Elə indi Sent-Vinsent və Qrenadinə səyahət etməyiniz üçün 10 səbəb

Dünyanın ləl-cəvahiratlarından biri də Sent-Vinsent və Qrenadindir. Sent-Vinsent və Qrenadin haradadır? Bu ölkə Karib dənizinin "Windward" adalarının bir hissəsi olan 32 ada və rif adasından və Sent-Vinsent adasından ibarətdir. Böyük bir ərazini əhatə edən Sent-Vinsent dağlıq bir əraziyə sahibdir və hündürlüyü 1220 metrə çatan, uzunluğu isə 29 km olan La Soufriere adlı aktiv bir vulkanı var. Qrenadin bir az daha kiçikdir və onu daha az tanınan Bekiya, Mustique, Kanuan və Union adları izləyir. Sent-Vinsent və Qrenadinin paytaxtı, eləcə də Sent-Vinsent və Qrenadin hava limanı Sent-Vinsent adasında yerləşir. Bəs yaxşı, nəyə görə bu gözəl adalara səyahət etməlisiniz? Bu bloqda Sent-Vinsent və Qrenadinə səyahət etməniz üçün on səbəblə tanış olacaq, eyni zamanda bu dövlət haqqındakı müxtəlif suallara cavab tapacaqsınız.

1. Sent-Vinsent və Qrenadinə uçuşlar

Qonşu ölkələrdən və adalardan, sizi Sent-Vinsent və Qrenadin hava limanına gətirəcək bir çox uçuş tapa bilərsiniz. Bu Karib adalarına çatmaq üçün Qrenada, Barbados, Martinika, Sent-Lüsiya, Puerto-Riko və ya Trinidaddan təyyarə ilə yola düşməlisiniz. Səyahət müddəti Barbadosdan 35, Qrenadadan 30, Martinikadan 45, Sent-Lüsiyadan 20 dəqiqə, Puerto Rikodan isə 2 saat 20 dəqiqdədir. Ayrıca, Sent-Vinsent və Qrenadin bayrağı altında üzən gəmi və kruizlər ilə ölkəyə və ya ölkə daxilində səyahət edə bilərsiniz. Paytaxt Kinqstaun digər adalara asanlıqla səyahət edə biləcəyiniz ölkənin əsas nəqliyyat mərkəzidir.

2. Misilsiz adalar

Son zamanlarda ölkənin Mustique, Union və Palm kimi bəzi adaları, xalq arasında olmasa da, zəngin və məşhur insanlar arasında çox populyarlaşdı. Sahillərindəki dərin mavi sular lövbər salmaq, balıq tutmaq, riflərə doğru enmək və ya ağ çimərliklərə qədər üzmək üçün ən yaxşı yerdir, elə bu səbəbdən də son vaxtlarda müstəsna bir cənnətə çevriliblər. Sürəti 10-25 knot arası olan küləklərlə birgə bir saat ərzində adadan adaya gedə, sahildə üzə, ərazidəki nəhəng tısbağaların bir qisminə tamaşa edə və çimərlik barındakı digər turistlərlə pivə içərək gün batımını seyr edə bilərsiniz. Ümumiyyətlə, Sent-Vinsent və Qrenadində yaxşı vaxt keçirə bilərsiniz. Bekiya adası Qrenadinin ən böyük adasıdır, Kanuan daha kiçikdir və arxipelaqın ortasında yerləşir, Mayreau isə ən kiçik adadır. Mayreauda təxminən cəmi 271 nəfər yaşayır. Palm adasında müstəsna bir kurort var, Union adası isə Qrenada ilə Sent-Vinsent arasında yer alır və Petit Sent-Vinsent Yer üzündəki cənnət olan 22 kabindən ibarət təvazökar bir kurorta ev sahibliyi edir.

3. Baleine şəlaləsi

Sent-Vinsent və Qrenadinin mağaraları, möhtəşəm mərcan rifləri və ucsuz-bucaqsız kimsəsiz və gözəl çimərlikləri var, buna görə də sıxlıqdan uzaqlaşmaq və ya çox romantik bir tətil keçirmək istəyirsinizsə, bu adalara səyahət haqqında düşünün. Ölkənin əsas turistik yerlərindən biri, Sent-Vinsentin şimalında yerləşən və bir-birindən gözəl gölməçələrin yaratdığı Baleine şəlaləsidir. Bu şəlalələr təxminən 60 fut hündürlüyündədir və nəhəng bir təbii gölməçəyə tökülürlər. Şəlalələrin olduğu əraziyə yalnız qayıqla getmək mümkündür ki, bu da özlüyündə qısa macəra deməkdir. Və… Conni Deppin məşhur filmi burada çəkilib! Ümid edirəm ki, turunuza delfinləri görmək üçün gəmi gəzintisi də daxil olar, ancaq bu, hava və proqramdam asılıdır. 

4. Mətbəx

Sent-Vinsent və Qrenadinin mətbəxi “Creole”-dir. Yeməklər əsasən tərəvəz, meyvə, quş əti və balıqdan ibarətdir. Hər şey hansı gün olmasından və ovun necə keçməsindən asılıdır. Təcrübə etməyinizi tövsiyə etdiyim yeməklərdən biri qaynadılmış "conch", marine edilmiş soğan və xiyar ilə hazırlanan “conch souse“-dur. Bonito, ton balığı, mahi-mahi və bəzi sazan növləri ənənəvi yeməklərdə ən çox istifadə olunan balıqlardır. Tərəvəzlər arasında isə Çili bibəri qədər Karib kələmləri, şirin kartoflar yerli yeməklərdə böyük rol oynayır. Əsasən guava, kokos, banan və manqodan ibarət olan böyük meyvə səbətləri tortları əvəz edir.

5. Adaların coğrafi yeri

Sent-Vinsent və Qrenadin haradadır? Bu ölkə şərqdən Atlantik okeanı, qərbdən isə Karib dənizi ilə əhatə olunmuş Kiçik Antil arxipelaqının Sent-Vinsent adası və otuz iki kiçik adacıqdan ibarət olan Qrenadin arxipelaqını ehtiva edir. Bu ölkə sanki bölgənin almazıdır və bəlkə də buna görə Sent-Vinsent və Qrenadinin bayrağında üç almaz fiquru görə bilərsiniz.

6. Karib Dənizinin Quldurları

Wallilabou körfəzi isti və büllur kimi təmiz sularda skuba dayvinq və şnorkellinq üçün əla bir yerdir. Bununla birlikdə, bəlkə də Walt Disney istehsalı olan "Karib Dənizinin Quldurları" filminin çəkilişləri üçün istifadə olunmasaydı bu qədər məşhur olmazdı. Filmin çəkiliş məkanları olduğu kimi qorunub saxlanır və sırf bu səbəblə hər il çox sayda turist Conni Deppin həyat verdiyi məşhur pirat Jack Sparrow-un bir zamanlar gəzdiyi məkanları, məsələn: estakada, pivəxana, kənddəki müxtəlif evləri, görmək üçün buraya gəlir. Karib dənizinin dərinliklərindəki çimərliyin qarşısında tipik bir pirat cənnəti ilə qarşılaşacaqsınız, bu da fikrinizin orada çəkilən səhnələrə getməsini qaçınılmaz edəcək.

7. Dil və mədəniyyət

Sent-Vinsent və Qrenadinin rəsmi dili ingilis dilidir. Bu, adadakı uzun müddətli ingilis işğalı ilə əlaqədardır. Ancaq adalarda Kreol ingiliscəsi, hind dili, Kreol dili də danışılır. "Vincentian Creole" dili Sent-Vinsent və Qrenadinin qeyri-rəsmi dilidir və yerli əhali gündəlik həyatda bu dildən istifadə edir. Ölkə eyni zamanda daşa oyulmuş bir növ totem olan və zəngin mədəni və tarixi irsi əks etdirən Layou petroqliflərinə, Kinqstaunun mənşəyini təmsil edən Charlotte qalası və digər qədim tikililərə ev sahibliyi edir.

8. Sent-Vinsent və Qrenadinin paytaxtı

Kinqstaun, Sent-Vinsent və Qrenadinin paytaxtıdır. Bu şəhərdə Charlotte Fort kimi bir çox Britaniya müstəmləkə dönəmi xatirələri görəcəksiniz. Kinqstaun 1722-ci ildə qurulub və təxminən 17000 nəfər əhalisi var. Ölkənin ən böyük şəhəri Sent-Vinsent və Qrenadinə səyahət edəcəyiniz hava limanına da ev sahibliyi edir.

9. Hikinq və ekskursiyalar

Hikinq etməyi sevirsinizsə, Sent-Vinsent və Qrenadinin meşələrini və bağlarını kəşf edə bilərsiniz. Mesopotamiya vadisi və Montreal bağları kimi gözəl yerləri kəşf etməkdən zövq alacaqsınız. Ekskursiyalar "Dark View Falls" şəlaləsi kimi möhtəşəm təbii gözəlliklərə səfər etmək, "Vermont Nature Trail" və "Cumberland Nature Trail" boyunca tura çıxmaq və La Soufriere vulkanının zirvəsini ziyarət etmək üçün əla seçimdir.

10. Qrenadin adalar qrupu

Qrenadinlərdə Sent-Vinsentdəki qədər təlaş və əyləncə yoxdur. Ancaq ərazini təşkil edən və gözəl tropik mənzərələrə ev sahibliyi edən bir çox kiçik adalara ekskursiyalar kimi fərqli fəaliyyətlərdən zövq ala bilərsiniz. Qrenadin adalar qrupundakı kiçik Kanuan adasında turizm zonası xaricində istirahət edə biləcəyiniz və sizə ən yaxşı çimərlik və skuba dayvinq seçimlərini təqdim edən iki böyük kurort var. Bekiya adası Qrenadinin ən böyük adasıdır və Karib dənizindəki ən çox qorunan təbii limana sahib olduğu üçün il boyu yelkənli gəmilərin və kruizlərin gəldiyi yerdir. Limanın bir-birindən gözəl evlərinin arxitekturası önə çıxır və izdihamlı olmasına baxmayaraq səyahətçilər buradan sakit və instaqramlıq olaraq bəhs edir.