Monako vizası haqqında vacib məlumatlar

Dünyadakı ikinci ən kiçik ölkə olan Monako hər il bir çox turist özünə cəlb edir. Qəribədir ki, Monakonun yalnız Fransa ilə sərhədləri var. İnsanlar Monako haqqında düşünəndə onların ağlı qarışır. Monako müstəqil dövlətdir? Bəli, bu şəhər-dövlət 1297-ci ildən etibarən müstəqildir. Bəs niyə insanlar Monako haqqında yanlış düşüncələrə malikdirlər? Çünki dövlət müstəqil olsa da, Monakonun viza siyasəti də daxil olmaqla xarici əlaqələri Fransa qanunlarına görə tənzimlənir. Bu məqalə əsasən Monako vizası, Monako viza tələbləri, Monako vizasını əldə etməyin yolları və s. üzərində fokuslanacaq.

Monako viza siyasəti

Monako viza siyasəti Fransa viza siyasəti ilə identikdir. Yəni Fransa vizası əldə etməklə Monakoya da səyahət etmək hüququ qazanacaqsınız. Əgər Fransaya səfər də xəyalınızdadırsa, bir daşla iki quş vura bilərsiniz. Başqa bir qəribə fakt daha: Monako Şengen bölgəsinə üzv dövlət olmasa da, viza siyasəti Şengen qaydalarına uyğun olaraq tənzimlənir.

Monakoya səyahət üçün kimlərə viza lazımdır? Bunu cavablamaq üçün vətəndaşı olduğunuz ölkənin Monako ilə viza statusunu yoxlamalısıniz. Avropa ölkələrindən başqa, aşağıdakı ölkələr Monako vizasız ölkələrdir:

Avstraliya, Antiqua və Barbuda, Argentina, Bahamalar, Barbados, Braziliya, Bruney, Kanada, Çili, Kolumbiya, Kosta-Rika, Dominika, Salvador, Gürcüstan, Qrenada, Qvatemala, Honduras, Honkonq, İsrail, Yaponiya, Kiribati, Makao, Malayziya, Marşall adaları, Mauritius, Meksika, Mikroneziya, Yeni Zelandiya, Nikaraqua, Palau, Panama, Paraqvay, Peru, Sent-Kits və Nevis, Sent-Lüsiya, Samoa, Seyşel adaları, Sinqapur, Solomon adaları, Cənubi Koreya, Sent-Vinsent və Qrenadin, Tayvan, Timor-Leste (Şərqi Timor), Tonqa, Trinidad və Tobaqo, Tuvalu, Birləşmiş Ərəb Əmirlikləri, ABŞ, Vanuatu, Venesuela, Ukrayna, Uruqvay.

Əgər siz bu ölkələrin birinin vətəndaşı deyilsinizsə, Monako vizası üçün müraciət etməlisiniz. Bu məqsədlə əvvəlcə ölkənizdə Monako səfirliyi və ya konsulluğunun olub-olmadığını yoxlamalısınız. Nəzərə alın ki, bir çox hallarda viza müraciətləri Fransa səfirliyi və ya konsulluğu tərəfindən qəbul edilir.

Monako vizasını necə əldə edəcəyinizi bilmirsinizsə, narahat olmayın, çünki bütün proseduru addım-addım izah edəcəyik.

Monako vizasının növləri və tələbləri

Monako vizalarını iki qrupa bölmək olar:

• Monako qısamüddətli vizaları

• Monako uzunmüddətli vizaları

Qısamüddətli vizalar Şengen vizaları hesab olunur və ziyarət məqsədlərinə görə müxtəlif növləri təyin edilir. Onlar:

• Turizm

• Mədəni ziyarət

• İdman

• Rəsmi səfər

• Tibbi səbəblər

• Ailə və ya dostları ziyarət

• Biznes

• Təhsil

• Tranzit

Bəs Monako viza tələbləri nələrdir? Demək olar ki, bütün növ vizalar üçün oxşar sənədlər təqdim etməlisiniz. Ancaq ziyarət məqsədindən asılı olaraq, bir-iki əlavə sənəd də tələb oluna bilər. Ümumilikdə Monako vizası üçün tələb olunan sənədlər bunlardır:

• Müraciət forması - Fransa Şengen vizası üçün doldurulan ərizədir.

• İki şəkil - pasport şəkili formatının tələblərinə cavab verməli və üzü tam əks etdirməlidir. Arxa plan ağ və ya açıq rəngdə olmalıdır. Fotonun ölçüsü 3.5x4.5 olmalıdır. Şəklin 70-80%-ini üzün ön hissəsi əhatə etməlidir. Üz ifadəsi olmamalı və gözlər tam açıq olmalıdır. Geyimin fondan fərqli rəngdə olması məsləhət görülür.

• Pasport və əsas səhifəsinin sürəti - pasportunuz geri dönüş tarixindən sonra ən azı üç ay müddətində etibarlı olmalıdır. İstifadə edilməmiş iki səhisəsinin olması da vacibdir.

• Köhnə Şengen vizalarının surətləri - ərizəçi əvvəlki Şengen vizalarının surətlərini təqdim etməlidir.

• Yaşadığınız ölkə və vətəndaşlığınız fərqlidirsə, yaşayış icazəsi və ya vizasının surəti təqdim edilməlidir. Sənədin qayıdış tarixindən sonra ən azı 3 ay müddətində etibarlı olması vacibdir.

• Şəxsiyyət vəsiqəsinin surəti

• Bilet bronu - Şengen zonasına giriş və çıxış tarixləri göstərilməlidir.

• Səyahət sığortası - Minimum sığorta təminatı 30000 avrodan az olmamalıdır.

• Qonaqlama yerini təsdiq edən sənəd - oteldə qalacaqsınızsa, bu otel bronu olmalıdır. Mənzil kirayələyirsinizsə, kirayə müqaviləsi təqdim olunmalıdır. Monakoda və ya Fransada mülk sahibi olanlar mülkiyyət sənədi təqdim etməlidir.

• Ərizəçinin ailə vəziyyətini göstərən sənədlər – bu, nikah haqqında şəhadətnamə, uşaqlarınızın doğum şəhadətnaməsi və s. ola bilər.

• Ölkədə qalacağınız müddətdə kifayət qədər maliyyə imkanlarınızın olduğunu sübut edən sənədlər.

• Peşəkar statusunuzu göstərən sənəd – universitetdən məktub, iş yerindən arayış, əmək müqaviləsi, pensiya müqaviləsi və s. ola bilər.

• Yetkinlik yaşına çıxmayan şəxsin müşayiət olunmadan səyahət etməsi halında, valideynlərinin və ya qəyyumlarının razılığını göstərən məktub təqdim etməlidir. Şəxs valideynləri ilə səyahət edirsə, doğum haqqında şəhadətnamə təqdim edilməlidir.

Qeyd etmək lazımdır ki, viza müraciətlərinin qiymətləndirilməsi 5-25 gün arasında davam edir. Ancaq bəzi növ vizalarda (vəziyyətdən asılı olaraq) 5 gündən az da çəkə bilər.

Monako biznes vizası

Monakonu işgüzar məqsədlələ əlaqədar olaraq ziyarət etməyi planlaşdıranlar, Monako biznes vizası tələblərini bilməli və bir qədər öncə qeyd edilmiş sənədlərlə birdə aşağıdakıları təqdim etməlidirlər:

• Ziyarət məqsədinizi göstərən sənədlər

• Dəvət məktubu

• Ərizəçi fərdi sahibkardırsa, bunu təsdiq edən sənəd

Monako mədəni və idman vizası

Mədəni tədbirə qatılmaq istəyən və ya bu məqsədlə dəvət alan şəxslər üçün yeganə əlavə tələb təşkilatçının adını, adresini, əlaqə məlumatlarını (telefon nömrəsi, email adresi), dəvət edən şəxsin adı və vəzifəsini, tədbirin məqsədini və müraciətçinin iştirakının rolunu, qalma müddətini, səyahət və yaşayış xərclərini qarşılayacq şəxs və ya qurumun adını özündə ehtiva edən dəvət məktubudur.

İdman vizası üçün müraciətdə də eyni məlumatları əks etdirən dəvət məktubu və ya idman tədbirində izləyici və ya qonaq kimi iştirakınızı təsdiqləyən giriş bileti və ya qəbzi təqdim edilməlidir.

Bu viza növlərini necə əldə edəcəyinizi bilmirsinizsə, narahat olmayın, şərtlər digərləri ilə eynidir. Yəni sənədləri Fransa və ya Monako konsulluğuna/səfirliyinə təqdim etməlisiniz. Unutmayın ki, idman vizası bəzi hallarda 5 gündən az müddətdə əldə edilə bilər.

Monako rəsmi səfər vizası

Monako viza müraciət formunu doldurduqdan və standart Şengen sənədlərini təqdim etdikdən sonra, əlavə sənəd təqdim etməyiniz xahiş olunur:

• Rəsmi görüşlərdə və ya danışıqlarda iştirak edəcək nümayəndə heyətinin üzvü olduğunuz barədə müvafiq dövlət orqanından və ya təşkilatı tərəfindən imzalanmış və möhürlənmiş təsdiq məktubu

Monako tibbi səbəblər vizası

Monakoda tibbi bir prosedurdan keçmək istəyirsinizsə (əməliyyat, müalicə), sizdən aşağıdakı məlumatları ehtiva edən sənəd/dəvət məktubu təqdim etməyiniz istənəcəkdir: tibb müəssisəsinin və imza atan şəxsin şəxsi və əlaqə məlumatları, sizin doğum tarixiniz, vətəndaşlığınız, ödəniş detalları, müalicə müddəti və s.

Monakoda ailə və dostları ziyarət vizası

Ailə və dostları ziyarət etmək üçün Monako vizası tələbləri:

• Ərizəçi sənədlərlə birlikdə səfərinin səbəblərini göstərməlidir. Bu sənədlərdə ərizəçinin dəvət edən şəxslə əlaqəsi və harada qalacağı göstərilməlidir. Ərizəçinin cənazəyə getməsi halında, şəxsin ölümünü və ərizəçinin mərhumla əlaqəsini göstərən sənəd təqdim edilməlidir.

Monako təhsil vizası

Monakoda qısamüddətli təhsil proqramlarına, dil kurslarına qatılmaq istəyən şəxslər aşağıdakı əlavə sənədi təqdim etməlidirlər:

• Ərizəçinin kurs qediyyatını, təhsil proramında iştirakını sübut edən və ödəniş detallarını, səfər müddətini, qurumun əlaqə məlumatlarını göstərən sənəd

Monako vizası rüsumu

Viza müraciətini tamamlamaq üçün 80 avro rüsum ödənilməlidir. 6-12 yaş arası uşaqlar üçün bu rəqəm 40 avrodur. 6 yaşdan kiçik uşaqlar üçün isə heç bir ödəniş tələb olunmur. Bundan başqa, AB ilə Azərbaycan, Albaniya, Bosniya və Herseqovina, Ermənistan, Kosovo, Gürcüstan, Şimali Makedoniya, Moldova, Rusiya, Serbiya, Ukrayna, Monteneqro arasında imzalanan müqavilə sayəsində bu ölkələrin vətəndaşları üçün viza rüsumu 35 avro təşkil edir.