Yemək həvəskarlarının ziyarət etməsi gərəkən 5 ölkə

Səyahətçilər ən çox hansı aktivitilərlə məşğul olurlar? Şəkil çəkmək? Hikinq? Muzeyləri ziyarət? Ola bilər, ancaq bununla birlikdə, bütün səyahətçilər üçün bir şey vacibdir - yemək. Yerli yeməkləri dadmaq bəziləri üçün məna kəsb etməsə də, yemək həvəskarları səyahət etdikləri ölkələrdə yerli yeməkləri dadmağa və milli mətbəxin təqdim olunduğu restoranlar tapmağa çalışırlar. Digər səyahətçilər ziyarət ediləcək ən yaxşı ölkələrlə maraqlandıqda, dəniz yeməklərini sevənlər ziyarət etmək üçün ən yaxşı Asiya ölkələrinin axtarışına çıxırlar.

Yemək üçün ən yaxşı ölkələr hansılardır?

Yeməksevərlərin İtaliya, Yaponiya, Hindistan, Fransa və s. kimi səyahət edə biləcəyi bir çox ölkə var. Bu ölkələrin şəhərlərində kifayət qədər kafe və restoran tapa bilərsiniz. Təbii ki, zövqlər mübahisəyə açıq deyil. Dəniz məhsullarını sevənlərdənsinizsə, səyahət üçün ən yaxşı Asiya ölkələrini gözdən keçirə bilərsiniz. Ədviyyatlı bir şey dadmaq istəsəniz, Hindistan, Meksika ya da Gürcüstanı ziyarət edə bilərsiniz.

Buyurun, yeməkləri ilə sizi ovsunlayacaq 5 ölkə ilə tanış olun.

İtaliya

Fikrimcə yeməksevərlərin Avropada gəzməli olduğu yerlərdən ən birincisi İtaliyadır. Hər kəs antipastodan makarona, pizzadan desertə qədər bütün italyan ləzzətlərini tanıyır və sevir. Xüsusilə uşaqlar arasında populyar olan makaron antipasto, qızartmalar, turşular, pendir və ya kolbasa spesiallarından sonra verilən ara yeməkdir. Bu Aralıq dənizi mətbəxində zeytun yağı, təzə otlar və tərəvəzlər, həmçinin balıq və digər dəniz məhsulları istifadə olunur. Səyyah şimala nə qədər çox irəliləsə, ət və süd məhsulları da o qədər çox verilir. Makarondan əlavə sizə risotto, gnocchi və minestron (tərəvəz şorbası) sınamağı məsləhət görürəm. Əsas yeməklərə isə Saltimbocca Alla Romana, Fritto di Porcini, Ossobuco Alla və Pesce Spada Alla Siciliana kimi adlar çəkə bilərəm. Bəs desert? İnanılmaz dərəcədə dadlı italyan şirniyyatları: profitrol, panna cotta, sorbe, zabaione və əlbəttə ki, tiramisu. Təbii ki, yerli dadlar ilə ən yaxşı gedən içki yerli şərablardır. Bu məqsədlə məşhur şərablardan Chianti və Barolonu qeyd edə bilərik.

Hindistan

Yəqin ki, hind mətbəxindən danışarkən ağla gələn ilk şey karridir. Hindistan karrisi bir raquya bənzəyir və bölgədən asılı olaraq süfrəyə düyü və ya çörək ilə verilir. Əslində bu yemək Tamil mətbəxindən gəlir. Əlbəttə ki, Hindistan mətbəxi Şri Lanka və Himalay arasında çox dəyişir və fərqli dini köklər və inanclar vegeterianlığa və ya mal və donuz ətindən imtina etməyə gətirib çıxarır. Bu səbəbdən də toyuq demək olar ki, bütün regionlarda məşhurdur. Ondan tez-tez karrinin hazırlanmasında istifadə olunur və ya təndirdə qızardılır.

Əsasən ağartı məhsulları və mərcimək, noxud kimi paxlalılar protein tədarükçüsü rolunu oynayır. Hindistanın şimalında isə süd məhsulları, qoz-fındıq, quzu və keçi əti ilə hazırlanan ədviyyatlı spesiallar ilə yanaşı, təndir yeməklərinin də dadını çıxara bilərsiniz. Doldurulmuş samosalar da inanılmaz dərəcədə aromatikdir. Ölkənin şərqi isə şirniyyatsevər insanlar üçün cənnətdir. Düyü pudingi Khir və ya Sandeş şirniyyatı xoşunuza gələcəkdir. Tropik Cənubi Hindistanda isə balıq və dəniz məhsullarından, həmçinin təzə tərəvəz və meyvələrdən kifayət qədər çox istifadə edilir. Burada vaxt keçirdiyiniz vaxt ərzində biryani və və sambarı da mütləq şəkildə sınamalısınız. Diqqət edin, cənubi hindistanlılar ədviyyatlı və Çili bibəri, Kerala bibəri və zəncəfil ilə dadlandırılmış yeməyi sevirlər! Qərbi Hindistanda isə paxlalılardan istifadə etməyi sevən, bol ədviyyatlı, zəngin bir mətbəxlə qarşılaşacaqsınız. Ən məşhur yeməklər arasından toyuq tikka masala, düyü, balıq və ya quzu köri ilə tandirdə toyuq, vindaloo, lassi (qatıq əsaslı içki), mərcimək və yerkökülü karri ilə çapati, biryani pakoranı; nan, puri və ya masala dosa kimi çörəkləri və çatni, turşu və paan kimi yan yeməkləri sadalaya bilərik.

Yaponiya

Fransızlar və italyanlar kimi yaponlar da məhsulların keyfiyyətinə və təravətinə ciddi diqqət yetirirlər. Yeməkdəki hər bir inqredientin dadının hiss edilməsi üçün digər Şərqi Asiya ölkələrinə nisbətən çox az yağ və ədviyyatdan istifadə edirlər. Bu səbəbdən Yaponiyanı yeməksevərlərin ziyarəti üçün ən yaxşı Asiya ölkələrindən biri hesab edirəm. Dünyanın heç bir paytaxtında, hətta Parisdə belə, Tokio qədər ulduz restoranlar yoxdur. Eyni zamanda, Yaponiya ən uzunömürlü insanların yaşadığı ölkədir və bu da yaponların son dərəcə sağlam pəhrizlərinə görədir. Hər bir əsas yeməyin əsas tərkib hissəsi düyüdür. Yaponlar düyünün qaynadılmış formasına "han", "ii" və ya "meshi" deyirlər. Onu müşayiət edən yan yemək "okazu" adlanır və adətən balıq və dəniz məhsullarından ibarətdir. Fərqli balıq növlərini ən saf halI ilə sınamaq üçün suşi xüsusilə idealdır. Kobe və Matsusaka mal-qaraları xüsusilə yaxşı ət verir. Daş qril yeməkləri və teriyaki marinada qoyulmuş ət də dadlıdır. Yapon karrisi isə "kare" adlanır və ən az digərləri qədər məşhur yeməklərdəndir.

Fransa

Xüsusilə YUNESKO-nun fransız mətbəxini Ümumdunya irsi siyahısına salmasından bəri, Fransa qastronomiyası baxımından Avropada gediləcək ən yaxşı ölkələrdən biridir. Fransız aşpazların 628 Michelin ulduzu var və hətta ortalama fransız vətəndaşı sərhəd qonşularındakı insanlara nisbətən yeməyə üç qat daha çox pul xərcləyir. Baget və fransız pendirinin əla bir qırmızı şərab ilə harmoniyasından əlavə, fransızların təklif etdiyi daha çox şey var. Geniş çeşidli müxtəlif regional mətbəxlərdə hər kəs istədiyini tapa bilər. Hər bir fransız bölgəsində hər cür büdcəyə uyğun yüksək keyfiyyətli və mükəmməl hazırlanmış ət və mükəmməl şərab sizi gözləyir. Cənubi Aralıq dənizi mətbəxində pomidor, bibər və badımcan kimi tərəvəzlər istifadə olunur və zeytun yağı, sarımsaq və aromatik otlar sevilir. Balıq həvəskarları isə pullarını Marsel buyabesinə və ya şimaldakı sahil bölgələrindəki dəniz məhsulları və balıq yeməklərinə xərcləməkdən peşman olmazlar. Truffle və foie gras isə sizi Perigordda gözləyir. Doyumlu yeməklərin pərəstişkarları isə kələm turşusu, kolbasa, donuz əti spesiallarını təklif edən Elzas ilə, paxla, bekon və ətdən hazırlanan ləzzətli öz suyunda bişirilmiş cassouletin olduğu cənub Fransanın kənd yerləri arasında seçim edə bilərlər.

Mərakeş

Sonda bu siyahıya şərq ekzotizmini gətirirəm. Mərakeş Moorish memarlığı, təzadlı landşaftı, canlı bazarları və şərq ləzzətləri ilə yemək aşiqlərinə əfsanəvi tətil vəd edir. Badam, zeytun, paxlalılar, xurma və tərəvəzlərlə, ətirli ədviyyatlar və otlarla (darçın, cirə, kokos tozu, zəfəran, təzə nanə və keşniş, habelə ras el-hanout və baharat kimi qarışıqlar) dolu rəngli stendlər hər kəsi ovsunlayır. Şimali Afrikalılar bunları balıq və dəniz məhsulları və ya quzu ilə qarışdırmağı və ədviyyatlı harissa sousu ilə dadlandırmağı sevirlər. Kuskus (buğda, darı və ya arpa mannısı) xüsusilə populyardır və müxtəlif yeməklərin əsasını təşkil edir. Öz adını daşıyan gil qabda hazırlanan tajin də son dərəcə tanınmış bir yeməkdir. Tajin yeməkləri çox aromatik və şirəlidir. Adətən bütün ailə qabın ətrafına toplaşır və üç barmaq və çörək ilə yemək yeyirlər. Tajin yeməkləri əsasən toyuq və quzu əti əsaslı hazırlanır, lakin balıq da populyardır. Bizim favoritlərimiz toyuq, limon və zeytun tajinləri, quzu tajinləri və karamelizə edilmiş heyvadır. Şimali Afrika desertləri isə balda isladıldıqlarına görə xüsusilə şirindirlər. Təzə nanə ilə ərəb çayı ləzzətli yeməyi orijinal şəkildə tamamlayır.