xəttini və Pekinin ecazkar şəhər mənzərəsini görə biləcəksiniz. Bu möhtəşəm binaya açıq terrasda şam yeməyi edib şərabınızı yudumlayarkən baxmaq istəyirsinizsə, Blue Frog restoranına gedə bilərsiniz.

7. Beihai Park

Pekində nə etməli? Pekində ediləcək çox şey var və bunlardan biri də Beihai parkına getməkdir. Bu gözəl park əvvəllər imperatorluq bağı olsa da, hal-hazırda xalqa açıqdır. Beihai Park turistlər üçün də ən əlverişli seçimlərdən biridir. Parkdakı göl mövsümdən asılı olmayaraq əla əyləncə məkanıdır. Buranı yay aylarında ziyarət etsəniz sarı rəngli ördək şəklindəki qayıqlarla gölü kəşfə çıxmağı unutmayın. Qışda isə konkilərinizi özünüzlə gətirin.

8. Hutonglar

Hutong Çində, xüsusən də Pekində rast gəlinən dar küçələrə və ya köhnə xiyabanlara verilən addır. Hutongları araşdırmaq Çinə səyahətinizdə etməniz gərəkən fəaliyyətlərdən biridir. Pekinin ən qədim məhəllələri əsasən Pekinin mərkəzindəki Yasaq Şəhər ətrafında yerləşir.

Yerli sakinlərin həyatını yaxından müşahidə etmək istəyirsinizsə, turistlərdən uzaqlaşmalı və bu küçələrdə gəzməlisiniz. Hutonglarda çəkilən şəkillər İnstaqram izləyicilərinizi heyran edəcək.

9. İxeyuan Yay Sarayı

Fantastik Çin memarlığı və qədim sənət nümunələri ilə yanaşı, heyranedici göl mənzərələri təqdim edən saraya səfər üçün tam bir günə ehtiyacınız olacaq. Sürətli hərəkət etsəniz, saray turunu daha tez də bitirə bilərsiniz, ancaq daha sonra çox yorğun hiss edəcəksiniz.

İxeyuan Yay Sarayını təkbaşına və ya bir qrup turistlə birgə turla kəşf edə bilərsiniz. Burada üç əsas sahə var: kompleks, Vanşouşan təpəsi (Uzunömürlük dağı) və Kunminxu gölü. Ən təsirli olan Uzunömürlük dağı, ən dinc olan isə Kunminxu gölüdür. Göldə qayıq turuna çıxmaqla sarayın möhtəşəm şəkillərini çəkə bilərsiniz.

10. Shichahai

Shichahai Pekində ziyarət ediləcək yerlər siyahınızda mütləq olmalıdır. Əgər Pekindəki təlaşdan bezsəniz, qaçacağınız yer sizə məlumdur. Burada üç göl var: Qianhai (ön göl), Houhai (arxa göl) və Xihai (qərb gölü). Bir söyüd ağacının kölgəsində oturmanızı və bütün bu gərginliklərdən arınmanızı məsləhət görürük. Ancaq bununla yanaşı, Houhai Bar Street-də pivə içə və ya küçədə satılan qeyri-adi yeməklərdən də yeyə bilərsiniz.

11. Red Bowl

Pekinə getdiniz, görməli yerləri gəzdiniz, indi isə yemək yeməyin vaxtıdır. Əgər rahat bir atmosferdə oturmaq istəyirsinizsə, Red Bowl-a baş çəkin. Bu restoran fotogenikdir, yeməkləri isə ikonik və çox dadlıdır. Bildiyimiz kimi, Çin mətbəxi inanılmaz yeməklər və ağlasığmaz qidalarla doludur. Odur ki, həm restoran, həm də yeməklər izləyiciləriniz heyran etməyə qadirdir.

12. Jingshan Park

Pekində instaqramlıq yerlər siyahımızda sonuncu Jingshan parkıdır. Yalnızca 15 dəqiqə vaxtınızı ayırmaqla Pekin şəhərinin ən yüksək nöqtələrindən birinə pilləkənlərlə qalxa və Beihai parkından Drum və Bell qülləsinə qədər hər şeyi və əlbəttə ki, Yasaq Şəhəri bütünlüklə görə bilərsiniz. Parkı gün batımında ziyarət etməklə ikiqat möhtəşəm instaqramlıq şəkillər çəkə bilərsiniz.