Avstraliya ziyarətçi vizası üçün necə müraciət etmək olar?

Məşhur Hollivud aktyoru David Venham deyir: “Avstraliya görünməmiş dərəcədə gözəl bir ölkədir və hər geri döndüyümdə məni heyrətləndirməkdən əl çəkmir.” 2019-cu ildə ölkəni təxminən 10 milyon insan ziyarət etdi. Bu rəqəm 2020-ci ildə arta bilərdi, ancaq COVID-19 pandemiyası səbəbindən mümkün olmadı. Bir çox insan həyatında ən azı bir dəfə Avstraliyanı ziyarət etmək istəyir. Bunu nəzərə alaraq, Avstraliya ziyarətçi vizası barədə danışmağa qərar verdik. Bu bloqda bu suallara cavab alacaqsınız: Avstraliya ziyarətçi vizası üçün rüsum nə qədərdir? Avstraliya ziyarətçi vizasını onlayn ala bilərəmmi? Avstraliya ziyarətçi vizasına baxılma müddəti nə qədərdir? Avstraliya ziyarətçi vizası üçün tələblər nədir?

Avstraliya viza siyasəti

Şəxs vizasız ölkələrdən deyilsə, Avstraliyaya səyahət üçün viza almalıdır. Ziyarətin məqsədindən və qalma müddətindən asılı olaraq müxtəlif viza növləri üçün müraciət edə bilərsiniz. Bəzi ölkələrdən fərqli olaraq, Avstraliyadan keçərkən belə vizanız olmalıdır (tranzit viza). Ümumiyyətlə, Avstraliya vizalarını aşağıdakı kateqoriyalara bölə bilərik:

• Ziyarətçi vizaları

• Təhsil və təlim vizaları

• Ailə və partnyor vizaları

• İş və bacarıq(lı) vizaları

• Avstraliya tibbi müalicə vizası

Üstəlik, ziyarətin məqsədindən asılı olaraq, qeyd etdiyimiz vizaların müxtəlif alt kateqoriyaları da mövcuddur. Ancaq bu gün ziyarətçi vizaları haqqında danışacağıq.

Avstraliya üçün ziyarətçi vizası

Ziyarətçi vizası (Subclass 600 olaraq da bilinir) Avstraliyaya məhdud bir müddət üçün səyahət etmə imkan verən müvəqqəti vizadır. Hökumət vizanın etibarlılıq müddətini və giriş sayını müraciətçinin statusuna uyğun olaraq təyin edir. Bəzi insanlar təkgirişli, bəziləri isə çoxgirişli viza əldə edə bilər. Çoxgirişli vizanın etibarlı olduğu müddət ərzində ölkəni istədiyiniz qədər tərk edə və yenidən daxil ola bilərsiniz. Bəs ziyarətçi vizasının etibarlılıq müddəti nə qədərdir? Əsasən üç ay. Ancaq bəzi hallarda 12 ay da ola bilər. Nümunə olaraq valideynlər üçün ziyarətçi vizasını misal göstərə bilərik. Bu vizanın etibarlılıq müddəti 12 ay və ya daha çox ola bilər.

Müraciət edənlər səyahət zamanı Avstraliyada yerləşən şirkət və ya təşkilat üçün işləyə və ya xidmət göstərə bilməzlər. Ancaq, biznes viza sahibləri aşağıdakıları edə bilər:

• Biznes və ya işlə bağlı təhqiqatlar aparmaq

• İşgüzar müqavilələr imzalamaq, bağlamaq və ya yeniləmək

• Rəsmi səfər çərçivəsində layihələri idarə etmək

• Ticarət sərgisində, seminarda, konfransda iştirak etmək

Avstraliya üçün ziyarətçi vizası necə alınır?

Viza almaq üçün bəzi addımlara və tələblərə əməl etməlisiniz. Onlayn və oflayn müraciət etmək şansınız var. Müraciətçi şəxslər müraciət prosesi zamanı aşağıdakı addımları izləyəcəklər:

• Birinci növbədə üstünlük verdiyiniz müraciət növünü seçin (onlayn və ya oflayn)

• Lazım olan bütün sənədləri toplayın

• Müraciət haqqını ödəyin

• Proses müddətini gözləyin

• Vizanızı səfirlikdən və ya onlayn olaraq əldə edin

Tələb olunan sənədlər (oflayn müraciət)

Viza müraciətinin ən vacib mərhələlərindən biri sənədlərin toplanmasıdır. Yanlış və ya əksik sənədlər vizadan rədd cavabına səbəb ola bilər. Odur ki, lazımi sənədlərdən ibarət yoxlama siyahısı yaratmağı unutmayın. Sizdən aşağıdakı sənədləri təqdim etməniz istənir:

• Avstraliya qonaq vizası üçün müraciət forması. Bütün müraciətçilər formanı ingilis dilində tam şəkildə doldurmalı, imza atmalı və tarix yazmalıdırlar (valideynlər övladları üçün imza atmalıdırlar).

• Pasport. Avstraliyanı tərk etdiyiniz tarixdən etibarən 6 ay boyunca etibarlı olan, son on il ərzində verilmiş, ən azı üç boş səhifəyə sahib pasportlar tələb olunur.

• Şəkil. Bilməniz gərəkən bəzi foto tələbləri: JPG / PNG formatında, 10 KB-1 MB həcmli, bərabər hündürlük və enə sahib, açıq rəngli və ya ağ fonda çəkilmiş, kölgəsiz, şəxsin üzünü aydın şəkildə təsvir edən 45mm x 35mm ölçülü şəkil.

• Şəxsiyyət vəsiqəsinin surəti

• Yaşayış icazəsi/vizasının surəti - yaşadığı ölkə və vətəndaşlığı fərqli olan şəxslər üçün.

• Pasportun əsas səhifəsinin və əvvəlki vizaların surətləri

• Maddi imkanların sübutu. Avstraliyaya səyahət zamanı bütün xərcləri ödəyə biləcək qədər vəsaitiniz olmalıdır. Üstılik bunu sübut etməlisiniz. Bu məqsədlə şəxsi bank çıxarışı (ən azı son üç ay üçün), kredit kartı, nağd pul, iş yerindən arayış və s. təqdim edə bilərsiniz.

• Dəvət məktubu. Avstraliyada yaşayan qohumunuz və ya dostunuz sizə dəvət məktubu göndərə bilər. Bu məktubda sizinlə olan münasibətləri, ziyarətinizin məqsədi və onlarda qaldığınız təqdirdə qalma müddətiniz göstərilməlidir. Həmin şəxs sizin bütün xərclərinizi üstlənirsə, bu haqda da sübut təqdim etməlisiniz.

• Səyahət marşrutu. Qonaqlama yerinin və uçuş biletlərinin bronunu göstərməlisiniz.

• Səyahət planı

• Vətənə qayıtmaq üçün səbəbləriniz olduğuna dair dəlillər. Bir çox insanın Avstraliya ziyarətçi vizasından sui-istifadə edə biləcəyi sirr deyil. Bu səbəblə sizin onlardan biri olmadığınızı göstərmək üçün iş yerindən, məktəb, kollec və ya universitetdən arayış kimi bəzi sənədlər təqdim etməlisiniz.

• Xarakter sənədləri. Mümkünsə, hərbi xidmət qeydiyyatını və ya tərxis sənədlərini göstərməlisiniz.

• Müraciət edən valideynlər üçün əlavə sənədlər

• Uşaqlar üçün əlavə sənədlər

Avstraliya ziyarətçi vizası üçün tələb olunan sənədlər (onlayn/elektron)

Oflayn versiyada olduğu kimi, bu da müvəqqəti vizadır. Uğurlu nəticə əldə etmiş müraciətçilər çoxgirişli viza əldə edəcəklər. Vizanın etibarlı olduğu müddət ərzində ölkəni istədiyiniz qədər tərk edə və yenidən daxil ola bilərsiniz. Hər girişdən sonra ölkə ərazisində maksimum üç ay qala bilərsiniz. Bu viza növü Subclass 651 də adlanır. Tələb olunan sənədlər:

• Müraciət forması

• Pasport və onun əsas səhifəsinin surəti

• Sağlamlıq sığortası

• Maddi imkanların sübutu

• Səfərin səbəbini göstərən sənədlər

Avstraliya ziyarətçi vizası rüsumu

Tələb olunan sənədləri təqdim etdikdən sonra viza rüsumunu ödəməlisiniz. Avstraliya ziyarətçi vizası üçün ödəməniz gərəkən məbləğ 145 Avstraliya dollarıdır (təxminən 113 ABŞ dolları). “Frequent Traveller Stream” üçün tələb edilən ödəniş isə 1.065 Avstraliya dollarıdır (təxminən 827 ABŞ dolları). Sənədlərinizi təqdim etdiyiniz ölkədən və yerdən asılı olaraq, kuryer xidməti haqqı və s. kimi əlavə ödənişlər də ödəməli ola bilərsiniz. Elektron Avstraliya ziyarətçi vizası üçün tələb olunan rüsum nə qədərdir? Bu viza tamamilə pulsuzdur!

Avstraliya ziyarətçi vizası proses müddəti

Yəqin ki, viza müraciətinin ən stressli hissəsi vizaya baxılma müddətidir. Bəs Avstraliya ziyarətçi vizasına baxılma müddəti nə qədər çəkir? Təxminən 1-3 ay arasında dəyişir (ölkəyə görə fərqliliklər ola bilər). Uyğun olduğunuz təqdirdə, elektron ziyarətçi vizası üçün müraciət etmək ən yaxşı seçimdir. Bu halda ancaq 3-5 təqvim günü gözləməyiniz lazımdır. Elektron ziyarətçi vizasına təxminən 35 ölkənin vətəndaşları müraciət edə bilər. Bu ölkələrdən bəziləri:

• Danimarka

• Estoniya

• Finlandiya

• Fransa

• Almaniya

• Hollandiya

• San Marino

• Slovakiya Respublikası

• Birləşmiş Krallıq - Britaniya vətəndaşı

• Vatikan

Avstraliya ziyarətçi vizasının uzadılması

Bəhs etmək istədiyim növbəti məqam Avstraliya ziyarətçi vizasının uzadılmasıdır. Əgər Avstraliyada vizanızın etibarlılıq müddətinin icazə verdiyindən daha çox qalmaq istəyirsinizsə, bilməlisiniz ki, qeyd etdiyimiz növ vizanı uzatmaq mümkün deyil. Bu halda ediləcək ən yaxşı şey başqa bir viza növünə müraciət etməkdir. Unutmayın ki, vizanızın etibarlılıq müddəti bitənə qədər müraciət etmiş olmalısınız.

Rədd cavabı alınmasının səbəbləri

Ziyarətçi vizası üçün müraciət zamanı diqqətli olmaq şərtdir. Hər il minlərlə insan Avstraliyaya səyahət edir. Müraciətlərinin sonunda müsbət cavab alan şəxslər kimi, rədd cavabı alan bir çox şəxs də var. Bəs bunun səbəbi nədir? Vizanın verilməməsinin bir çox müxtəlif səbəbləri ola bilər və burada bəzilərindən bəhs edəcəyəm:

• Pasportun etibarlı olmaması. Bildiyiniz kimi, pasport viza müraciəti üçün əsas sənəddir.

• Maddi imkanların yetərli olmaması. Bütün müraciətçilərin öz xərclərini qarşılayacaq kifayət qədər vəsaiti olmalıdır.

• Cinayət arxivi. Cinayət arxivi olan şəxslərin viza alma şansı aşağıdır.

• Yanlış və ya əksik sənədlər. Bütün lazımi sənədləri təqdim etməli və rəsmiləri aldatmağa çalışmamalısınız.