Avropanın ən yaxşı paytaxtı: Paris, Berlin yoxsa Oslo?

Hər zaman Avropa şəhərləri səyahət etmək və xüsusilə də yaşamaq üçün digər şəhərlərlə müqayisə də ən yaxşı seçim hesab olunur. Yəqin ki, "Avropada gəzmək üçün ən yaxşı şəhərlər hansılardır?" sualının cavabını bilirsiniz. Bəs Avropada yaşamaq üçün ən yaxşı şəhərlər hansılardır?

Paris

Parisdən başlayaq. Şübhəsiz ki, Avropanın ən yaxşı şəhərlərindən biri olan Paris Fransanın paytaxtı və İl-de-Frans bölgəsinin inzibati mərkəzidir. Şəhər Paris hövzəsinin mərkəzində, Sena çayı sahilində salınıb.

Parisin beynəlxalq şöhrət qazanmasının səbəbi neoklasik memarlıq üslubu və bu effektlə formalaşan moda və sənətdir. Orijinal Monmartr və ya əfsanəvi Yelisey çölləri, minlərlə turistin olduğu sıx bir şəhər olan Parisə səyahət edərkən yaxşı bir başlanğıc turu üçün idealdır. Fantastik dəbli atmosfer axtaranlar üçün Mare, Latın məhəlləsi və ya qədim Sen-Marten kanalı doğru yer olardı. İncəsənət qalereyaları və muzeylər isə sənətsevərlər üçün ideal ünvanlardır.

Moda və lüks şəhəri kimi tanınan Parisin simvolu Eyfel qülləsidir. Ancaq Luvr muzeyi, Notr-Dam kilsəsi, Panteon, Orse muzeyi, Sakre-Kör bazilikası, Pompidou mərkəzi və Milli Əlillər Evi də Parisə səyahətiniz zamanı görməli olduğunuz ən vacib yerlərdən biridir.

Digər Avropa şəhərləri ilə müqayisədə Paris yetərincə təhlükəsiz şəhərdir. Dünyanın ən böyük otellərinə sahib olan şəhərdə hər büdcəyə uyğun qonaqlama yerləri tapmaq mümkündür.

Nəticə olaraq, Parisin yalnız ən yaxşı Avropa şəhərlərindən biri yox, həm də yaşamaq üçün ən yaxşı şəhərlərdən biri olduğunu söyləmək olar.

Parisdəki restoran və kafelərdə fransız mətbəxinin bütün nümunələrini tapmaq mümkündür. Parisdə səhər yeməyi deyincə ağla gələn ilk şey əsasən qəhvə ilə birlikdə yeyilən kruassandır. Soğan şorbası, ilbiz və midyə ilə hazırlanan yeməklər ən diqqət çəkən yeməklərdəndir.

Havanın bahar və payız aylarında sərin, yayda isti və nəmli olduğu Parisdə hava əsasən soyuqdur. Avqust və iyul ayları ən isti, dekabr və fevral ayları isə ən soyuq aylardır. Hava şəraiti və müxtəlif tədbirlərə görə Parisə səyahət etmək üçün ən çox yay aylarına üstünlük verilir, amma qeyd etmək lazımdır ki, fransızlar illik tətillərinə avqust ayında çıxdıqları üçün bu dövrdə bir çox mağaza, restoran və özəl muzey bağlı ola bilər.

Fransada təhsilə nəzər yetirsək, əksər fransız universitetlərinin dünyanın ən yaxşı 500 universiteti arasında olduğunu və əksəriyyətinin paytaxt Parisdə yerləşdiyini görərik.

Sonda isə Parisdəki həyat keyfiyyətinə yaxından nəzər salaq və buranın yaşamaq üçün ən yaxşı şəhərlərdən biri olub-olmadığına qərar verək:

Həyat keyfiyyəti indeksi - 118.20 (Yüksək):

1. Alıcılıq qabiliyyəti pariteti indeksi - 68.62 (Orta)

2. Təhlükəsizlik indeksi - 46.81 (Orta)

3. Səhiyyə xidməti indeksi - 79.49 (Yüksək)

4. İqlim indeksi - 88.39 (Çox yüksək)

5. Yaşam maliyyəti İndeksi - 95.49 (Yüksək)

6. Gəlirin əmlak qiymətinə nisbəti - 20.96 (Çox yüksək)

7. İşə gedib-gəlmə indeksi - 40.76 (Orta)

8. Çirklənmə İndeksi - 64.54 (Yüksək)

Berlin

Tarixi quruluşu və küçələri ilə kəşf edilməyi gözləyən, Avropanın bohem ruhlu şəhəri Berlin Almaniyanın paytaxtı və ən böyük şəhəridir. Berlin həm Almaniyanın, həm də Avropanın aparıcı mədəni və siyasi paytaxtlarından biridir. Bu gün şəhər multikultural və tolerant quruluşu, canlı gecə həyatı, çoxsaylı muzeyləri və sənət qalereyaları ilə hər il minlərlə turistin ziyarət etdiyi yerlərdən biridir. Berlin həm də çox mütəşəkkildir: alman şəhər planlaşdırmasının əla bir nümunəsi. Paytaxt olsa da, əhali sayında əhəmiyyətli dərəcədə artım olmayıb və şəhərdə nəqliyyat olduqca rahatdır.

Berlin dünyanın ən yaşıl və təmiz şəhərlərindən biridir. Şəhərdə gəzərkən özünüzü meşədə gəzirmiş kimi hiss edə bilərsiniz. Məhz bu xüsusiyyəti onu ziyarət edilməsi gərəkən ən yaxşı Avropa şəhərlərindən birinə çevirir!

Vaxtilə Berlində baş vermiş müharibələr səbəbi ilə şəhərdəki orta əsrlərə aid bir çox əsər yerlə yeksan olmuşdur. Ümumiyyətlə, şəhərdəki tarixi binaların ciddi şəkildə ziyan gördüyünü söyləmək olar. Ancaq müharibədən sonra bərpa edilə biləcək vəziyyətdə olan binalar ən yaxşı şəkildə bərpa edilmişdir. Şəhərdəki ən məşhur yer Brandenburq qapısıdır. Alexanderplatz, Holokost monumenti və Berlin kafedralı da Berlinə səyahət edərkən mütləq ziyarət edilməsi gərəkənlərdəndir.

Texno musiqinin mərkəzinə çevrilən şəhər, sözün əsl mənasında çılğın bir gecə həyatına sahibdir. Alman mətbəxi çox zəngin bir mətbəx olmasa da, Berlin multikultural şəhər olduğundan burada dünyanın hər yerinə aid mətbəxləri təklif edən restoranlar tapmaq mümkündür. Fransız, italyan və yapon mətbəxlərindən əlavə, çox saylı türk immiqrantlara görə Berlində türk mətbəxi də kifayət qədər məşhurdur. Berlində yemək yemək digər Avropa şəhərlərinə nisbətən olduqca ucuzdur.

Şimali Avropada yerləşən Berlində hava hər an soyuya bilər. Okean iqliminin təsirlərinin də göründüyü şəhərdə əsasən kontinental iqlim üstünlük təşkil edir. Berlinə qış aylarında getməyi planlaşdırırsınızsa, sıfır dərəcədən aşağı hava şəraitini nəzərə almalısınız. Soyuq və sərt qışı olan Berlində yay ayları da sərin və arabir yağışlı keçir. Berlində isti və günəşli günlər az olduğundan almanlar bu günlərdə günəş vannası almaq üçün parklara axışırlar. Yaz və payız əsasən sərin, lakin gəzinti üçün uyğundur.

Şübhəsiz ki, Almaniya hər daim təhsil sistemini inkişaf etdirməyə çalışan ölkələrdəndir. Buradakı təhsil səviyyəsi hər zaman dünyanın ən yaxşılarından hesab olunur.

Çox yüksək həyat keyfiyyətinə əsasən, Berlin Avropada yaşamaq üçün ən yaxşı şəhərlərdən biridir deyə bilərik.

Həyat keyfiyyəti indeksi - 159.72 (Çox yüksək):

1. Alıcılıq qabiliyyəti pariteti indeksi - 87.47 (Orta)

2. Təhlükəsizlik indeksi - 58.66 (Orta)

3. Səhiyyə xidməti indeksi - 69.85 (Yüksək)

4. İqlim indeksi - 83.35 (Çox yüksək)

5. Yaşam maliyyəti İndeksi - 73.26 (Orta)

6. Gəlirin əmlak qiymətinə nisbəti - 9,90 (orta)

7. İşə gedib-gəlmə indeksi - 33.66 (Aşağı)

8. Çirklənmə İndeksi - 39.41 (Aşağı)

Oslo

Məqaləmizə Avropanın və xüsusilə Skandinaviyanın ən yaxşı şəhərlərindən biri olan Oslo ilə davam edirik. Norveçin paytaxtı Oslo, çox yüksək həyat standartına və bol oksigenə sahib ölkənin ən böyük şəhəridir.

Oslo liman şəhəridir və məhz bu liman ərazisi Norveçə səyahət edərkən mütləq görməniz gərəkən Oslo Opera Evi və Akershus regionu da daxil olmaqla bir çox muzeyə, alış-veriş məkanlarına, kafe və restoranlara ev sahibliyi edir. Yaşıl sahələri, heykəl parkı, müasir binaları ilə məşhur şəhərdə tarixi saraylar və muzeylər də var.

Şəhərdə bir çox ictimai nəqliyyat alternativi olduğundan nəqliyyat baxımından problem yaşamayacaqsınız. Müxtəlif tədbirlər və festivallarla birlikdə canlanan turistik dövrdə Osloda həyat daha da xoş olur.

Qolfstrim cərəyanının təsirinin hiss olunduğu Osloda qış soyuq və əsasən qarlı keçir. İyuldan oktyabr aylarına qədər olan zaman intervalı, ən çox yağıntının düşdüyü dövrdür. Osloya səyahət etmək üçün ən ideal aylar orta temperaturun 20 ° C olduğu iyun, iyul və avqust aylarıdır.

Oslodakı bir çox restoran yerli ləzzətlərlə yanaşı, dünya mətbəxinin dadlı nümunələrini də təqdim edir. Balıq ətinin isə dəniz məhsullarının böyük əhəmiyyət daşıdığı yerli mətbəxdə fərqli bir yeri var. Norveç üsulu somon Osloya səyahət edərkən sınamalı olduğunuz məşhur ləzzətlərdən biridir.

Canlı gecə həyatına sahib olan şəhərdə bir çox gecə klubu, bar, diskoteka və başqa əyləncə mərkəzləri var. Xüsusilə turistik dövrdə səhərə qədər açıq olan bir çox məkan tapa bilərsiniz. Karl Johans gate bir çox gözəl restoran və tarixi məkanlarla yanaşı, məşhur əyləncə məkanlarına da ev sahibliyi edir

Ən yüksək həyat keyfiyyəti indekslərindən birinə sahib olan Oslo Avropada yaşamaq üçün ən yaxşı şəhərlərdən biridir.

Həyat keyfiyyəti indeksi - 162.12 (Çox yüksək):

1. Alıcılıq qabiliyyəti pariteti indeksi - 81.57 (Orta)

2. Təhlükəsizlik indeksi - 65.26 (Yüksək)

3. Səhiyyə xidməti indeksi - 75.71 (Yüksək)

4. İqlim İndeksi - 59.99 (Orta)

5. Yaşam maliyyəti İndeksi - 106.91 (Yüksək)

6. Gəlirin əmlak qiymətinə nisbəti - 10.67 (orta)

7. Trafik Gəliş Vaxt İndeksi - 31.92 (Aşağı)

8. İşə gedib-gəlmə indeksi - 24.15 (Aşağı)

Bəhs etdiyimiz 3 şəhər hər cəhətdən Avropanın ən yaxşı şəhərləri arasındadır və əminəm ki, onların hər hansı birini seçsəniz məyus olmayacaqsınız.