Real Madrid azarkeşləri üçün Madriddə görülməsi gərəkən yerlər

İspaniyanın paytaxtı Madrid, sənət, dəb, memarlıq, mədəniyyət və idman zənginliyi ilə Avropanın ən xüsusi şəhərlərindən biridir. London və Parisdən sonra Avropa Birliyinin üçüncü ən böyük şəhəri olan Madrid, İspaniyanın siyasi mərkəzi və eyni zamanda, ispan aristokratiyasının mərkəzidir. Pireney yarımadasının şimal-şərqində yerləşən Madrid, daxilindən axan məşhur Manzanares çayının mənzərəsi ilə çox gözəl bir şəhər siluetinə malikdir. Madrid, şopinqin daima canlı olduğu küçələri, bütün izzəti ilə tarixin izlərini əks etdirən bulvarları, xoş atmosferli kafeləri, ləzzətli tapasları və Flamenko ruhunun futbol coşğusu ilə, heç şübhəsiz ki, Avropanın ən maraqlı şəhərlərindən biridir. Bəs Real Madrid klubu Madrid şəhəri və futbol dünyası üçün nə ifadə edir?

Real Madrid FK

Real Madrid FK İspaniya La Liga-sında mübarizə aparan iki ən böyük komandadan biridir. Real Madrid həm İspaniyada, həm də Avropada qazandığı uğurlarla dünyanın ən yaxşı komandalarından biri sayılır. 1902-ci ildə Madrid Futbol Klubu adı altında Madriddə qurulan futbol klubu, dünyanın ən şöhrətli komandaları siyahısındadır. Öz oyunlarını 81044 nəfər tutuma sahib Santyaqo Bernabeu stadionunda keçirən Real Madrid, tarixi boyunca çox önəmli qələbələrə imza atmışdır.

Real Madrid qazandığı kuboklardan başqa marka dəyəri ilə dünyanın ən dəyərli komandası hesab olunur. Forbes jurnalının araşdırmasına görə, İspaniyanın Madrid şəhərini təmsil edən Real Madrid FK-nin marka dəyəri 3,4 milyard dollardır. Bundan əlavə, illik xalis gəliri təxminən 550 milyon avro olan klub Avropanın və dünyanın ən bahalı klubu hesab olunur.

Real Madrid, Avropa kubokları və çempionatları baxımından Avropanın ən uğurlu komandası hesab olunur. Komandanın ümumilikdə, 13 Çempionlar Liqası Kuboku, 33 İspaniya Milli Liqası(La Liga) Kuboku, 19 İspaniya Kuboku, 4 FIFA Klublararası Dünya Kuboku, 2 UEFA Kuboku və s. nailiyyətləri var. 

Dünyada nə qədər Real Madrid azarkeşi var?

Dünyada 240 milyondan çox Real Madrid azarkeşi var. Klubun tarixi, qazandığı uğurlar və nəhəng azarkeş bazası Real Madridi futbol tarixinin ən böyük komandalarından birinə çevirir.

Real Madrid azarkeşləri üçün Madriddə görülməsi gərəkən yerlər hansılardır?

İndi sizinlə Real Madrid azarkeşlərinin İspaniyaya səyahəti zamanı Madriddə mütləq şəkildə ziyarət etməsi gərəkən yerləri bölüşəcəm. Bu yerlər təkcə Real Madrid azarkeşləri üçün deyil, həm də bütün futbol azarkeşləri üçün cəlbedici və dəyərlidir.

1. Santyaqo Bernabeu stadionu

Santyaqo Bernabeu Stadionu, 1947-ci ildə tikintisinin tamamlandığı gündən bəri Real Madridin ev stadionudur. Hazırda yer tutumu 81044 nəfərdir. Dörd dəfə UEFA Çempionlar liqasının final oyunlarına və 1982-ci ildə FIFA Dünya Kuboku finalına ev sahibliyi etmiş Santyaqo Bernabeu dünyanın ən məşhur və ən şan-şöhrətli futbol məkanlarından biridir.

Stadion Real Madrid azarkeşlərinin “məbədi”dir və buranı A-dan Z-yə qədər kəşf etmək üçün stadiona tur bileti ala bilərsiniz.

2. Real Madrid FK Muzeyi

Santyaqo Bernabeu stadion turuna klubun muzeyini ziyarət etmək daxildir. Real Madrid tərəfdarısınızsa, bu təcrübə sizin üçün əfsanəvi olacaq! Real Madridin qazandığı ən böyük, ən məşhur, ən qiymətli futbol kuboklarının hamısını burada görə bilərsiniz.

3. Ciudad Real Madrid

Ciudad Real Madrid, Real Madrid azarkeşləri üçün Madriddə ziyarət edilməsi gərəkən ən yaxşı yerdir. Ciudad Real Madrid, Real Madridin, paytaxtın Valdebebas bölgəsində yerləşən məşq kompleksidir. Burada həmçinin, klubun "La Fabrica" kimi tanınan gənclər akademiyası da fəaliyyət göstərir. Siz burada, hər gün məşq edən Real Madridli oyunçular və gələcəyin elit futbolçuları ilə tanış ola bilərsiniz. Hətta, Ciudad Real Madrid-də sevdiyiniz oyunçu ilə şəkil çəkdirə və ya ondan imza ala bilərsiniz. 

4. Sanchis Bar Marisquera

1983-2001-ci illərdə Real Madrid FK-da oynamış Manolo Sanches bu barın sahibdir. Real Madrid azarkeşləri komandanın hər matçında burada toplanırlar. Bu məkan Real Madridin “real” azarkeşləri üçün ev deməkdir. Həqiqi futbol atmosferini görmək və yaşamaq isəyirsinizsə, siz mütləq bu barı ziyarət etməlisiniz.

5. Cibeles Fountain

Cibeles Fountain, Madridin ən məşhur yerlərindən biridir. Madrid pərəstişkarlarının Cibelesə toplaşan şəkilləri yəqin ki, sizə tanışdır, çünki komandanın hansı kuboka nail olmağından asılı olmayaraq gediləcək ilk yer hər zaman Cibelesdir. Real Madrid bir titul qazanarsa, çempionluğa vəsiqə qazanarsa və ya sadəcə azarkeşlərinə qeyd etmələri üçün hər hansı bir səbəb verərsə, Real Madridin azarkeşləri Cibeles Fountain-də olacaqlar. Komanda, futbolçular və bütün Real Madrid azarkeşləri həmişə bütün uğurlarını bu yerdə birlikdə qeyd edirlər.