Niderland iş vizasını necə əldə etmək olar?

Köhnə bir deyim var: "Dünyanı Tanrı, Hollandiyanı hollandlar yaratdı". Bunu niyə deyirəm? Çünki onların hansı dərəcədə bacarıqlı olduğunu ifadə etməyə çalışıram. Bu kiçik ölkədən olan insanlar tarixə çox böyük təsir göstərmiş, onun istiqamətini dəfələrlə dəyişmişlər. Qərbi Avropada yerləşən Hollandiya bir çox cəhətdən ən bənzərsiz ölkələrdən biridir. 1700-cü ildə Hollandiya imperiyası bütün dünyaya yayılmış torpaqlara sahib idi, indi isə sadəcə Hollandiya ilə kifayətlənirlər. Ancaq gücündən heç bir şey itirməyib, sadəcə formasını dəyişib. Bir vaxtlar qlobal ticarət gücü idi, indi isə dünyanın ən çox məhsul ixrac edən ölkələrindən biridir. Dünyanın müxtəlif yerlərindən olan insanların Hollandiyada iş axtarması təəccübləndirici deyil. Hollandiyadakı iş mədəniyyəti xüsusilə beynəlxalq bizneslər üçün əlverişlidir. Fərqli sektorlara tətbiq olunan bir çox innovasiyaları görürük. İnsanları Niderlanda gəlməyə cəlb edən şeylərdən biri də təhsildir. Avropadakı iş mərkəzlərindən biri olaraq Hollandiyadakı müəssisələr ən güclü əlaqələrə və şəbəkələrə malikdir. Odur ki, məzunların çoxu karyeralarına çox nüfuzlu şirkətlərdə başlayırlar. Tələbatı nəzərə olaraq, Niderland iş vizası haqqında yazmağın bu ölkədə işləmək istəyənlər üçün faydalı ola biləcəyini düşündük. Əhatə edilməsi gərəkən çox şey var. Hollandiya iş vizası tələblərinə, proses müddətinə baxacaq, amma ən vacibi, Hollandiya iş vizasının necə alınacağına dair suallarınıza cavab verməyə çalışacağıq. Ancaq əvvəlcə Hollandiya viza siyasətinə nəzər salaq.

Hollandiya viza siyasəti

Hollandiya viza siyasəti ölkələr arasındakı qarşılıqlı əlaqələrdən və razılaşmalardan asılı olaraq dəyişə bilər. Bəzi ölkələr viza qaydalarına tabedir. Bu səbəbdən ölkələri vizasız və viza tələb olunan olmaqla iki qrupa ayıra bilərik. Aşağıdakı siyahı viza qaydalarına tabe olmayan və ya başqa sözlə vizasız ölkələrdir:

AB, Avstraliya, Antiqua və Barbuda, Argentina, Baham adaları, Barbados, Braziliya, Kanada, Çili, Kolumbiya, Kosta-Rika, Dominika, Salvador, Gürcüstan, Qrenada, Qvatemala, Honduras, Honkonq, İsrail, Yaponiya, Kiribati, Makao, Malayziya , Marşall adaları, Mauritius, Meksika, Mikroneziya, Yeni Zelandiya, Nikaraqua, Palau, Panama, Paraqvay, Peru, Sent-Kits və Nevis, Sent-Lüsiya, Samoa, Seyşel adaları, Sinqapur, Solomon adaları, Cənubi Koreya, Sent-Vinsent və Qrenadin, Tayvan , Timor-Leste (Şərqi Timor), Tonqa, Trinidad və Tobaqo, Tuvalu, Birləşmiş Ərəb Əmirlikləri, ABŞ, Vanuatu, Venesuela, Uruqvay.

Əgər ölkəniz siyahıda deyilsə, bu ölkədə qalmaq və işləmək üçün Hollandiya iş vizasına müraciət etməlisiniz. Hollandiyaya səyahət üçün hansı növ vizalar var? Ümumiyyətlə, vizalar uzunmüddətli və qısamüddətli olaraq təsnif edilir. Təxmin etdiyiniz kimi, qısamüddətli vizalar kiçik zaman dilimini əhatə edən, uzunmüddətli vizalar isə daha çox qalmağa imkan verən viza növləridir. İş vizası uzunmüddətli vizalar qrupuna aiddir. Hollandiya iş vizası almaq rəqabət tələb edir. Bu səbəblə, Hollandiya iş vizasına müraciət proseduruna başlamazdan əvvəl yaxşıca hazırlanmanız məsləhətdir.

Hollandiya üçün hansı növ iş vizaları var?

Bildiyiniz kimi, iş vizaları Hollandiyada qalmaq və işləmək istəyən insanlar üçün nəzərdə tutulmuşdur. Hollandiya iş vizasının bir neçə növü var. Ancaq bu yazıda ən çox tətbiq olunan iş vizalarından bəhs edəcəyik. Bunlar GVVA / Tək icazə, yüksək ixtisaslı miqrant icazəsi, əcnəbi məzunlar üçün oriyentasiya ili icazəsi, sahibkar icazəsi və Hollandiya təhsil sonrası iş vizasıdır.

GVVA / Tək icazə Hollandiyada 3 aydan çox işləməyinizə imkan verir. Müraciət işəgötürən tərəfindən edilir və özünəməxsus şərtləri var. Əsas odur ki, işəgötürən daha öncə AB və Hollandiya daxilində uyğun bir işçi tapmağa çalışdığını amma tapa bilmədiyini və beləcə AB xaricinə müraciət etdiyini göstərsin.

Haqqında danışacağımız ikinci növ hollandiyalı işəgötürənlər tərəfindən qabiliyyətli işçilər tapmaq və onları işlə təmin etmək üçün istifadə edilən yüksək ixtisaslı miqrant icazəsidir. Daha az vaxt tələb olunmasına və daha rahat olmasına baxmayaraq, bu növ icazə üçün yüksək rəqabət var. Yüksək dərəcəli ali təhsil və sahənizdə təcrübəyə sahib olmaq vacibdir.

Əcnəbi məzunlar üçün oriyentasiya ili icazəsi bu yaxınlarda məzun olmuş və Ph.D dərəcəsinə sahib olanlara verilə bilər. İcazənin müddəti üç ildir və yalnız Hollandiya universitetlərindən deyil, digər ölkələrin nüfuzlu universitetlərindən məzun olanlara da verilir.

Hollandiyada biznes qurmaq istəyən şəxslər sahibkar icazəsi üçün müraciət edə bilərlər. Bununla birlikdə, bu növ iş vizasına uyğun olmaq üçün müəyyən qabiliyyətlərə sahib olduqlarını sübut etməlidirlər.

Hollandiya təhsil sonrası iş vizası orientasiya ili icazəsinə bənzəyir. Lakin, oriyentasiya ili icazəsindən fərqli olaraq, bu vizaya təkcə elmlər namizədləri deyil, həm də bakalavr və magistr dərəcəsi olanlar da müraciət edə bilərlər. Əsas fərq isə budur ki, bu vizaya müraciət edə bilmək üçün Hollandiya universitetini bitirməlisiniz.

İş vizası tələbləri, rüsumu və proses müddəti

Daha əvvəl də qeyd etdiyimiz kimi, bu viza milli vizadır və qaydaları Hollandiya hökuməti tərəfindən tənzimlənir. Aşağıdakı siyahıda Hollandiya iş vizası tələblərini tapa bilərsiniz:

• Ərizəçi tərəfindən ingilis və ya holland dilində doldurulmuş, imzalanmış və tarixlənmiş müraciət forması.

• Hollandiya ərazisindən ayrıldıqdan sonra 6 ay müddətində etibarlı olacaq pasport tələb olunur. Sənəd ərizəçinin imzasını daşımalı və ən çox 10 il əvvəl verilmiş olmalıdır. Ən azı iki boş səhifəyə sahib olmalıdır.

• Bu yaxınlarda (son 6 ayda) çəkilmiş üç fotoşəkil. Şəkilin 70-80 faizini ərizəçinin üzünün ön hissəsi əhatə etməlidir. Arxa plan ağ rəngdə olmalıdır. Uniformada olmağınız və üz ifadələri göstərməməniz də tələblər arasındadır.

• Hollandiya ərazisini tərk etdikdən sonra üç ay müddətində etibarlı qalacaq milli şəxsiyyət vəsiqəsi tələb olunur.

• Müraciətçinin yaşadığı və vətəndaşı olduğu ölkə fərqli olarsa, yaşayış icazəsi və ya vizasının surətini təqdim etmək lazımdır.

• Keçmiş Şengen vizalarının və pasportun əsas səhifəsinin surətləri.

• Hollandiyada işləyəcəyinizi təsdiq edən sənədlər. Ümumi işdirsə, universitet dərəcələri, sertifikatlar lazımdır. “Blue Card” namizədləri üçün, Hollandiya universitetindən və ya bərabər hüquqlu universitetdən diplom.

• İş təcrübələrinizi, qabiliyyətinizi, sertifikatlarınızı və s. nümayiş etdirən CV.

• Ərizəçinin Hollandiyada qonaqlama yerinin olacağını təsdiq edən sənədlər. Bu, otel rezervasiyası ola bilər.

• Son 6 ay ərzində alınmış son 5 il üçün məhkumsuzluq arayışı.

• Ərizəçinin ictimai sağlamlığa təhlükə yarada biləcək heç bir problemi olmadığını sübut edən səlahiyyətli həkim tərəfindən verilmiş və təsdiq edilmiş tibbi arayış.

Hollandiya iş vizası almaq bir qədər yorucu ola bilər. Müraciəti necə edəcəyinizi bilmirsinizsə, xüsusilə çətin ola bilər. İş vizasının növündən asılı olaraq, müraciət prosesindəki iştirakınız dəyişə bilər. Bəzi növlər mütləq iştirakınızı tələb etdiyi halda, əksəriyyəti üçün müraciət işəgötürən tərəfindən aparılır. Bütün müraciətlər “Immigration and Naturalisation Service (IND)” qurumuna yönəldiləcək. Hollandiya iş vizası proseduru haqqında daha ətraflı məlumat almaq üçün IND-in rəsmi saytına baxa bilərsiniz.

Hollandiya iş vizasına baxılma müddətinə gəldikdə, bu bir çox faktordan asılı olaraq dəyişə bilər. Qısamüddətli vizalardan fərqli olaraq, iş icazələrinin işlənməsi bir qədər uzun çəkir. Müraciətlərin çoxuna 7 həftə ərzində baxılır. Ancaq qanuni müddət məhdudiyyəti 90 gündür. Hollandiya iş vizası rüsumuna gəldikdə, bu bir çox faktordan asılı olaraq dəyişir. Məsələn, özünüməşğulluq halında 1300 avro olan rüsum, digər iş icazələri üçün 300 avro civarındadır.

Sonda deyə bilərik ki, Hollandiya iş vizası almaq çətin olsa da buna dəyər. Məsləhətim əvvəlcə hansı növün sizin üçün uyğun olduğunu müəyyən etmək, daha sonra prosedurlara başlamaqdır, çünki hər növlə bağlı fərqli nüanslar var.