Sarayevoda 12 İnstaqramlıq yer

Balkanlarda çoxlu instaqramlıq mədəni və tarixi yerlərin, eləcə də ecazkar turistik yerlərin olması heç kimə sirr deyil. Bu baxımdan Bosniya və Herseqovina da istisna deyil. Balkanlara səyahət planlayırsınızsa, yüzlərlə instaqramlıq yer tapacağınız Bosniya və Herseqovinaya da səyahət etməlisiniz. Ölkə Cənub-Şərqi Avropada yerləşir. Şimalda, qərbdə və cənubda Xorvatiya, cənub-şərqdə Monteneqro və şərqdə Serbiya ilə həmsərhəddir. Xəritəyə baxdığımız zaman Xorvatiyanın ölkəni əhatə etdiyini və okeana çıxışının qarşısını aldığını düşünə bilərik. Lakin əslində bu belə deyil, Bosniya və Herseqovinanın Neum şəhərindən Adriatik dənizinə çıxışı var.

Bosniya və Herseqovinanın paytaxtı və ən böyük şəhəri 300.000 əhali sayına sahib Sarayevodur. Dinarik Alpları ilə əhatə olunan şəhər ölkənin mərkəzində, Miljacka çayının sahilində yerləşir. Ölkədə çəkilmiş ən çox bəyənilən İnstaqram şəkilləri Sarayevodandır. Mən də bu bloqda Sarayevodakı görməli yerlər və nə üçün Sarayevoya getməli olduğunuz barədə yazacağam. Sarayevoda 12 instaqramlıq yer:

1. Bascarsija

Sarayevo Şərqin Qərblə birləşdiyi şəhərdir. Nə qədər şablon səslənsə də, Sarayevo haqqında bunu demək vacibdir. Ölkə Avstriya, macar, türk və hətta Slavyan mədəniyyətləri və üslublarından ibarət bir qarışımdır. Şəhərin mərkəzində yerləşən Köhnə Sarayevo tarixi hiss etmək üçün inanılmaz bir yerdir. Bascarsija olaraq da tanınır. Ad 15-ci əsrdə Osmanlıların ikonik bazar yerini qurması ilə ortaya çıxdı. Türkcə Bascarsija hərfi mənada əsas ticarət mərkəzi deməkdir (“baş” əsas, “çarşı” isə bazar). Bu heyrətləndirici tarixi yer I və II dünya müharibəsi bəlalarından qurtulmağı da bacarıb. Bazar yeri 1980-ci illərdə öz təzəliyini bu günə qədər qoruyub saxlamaq üçün bəzi yenidənqurma proseslərindən keçdi. Burada Qazi Hüsrev bəy məscidi, Köhnə Ortodoks kilsəsi, Köhnə Yəhudi məbədi və başqa tarixi binalar var. Bascarsija Sarayevo xalqı üçün yalnız milli monument yox, həm də şəhərin tarixi və mədəni irsidir.

2. Talks & Giggles

Dostlarınızla oturub dincəlmək və şəhərin memarlığından zövq almaq üçün dinc bir yer axtarırsınız? Narahat olmayın, sarayevolular sizi məyus etməz. Talks & Giggles Miljacka çayının sahilindəki Papagajka adlı binada yerləşən çox xoş bir kafedir. Bura bir fincan nəfis qəhvə içmək, limunana (limon suyu, meyvə və nanə qarışığı) kimi soyuq içkilər, ləzzətli çizkeyk və kökələr, eləcə də Slatki Budžak tortlarını dadmaq üçün inanılmaz bir yerdir. Papagajkanın ab-havası və əla servis xidməti sizə yaxşıca istirahət edib instaqramlıq çəkilişlər edə bilməniz üçün şərait yaradacaq. Dietanızı bir günlük unudun və dadlı şirniyyatlardan yeyib yerlilərlə ünsiyyətdən zövq alın.

3. Latın Körpüsü

Tarixi sevirsinizsə, Bosniya və Herseqovinaya səyahət edərkən Latın körpüsünü marşrutunuza salın. Körpünün ölkə tarixindəki əsas əhəmiyyəti I dünya müharibəsindən ilə bağlıdır. Bu körpü Frans Ferdinand və hamilə arvadının xəstəxanaya gedərkən öldürüldüyü körpüdür. Latın körpüsündə baş verən bu sui-qəsd (Sarayevo sui-qəsdi) sonradan müharibənin başlamasına bəhanə oldu və bəzi hadisələr zəncirinə səbəb oldu. Tarix kitablarında körpü haqqında ilk qeyd XV əsrin ortalarında olmuşdur. 1791-ci ildə şiddətli yağış və daşqın nəticəsində yerlə bir olan körpü yeddi il sonra zəngin tacir Abdullah Briqanın ianəsi sayəsində yenidən inşa edilmişdir. İnstaqramda məlumat dolu post paylaşmaq məqsədilə ilə şəkillər çəkmək və tarix biliklərinizi dostlarınıza göstərmək üçün gözəl bir yerdir.

4. Vyeçnisa

Sarayevoda ziyarət etməli yerlərdən biri də Vyeçnisa, yəni Bələdiyyə zalıdır. Vyeçnisa Bosniya və Herseqovinanın Avstriya-Macarıstan imperiyası tərəfindən işğalını xatırladan ən ekstravaqant binadır. Sarayevo Bələdiyyə zalı tikildiyi 1890-cı illərdən bəri şəhərinin əsas simvolu olmuşdur. Şəhərin ən əsas instaqramlıq yerlərindən biridir. Sarayevoya səyahət zamanı Vyeçnisanın həm xarici, həm daxili hissəsinin unudulmaz şəkillərini çəkmə fürsətini qaçırmayın. Bina 1992-1996-cı illərdə Sarayevo mühasirəsi zamanı tamamilə məhv edilmiş və 2014-cü ildə yenidənqurma işlərindən keçmişdir.

5. Gözəl Sənətlər Akademiyası

Sarayevo haradadır? Tarixi binaların və abidələrin Bosniya və Herseqovinanın müharibə tarixini xatırladan yerində. Buna ən yaxşı nümunələrdən biri də Gözəl Sənətlər Akademiyasıdır. Əvvəlcə yevangelist kilsə olaraq inşa edilmiş bina bu gün şəhərin ən sevimli tarixi binalarından biridir. Kilsə 1899-cu ildə Avstriya-Macarıstan işğalı zamanı yevangelistlərin sayı kəskin artdığı vaxtda inşa edilib. Daha sonra işğalın sona çatması ilə onlar ölkəni tərk etdi, kilsə ilkin məqsədini itirdi və Gözəl Sənətlər Akademiyası kimi fəaliyyət göstərməyə başladı.

6. Sebilj Brunnen Fəvvarəsi

Siyahımızdakı digər instaqramlıq yer Sebilj fəvvarəsidir. Bu tarixi abidə növünün sonuncusu olduğundan yerli sakinlər üçün böyük əhəmiyyətə malikdir. Şəhər əvvəllər Sebilj kimi bir çox köşk şəkilli ictimai fəvvarələrə ev sahibliyi edirdi. Bu tip fəvvarələrin tikilməsi ənənəsi Bosniya və Herseqovinaya Osmanlı tərəfindən gətirilmişdi. Fəvvarələr yoldan keçənləri su ilə təmin etmək məqsədi ilə tikilirdilər. Dediyimiz kimi, indi onlardan yalnızca biri qalıb və belə bir əfsanə var ki, Sebiljdən su içsəniz gələcəkdə yenidən Sarayevoya qayıdacaqsınız.

7. Sarı Qala

Sarı qalanın yerləşdiyi Vratnik Sarayevoya qonşu qəsəbədir. Müharibə ilə əlaqəli bu əlamətdar yeri mütləq ziyarət etməlisiniz. Sarı qala (başqa adı ilə Yellow Bastion) Vratnik qəsəbəsini əhatə edən istehkamlardan biridir. Qalanın tikintisində istifadə edilən sarı daşlar adın ortaya çıxmasına səbəb oldu. Bu gün qala mütləq foto qalereyanızda olması lazım olan heyranedici Sarayevo mənzərəsi təqdim edir.

8. Ağ Qala

Sarayevoda kəşf etməniz gərəkən digər tarixi yer Ağ qaladır. Sarı qala ilə yanaşı, Ağ qala da köhnə Vratnik şəhərini qorumaq üçün tikilən beş istehkamdan biridir. Sarı həmkarı kimi Ağ qala da öz adını 14 və 15-ci əsrlərdə tikintisində istifadə edilən ağ daşlardan götürüb. Qaladan Sarayevonun heyrətamiz mənzərəsini lentə alıb İnstaqramda minlərlə bəyəni əldə edə bilərsiniz.

9. Ümid Tuneli

Ölkənin çətinliklərlə dolu tarixindən geriyə qalan bir digər xatirə də Ümid tunelidir. Tarixi sevənlərdənsinizsə, Sarayevoya səyahət zamanı bu tuneli ziyarət şansını əldən verməməlisiniz. Tunel öz adını şəhərin 1992-ci ilin aprelindən 1996-cı ilin fevralına qədər olan mühasirəsi zamanı xaricdən zəruri maddələr əldə etmək üçün yeganə ümidi olduğuna görə götürdü.

10. Müqəddəs İsa Qəlbi Kafedralı

Hal-hazırda Vrhbosna arxiyeparxiyasının kafedralı olaraq fəaliyyət göstərən Müqəddəs İsa Qəlbi kafedralı memarlıq abidələrini sevənləri heyran etməyi bacaracaq. Neo-Gotik üslubda tikilmişdir. Kafedralın tam qarşısında Papa II İohann Pavelin heykəli var. Kafedral Sarayevonun günümüzə qədər gəlib çatmış ləl-cəvahiratlarından biridir.

11. Tərk Edilmiş Bobsley Yolu

Sarayevoda qeyri-adi bir instaqramlıq yer tapacaqsınız: tərk edilmiş bobsley yolu. Bu yol 1984-cü il Qış Olimpiya Oyunlarının xatirəsidir. Təbiət tərəfindən bərpa edilmiş və meşə ilə əhatə olunmuşdur. Yol boyu çoxlu qraffitilər də var və bu da onu İnstaqrama dəyər şəkillər çəkmək üçün ideal edir.

12. Inat Kuca

Inat Kuca (Sarajevo Spite House) hazırda restoran kimi fəaliyyət göstərən köhnə bir binadır. Evin inadkar köhnə sahibi ilə əlaqəli gülməli və maraqlı bir tarixi var. Şəhərin Avstriya-Macarıstan rəsmiləri tərəfindən idarə olunduğu 1892-ci ildə işğalçılar güclərini göstərmək üçün yeni bir bələdiyyə binası tikməyə çalışırdılar. Onlar yol boyunca bəzi evləri dağıtdılar, ancaq bir nəfər öz evinin dağıdılmasına icazə vermədi. Rəsmilər çox mübarizə apardıqdan sonra yalnız 1895-ci ildə onu razı salmağı bacardılar.

Qısa xülasə

Tarixi baxımdan zəngin olan Sarayevo səyahətə layiq olan, amma yetəri qədər qiymətləndirilməmiş paytaxtlardan biridir. Bu yazıda sizə Sarayevo və bu şəhərdə ən çox bəyənilən İnstaqram şəkillərini harada çəkə biləcəyinizlə bağlı məlumat verməyə çalışdım. Bu yerləri bilməniz Bosniya və Herseqovinaya səyahət zamanı köməyinizə çatacaq.