Niueyə səyahət üçün səbəblər

Sakit okean ada ölkələri qorunub saxlanılan yerli mədəniyyəti və dili, ecazkar təbii xəzinələri ilə bənzərsiz turistik yerlər arasındadır. Bu ölkələrdən biri olan Niueyə səyahət edib kəşf etməyə dəyər. Niue məşhur turistik şəhər və rayonları ziyarət etməkdən bezən səyahətçiləri cəlb edir. Niue haradadır? Bir ada ölkəsi olaraq, Niue Cənubi Sakit okeanda yer almaqdadır. Niue coğrafi baxımdan Yeni Zelandiya, Samoa, Kuk Adaları və Tonqa ilə yaxındır. Niuenin paytaxtı haradır? Alofi, Niuenin paytaxtıdır. Bu Cənubi Sakit okean ölkəsi, 14 kənddən ibarətdir və ən böyüyü Niuenin paytaxtı - Alofidir. Niue dili nədir? İngilis və niuecə ölkədə geniş yayılmış rəsmi dillərdir. Niueni nə qədər insan ziyarət edir? Rəsmi dövlət statistikasına görə, bu Sakit okean adasını hər il təxminən yeddi min insan ziyarət edir. Niueni ziyarət etmək üçün ən yaxşı vaxt nə vaxtdır? May və oktyabr ayları arasındakı mövsüm Niueni ziyarət etmək üçün ən yaxşı vaxtdır. Çünki yay mövsümündə hava şəraiti quraq, isti və sabitdir. Biz Niue haqqında bəzi əsas faktları öyrəndik, indi isə Niueni ziyarət etmək üçün səbəblərdən bəhs etmə zamanıdır. Sizi Niue adasına səyahət etməyə təşviq edəcək yerli mədəniyyət, füsunkar təbiət, əla turizm imkanları və ləzzətli mətbəxdən bəhs edəcəyik. Ayrıca, Niueyə necə getməyin detallarını da izah edəcəyik.

Niue mədəniyyəti, sənətkarlıq və festivallar

Niue mədəniyyəti incə əl sənətləri, yerli musiqi, ənənəvi mərasimlər və dini praktikalarla olduqca zəngindir. Niue qadınları rəngləri və naxışları ilə turistləri heyran edən müxtəlif papaqlar, paltarlar və çantalar toxuyurlar. Həmçinin Niue xalqı əl işlərini çox münasib qiymətə satır. Niue mədəniyyətini təmsil edən əl işi sənət əsərləri sevdikləriniz üçün ən yaxşı hədiyyələrdən biri olacaqdır. Niue mədəniyyətinin başqa bir həyəcan verici elementi Vaka adlanan ənənəvi kanoedir. Yerli xalq min illərdir ki, Sakit okeandan qida əldə etmək üçün Vakadan istifadə edir. Ənənəvi kanoelərdən gündəlik məqsədlər üçün hələ də geniş istifadə olunur. Yerli əhali kanoeləri uzun bir müddət özənlə oyaraq hazırlayır. Niue adasına səyahətiniz zamanı çox əyləncəli olan kanoe oyma ilə məşğul ola bilərsiniz.

Bundan əlavə, Niuedəki tətilinizdə sənət qalereyalarını ziyarət edə bilərsiniz. Tahiono qalereyası 1990-cı illərdən bəri yerli rəssamların əsərlərini sərgiləyir. Niue incəsənəti yerli sənətkarlar tərəfindən təbii parçalar üzərində çəkilmiş xüsusi rəsmlərlə xarakterizə olunur. İncəsənət qalereyaları Sakit okean ada mədəniyyəti ilə böyük ölçüdə maraqlanan turistlər üçün açıqdır.

Niue mədəniyyəti ənənəvi və dini mərasimləri ilə də dünya miqyasında məşhurdur. Hər həftə Niue xristian icması, ayin və inanclarına ehtiram etmək üçün kilsələrə toplaşır. Bazar gününüzə kilsədə səhər dualarına qatılaraq xoş bir şəkildə başlaya bilərsiniz. Yerli əhali dualarını niuecə edir. İngilis dilində danışan turistlər mərasim və rituallara qoşula bilər, çünki demək olar ki, bütün yerli insanlar ingilis dilində danışa və dua edə bilərlər. Bir çox Niue otelləri ziyarətçiləri qarşıdan gələn dini tədbirlər haqqında məlumatlandırır.

Bundan əlavə, kənd icmaları illik və həftəlik festivallar təşkil edirlər. Takai Commission Holiday vaxtı yerli Niue xalqı mahnı oxuyaraq, rəqs edərək və ləzzətli yeməklər hazırlayaraq özlərini əyləndirir. Donuz, toyuq və müxtəlif tərəvəz yeməkləri Takai festivalının tipik yeməkləridir. Üstəlik, “Marine Day” Niue adasının ənənəvi yemək mədəniyyəti ilə əlaqəli olduğu üçün xüsusilə diqqətəlayiqdir. Festival şouları zamanı yerli insanlar gün ərzində tutduqları balıqları bişirmək üçün bir yerə toplaşırlar. Yerli xalq “Marine Day” festivallarına çoxlu tutulmuş balıq ilə gəlir. Onlar ənənəvi olaraq öz dolanışıqlarını balıq tutmaqla təmin edirlər. Buna görə yerli əhali ov və balıqçılığın vacibliyini bilir. Turistlər festivallara qatıla və yerli icmalarla birlikdə yemək bişirə bilərlər. Niue xalqı əcnəbilərə qarşı olduqca səmimi və qonaqpərvərdir. Bəzən, Niue otelləri də turistləri əyləndirmək üçün mini festivallar təşkil edir.

Valehedici okean macəraları

Balina izləmək, Niuenin ən məşhur turistik fəaliyyətlərindən biridir. Balinaya baxmaqdan zövq almaq üçün Niueyə nə qədər insanın gəldiyini blmək sizi təəccübləndirəcək. İlin sakit və quru mövsümündə, Sakit okeanda üzən balinaları görə bilərsiniz. Sakit okean suyu olduqca təmizdir və rəngli faunanın həyat tərzini daha yaxından görməyə imkan verir. Ayrıca, dalış edə və okeanın gözəl balinaları ilə birlikdə üzə bilərsiniz. Niuedəki bir çox oteldə sakit bir şəkildə durub rahatlıqla balinaları izləyə biləcəyiniz xüsusi izləmə sahələri var. Balinalarla üzməzdən əvvəl bəzi təlimlərə və təlimatlara ehtiyacınızın olduğunu qeyd etmək lazımdır. Yerli turizm agentlikləri sizi Sakit okeanın vəhşi florası və faunası ilə üzməyə hazırlayacaq kurslar təklif edir. Okean bitkilərinə zərər verməmək və balinaların təbii yaşam şərtlərini pozmamaq çox vacibdir. Delfinlər də bu okean faunasına daxildir. Balinalar və delfinlər təhlükəsizdir və üzgüçülər üçün heç bir təhlükə yaratmır. Ən əsası, sosial media izləyiciləriniz balinalar və delfinlər ilə üzdüyünüz şəkillərinizi və videolarınızı çox sevəcəklər.

Cənubi Sakit okeanın suyu büllur kimi təmizdir və bu onu su idmanları üçün mükəmməl edir. Bir çox insan ən yaxşı dalğıclıq təcrübəsini yaşamaq üçün Niueni ziyarət edir. Digər turistlər və təlimçilərlə birlikdə dalğıclıq turlarına qatıla bilərsiniz. Skuba-dayvinq sizə Sakit okeanın endemik flora və faunasını və heyranedici mərcan riflərini araşdırmağa imkan verir. Rəngli sualtı dünyasına görə su idmanı həvəskarları Niue dəniz həyatına dalmağı və kəşf etməyi çox sevirlər. Mağaralar, mərcan divarları, əldəyməmiş torpaqlar və bənzərsiz bitkilər okean suyunun təmizliyi sayəsində mükəmməl bir şəkildə görünəcəklər. Snorkellinq Niuedə tətil edərkən zövq alacağınız başqa bir su idman növüdür. Snorkellinq və scuba-dayvinqdən əvvəl sualtı geyim və ayaqqabılar almağı unutmayın. Niuenin Sakit okean sahillərində yüzlərlə qədim mağara var. Avropalı alimlər Niue mağaralarının minlərlə il əvvələ dayanan maraqlı tarixini vurğulayırlar. Bir qrup yerli və ya xarici turistlə birlikdə mağara turlarında iştirak edə bilərsiniz. Niue mağaralarını kəşf edərkən yerli xalqın tarixi və ənənələri haqqında çox şey öyrənəcəksiniz. Niue camaatı tarixən mağaralardan kanoeləri və ov alətlərini saxlamaq üçün istifadə ediblər.

Ləzzətli Niue mətbəxi

Niue inanılmaz dərəcədə ləzzətli yeməklərin evidir. Burada Uga adlı kokos xərçəngini dadmaq şansınız var. Kokos xərçəngi həm restoranlarda, həm də yemək festivallarında təqdim edilir. Səhər yeməyində tərkibində süd də daxil olmaqla xüsusi yerli inqredientlər olan Niue sıyığını sınamalısınız. Bundan başqa, povi masima ətdən hazırlanmış başqa bir dadlı yan yeməkdir. Banan çipsləri uzun gəzintilərdən zövq alarkən sınaya biləcəyiniz yüngül çərəzdir. Qeyri-adi yerli yeməkləri dadmaq üçün çox sayda insan Niueyə səyahət edir. Turistlər üçün ən qeyri-adi yemək, çiy balıq və kokos kremi ilə hazırlanmış ota ika olacaqdır. Ayrıca əsas yeməklə yanaşı, kokos çörəyini dadmaqla yemək vaxtınızı daha da maraqlı edə bilərsiniz. Niuedakı souslarının bənzərsiz dadı sizi çox təəccübləndirəcək. Kokos Niue mətbəxində geniş istifadə olunur.

Niueyə necə səyahət etmək olar?

Niue çox da tanınmayan turistik yer olduğundan, bir çox insan Niue adasına necə səyahət edəcəyini bilmək istəyir. Bunun üçün beynəlxalq uçuşlar ən yaxşı seçimdir. Yeni Zelandiyanın böyük bir hava yolu şirkəti olan Air New Zealand həftədə iki dəfə Niueyə uçuşlar təşkil edir. Niueyə uçuşlar paytaxtın yaxınlığında yerləşən hava limanında (ölkədəki yeganə hava limanı) bitir. Mövsümi tənəffüs xəstəliklərinin yayılmasının qarşısını almaq üçün, hökumət rəsmi olaraq Niueyə uçuşları təxirə sala bilər. Bir çox əcnəbi ya biletlərin ya viza haqlarının baha olmasından ya da Niue adasına necə getməyi bilmədiklərindən Niueyə səyahət etmirlər. Ancaq Sakit okean sahillərində gözəl bir yay tətili keçirmək üçün çoxlu vaxt və pul sərf etməyə dəyər. Niueni ziyarət etdikdən sonra, gözəl Cənubi Sakit okean adalarına bir daha səyahət etmək istəyəcəksiniz.