Ziyarət etmək üçün ən yaxşı fransızdilli ölkələr

Fransız dilində danışan ölkələrin sayı nə qədərdir? Bu bloq ziyarət ediləcək ən yaxşı fransızdilli ölkələr haqqında olacaq, o ölkələr ki, fransız dili biliklərinizi inkişaf etdirməkdə də sizə kömək edəcək. Bildiyiniz kimi, dil öyrənməyin ən yaxşı yolu danışmaqdır. Siz doğru yerdəsiniz! Səyahət üçün maraqlı yerləri kəşf edin və fransız dilinizi inkişaf etdirin.

Müstəmləkəçilik və kölə ticarəti sayəsində fransızca ən çox danışılan altıncı dildir. Dil 29 ölkədə rəsmi dildir, bu səbəblə də səyahət etməli Frankofoniya (fransızca danışan insanlar və ya millətlər) yerləri üçün kifayət qədər seçiminiz var.

Multikultural şəhərlərin ölkəsi - Kanada

Kanada ilə başlayaq. Kanada əhalisinin təxminən 7 milyonu fransızca danışır. Onların əksəriyyəti Kvebek əyalətində yaşayır. Montreal (Kvebekin ən böyük şəhəri) fransızdilli şəhərlər arasında ikinci ən böyükdür və Şimali Amerikanın tarixi yerlərindən biridir. Eyni zamanda, ölkədəki Anqlosaksların üstünlüyünə baxmayaraq, gülümsəyən insanların şəhəri olaraq da bilinən Montreal fransız mədəniyyətini inadla yaşada bilən fransız şəhəridir. Montreal öz təbiəti, dünya miqyasında məşhur botanika bağı, Viktoriya memarlığı və yemək mədəniyyəti ilə diqqətləri cəlb etməyi bacardı, Şimali Amerika marşrutlarına əlavə edilməsi lazım olan ən xüsusi dayanacaqlardan biri oldu.

Hindistan dənizinin xəyal adaları - Seyşel adaları

Seyşellər Hind okeanında 40 qranit və 75-dən çox mərcan adası da daxil olmaqla 115-ə yaxın adadan ibarətdir. Seyşellər multietnik bir ölkədir: ingilis, fransız və Seyşel kreolu ən çox danışılan dillərdir. Unutmayın ki, adalardan bir neçəsi sadəcə bir neçə nəfəri alacaq qədər böyükdür. Buna görə də rezervasiya edərkən diqqətli olmalısınız. Seyşellər əfsanəvi coğrafiya, günəş, tropik həyat və vəhşi təbiətlə qarışmaq, bir az tənbəllik etmək və ya su idmanları ilə məşğul olmaq istəyənlər üçün unudulmaz imkanlar təqdim edir. Ən əsası isə bol-bol bəyəni alacaq İnstaqram fotolarınız olacaq. Praslin adasındakı Anse Georgette və Anse Lazio çimərliklərini ziyarət etməyi unutmayın. Qonaqlama üçün ən çox seçilən yerlərdən biri, otel bölgəsi olaraq da bilinən Beau Vallon-dur. Bura dərin mavi dənizin sonsuz genişliyi və rəngarəng bir qürub üçün idealdır. Adalarla tanış olmaq üçün gündəlik ada turlarına qatılmaq və maşın icarəyə götürmək mümkündür.

Min təpənin ölkəsi - Ruanda

Ruanda Afrikadakı müstəmləkəçilikdən öz payını alan və indi fransızca danışan ölkələrdən biridir. Belçika rəhbərliyi səbəbi ilə fransız dili ölkədə geniş yayılmışdır. Bu gün Ruanda zəngin mədəniyyəti, köklü tarixi keçmişi, təbii gözəllikləri və vəhşi canlı növləri ilə turistləri cəlb edir.

Minlərlə insanın ölümünə səbəb olan Ruanda soyqırımı, ölkənin yaxın tarixindəki ən böyük qırğınlardan və ən ağrılı hadisələrdən biri hesab olunur. 1994-cü ildə baş tutmuş bu soyqırım haqqında daha çox məlumat əldə etmək istəyənlər, ölkənin paytaxtındakı Kiqali Soyqırım Monumentini ziyarət edə bilərlər. Nyungwe Meşəsi Milli Parkı ölkənin cənub-qərb hissəsində yerləşən turistik bölgələrdən biridir. Təbiət yürüşləri, şimpanze və quş seyr etmə kimi fəaliyyətlərdə iştirak edə bilərsiniz. Təxminən min kvadrat kilometr ərazini əhatə edən bu park, öz təbiəti və yüzlərlə fərqli heyvan növü ilə füsunkar yağış meşələrinə ev sahibliyi edir. Bundan əlavə, bölgədəki vəhşi təbiəti araşdırmaq məqsədi ilə safari turlarına qatılmaq üçün Akagera Milli Parkına, Ruandanın mədəni və tarixi keçmişini əks etdirən çoxsaylı sənət əsərlərini görmək üçün Etnoqrafiya Muzeyinə baş çəkmək lazımdır.

Laqunların dünyası - Yeni Kaledoniya

Yeni Kaledoniya fransız dilinə yeni başlayanların öz biliklərini tətbiq edə biləcəyi başqa bir ekzotik yer ola bilər. Yeni Kaledoniya romantik atmosferi və mavi çimərlikləri ilə bal ayına çıxmaq istəyən cütlüklər üçün ideal bir istirahət yeridir. Sakit okeanın cənub-şərqində təxminən 300 min insanın yaşadığı və Fransaya tabe olan adalar qrupu - Yeni Kaledoniya öz möhtəşəm təbiəti, tropik çimərlikləri və firuzəyi dənizi ilə sizi valeh edəcəkdir. Təbiət gəzintiləri, üzgüçülük, sörfinq və dayvinq dünyaca məşhur otel zəncirlərinin lüks qonaqlama mərkəzlərinə sahib olduğu Yeni Kaledoniyada ən populyar fəaliyyətlərdir. Upi Bay, Ouvea çimərliyi, La Baie des Tortues və La Poule kimi bölgələr Yeni Kaledoniyada turistləri ən çox cəlb edən təbii gözəlliklərdəndir. Siz dalışı sevirsiniz? Onda bu yer tam sizin üçündür. Sualtı sənədli filmlərin çoxunun Yeni Kaledoniyada çəkildiyini unutmayın.

Afrikaya qaçış - Seneqal

Afrikada nə qədər fransızdilli ölkə olduğunu düşünürsünüz? Seneqal Afrikadakı fransızdilli ölkələrdən biridir. Fransız dilinin rəsmi dil olmasına və geniş yayılmasına baxmayaraq, yerli dil (Volof) da danışılır. Atlantik okeanda yerləşən Seneqal 14 bölgədən ibarətdir. Bu ölkədə tropik iqlim hakimdir. Seneqala uçmaq üçün ən yaxşı vaxt noyabr-fevral aylarıdır. Seneqalda gəziləcək yerlər göllərdən abidələrə, parklardan muzeylərə qədər dəyişir. Ölkənin ən qədim və ən böyük sənət muzeyi olan IFAN Afrika İncəsənəti Muzeyi Dakar şəhərində yerləşir. Muzey ölkənin zəngin mədəniyyətini üzə çıxaran heykəlləri, ənənəvi geyimləri, maskaları və müxtəlif musiqi alətlərini əks etdirir. Seneqalın ən populyar turizm yerlərindən biri olan və 1978-ci ildən bəri YUNESKO-nun Ümumdünya irsi siyahısında yer alan Qore adasını görmədən ölkəni tərk etmək günah olar. Tarixi qalıqlarına və nəfis təbii gözəlliyinə görə diqqət çəkən ada keçmiş illərdə kölə ticarətinin mərkəzi olan yerlərdən biri idi. Seneqalda təbii gözəllikləri və fərqli heyvan növlərini görmək istəyənləri özünə cəlb edən təbii bir sahə olan Saloum Delta Milli Parkı 760 min kvadrat kilometr sahəni əhatə edir. Daha çox Çəhrayı göl kimi tanınan Retba gölü hər il dünyanın dörd bir yanından gəlmiş çox sayda turistə ev sahibliyi edir. Göl çox duzludur və bu, çəhrayı rəng almasında vacib bir amildir. Yerli sakinlər bu göldən duz kütlələri çıxararaq turistlərə satırlar. Ölkənin köklü tarixini, təbiətini və unudulmaz mənzərələr təklif edən vəhşi təbiət ərazilərini görmək istəyirsinizsə, Afrika mədəniyyətinin füsunkar əsərlərinə baxmaq və fransız dili biliyinizi inkişaf etdirmək üçün Seneqala bilet alın və bu ecazkar coğrafiyanı kəşfə başlayın. Ölkənizdən çıxarkən sarı qızdırma peyvəndi etdirdiyinizdən və vizanızın olduğundan əmin olun.

Şokoladın ləzzəti - Belçika

Belçika əhalisinin təxminən yarısı fransızca danışır. “Art-Nouveau” üslublu arxitekturası, zəngin mədəni irsi, nazik qumla örtülü çimərlikləri və xoş hislər bəxş edən kulinariya mədəniyyəti ilə Belçika turistlərin qədim Avropa qitəsində ən sevdiyi yerlərdən biridir. Ölkədəki tarixi yerləri və gözəl qəsəbə və şəhərləri ziyarət edə bilərsiniz. Romantik sevgililərin sevimli şəhəri Brügge – bu şəhərin füsunkar memarlığını kəşf etmək üçün velosiped turlarına qatıla, kanalların ətrafında uzun gəzintilər edə və ya sadəcə küçələrdə gəzə bilərsiniz. Bu cazibədar və təsir edici şəhərə gedəndə dünyaca məşhur şokaladların dadına baxmağı unutmayın. Orta əsrlərdə Avropanın ən zəngin şəhərlərindən biri olan Gent, hazırda Belçikanın ən məşhur turizm bölgələrindən biridir. Şelda çayı ilə Lys çayının qovşağında yerləşən bu cəlbedici şəhərdə Gent Festivalı, Gent Caz Festivalı və Gent Beynəlxalq Film Festivalı kimi bir çox əyləncəli tədbirlər keçirilir. Bunlardan əlavə, Brüsseldəki Market meydanını, St Michael və St Gudula Kafedralını və Atomiumu ziyarət edin.

Afrikanın ən böyük adası - Madaqaskar

Tropik iqlimi, manqo ağacları, dalğıclıq həvəskarlarını cəlb edən möhtəşəm dalış yerləri və misilsiz çimərlikləri ilə göz qamaşdıran Afrika ölkəsi Madaqaskarda fransızca danışın. Madaqaskar Afrikadakı fransızdilli ölkələrdən biridir. Bu ada ölkəsi kəşf edilməmiş təbiəti və maraqlı növləri ilə yanaşı firuzəyi suları ilə də diqqət çəkir. Lemurlar, nəhəng tısbağalar və buqələmunlar arasında unudulmaz bir tətil üçün yolunuzu Madaqaskardan salmalısınız. Möhtəşəm mənzərəsi ilə turistləri cəlb edən Baobablar prospekti 800 illik Baobab ağacları ilə əhatə olunmuş bir yerdir. Morondava və Tsiribihina arasındakı bu yolda xoş gəzinti etmək fürsətini qaçırmayın. Nosy Be adası ölkənin şimal-qərbində yerləşir və mavi rəngin müxtəlif çalarlarına bürünmüş çimərlikləri, ləzzətli yeməklərin dadına baxa biləcəyiniz restoranları ilə göz oxşayır. Şanslı olsanız, balinaların keçid yolundakı Nosy Be adasında bu nəhəng dəniz canlılarını görmək imkanı tapacaqsınız. Balinaların üzdüyü sular bir az qorxuducu olsa da, ölkənin şərq hissəsindəki təbii liman - Tamatave (Toamasina) ilə tanış olmalısınız.

Üstəlik, Tamatave sizi ağ qumla örtülmüş çimərlikləri ilə təəccübləndirəcəkdir. Madaqaskarı sadəcə bir film kimi xatırlamaq istəmirsinizsə, ən qısa müddətdə bu möhtəşəm coğrafiyanı ziyarət etməli və onun ecazkar gözəlliyini görməlisiniz. İndi Madaqaskara təyyarə bileti almaq və macəraya başlamaq vaxtıdır.